Category: لاہور

مہنگائی سے پریشان شہریوں کے لیے اہم پیش رفت سامنے آئی ہے، جہاں آل پاکستان پبلک ٹرانسپورٹ اونرز فیڈریشن نے ملک بھر میں پبلک ٹرانسپورٹ کرایوں میں نمایاں کمی کا اعلان کر دیا ہے۔ اس فیصلے کے تحت کرایوں میں 25 فیصد کمی کی جائے گی، جس سے روزانہ سفر کرنے والے لاکھوں مسافروں کو براہِ راست ریلیف ملے گا۔

ذرائع کے مطابق آل پاکستان پبلک ٹرانسپورٹ اونرز فیڈریشن اور مختلف بڑی ٹرانسپورٹ کمپنیوں کے نمائندوں نے سیکریٹری ریجنل ٹرانسپورٹ اتھارٹی لاہور محسن رانا سے ملاقات کی، جس میں موجودہ کرایوں، عوامی مشکلات اور ٹرانسپورٹ نظام سے متعلق امور پر تفصیلی گفتگو کی گئی۔ملاقات کے دوران فیڈریشن کی جانب سے باضابطہ طور پر اعلان کیا گیا کہ پبلک ٹرانسپورٹ کے کرایوں میں فوری طور پر 25 فیصد کمی کی جا رہی ہے تاکہ عوام کو سفری اخراجات میں سہولت فراہم کی جا سکے۔اس موقع پر انٹر سٹی بس سروس چلانے والی 6 بڑی ٹرانسپورٹ کمپنیوں کے آپریشن مینیجرز بھی موجود تھے، جنہوں نے سیکریٹری آر ٹی اے کی موجودگی میں اپنے کرایوں میں بھی 25 فیصد کمی کا اعلان کیا۔

اس فیصلے کے بعد روزانہ سفر کرنے والے طلبہ، ملازمین، کاروباری افراد اور دیگر شہریوں کے سفری اخراجات میں واضح کمی آئے گی۔ خاص طور پر بین الاضلاعی سفر کرنے والے افراد کو اس اقدام سے زیادہ فائدہ پہنچنے کی توقع ہے۔ٹرانسپورٹ حکام کے مطابق نئے کرایوں کا اطلاق فوری طور پر یا جلد از جلد مرحلہ وار کیا جائے گا، جبکہ تمام کمپنیوں کو ہدایت کی جائے گی کہ وہ نئے کرایہ نامے نمایاں طور پر آویزاں کریں۔شہریوں نے کرایوں میں کمی کے اعلان کو خوش آئند قرار دیتے ہوئے مطالبہ کیا ہے کہ حکومت اور ٹرانسپورٹ ادارے اس فیصلے پر سختی سے عملدرآمد بھی یقینی بنائیں تاکہ عوام کو حقیقی ریلیف مل سکے۔

مرکزی مسلم لیگ کے زیر اہتمام امریکا،ایران جنگ بندی کروانے میں پاکستان کے کردار پر یوم تشکر منایا گیا، لاہور سمیت متعدد شہروں میں ریلیاں نکالی گئیں، خطبات جمعہ میں علماء کرام نے خطے میں قیام امن کے لئے پاکستان کے کردار کو موضوع بنایا، جنگ بندی مذاکرات کی کامیابی کے لئے خصوصی دعائیں کی گئیں

مرکزی مسلم لیگ کے زیر اہتمام یوم تشکر کے سلسلہ میں لاہور، قصور،ننکانہ،بہاولنگر،ڈیرہ اسماعیل خان ،پاکپتن،موڑ کھنڈا،چیچہ وطنی،لالیاں ،چنیوٹ سمیت دیگر شہروں میں ریلیوں میں ہزاروں افراد شریک ہوئے،ریلیوں کے شرکاء نے ہاتھوں میں قومی پرچم اٹھا رکھے تھے اور پاکستان کے حق میں نعرے لگاتے رہے، شرکاء نے حکومتِ پاکستان اور پاک فوج کی حالیہ سفارتی کامیابیوں کو سراہتے ہوئے زبردست خراجِ تحسین پیش کیا،مرکزی مسلم لیگ کے زیر اہتمام لاہور میں مال روڈ پر یوم تشکر کی ریلی نکالی گئی،ریلی کی قیادت جنرل سیکرٹری لاہور چوہدری حمید الحسن گجر نے کی، ریلی سے خطاب کرتے ہوئے مقررین کا کہنا تھا کہ پاکستان کی شاندار سفارتکاری کے نتیجے میں مشرقِ وسطیٰ میں جاری کشیدگی کے خاتمے کی راہ ہموار ہو رہی ہے،پاکستان کی اس شاندار سفارتی کامیابی نے پوری قوم کے دلوں کو سکون اور فخر سے بھر دیا ہے۔ ہم ریاستِ پاکستان، حکومت اور پاک فوج کو اس عظیم کامیابی پر خراجِ تحسین پیش کرتے ہیں۔ جامع مسجد القادسیہ میں جمعہ کے اجتماع سے خطاب میں مرکزی مسلم لیگ کے نائب صدر حافظ عبدالرؤف کاکہنا تھا کہ اللہ تعالیٰ نے پاکستان کو عزت عطا فرمائی ہے،حالات کو دیکھیں،اس خطے میں سب سے محفوظ ملک آج پاکستان ہے، اللہ نے پاکستان کو دفاع عطا کیا،یہ اللہ کا احسان ہے ،مذاکرات کی کامیابی کے لئے دعا گو ہیں، پاکستان آج دنیا کے فیصلے کر رہا ہے، اسلام آباد کی طرف سب کی نظریں ہیں، پاکستان پر معاشی پابندیاں لگوانے ،تنہا کرنے والوں کے خواب ٹوٹ چکے، مرکزی مسلم لیگ قصور کی جانب سے ریلی میں شہریوں کی بڑی تعداد نے شرکت کی۔ ریلی کی قیادت جنرل سیکرٹری رانا محمد اشفاق نے کی، مرکزی مسلم لیگ پاکپتن کے زیر اہتمام ریلی کا اہتمام کیا گیا جس کی قیادت جنرل سیکرٹری پاکستان مرکزی مسلم لیگ پاکپتن نے کی،مرکزِ شہداء کالج روڈ سے کمرشل کالج چوک بہاولنگر تک اظہارِ تشکر ریلی کا انعقاد کیا گیا، ریلی کی قیادت مرکزی مسلم لیگ بہاولنگ کے صدر چوہدری کاشف جاوید نے کی، مرکزی مسلم لیگ پی پی 135 موڑ کھنڈا کے زیر اہتمام تشکر ریلی کا انعقاد کیا گیا، ریلی میں علاقے بھر سے مختلف مذہبی و سیاسی جماعتوں کے نمائندگان اور عوام الناس نے بڑی تعداد میں شرکت کی، اظہار تشکر ریلیوں سے خطاب کرتے ہوئے رہنماؤں کا کہنا تھا کہ یہ 10 مئی کے بعدپاکستان کی ایک اور بڑی کامیابی ہے ،ایران اور امریکہ کے درمیان کشیدہ حالات کے باعث دنیا ایک بڑی جنگ کی طرف بڑھ رہی تھی، تاہم پاکستان نے اس صورتحال میں اہم اور مثبت کردار ادا کیا، پاکستان کی بروقت سفارتی کوششوں نے خطے میں امن کے قیام میں اہم کردار ادا کیا، جو قابلِ تحسین ہے۔

مرکزی مسلم لیگ کے شعبہ خواتین، مسلم ویمن لیگ نے "اپنا اگاؤ، اپنا بچاؤ” کے عنوان سے ملک گیر مہم کا باقاعدہ آغاز کر دیا ہے، جس کے تحت خواتین کو کچن گارڈننگ کی جانب راغب کیا جا رہا ہے، مہم کے دوران گھروں میں پودے اور سبزیاں اگانے والی خواتین میں انعامات بھی تقسیم کیے جائیں گے۔

مسلم ویمن لیگ کی سیکرٹری جنرل عفت سعید اس مہم کی نگرانی کر رہی ہیں۔ انہوں نے لاہور میں مہم کے افتتاح کے موقع پر کہا کہ خواتین اپنے گھروں، چھتوں، صحنوں اور گملوں میں روزمرہ استعمال کی سبزیاں جیسے دھنیا، پودینہ، ٹماٹر اور مرچ خود اگائیں اور "اپنی ضرورت، اپنے ہاتھ” کے اصول کو فروغ دیں، اس مہم کے اہم مقاصد میں خواتین کو معاشی خود کفالت کی طرف لانا، گھریلو سطح پر مہنگائی کے اثرات کو کم کرنا، ہر گھر میں صحت مند اور خالص غذا کو فروغ دینا، خواتین میں عملی ہنر اور خود اعتمادی پیدا کرنا اور شجرکاری کے ذریعے ماحولیاتی بہتری میں کردار ادا کرنا شامل ہے، مہم کے تحت کچن گارڈننگ ورکشاپس کا انعقاد کیا جائے گا، جبکہ خواتین کو بیج اور پودے بھی فراہم کیے جائیں گے، سوشل میڈیا کے ذریعے رہنمائی کا سلسلہ جاری رکھا جائے گا اور یونین کونسل سطح پر "سبز گھر” مہم بھی چلائی جائے گی،بہترین کارکردگی دکھانے والی خواتین کی حوصلہ افزائی کے لیے انعامات دیے جائیں گے

وزیراعلیٰ پنجاب مریم نواز کی زیرِ صدارت ایک اہم اجلاس میں صوبے میں بڑھتے ہوئے سائبر جرائم، خصوصاً سوشل میڈیا پر بچوں اور خواتین کو ہراساں کرنے اور بلیک میلنگ کے واقعات کے تدارک کیلئے بڑے اقدامات کی منظوری دے دی گئی ہے۔

اجلاس کے دوران فیصلہ کیا گیا کہ پنجاب میں ایک جدید اور خصوصی پنجاب سائبر کرائم یونٹ قائم کیا جائے گا، جو سوشل میڈیا پر ہونے والے جرائم کے خلاف فوری کارروائی کو یقینی بنائے گا۔ اس یونٹ کا بنیادی مقصد متاثرہ افراد، خاص طور پر خواتین اور بچوں، کو محفوظ، آسان اور بروقت سہولت فراہم کرنا ہے۔حکومت کی جانب سے جاری تفصیلات کے مطابق اب متاثرہ افراد کو شکایت درج کروانے کیلئے روایتی طور پر تھانے جانے کی ضرورت نہیں ہوگی۔ اس کے بجائے جدید نظام متعارف کرایا جا رہا ہے جس کے تحت موبائل سائبر کرائم یونٹس خود متاثرہ افراد تک پہنچیں گے۔ مزید برآں، ورچوئل پولیس اسٹیشن اور پی کے ایم (PKM) ایپ کے ذریعے بھی شکایات درج کروانے کی سہولت فراہم کی جائے گی، جس سے فوری رسپانس اور کارروائی ممکن ہو سکے گی۔رپورٹ میں اس بات پر بھی زور دیا گیا کہ متاثرہ افراد کی شناخت کو مکمل طور پر خفیہ رکھا جائے گا تاکہ وہ بغیر کسی خوف یا دباؤ کے اپنی شکایات درج کروا سکیں۔ اس کے ساتھ ساتھ حکومت نے سائبر جرائم میں ملوث افراد کے خلاف سخت سزاؤں کیلئے نئی قانون سازی کرنے کا بھی فیصلہ کیا ہے، تاکہ ایسے جرائم کی موثر روک تھام ممکن بنائی جا سکے۔

اجلاس سے خطاب کرتے ہوئے وزیراعلیٰ مریم نواز نے کہا کہ سائبر کرائم آج کے دور کا ایک سنگین مسئلہ بن چکا ہے، جو خاص طور پر نئی نسل کو متاثر کر رہا ہے۔ انہوں نے اس عزم کا اظہار کیا کہ حکومت پنجاب نوجوانوں، خواتین اور بچوں کو محفوظ ڈیجیٹل ماحول فراہم کرنے کیلئے ہر ممکن اقدامات کرے گی۔