Category: لاہور

مرکزی مسلم لیگ کے صدر خالد مسعود سندھو نے کہا ہے کہ افغانستان کی بلا اشتعال جارحیت پر پاکستانی قوم مسلح افواج کے ساتھ کھڑی ہے ۔ افغان طالبان فیصلہ کر لیں وہ دہشت گردی کا ساتھ دیں گے یا پاکستان کا ، فتنہ الخوارج ملک و ملت کے دشمن، قیام امن کے لئے قومی اتحاد کی ضرورت ہے۔ ہماری لڑائی افغان عوام کے ساتھ نہیں بلکہ دہشت گردوں کے ساتھ ہے

ان خیالات کا اظہار انہوں نے لاہور کے نجی ہوٹل میں سینئر صحافیوں کے اعزاز میں افطار ڈنر کی تقریب سے خطاب کرتے ہوئے کیا ۔ اس موقع پر مرکزی ترجمان تابش قیوم ، سیکرٹری جنرل مرکزی مسلم لیگ لاہور مزمل اقبال ہاشمی نے بھی خطاب کیا۔ مرکزی مسلم لیگ کے صدر خالد مسعود سندھو کا کہنا تھا کہ مرکزی مسلم لیگ کی سیاست خدمت کی سیاست ہے۔ سیاسی جماعتوں کا کام صرف الیکشن لڑنا نہیں۔ مرکزی مسلم لیگ کی خدمت کی سیاست صحافیوں نے خود دیکھی۔ پاکستان میں دہشت گردی کے واقعات ہوئے امام بارگاہ پر حملہ سازش تھی ۔ افغانستان سے ہمارے ملک میں دہشت گردی ہوئی ان 5 سالوں میں دس ہزار کے قریب شہری شہید ہوئے۔برداشت کی ایک حد ہوتی یے ۔ پاکستان نے افغانوں کی میزبانی کی لیکن انہوں نے بھلائی کا بدلہ بھلائی میں نہ دیا ۔مسلح افواج عوام پر حملے قابل برداشت نہیں۔ اب افغان انڈیا کی گود میں جا کر بیٹھ گئے۔ ایک بار پھر کہتا ہوں اسرائیل و انڈیا کی لڑائی افغانستان میں نہ لڑیں ۔ آج وقت ہے ایک قوم کی حیثیت سے متحد ہو کر اس ملک کے لیے سوچنا ہو گا مسلح افواج کے ساتھ قوم بھر پور طریقے سے کھڑی یے ۔ پاکستان وہ ملک ہے جس کی طرف امت مسلمہ دیکھتی ہے۔ ہماری افغان عوام کے ساتھ لڑائی نہیں ہماری جنگ ان دہشت گردوں کے ساتھ ہے جو ہمارے عوام پر حملہ کرتے ہیں۔ ملک میں دہشت گردی برداشت نہیں کریں گے۔ جو بھی ملک کا امن برباد کرنے کی کوشش کرے گا اس کو پاش پاش کریں گے ہماری شناخت پاکستان ہے ۔ یہ قائم دائم رہے گا

مزمل اقبال ہاشمی نے کہا کہ مرکزی مسلم لیگ ملکی سیاست میں بڑی تبدیلی کی جانب گامزن ہے۔ عوام کو قیادت کا حق دینا چاہتے ہیں لاہور کی 274 یونین میں سے 148 یونین کونسل میں انٹرا پارٹی انتخابات کروا چکے ہیں۔ رمضان کے بعد باقی یونین کونسل میں انتخابات کروائیں گے۔۔

پاکستان مرکزی مسلم لیگ نے افغا ن طالبان کی بلا اشتعال جارحیت پر گہری تشویش کا اظہار کرتے ہوئے واضح کیا ہے کہ وطنِ عزیز کی حرمت اور سرحدوں کے دفاع پر کوئی سمجھوتہ نہیں کیا جائے گا۔ صدر مرکزی مسلم لیگ خالد مسعود سندھو نے کہا کہ انتہائی افسوس کا مقام ہے کہ رمضان المبارک جیسے مقدس مہینے میں بھی افغانستان میں پناہ گزین دہشت گردوں نے پاکستانی عوام اور افواج کا خون بہایا، جس کے جواب میں افواجِ پاکستان نے اپنے دفاع کا بھرپور حق استعمال کرتے ہوئے دہشت گردوں کے ٹھکانوں کو کامیابی سے نشانہ بنایا۔ اس تناظر میں پاکستان مرکزی مسلم لیگ فتنۃ الخوارج کی حمایت میں سرحد پار سے ہونے والی جارحیت کے خلاف ‘آپریشن غضب للحق’ کی بھرپور تائید و حمایت کرتی ہے۔

خالد مسعود سندھو نے کہا کہ آج ایک طرف تو ہماری فورسز کو نشانہ بنایا جا رہا ہے، آپ دیکھتے ہیں کہ روزانہ شہادتیں ہورہی ہیں اور جوان شہید ہو رہے ہیں۔ بلوچستان کی صورتحال سب کے سامنے ہے، جبکہ خیبر پختونخوا کے حالات بھی واضح ہیں،روزانہ کہیں نہ کہیں حملے ہو رہے ہیں، جن میں جہاں فورسز کے لوگ شہید ہوتے ہیں وہاں ہمارے عام شہری بھی اپنی جانوں کے نذرانے پیش کررہے ہیں ۔انہوں نے افغان حکومت کو مخاطب کرتے ہوئے کہا کہ پاکستانی عوام نے ہمیشہ افغان طالبان کی بیرونی قوتوں سے آزادی کے لیے دعائیں کیں اور لاکھوں افغان مہاجرین کو دہائیوں تک اپنے سینے سے لگائے رکھا۔ انہوں نے کہا کہ مجھے آج بہت افسوس سے بات کرنی پڑتی ہے کہ افغانی جو ہمارے بھائی تھے، جن کا ہم نے ایک لمبے عرصے تک بوجھ اٹھایا، آج پتہ نہیں وہ کیوں گمراہ ہو گئے ہیں اور آج وہ ان کی جھولی میں جا بیٹھے ہیں جنہوں نے ساری عمر ان کی مخالفت کی اور ان کے خلاف جنگ لڑی۔

انہوں نے مزید کہا کہ آج وہی افغان سرزمین پاکستان پر ان دہشت گردوں کو مسلط کرنے کے لیے استعمال ہو رہی ہے جو اسلام اور انسانیت کے دشمن ہیں، جن کا ایجنڈا صرف اور صرف پاکستان میں خونریزی اور انتشار پھیلانا ہے۔ ایک طرف ہندوستان اور دوسری طرف سے افغانستان کی جانب سے پاکستان پر جنگ مسلط کرنے کی کوشش کی جا رہی ہے۔ یہ بات انتہائی لمحہ فکریہ ہے کہ اسلام کا نام لینے والے افغان حکمران آج ہندوتوا کی پیروکار بھارتی حکومت سے پینگیں بڑھا رہے ہیں۔ افغان طالبان کو چاہیے تھا کہ وہ اللہ کی دی ہوئی آزادی اور عزت کو مسلمانوں کے خلاف استعمال کرنے کے بجائے فلسطین اور کشمیر کے مظلوم مسلمانوں کی آزادی کے لیے وقف کرتے، مگر افسوس کہ وہ اس وقت ظلم کا حصہ بن رہے ہیں۔انہوں نے کہا کہ پاکستان افغان عوام کا دشمن نہیں ہے اور نہ ہی ہماری لڑائی افغان بھائیوں سے ہے، بلکہ پاکستان کی یہ جنگ صرف فتنے کے خاتمے اور دہشت گردی کی بیخ کنی کے لیے ہے

پاکستان مرکزی مسلم لیگ نے دو ٹوک پیغام دیتے ہوئے کہا کہ افواجِ پاکستان نہ صرف اپنی سرحدوں کا دفاع کرنا جانتی ہیں بلکہ سرحد پار بیٹھے دشمن کو اس کے گھر میں گھس کر سبق سکھانے کی مکمل صلاحیت رکھتی ہیں۔ پوری قوم اپنی افواج کے شانہ بشانہ کھڑے ہو کر دشمن کو منہ توڑ جواب دینے کے لیے متحد ہے اور ملک کی حرمت پر کسی کو آنچ نہیں آنے دی جائے گی۔

وزیراعلیٰ پنجاب مریم نواز شریف نے پاک-افغان سرحد پر خوارج کے بزدلانہ حملے پر شدید ردِعمل کا اظہار کیا ہے اور شدید مذمت کی ہے۔

وزیر اعلی مریم نواز شریف نے پاک افواج کی جانب سے افغان سرحد پر خوارج کو فوری اور منہ توڑ جواب دینے پر خراج تحسین پیش کیا ہے۔وزیراعلی مریم نواز شریف نے کہا کہ سلام ہے پاک فوج کو جنہوں نے پلک جھپکتے ہی دشمن کو منہ توڑ جواب دیا۔ انہوں نے کہا کہ خوارج، انکے ہینڈلرز اور سپورٹرز پہلے بھی ذلیل ہوئے اور اب بھی ذلیل ہونگے۔ وزیراعلی مریم نواز شریف نے کہا کہ سلام ہے پاک فوج کو جنہوں نے پلک جھپکتے ہی دشمن کا غرور خاک میں ملا دیا۔خوارج اور ہینڈلرز کا ہر وار الٹا پڑے گا، پاکستان کی مٹی کا ایک ایک ذرہ بنیان مرصوص بن کر لڑے گا-انہوں نے کہا کہ پاکستان کی جغرافیائی حدود ہماری ریڈ لائنز ہیں جو کراس کرے گا ذلیل و رسوا ہوگا۔

وزیراعلی مریم نواز شریف نے کہا کہ پوری قوم اور ہماری سپاہ کا ہر جوان پاکستان کے وقار کا نگہبان ہے۔ انہوں نے کہا کہ پاکستان کی امن پسندی کو کمزوری سمجھنے والے بڑی بھول میں ہیں۔ ہم مٹ جائیں گے مگر اپنی پاک سرزمین کی آبرو پر حرف نہیں آنے دیں گے-

رمضان المبارک نزول قرآن کا مہینہ ہے اس برکت والے مہینہ میں قرآن مجید کے ساتھ مضبوط کرنے عبادات بجا لانے کے ساتھ ساتھ شہید مقدس اوراق کی حفاظت کا بھی عہد کیا جائے ۔ شہید مقدس کی حفاظت میں اہل ایمان کیلئے عظیم اجر وثواب کی بشارت ہے ، یہ دل میں تقوی کی علامت ہے ، نیکی اور ثواب میں اضافہ ہوتا ہے ، ا للہ کی خشنودی اور ملائکہ کی قربت حاصل ہوتی ہے ۔

ان خیالات کا اظہار خادم قرآن اور پنجاب قرآن بورڈ کے سابق ممبر محمد ناظم الدین نے کیا ۔ انھوں نے کہا کہ شہید مقدس اوراق خصوصاََ قرآن مجید کی آیات اور احادیث پر مشتمل صفحات کی حفاظت اور احترام ایمان کا حصہ اوراجر عظیم کا باعث ہے ۔ شعائر الہیٰ کی تعظیم قلبی تقویٰ کی علامت ہے ۔ شہید مقدس اوراق کو ادب سے اٹھانا ، انھیں محفوظ جگہ پر منتقل کرنا صرف مذہبی ذمہ داری ہی نہیں بلکہ صدقہ جاریہ بھی ہے اور باعث خیر ، رحمت اور برکت بھی ہے ۔ انھوں نے کہا کہ بہت سے ناشران قرآن مجید کی طباعت اور اشاعت کیلئے غیر معیاری پیپر استعمال کرتے ہیں جس سے ہر ماہ بڑی تعداد میں قرآن مجید ، پارے اور قاعدے شہید ہوتے ہیں، جس سے ہر ماہ شہید مقدس اوراق کی ہزاروں ٹن بوریاں جمع ہوجاتی ہیں جنھیں محفوظ کرنا بذات خود ایک سنگین مسئلہ بنتا جا رہا ہے لہذا علما ء اساتذہ اور والدین سے گزارش ہے کہ وہ نئی نسل میں کلام الہیٰ اور شہید مقدس اوراق کی حفاظت کا شعور پیدا کریں ۔ غیر معیاری اور ناقص پیپر پر طبع شدہ قرآن مجید اور سیپارے خریدنے کی بجائے معیاری پیپر پر شائع شدہ قرآن مجید اور سیپارے خریدیں تاکہ ان کے شہید ہونے کا احتمال کم سے کم ہو ۔ اسلئے کہ شہید مقدس اوراق کی حفاظت ہماری اجتماعی ذمہ داری ہے۔ ہم کتاب الہیٰ کی عزت اور حفاظت کریں گے تو اللہ ہمیں عزت دے گا ۔ حکومت سے گزارش ہے کہ شہید مقدس اوراق کی حفاظت کا مضمون تعلیمی اداروں کے نصاب میں شامل کیا جائے تاکہ نوجوان نسل کو اپنی ذمہ داری کا احساس ہوسکے ۔

بانی پی ٹی آئی عمران خان کی ہمشیرہ علیمہ خان نے حالیہ پریس کانفرنس میں پارٹی کی سینئر قیادت کو شدید تنقید کا نشانہ بنایا اور کہا کہ بانی کی صحت سے متعلق معاملات پر صرف خاندان کو بات کرنے کا حق ہے۔
پریس کانفرنس کے دوران علیمہ خان کا کہنا تھا کہ “بھائی ہمارا ہے اور ان کی صحت ہماری اولین ترجیح ہے، اس لیے ہماری اجازت کے بغیر کوئی بھی اس معاملے پر بیان نہ دے۔”
‎انہوں نے پارٹی چیئرمین بیرسٹر گوہر سمیت دیگر رہنماؤں پر سوال اٹھاتے ہوئے کہا کہ حامد خان، علی ظفر اور لطیف کھوسہ کہاں ہیں اور بانی پی ٹی آئی کی صحت کے معاملے پر واضح مؤقف کیوں سامنے نہیں آ رہا۔
‎ان کا کہنا تھا کہ بیرسٹر گوہر نے بانی کی صحت کے معاملے کو نظر انداز کیا اور اب اس حوالے سے کوئی وضاحت نہیں دی جا رہی۔
‎علیمہ خان نے مزید کہا کہ وزیر داخلہ محسن نقوی کی جانب سے علاج میں تاخیر کا ذکر کیا جا رہا ہے، حالانکہ ان کے مطابق بانی کا مناسب علاج ہی نہیں ہوا۔ انہوں نے سوال اٹھایا کہ اگر پارٹی رہنماؤں کی وزیر داخلہ سے ملاقات ہوئی تھی تو عوام کو اس کی تفصیلات کیوں نہیں بتائی جا رہیں اور حکومت سے کیے گئے وعدوں کو سامنے کیوں نہیں لایا جا رہا۔
‎انہوں نے مطالبہ کیا کہ بانی پی ٹی آئی کے علاج اور صحت سے متعلق تمام معاملات شفاف انداز میں عوام کے سامنے رکھے جائیں۔

پنجاب کے مختلف اضلاع کے مزید 2735 سرکاری اسکولز ٹھیکے پر دینے کا فیصلہ کرلیا گیا۔ محکمہ اسکول ایجوکیشن پنجاب نے نجی شعبے سے درخواستیں طلب کرلیں۔

پنجاب کے مزید سرکاری اسکولز ٹھیکے پر دینے کا فیصلہ کیا گیا ہے، مختلف اضلاع کے مزید 2735 اسکولز نجی افراد چلائیں گے۔محکمہ اسکول ایجوکیشن پنجاب نے نجی شعبے سے درخواستیں طلب کرلیں، 31 مارچ تک نجی شعبے سے افراد اسکولز حاصل کرنے کیلئے اسکروٹنی ہوگی۔رپورٹ کے مطابق رحیم یارخان کے 247، خانیوال کے 157، فیصل آباد 112، بہاولنگر کے 150، لاہور کے 42، چنیوٹ کے 82، لیہ کے 92، قصور کے 94، ملتان کے 128 اسکول نجی شعبے کو دیئے جائیں گے۔محکمہ اسکول ایجوکیشن کا کہنا ہے کہ تیسرے مرحلے میں ایسے اسکولز نجی شعبے کو ملیں گے جن میں 100 سے زائد طلباء اور 2 ٹیچر موجود ہیں۔محکمہ اسکول ایجوکیشن پنجاب 10 ہزار سے زائد اسکولز نجی شعبے کے حوالے کرچکا ہے۔