Category: لاہور

لاہور ہائیکورٹ نے سموگ تدارک کیس میں خبردار کیا ہے کہ اگر تحفظات دور نہ کیے گئے تو ناصر باغ پراجیکٹ روک دیا جائے گا۔

لاہور ہائیکورٹ کے جسٹس شاہد کریم نے سموگ تدارک کے لیے دائر درخواستوں پر سماعت کی، ممبر جوڈیشل کمیشن ، اظہر صدیق ایڈووکیٹ اور میاں عرفان اکرم سمیت دیگر پیش ہوئے،جسٹس شاہد کریم نے ریمارکس دیئے کہ اورنج لائن بن چکی ہے، روڈا بننے جا رہا ہے، پتہ نہیں کیا ہوگا، میرے فیصلے موجود ہیں، ڈویلپمنٹ ہوسکتی ہے مگر گرین ڈویلپمنٹ بھی کوئی چیز ہے، ناصر باغ سمیت کئی تاریخی مقامات لاہور کی پہچان ہیں، ڈی جی ایل ڈی اے ناصر باغ پراجیکٹ کےبارے میں ماہر تعمیرات کو مطمئن کریں،ماہر تعمیرات رضا علی دادا نے عدالت کو بتایا کہ یہ پراجیکٹ ناصر باغ کی جگہ پر مناسب نہیں، اس پر عدالت نے ڈی جی ایل ڈی کو ان سے پراجیکٹ کے بارے میں ملاقات کی ہدایت کی، عدالت کے استفسار پر بتایا گیا کہ لاہور میں چھوٹے بڑے 804 پارک ہیں۔

جسٹس شاہد کریم نے پی ایچ اے کو تمام پارکوں میں تجاوزات ختم کرنے کے احکامات جاری کر دیئے اور ریمارکس دیئے کہ درخت اور ہریالی کو ختم کرنا کسی صورت درست نہیں،دوران سماعت جسٹس شاہد کریم نے تمام شوگر ملز میں واٹر ٹریٹمنٹ پلانٹس نصب کرنے کا حکم بھی دیا، ممبر جوڈیشل کمیشن نے بتایا کہ محکمہ ماحولیات نے اپنے رولز میں ترمیم کی جس کے تحت ناصر باغ سمیت کچھ پراجیکٹس پر این او سی کی ضرورت نہیں،عدالت نے ریمارکس دیئے کہ ناصر باغ سمیت کئی تاریخی مقامات کی اہمیت ہے، کسی بھی ادارے کو پراجیکٹ شروع کرنے سے پہلے اس اہمیت کو سامنے رکھنا چاہئے، ڈی جی ایل ڈی اے، ماہرین اور ممبر جوڈیشل کمیشن سے میٹنگ کریں اگر تحفظات دور نہ کئے تو مجبوراً ناصر باغ پراجیکٹ روکنا پڑے گا،پی ایچ اے قانون کے مطابق درختوں کی پلانٹیشن کرے، لاہور میں جو پارک ٹھیک حالت میں نہیں، ان کو بحال کیا جائے، جن پارکس میں تجاوزات ہیں ان کو ختم کریں پارکس کو بحال کریں تاکہ بچے وہاں کھیل سکیں۔

وزیراعلیٰ مریم نواز شریف کی زیر صدارت خصوصی اجلاس منعقد ہوا جس میں ہر شہر کے بیوٹیفکیشن پلان کی تفصیلات اور تصویری جائزہ لیا گیا۔ وزیراعلیٰ مریم نواز شریف نے بیوٹیفکیشن پلان فیز ون کی تکمیل کے لئے فروری سے مئی تک کاہدف مقرر کر دیا۔

اجلاس میں ہر ضلع، ہر تحصیل اور ہر شہر کے بیوٹیفکیشن پلان پر تفصیلی بریفنگ دی گئی۔ اجلاس کو بریفنگ میں بتایا گیا کہ پنجاب کے 39اضلاع میں 132بیوٹیفکیشن سکیمیں 16ارب 90 کروڑ روپے کی لاگت سے مکمل ہوں گی۔ 97 بیوٹیفکیشن سکیموں کے ورک آڈر جاری،88 بیوٹیفکیشن پراجیکٹ شروع ہوگے۔ لاہور میں بیوٹیفکیشن کے 18، سرگودھا میں 6، بہاولپور میں 16، گوجرانوالہ میں 12 پراجیکٹ شروع کیے جائیں گے۔ راولپنڈی کے 17، فیصل آباد کے 13، ملتان 8 اور ساہیوال میں 24 بیوٹیفکیشن پراجیکٹ مکمل کیے جائیں گے۔ بریفنگ میں مزید بتایا گیا کہ پنجاب کے بھر کے 33اضلاع میں بیوٹیفکیشن پراجیکٹ پر تیزی سے کام جاری ہے۔ بیوٹیفکیشن پراجیکٹ میں قدیمی دروازوں کی بحالی کے کام کو بھی شامل کیا گیا ہے۔ ہر بازار میں فائبر گلاس اور ٹین سائل کور لگائے جائیں گے۔ وزیراعلیٰ مریم نواز شریف نے ہرشہر کے بیوٹیفکیشن پلان میں واٹر فیچر/فوارے، مصنوعی آبشارے شامل کرنے کی ہدایت کی۔ وزیراعلیٰ مریم نواز شریف نے مرکزی بازاروں میں روڈ کے درمیان خوبصورت گرین بیلٹ بنانے کا حکم دیا اور بیوٹیفکیشن پلان میں تیزی سے بڑھنے والے پودے اور سبزہ شامل کرنے کی ہدایت کی۔

وزیراعلیٰ مریم نواز شریف نے فٹ پاتھ پر روایتی گرے ٹائلز کی بجائے خوبصورت کلرٹائل لگانے کا حکم بھی دیا۔
اجلاس میں بیوٹیفکیشن پراجیکٹ کے لئے ڈیش بورڈ بنانے کا فیصلہ کیا گیا۔ وزیراعلیٰ مریم نوا زشریف نے بیوٹیفکیشن ڈیش بورڈ کور وزانہ کی بنیاد پر اپ ڈیٹ کرنے کی ہدایت بھی کی۔ اجلاس میں ڈی سی کی طرح اسسٹنٹ کمشنروں کے بھی کے پی آئیز مقرر کرنے کا فیصلہ کیا گیا جس سے کارکردگی مانیٹرنگ کی جائے گی۔ کھلے مین ہول،ٹوٹی سڑکیں، گندگی، کوڑے کے ڈھیر، ٹوٹی ہوئی گرین بیلٹ اور خراب (کلر)پینٹ پرذمہ داران کے خلاف کارروائی ہوگی۔ شہروں میں تجاوزات نظر آنے پر اسسٹنٹ کمشنر کو وارننگ دی جائیگی۔ وزیراعلیٰ مریم نواز شریف نے کہا کہ شہروں کی بیوٹیفکیشن کا عمل جاری رہے گا۔ ہر ضلع،شہر اور قصبے کو اینڈ ٹو اینڈ(مکمل) بیوٹی فائی کیا جائے گا۔وزیراعلیٰ مریم نواز شریف نے کہا کہ کوئی ایک بازار نہیں، شہر کے ہرہرکونے کو صاف ستھرا نظر آنا چاہیے۔ بیوٹیفکیشن پراجیکٹ اور اپ گریڈیشن کے دوران عوام کی سہولت کا خیال رکھا جائے،کوئی تکلیف نہیں ہونی چاہیے۔ اجلاس کو بریفنگ میں بتایا گیا کہ رحیم یار خان کے چھ بیوٹیفکیشن پراجیکٹ31مارچ تک مکمل ہوں گے۔ بہاولپور میں بابا فرید گیٹ، الصادق مسجد کی قدیمی صورت کی بحالی اور کھڑکیوں پر ووڈ بال کونی بنے گی۔ بہاولنگر،فورٹ عباس، منچن آباد،چشتیاں میں پانچ بیوٹیفکیشن پلان 30جنوری تک تکمیل کا ہدف مقرر کیا گیا ہے۔ وزیراعلیٰ مریم نواز شریف نے منچن آباد اور چشتیاں کے بیوٹیفکیشن پلان کو ری ڈیزائن کرنے کی ہدایت کی۔ بریفنگ میں بتایا گیا کہ فیصل آباد کے 121 سال قدیم گھنٹہ گھر اور بازاروں کو تجاوزات سے پاک اور اپ گریڈیشن کی جاری رہی ہے۔ ٹوبہ ٹیک سنگھ، کمالیہ اورگوجرہ میں تین بیوٹیفکیشن پلان فروری تک مکمل کر لیے جائیں گے۔ جھنگ، شورکوٹ،18ہزاری بیوٹیفکیشن پلان کے لئے 30اپریل کا ہدف مقرر کیا گیا ہے۔ چینیوٹ میں روایتی قدیمی فرنیچر مارکیٹ کو جدید ڈیزائن میں اپ گریڈ کیا جائے گا۔

وزیراعلیٰ مریم نوا زشریف نے پورے گوجرانوالہ کو نئی اور خوبصورت شکل دینے کی ہدایت کی۔ بریفنگ میں مزید بتایا گیا کہ نارووال، شکرگڑھ اور ظفر وال میں تین بیوٹیفکیشن سکیمیں 31 مئی تک مکمل ہوں گی۔ وزیراعلیٰ مریم نوا زشریف نے گجرات شہر کی اپ لفٹنگ کا پلان تین روز میں طلب کر لیا۔ سیالکوٹ کے اقبال منزل بازار اور ملحقہ گلیوں کی شاندار اپ گریڈیشن 31 مئی تک ہوگی۔ راولپنڈی کے راجہ بازاراور کمرشل مارکیٹ ایریا کو جدید اور شاندار صورت دی جائے گی۔ اٹک اور احسن ابدال میں دو بیوٹیفکیشن پراجیکٹ مکمل کیے جائیں گے۔وزیراعلیٰ مریم نواز شریف نے چکوال کے چھپڑ بازار کا نام تبدیل کرنے کی ہدایت کی، 30مارچ تک بیوٹیفکیشن مکمل ہوگی۔ جہلم، دینہ، سوہاوہ اور پنڈدانخان میں بیوٹیفکیشن کے چار پراجیکٹ 397ملین روپے کی لاگت سے مکمل ہوں گے۔

چیئرمین رابطہ علماء و مشائخ پاکستان،مرکزی مسلم لیگ کے جوائنٹ سیکرٹری قاری محمد یعقوب شیخ نے کہا ہے کہ چیف آف ڈیفنس فورسز،فیلڈ مارشل سید عاصم منیر نےعلما و مشائخ سے خطاب میں دہشتگردی کیخلاف جس عزم کا اظہار کیاقوم اسکی تائید کرتی ہے، افغان علما کی جانب سے اپنی سرزمین کسی دوسرے ملک کیخلاف استعمال نہ ہونے کے بیان کا خیر مقدم کرتے ہیں،افغان طالبان علماء کے بیان کی تائید کریں اور افغانستان سے پاکستان میں ہونے والی دہشتگردی کو روکیں،

قاری یعقوب شیخ کا کہنا تھا کہ پاکستان کے چیف آف ڈیفنس فورسز سید عاصم منیر نے پاکستان میں دہشتگردی کے خاتمےاور ملک کے دفاع کے لئے جس عزم کا اظہار کیا پاکستان بھر کے علما کرام تائید کرتے ہیں،فیلڈ مارشل سید عاصم منیر نے علماء مشائخ کو ملکی دفاع کے لئے اعتماد میں لینا خوش آئند ہے،پاکستان بھر کے علما کرام کلمہ کے نام پرحاصل ملک پاکستان کے دفاع و سلامتی کے لئے افواج پاکستان کے ساتھ کھڑے ہیں،دہشتگردی کی شریعت میں کوئی گنجائش نہیں،افغان طالبان اپنی سرزمین پاکستان کیخلاف استعمال نہ ہونے دیں بصورت دیگر پاکستان کی مسلح افواج قیام امن کے لئے جو بھی فیصلہ کریں گے مرکزی مسلم لیگ سمیت پاکستان کے علما کرام،قوم مکمل تائید و حمایت کرے گی ، برادر ملک افغانستان کے ایک ہزار سے زائد علما کی افغان سرزمین کسی دوسرے ملک کے خلاف استعمال نہ ہونے کی قرارداد خوش آئند ہے،ضرورت اس امر کی ہے کہ افغان طالبان عملی طور پر ٹی ٹی پی کو روکیں اور ان کی پشت پناہی ختم کریں،پاکستان نے افغانستان کے لئے ہمیشہ برادر ملک کے طور پر حق ادا کیا تاہم افغانستان کی جانب سے ٹی ٹی پی کی پشت پناہی اور پاکستان میں دہشتگردانہ حملوں کا رویہ کسی صورت بھی قابل قبول نہیں ہے، اس ضمن میں پاکستان نے دوست ممالک کے ساتھ افغانستان کے ساتھ مذاکرات کئے ،تحمل کا مظاہرہ کیا لیکن افغانستان کی جانب سے ہٹ دھرمی دکھائی گئی،اب افغان علما کی جانب سے فتوے کے بعد افغان حکومت اسکی تائید کرے ،افغان طالبان کے زیر سایہ ٹی ٹی پی سرگرم ہے،افغان طالبان گارنٹی دیں کہ پاکستان میں بسنے والوں پر ایک بھی گولی افغانستان کی سرزمین سے نہیں چلے گی،

چیئرمین پیپلز پارٹی بلاول بھٹو زرداری نے کہا ہے کہ ایک سیاسی جماعت سیاسی دجال کا کام کر رہی ہے، اس کی کوشش ہے عوام اور افواج کے درمیان دراڑ پیدا کرے۔

پیپلزپارٹی کے چیئرمین بلاول بھٹو زرداری کی باغبان پورہ میں چمن پارک کے علاقے آمدہوئی، بلاول بھٹو زرداری نے کامریڈ زبیدہ شاہین کے انتقال پر ان کے لواحقین سے تعزیت کی.اس موقع پر بلاول بھٹو زرداری نےکہا کہ خیبرپختونخوا میں گورنر راج لگانا میرا یا میری پارٹی کا مطالبہ نہیں، میں کسی سیاسی پارٹی پر پابندی کے حق میں بھی نہیں ہوں، سیاسی پارٹی کو خیبر پختونخوا میں اپنا رویہ بہتر کرنا ہوگا، دہشت گردوں کے خلاف جاری آپریشن میں خلل ڈالا تو مسائل بنیں گے، سیاسی جماعت دہشت گردوں کی سہولت کار بنی تو پھر گورنر راج لگانا مجبوری بن جائےگا ، خیبر پختونخوا میں جنگی حالات پیدا ہوتے جا رہے ہیں،پاکستان کو افغانستان کی طرف سے جو خدشات ہیں وہ سچ ثابت ہو رہے ہیں، افغانستان سے دہشت گرد پاکستان آ کر دہشت گردی کرتے ہیں، یہ پاکستان کے لیے سنگین خطرہ ہے، ہماری افواج اس چیلنج کا مقابلہ کررہی ہیں، پاکستان کے اندرونی چیلنجز سے بھی نمٹا جارہا ہے ،پاک فوج پاکستان کے خلاف میلی آنکھ سے دیکھنے والوں کو بھرپور جواب دینے کی صلاحیت رکھتی ہے، افسوس ایسی سیاسی قوتیں بھی ہیں جو اس وقت ادارے پر حملہ کرتی ہیں، پیپلز پارٹی کا مطالبہ ہے کہ سیاسی جماعتیں اپنی سیاست کو دائرے میں رکھیں،مئی کی جنگ میں پاکستان کے ہاتھوں شکست بھارت کو ہضم نہیں ہورہی، وہ ایک بار پھر پاکستان پر وار کرنےکی سازشیں کر رہا ہے، بھارت کے خلاف جنگ میں پاکستان کی جیت پوری دنیا نے تسلیم کی، پاک آرمی، پاک فضائیہ اور بحریہ میں اتنی طاقت ہےکہ پاکستان کی طرف میلی آنکھ سے دیکھنے والے کو بھرپور جواب دے سکتے ہیں۔

بلاول زرداری کا مزید کہنا تھا کہ ایک سیاسی جماعت سیاسی دجال کا کام کر رہی ہے، اس کی کوشش ہے عوام اور افواج کے درمیان دراڑ پیدا کرے، ہم ان کو کہنا چاہتے ہیں کہ اپنےکردار کو ٹھیک کریں۔ایک سوال کے جواب میں بلاول کا کہنا تھا کہ مریم نواز اگر سندھ سے انتخاب لڑیں تو ہم ویلکم کریں گے، سندھ میں تمام سیاسی جماعتوں کو انتخاب میں حصہ لینا چاہیے۔

لاہور: پاکستان تحریک انصاف کے وائس چیئرمین اور سابق وزیر خارجہ شاہ محمود قریشی کو طبیعت میں بہتری آنے کے بعد اسپتال سے ڈسچارج کردیا گیا ہے اور انہیں دوبارہ کوٹ لکھپت جیل منتقل کردیا گیا۔

شاہ محمود قریشی کے وکیل رانا مدثر نے بتایا کہ شاہ محمود قریشی کچھ روز قبل پتے کی سرجری کے لیے پاکستان کڈنی اینڈ لیور انسٹیٹیوٹ میں زیرِ علاج تھے جہاں ڈاکٹروں نے ضروری علاج اور آپریشن کے بعد انہیں آرام کا مشورہ دیا تھا۔وکیل کا کہنا ہے کہ اب طبیعت میں نمایاں بہتری کے باعث اسپتال انتظامیہ نے انہیں ڈسچارج کردیا ہے۔رانا مدثر نے مزید بتایا کہ قریشی کے اہم میڈیکل ٹیسٹ لیے گئے ہیں جن کی رپورٹس 15 روز بعد موصول ہوں گی، جس کے بعد ڈاکٹروں کی جانب سے مزید علاج یا فالو اَپ کے حوالے سے فیصلہ کیا جائے گا۔

واضح رہے کہ شاہ محمود قریشی 9 مئی کے مقدمات میں گرفتار ہیں اور کوٹ لکھپت جیل میں قید ہیں، جہاں سے انہیں سرجری کے لیے اسپتال منتقل کیا گیا تھا۔ جیل حکام کے مطابق انہیں مکمل سیکیورٹی کے ساتھ واپس جیل منتقل کیا گیا ہے۔

سوشل میڈیا پر گردش کرنے والی ویڈیو میں دعویٰ کیا گیا ہے کہ پنجاب پولیس کے افسران ایف ایم پر نازیبا زبان استعمال کر رہے ہیں۔

حقیقت میں‌یہ ویڈیو مکمل طور پر غلط اور اے آئی سے تیار کردہ پروپیگنڈا ہے۔جو ویڈیو 92 نیوز کے لوگو کے ساتھ گردش کر رہی ہے، وہ ایڈٹ شدہ اور جعلی ہے۔92 نیوز کی انتظامیہ نے واضح طور پر اس بات کی تردید کی ہے کہ اُن کا اس مواد سے کوئی تعلق ہے یا انہوں نے اسے نشر کیا ہے۔یہ پروپیگنڈا پی ٹی آئی کے سوشل میڈیا ٹیم کی جانب سے تیار کیا گیا ہے تاکہ عوام کو گمراہ کیا جائے اور نفرت پھیلائی جائے۔ایف آئی اے سائبر کرائم میں اُن تمام سوشل میڈیا اکاؤنٹس کے خلاف سرکاری شکایت درج کرا دی گئی ہے جنہوں نے یہ جعلی ویڈیو پھیلائی۔

پنجاب پولیس کی جانب سے ایف ایم پر نازیبا زبان استعمال کرنے کا بیانیہ سراسر غلط معلومات ہے اور اسے نہ مانا جائے اور نہ ہی پھیلایا جائے۔

لاہور: پنجاب حکومت نے بسنت منانے کی اجازت دے دی ہے۔ حکومت کے ذرائع کے مطابق بسنت کا تہوار رواں سال 6، 7 اور 8 فروری کو منایا جائے گا، تاہم اس دوران قواعد و ضوابط کی خلاف ورزی پر سخت کارروائی کی جائے گی۔

نجی ٹی وی کے مطابق ذرائع نے بتایا کہ بسنت کے دوران کسی بھی قسم کی فائرنگ، ہلڑ بازی یا غیر قانونی سرگرمی کی اجازت نہیں ہوگی۔ بسنت کے موقع پر پتنگ اور ڈور کے استعمال کے لیے خصوصی کیو آر کوڈ جاری کیے جائیں گے تاکہ سب قوانین کی پابندی کریں۔

گورنر پنجاب سلیم حیدر کے دستخطوں سے جاری ہونے والے آرڈیننس میں بسنت منانے کے لیے واضح شرائط اور پابندیاں مقرر کی گئی ہیں۔ آرڈیننس کے مطابق قوانین کی خلاف ورزی پر نہ صرف جرمانہ بلکہ قید کی بھی سزا دی جا سکتی ہے۔آرڈیننس کے مطابق پنجاب میں 2001 میں پتنگ بازی پر پابندی عائد کی گئی تھی، اور اب 25 سال بعد محدود شرائط کے تحت دوبارہ اجازت دی گئی ہے۔ تاہم، 18 سال سے کم عمر کے بچے پتنگ بازی نہیں کر سکیں گے اور خلاف ورزی کی صورت میں والد یا سرپرست ذمہ دار ہوں گے،بسنت کے موقع پر صرف دھاگے سے بنی ڈور کے استعمال کی اجازت ہوگی، جبکہ دھات یا تیز دھار مانجھے والے دھاگے کے استعمال پر سخت قانونی کارروائی ہوگی۔ خلاف ورزی کرنے والے کو کم از کم 3 سال اور زیادہ سے زیادہ 5 سال قید، اور 20 لاکھ روپے تک جرمانے کی سزا ہو سکتی ہے۔مزید برآں، آرڈیننس میں یہ بھی کہا گیا ہے کہ ضلع کے اندر ہر موٹرسائیکل حفاظتی تدابیر کے مطابق چلائی جائے گی تاکہ کسی بھی ناخوشگوار واقعے سے بچا جا سکے۔