Category: لاہور

: پاکستان نے ایک بار پھر عالمی سفارتکاری میں اہم کردار ادا کرتے ہوئے امریکا اور ایران کے درمیان جنگ بندی میں کلیدی کردار ادا کیا ہے، جسے ماہرین “سوشل میڈیا ڈپلومیسی” کی ایک منفرد مثال قرار دے رہے ہیں۔

امریکی صدر ڈونلڈ ٹرمپ کی جانب سے جنگ بندی کے اعلان سے قبل وزیر اعظم شہبازشریف نے سماجی رابطے کی ویب سائٹ ایکس (X) پر اپیل کی کہ “سفارتکاری کو موقع دیا جائے” اور آبنائے ہرمز کے حوالے سے دی گئی ڈیڈ لائن میں دو ہفتوں کی توسیع کی جائے۔ذرائع کے مطابق وزیراعظم کی اس اپیل کے محض ڈیڑھ گھنٹے بعد امریکی صدر نے حملے مؤخر کرنے اور سفارتی عمل کو آگے بڑھانے پر رضامندی ظاہر کی، جسے پاکستان کی بروقت اور مؤثر سفارتی حکمت عملی قرار دیا جا رہا ہے۔

بعد ازاں وزیر اعظم شہباز شریف نے اپنے بیان میں اعلان کیا کہ “انتہائی عاجزی کے ساتھ یہ بتاتے ہوئے خوشی ہو رہی ہے کہ اسلامی جمہوریہ ایران اور ریاست ہائے متحدہ امریکا نے اپنے اتحادیوں کے ساتھ مل کر فوری جنگ بندی پر اتفاق کر لیا ہے، جو لبنان سمیت ہر جگہ فوری طور پر نافذ العمل ہوگی۔

ذرائع کا کہنا ہے کہ پاکستان نہ صرف جنگ بندی میں ثالث بنا بلکہ اب وہ دونوں ممالک کے درمیان براہ راست مذاکرات کی میزبانی بھی کرے گا۔ جمعہ کے روز اسلام آباد میں ہونے والے ان مذاکرات کو خاص اہمیت حاصل ہے کیونکہ امکان ظاہر کیا جا رہا ہے کہ یہ فروری کے آخر میں شروع ہونے والے تنازع کے بعد امریکی اور ایرانی حکام کی پہلی براہ راست ملاقات ہوگی۔مزید برآں، امریکی نائب صدر جے ڈی وینس بھی ممکنہ طور پر ہنگری کے دورے کے بعد اسلام آباد پہنچ سکتے ہیں، تجزیہ کاروں کے مطابق پاکستان کی یہ سفارتی کامیابی نہ صرف خطے میں امن کے قیام کی جانب اہم قدم ہے بلکہ عالمی سطح پر پاکستان کے مثبت اور مؤثر کردار کو بھی اجاگر کرتی ہے۔

سینئر صحافی و اینکر پرسن مبشر لقمان نے امریکا ایران جنگ بندی کے لئے پاکستان کے کردار کو سراہا ہے

سماجی رابطے کی ویب سائٹ ایکس پر ایک پوسٹ میں مبشر لقمان نے پاکستان کی سفارتی کامیابیوں کو غیر معمولی قرار دیتے ہوئے کہا ہے کہ "الحمدللہ پاکستان نے وہ حاصل کر لیا جو ناقابلِ تصور تھا”۔مبشر لقمان نے امریکا ایران جنگ بندی کے لئے پاکستان کی سفارتی کوششوں پر وزیراعظم شہباز شریف اورفیلڈ مارشل سید عاصم منیر کو کامیابی کا کریڈٹ دیتے ہوئے کہا کہ یہ اعتراف اپنی جگہ درست ہے، تاہم وزارت خارجہ کا بھی اس میں کردار اہم ہے، وزیر خارجہ اور وزارتِ خارجہ کی ٹیم نے غیر معمولی کارکردگی دکھائی اور یہ کامیابی دراصل شاندار ٹیم ورک کا نتیجہ ہے۔ پاکستان فارن سروسز نے اپنی پیشہ ورانہ مہارت اور اعلیٰ سفارتی صلاحیتوں کا بھرپور مظاہرہ کیا ہے۔

مبشر لقمان نے بھارتی وزیر خارجہ جے شنکر پر تنقید کرتے ہوئے طنزیہ انداز اپنایا اور کہا کہ،جے شنکر، حسد سے جلتے رہیں .

تحصیل مری کے خوبصورت پہاڑی علاقے کوٹلی ستیاں میں قائم ٹورازم ڈویلپمنٹ کارپوریشن آف پنجاب (ٹی ڈی سی پی) کے نئے سیاحتی منصوبے چیوڑا بیس ریزارٹ نے ملکی میڈیا کی بھرپور توجہ حاصل کر لی۔

لاہور سے تعلق رکھنے والے مختلف معروف الیکٹرانک میڈیا چینلز کے ٹورازم بیٹ رپورٹرز نے ریزارٹ کا خصوصی دورہ کیا۔ اس موقع پر بیس سے زائد صحافیوں نے ریزارٹ میں موجود جدید سہولیات سے آراستہ گلمپنگ پوڈز اور دلکش ٹری ہاؤسز میں کا دورہ کیا اور قدرتی حسن سے بھرپور ماحول کو خوب سراہا۔ ریزارٹ میں جدید طرز اور منفرد فن تعمیر پر سات گلمپنگ پورڈذ اور چار ٹری ہائوسز تیار کئے گئے ہیں اور ریسٹورنٹ بھی تعمیر کیا گیا ہے تاکہ سیاحوں کو بہترین سہولیات فراہم کی جاسکیں۔ اس کے علاؤہ آرچری، اے ٹی وی رائیڈرز ، سٹار گیزنگ جیسی تفریحی سرگرمیوں کا بھی اہتمام کیا گیا ہے،اس موقع پر صحافیوں کو ریزارٹ میں فراہم کی جانے والی جدید رہائشی سہولیات، ماحولیاتی ہم آہنگی پر مبنی تعمیرات، اور سیاحت کے فروغ کے لیے کیے گئے اقدامات پر تفصیلی بریفنگ دی گئی۔ شرکاء نے ریزارٹ کے منفرد تصور، اعلیٰ معیار اور سیاح دوست سہولیات کو بے حد سراہتے ہوئے اسے پنجاب میں سیاحت کے فروغ کی جانب ایک اہم پیش رفت قرار دیا۔

صحافیوں کا کہنا تھا کہ چیوڑا بیس ریزارٹ نہ صرف ملکی بلکہ غیر ملکی سیاحوں کے لیے بھی ایک پرکشش مقام ثابت ہوگا، جو خطے میں سیاحت اور مقامی معیشت کے فروغ میں اہم کردار ادا کرے گا۔ٹی ڈی سی پی نے پٹریاٹہ ٹاپ پہ بھی چار نئے ٹری ہاؤسسز قائم کئے ہیں جن کا مقصد ماحول دوست سیاحت کا فروغ اور سیاحوں کو منفرد انداز میں قیام کے مواقع فراہم کرنا ہے۔ یہ تمام منصوبے اس خطے میں سیاحت کے فروغ میں اہم سنگ میل ثابت ہونگے،محکمہ سیاحت ایسے منصوبوں کے ذریعے پنجاب کے خوبصورت اور کم دریافت شدہ علاقوں کو سیاحتی نقشے پر لانے اور معیاری سیاحتی سہولیات فراہم کرنے کے لئے کوشاں ہے۔

طبی ماہرین نے خبردار کیا ہے کہ مردوں میں پائی جانے والی ایریکٹائل ڈس فنکشن (ED) یا مردانہ کمزوری محض جنسی مسئلہ نہیں بلکہ یہ دل اور خون کی نالیوں سے جڑی سنگین بیماریوں کی ابتدائی علامت بھی ہو سکتی ہے۔

ڈاکٹروں کے مطابق جب مریض اس مسئلے کے ساتھ کلینک آتے ہیں تو ان کی پہلی تشویش اکثر صحت نہیں بلکہ رشتے سے متعلق ہوتی ہے۔ بیشتر مرد یہ خوف ظاہر کرتے ہیں کہ ان کا شریکِ حیات انہیں چھوڑ سکتا ہے، تاہم ماہرین اس موقع کو ایک بڑے طبی مسئلے کی نشاندہی کے طور پر دیکھتے ہیں۔ماہرین کے مطابق اگر کسی شخص کو پہلے سے ہائی بلڈ پریشر یا بے قابو ذیابیطس ہو تو مردانہ کمزوری کی وجہ سمجھنا نسبتاً آسان ہوتا ہے۔ لیکن اگر نوجوان یا بظاہر صحت مند افراد میں یہ مسئلہ ظاہر ہو تو ڈاکٹر اس کو دل اور خون کی نالیوں کی صحت سے جوڑ کر دیکھتے ہیں۔

طبی تحقیق سے معلوم ہوا ہے کہ جنسی کمزوری دل کی بیماری کی علامات ظاہر ہونے سے ایک سے تین سال پہلے سامنے آ سکتی ہے۔ اس کا مطلب یہ ہے کہ یہ مسئلہ ایک “وارننگ سائن” کے طور پر کام کر سکتا ہے۔دل کی زیادہ تر بیماریاں براہِ راست دل سے شروع نہیں ہوتیں بلکہ جسم کی چھوٹی خون کی نالیوں سے آغاز ہوتا ہے۔ وقت کے ساتھ شریانیں سخت ہو جاتی ہیں،کولیسٹرول جمع ہونے لگتا ہے،خون کا بہاؤ متاثر ہوتا ہے، ہائی بلڈ پریشر، شوگر، تمباکو نوشی، نیند کی کمی اور ذہنی دباؤ ان مسائل کو مزید بڑھاتے ہیں۔ماہرین کے مطابق ایریکشن ایک پیچیدہ عمل ہے جس میں دماغ، اعصاب، خون کی نالیاں اور پٹھے سب مل کر کام کرتے ہیں۔دماغ سے سگنل شروع ہوتا ہے،خون عضوِ تناسل کی طرف جاتا ہے،نالیاں پھیلتی ہیں اور خون اندر رکتا ہے،اگر اس عمل میں کسی بھی مرحلے پر خلل آئے تو ایریکشن متاثر ہو سکتا ہے۔

ڈاکٹرز کا کہنا ہے کہ اگر خون کی نالیاں تنگ یا سخت ہونا شروع ہو جائیں تو اس کا اثر سب سے پہلے جنسی کارکردگی پر پڑ سکتا ہے۔ یہی وجہ ہے کہ مردانہ کمزوری کو بعض اوقات “ویسکولر بیماری” (خون کی نالیوں کی بیماری) کی ابتدائی علامت سمجھا جاتا ہے۔اگر یہ مسئلہ اچانک شروع ہو،مسلسل رہے،یا وقت کے ساتھ بڑھتا جائے،تو اسے سنجیدگی سے لینا ضروری ہے۔

ماہرین کے مطابق اگر کسی شخص کی دل کی حالت مستحکم ہو تو جنسی عمل عام طور پر محفوظ ہوتا ہے۔یہ عمل جسم پر اتنا ہی دباؤ ڈالتا ہے جتنا تیز چہل قدمی یا سیڑھیاں چڑھنے سے پڑتا ہے۔ اگر کوئی شخص یہ سرگرمیاں بغیر سینے کے درد یا سانس پھولنے کے کر سکتا ہے تو جنسی عمل بھی عموماً محفوظ سمجھا جاتا ہے۔اگرچہ مردانہ کمزوری کی ادویات فوری فائدہ دیتی ہیں، لیکن ماہرین خبردار کرتے ہیں کہ یہ صرف علامت کو ٹھیک کرتی ہیں، اصل بیماری کو نہیں۔خاص طور پر دل کے مریضوں کی کچھ ادویات کے ساتھ یہ خطرناک ردعمل دے سکتی ہیں،اس لیے ڈاکٹر کے مشورے کے بغیر استعمال نہیں کرنا چاہیے،ماہرین مردوں کو مشورہ دیتے ہیں کہ اگر انہیں اپنی جنسی صحت میں تبدیلی محسوس ہو تو اسے نظرانداز نہ کریں بلکہ بلڈ پریشر چیک کروائیں،کولیسٹرول اور شوگر ٹیسٹ کروائیں،نیند اور ذہنی دباؤ پر توجہ دیں،تمباکو نوشی ترک کریں

ماہرین کے مطابق مردانہ کمزوری کو صرف ایک نجی یا وقتی مسئلہ سمجھنا خطرناک ہو سکتا ہے۔ یہ جسم کے اندر جاری کسی بڑی بیماری کا ابتدائی اشارہ بھی ہو سکتا ہے۔اس لیے بروقت تشخیص اور علاج نہ صرف بہتر جنسی زندگی بلکہ ایک لمبی اور صحت مند زندگی کی ضمانت بھی بن سکتا ہے۔

شہر کے مختلف علاقوں میں آوارہ کتوں کی بہتات نے شہریوں کا جینا دوبھر کر دیا۔ بار بار شکایات کے باوجود تاحال کوئی شنوائی نہ ہو سکی۔ مغل پورہ کے علاقے گلشن پارک میں آوارہ کتوں کے دو بچوں پر خوفناک حملے۔ اہل علاقہ نے شدید احتجاج کرتے ہوئے وزیراعلیٰ پنجاب مریم نواز سے اپیل کی ہے کہ آوارہ کتوں کی بہت زیادہ بڑھتی ہوئی تعداد پر قابو پانے کے لیے خصوصی اقدامات کیے جائیں اور لوگوں کی زندگیاں محفوظ بنائی جائیں۔

مغل پور ہ کے قریب حبیب پارک اور گلشن پارک کے علاقوں میں اس وقت صورت حال یہ ہے کہ آوارہ کتوں کے غول کے غول گلیوں میں پھرتے اور بھونکتے دکھائی دیتے ہیں۔ پچھلے کچھ عرصے میں کئی بچوں اور بزرگوں پر کتوں نے شدید حملے کیے ہیں ۔ خاص طور پر نماز فجر کے وقت نمازیوں کا مساجد میں جانا محال ہو چکا ہے۔ قرآن پڑھنے کے لیے بچے مسجد جاتے ہوئے ڈرتے ہیں اور والدین بھی خوف زدہ دکھائی دیتے ہیں۔ مغل پورہ کے علاقے حبیب پارک میں جامع مسجد قبا کے قریب چونکہ کچھ کھلی جگہ موجود ہے اس لیے وہاں آوارہ کتوں نے خاص طور پر ڈیرے ڈال رکھے ہیں جس سے مسجد آنے والے نمازیوں اور قرآن پڑھنے والے بچوں کو انتہائی مشکل صورت حال کا سامنا ہے۔ حبیب پارک اور گلشن پارک کے علاقوں میں آئے دن بچوں اور بزرگوں پر آوارہ کتوں کے حملوں اور کاٹنے کےو اقعات بھی پیش آئے ہیں۔ لوگ اپنے بچوں کو سکولوں اور مساجد میں قرآن پڑھنے کے لیے بھیجتے ہوئے ڈرتے ہیں۔ ان علاقوں میں کتوں کی بھرمار ہے جبکہ شکایت کے باوجود شنوائی نہ ہونے پر شہری انتہائی بے بسی سے دوچار ہیں۔ اہل علاقہ کا کہنا ہے کہ حکومت پنجاب اس خطرناک صورت کا فوری نوٹس لے اور گلیوں میں جگہ جگہ پھرنے والے آوارہ کتوں سے لوگوں کی جان چھڑائی جائے۔

واضح رہے کہ لاہور میں آوارہ کتوں کی بہت زیادہ بڑھتی ہوئی تعداد شہریوں کے لیے وبال جان بن گئی ہے اور ہر روز کتوں کے ہاتھوں زخمی ہونے والے کئی لوگ ہسپتالوں میں لائے جاتے ہیں۔ واضح رہے کہ ابھی حال ہی میں لاہور ہائی کورٹ میں ایک رپورٹ جمع کروائی گئی ہے جس میں انکشاف ہوا ہے کہ پچھلے ڈھائی سال میں آوارہ کتوں کے حملوں میں صرف پنجاب میں پانچ لاکھ سے زائد افرادزخمی ہوئے ہیں۔ ایک سال میں صرف لاہور میں بیس ہزار کے قریب آوارہ کتوں کے حملوں کا نشانہ بنے ہیں۔

اگر آپ روزانہ 8 سے 9 گھنٹے کی مکمل نیند لینے کے باوجود بھی صبح اٹھتے ہی تھکاوٹ، سستی اور کمزوری محسوس کرتے ہیں تو یہ محض نیند کی کمی نہیں بلکہ کسی سنگین طبی مسئلے کی علامت بھی ہو سکتی ہے۔ ماہرین صحت نے خبردار کیا ہے کہ مسلسل تھکاوٹ کو نظر انداز کرنا خطرناک ثابت ہو سکتا ہے۔

سر گنگا رام اسپتال کی ماہر ڈاکٹر سونیا راوت کے مطابق بعض اوقات بظاہر مکمل نیند لینے کے باوجود اس کا معیار خراب ہوتا ہے، جس کی وجہ سے جسم کو مکمل آرام نہیں ملتا اور انسان خود کو تھکا ہوا محسوس کرتا ہے۔ماہرین کے مطابق صبح کی مستقل تھکاوٹ درج ذیل 5 بیماریوں یا مسائل کی نشاندہی کر سکتی ہے، نیند کی خرابی،یہ ایک عام مگر خطرناک مسئلہ ہے جس میں نیند کے دوران سانس بار بار رکتی ہے۔ اس سے نیند کا تسلسل متاثر ہوتا ہے اور جسم کو مناسب آکسیجن نہیں مل پاتی، جس کے باعث دن بھر تھکاوٹ رہتی ہے۔ خون کی کمی ،آئرن، وٹامن بی 12 یا فولک ایسڈ کی کمی خون کی کمی کا سبب بنتی ہے، جس سے جسم میں آکسیجن کی فراہمی متاثر ہوتی ہے اور مسلسل کمزوری محسوس ہوتی ہے۔

تھائرائیڈ کا مسئلہ ،تھائرائیڈ ہارمون کی کمی میٹابولزم کو سست کر دیتی ہے، جس کے نتیجے میں سستی، وزن میں اضافہ اور تھکاوٹ جیسی علامات ظاہر ہوتی ہیں۔ ذہنی دباؤ اور ڈپریشن،مسلسل ذہنی تناؤ، بے چینی اور ڈپریشن نہ صرف نیند کے معیار کو متاثر کرتے ہیں بلکہ صبح اٹھنے پر بھی تھکن اور بوجھل پن کا احساس برقرار رکھتے ہیں۔وٹامن ڈی کی کمی بھی توانائی کی سطح کو کم کر دیتی ہے، جس سے پٹھوں میں درد، کمزوری اور تھکاوٹ عام ہو جاتی ہے۔ماہرین کا کہنا ہے کہ ناقص طرزِ زندگی بھی اس مسئلے کو بڑھا دیتا ہے۔ دیر سے سونا، کیفین کا زیادہ استعمال، ورزش کی کمی اور اسکرین کا زیادہ استعمال جسم کے قدرتی نظام کو متاثر کرتا ہے۔

ڈاکٹروں کے مطابق اگر آپ کو مسلسل تھکاوٹ کا سامنا ہے تو متوازن غذا کا استعمال کریں،روزانہ ورزش کو معمول بنائیں،سونے کا وقت مقرر کریں،کیفین اور موبائل کے استعمال کو کم کریں،اگر اس کے باوجود مسئلہ برقرار رہے تو فوری طور پر ڈاکٹر سے رجوع کریں، کیونکہ یہ کسی بڑی بیماری کی ابتدائی علامت بھی ہو سکتی ہے۔ماہرین کا مشورہ ہے کہ اپنی صحت کو سنجیدگی سے لیں، کیونکہ بروقت تشخیص ہی بہتر علاج کی ضمانت ہے۔

گرمیوں کے موسم میں جہاں شدید گرمی اور پسینہ انسان کو نڈھال کر دیتا ہے، وہیں قدرت نے ایسے پھل بھی عطا کیے ہیں جو نہ صرف جسم کو ٹھنڈک دیتے ہیں بلکہ صحت کے لیے بے حد مفید بھی ہوتے ہیں۔ انہی میں سے ایک اہم پھل خربوزہ ہے، جسے ماہرین صحت گرمیوں کا “سپر فروٹ” قرار دیتے ہیں۔

ماہرین کے مطابق اگر خربوزہ روزانہ غذا کا حصہ بنایا جائے تو یہ جسم پر حیران کن مثبت اثرات مرتب کرتا ہے۔ خربوزہ پانی سے بھرپور پھل ہے جس میں تقریباً 90 سے 95 فیصد تک پانی موجود ہوتا ہے، یہی وجہ ہے کہ یہ جسم کو ڈی ہائیڈریشن سے بچانے میں اہم کردار ادا کرتا ہے۔خربوزہ گرمی کی شدت کو کم کرنے میں مدد دیتا ہے۔ اس کا باقاعدہ استعمال جسم کو ٹھنڈا رکھتا ہے اور پیاس کی شدت کم کرتا ہے، جس سے ہیٹ اسٹروک جیسے خطرات بھی کم ہو سکتے ہیں۔

نظامِ ہضم بہتر بناتا ہے،اس پھل میں موجود فائبر نظامِ ہضم کو بہتر بناتا ہے۔ خربوزہ کھانے سے قبض کی شکایت دور ہوتی ہے اور معدہ صاف رہتا ہے، جس سے مجموعی صحت بہتر ہوتی ہے۔

مدافعتی نظام مضبوط کرتا ہے،خربوزے میں وٹامن سی اور اینٹی آکسیڈنٹس وافر مقدار میں پائے جاتے ہیں، جو جسم کے مدافعتی نظام کو مضبوط بناتے ہیں اور انفیکشن سے بچاؤ میں مدد دیتے ہیں۔

آنکھوں اور جلد کے لیے مفید،وٹامن اے سے بھرپور ہونے کے باعث خربوزہ بینائی کو بہتر بنانے میں مدد دیتا ہے، جبکہ جلد کو تروتازہ اور چمکدار بناتا ہے۔ گرمیوں میں دھوپ سے متاثرہ جلد کے لیے یہ ایک قدرتی علاج بھی سمجھا جاتا ہے۔

وزن کنٹرول میں مددگار،کم کیلوریز اور زیادہ فائبر کے باعث خربوزہ وزن کم کرنے یا کنٹرول رکھنے والوں کے لیے بہترین انتخاب ہے۔ یہ پیٹ کو دیر تک بھرا رکھتا ہے، جس سے غیر ضروری کھانے کی خواہش کم ہو جاتی ہے۔

ماہرین کا کہنا ہے کہ ذیابیطس کے مریض خربوزہ استعمال کرنے سے پہلے ڈاکٹر سے مشورہ ضرور کریں، کیونکہ اس میں قدرتی شکر موجود ہوتی ہے۔روایتی طریقہ علاج جیسے آیوروید میں بھی خربوزے کو جسم کی گرمی کم کرنے اور اندرونی نظام کو متوازن رکھنے کے لیے نہایت مفید قرار دیا گیا ہے۔اگر آپ گرمیوں میں صحت مند اور توانا رہنا چاہتے ہیں تو خربوزے کو اپنی روزمرہ غذا کا حصہ بنائیں۔ یہ نہ صرف جسم کو ٹھنڈک دیتا ہے بلکہ مجموعی صحت کو بھی بہتر بناتا ہے


پاکستان سپر لیگ کی فرنچائز لاہور قلندرز نے ٹیومر میں مبتلا ایک بچے کی خواہش پوری کرنے کا اعلان کر دیا ہے، جس نے کپتان شاہین شاہ آفریدی سے ملاقات کی خواہش ظاہر کی تھی۔
تفصیلات کے مطابق فرزان نامی بچہ گزشتہ چار سال سے ٹیومر کے خلاف جنگ لڑ رہا ہے اور وہ لاہور قلندرز کا بہت بڑا مداح ہے۔ بچے نے اپنے پیغام میں بتایا کہ اس کا تعلق گوجرانوالہ کے علاقے قلعہ دیدار سنگھ سے ہے اور وہ اپنے پسندیدہ کھلاڑی شاہین آفریدی سے ملنا چاہتا ہے۔
‎لاہور قلندرز کی انتظامیہ نے بچے کا پیغام موصول ہونے کی تصدیق کرتے ہوئے کہا کہ اس بہادر بچے کو میچ میں مدعو کیا جائے گا تاکہ وہ اپنے پسندیدہ کپتان سے ملاقات کر سکے۔
‎انتظامیہ نے مزید کہا کہ بچے کو خوش کرنے کے لیے ٹیم کی جانب سے دستخط شدہ شرٹ بھی تحفے میں دی جائے گی تاکہ اس کے چہرے پر مسکراہٹ لائی جا سکے۔
‎لاہور قلندرز کے اس اقدام کو سوشل میڈیا پر بھی سراہا جا رہا ہے جہاں صارفین نے ٹیم کے اس انسان دوست قدم کو قابل تعریف قرار دیا ہے۔
‎یہ پیش رفت اس بات کی عکاسی کرتی ہے کہ کھیل صرف میدان تک محدود نہیں بلکہ انسانیت اور امید کا پیغام بھی دیتا ہے، خاص طور پر ایسے بچوں کے لیے جو زندگی کی مشکل جنگ لڑ رہے ہوں۔