Category: لاہور

‎لاہور کے علاقے اچھرہ میں تین کم سن بچوں کے لرزہ خیز قتل کیس میں اہم پیش رفت سامنے آئی ہے جہاں پولیس تحقیقات کے بعد یہ انکشاف ہوا ہے کہ بچوں کی قاتل ان کی سگی ماں ہی ہے۔ پولیس کے مطابق ملزمہ نے دورانِ تفتیش اپنے جرم کا اعتراف بھی کر لیا ہے، جس کے بعد کیس میں نئی سمت سامنے آ گئی ہے۔
‎حکام کے مطابق ابتدائی تحقیقات کے دوران بچوں کی والدہ کا رویہ مشکوک پایا گیا، جس پر مزید تفتیش کی گئی۔ شواہد اور بیانات کی بنیاد پر پولیس نے خاتون کے خلاف مضبوط کیس تیار کیا، جس کے بعد اس نے مبینہ طور پر اپنے جرم کا اعتراف کر لیا۔ بتایا جا رہا ہے کہ خاتون نے منصوبہ بندی کے تحت یہ افسوسناک واردات انجام دی۔
‎پولیس کا کہنا ہے کہ واقعے کے بعد ملزمہ نے خود کو بے قصور ظاہر کرنے کے لیے ایک کہانی بنانے کی کوشش کی۔ اطلاعات کے مطابق خاتون گھر سے میڈیکل کے بہانے نکلی اور بعد میں اپنے شوہر کو فون کر کے واپس بلایا، جبکہ واپسی پر حالات کو مختلف انداز میں پیش کرنے کی کوشش کی گئی۔
‎تحقیقات میں یہ بھی سامنے آیا ہے کہ ملزمہ نے قتل کا الزام اپنی ساس پر ڈالنے کی کوشش کی، تاہم شواہد نے اس دعوے کو غلط ثابت کر دیا۔ پولیس کے مطابق گزشتہ رات ہونے والا گھریلو جھگڑا اس واقعے کی ممکنہ وجہ ہو سکتا ہے، تاہم اس پہلو پر مزید تحقیقات جاری ہیں۔
‎یاد رہے کہ آج صبح اسی گھر سے تین بچوں کی لاشیں برآمد ہوئی تھیں جنہیں بے دردی سے گلا کاٹ کر قتل کیا گیا تھا، جس پر پورے علاقے میں شدید صدمہ اور خوف کی فضا پھیل گئی تھی۔

پنجاب میں زرعی و معاشی خوشحالی کے فروغ کے لیے وزیراعلیٰ پنجاب مریم نواز شریف نے ”اپنا کھیت، اپنا روزگار سکیم“ کے پورٹل کا باقاعدہ افتتاح کر دیا۔ اس منصوبے کے تحت بے زمین دیہاتیوں کو تقریباً 160 ارب روپے مالیت کی زرعی اراضی فراہم کی جائے گی۔

وزیراعلیٰ کی ہدایت پر زرعی اراضی کی نشاندہی پانی کی دستیابی اور زمین کی زرخیزی کو مدنظر رکھ کر کی گئی ہے۔ پنجاب کے مختلف اضلاع میں 13 ہزار 812 زرعی لاٹس کے ذریعے 88 ہزار 780 خاندان مستفید ہوں گے، جبکہ چولستان میں 16 ہزار 685 لاٹس کی فراہمی سے ایک لاکھ ایک ہزار 111 خاندانوں کو فائدہ پہنچے گا،سکیم کے تحت ہر کامیاب امیدوار کو 25 سے 40 لاکھ روپے مالیت کی زرعی اراضی کاشت کے لیے دی جائے گی۔ سینئر ممبر بورڈ آف ریونیو نبیل جاوید نے منصوبے پر تفصیلی بریفنگ دیتے ہوئے بتایا کہ کامیاب کاشتکاروں کو فی ایکڑ 50 ہزار سے ڈھائی لاکھ روپے تک آبادکاری کے لیے ون ٹائم گرانٹ بھی دی جائے گی،حکومت کی جانب سے پانی کی دستیابی کے ساتھ ایک لاکھ 24 ہزار سے زائد ایکڑ زرعی اراضی فراہم کی جائے گی، جبکہ دیہات میں بے روزگار کاشتکاروں کو یہ زمین 10 سال کے لیے دی جائے گی۔ اضلاع میں اس سکیم کے لیے 43 ہزار 938 ایریاز اور چولستان میں 83 ہزار 425 ایریاز کی نشاندہی آبپاشی اور زرخیزی کو مدنظر رکھ کر کی گئی ہے۔

خواہشمند کاشتکار 2 سے 18 مئی تک درخواستیں جمع کرا سکتے ہیں جبکہ امیدوار یکم جون سے 8 جون تک ڈپٹی کمشنر کے پاس اپیل کا حق رکھیں گے۔ 19 جون کو حتمی فہرست جاری کی جائے گی اور 30 جون سے زمین کی تقسیم کا عمل شروع ہوگا،ایک سے زائد امیدوار ہونے کی صورت میں قرعہ اندازی کے ذریعے زمین الاٹ کی جائے گی جو 10 سال کے لیے ہوگی۔ فراہم کردہ زمین صرف زرعی مقاصد کے لیے استعمال ہوگی اور پختہ تعمیرات کی اجازت نہیں ہوگی۔ ہر کاشتکار اپنی مرضی کی فصل کاشت کر سکے گا،سکیم کے تحت ہر لاٹ کے ساتھ ایگریکلچر افسر اور زرعی انٹرنی بھی تعینات ہوں گے، جبکہ اسسٹنٹ کمشنر اور محکمہ زراعت کے افسران پر مشتمل کمیٹی سال میں دو مرتبہ دورہ کر کے کاشتکاری کا جائزہ لے گی۔

وزیراعلیٰ پنجاب مریم نواز شریف کا جرائم کی شرح میں اچانک اضافے پرنوٹس، ہنگامی اجلاس طلب کر لیا

وزیراعلیٰ مریم نواز شریف نے جرائم کے واقعات کی ویڈیوز خود شئیر کرکے شرکا کو دیکھا کر سخت اظہار برہمی کیا،وزیراعلیٰ مریم نواز شریف نے متعلقہ پولیس افسروں سے باز پرس کی،جرائم روکنے کے لئے پیشگی اقدامات پر کام کرنے کا ہدف مقرر کر دیا،شیخوپورہ اور فیصل آباد میں جرائم کنٹرول نہ ہونے پر متعلقہ افسران کی سرزنش کی،آرپی اوز اور ڈی پی اوز کو سی سی ڈی سے بھرپور تعاون کی ہدایت کی،وزیراعلیٰ مریم نواز شریف نےآر پی اوز، سی پی اوز اور ڈی پی اوز سے ویڈیو لنک خطاب کیا اور کہا کہ جرائم کی شرح میں اچانک اضافے کا رجحان شرمناک اور فکر انگیز ہے۔ اتنی محنت کے بعد پنجاب کو سیف سٹی اور جرائم سے پاک کیا،اب پھر سستی کی گنجائش نہیں۔قتل، ڈکیتی، اغوا اور گمشدگی جیسے واقعات کا تسلسل اور بڑھنا قطعاً برداشت نہیں۔چھوٹے سے چھوٹا جرم بھی جرم ہے، اسے روکنا ہوگا۔ پولیس کو ہر قسم کی مداخلت سے پاک کر دیا، اب ڈیلیور کر کے دکھانا ہوگا۔ 100فیصد میرٹ پولیسنگ کی وجہ سے اپنے پرائے سب کی ناراضگی موڑ لی۔ پچھلے دور میں سیاسی وابستگیوں سے تعیناتیاں ہوتی تھیں، اب سیاسی مداخلت بالکل صفر ہے۔پولیس افسروں کا فائنل انٹرویو خود کرتی ہوں، من چاہا بجٹ دیا، اسلحہ، آلات اور گاڑیاں بھی دیں۔عوام کو تحفظ اور سکون کا احساس دینے چاہتے ہیں۔امن و امان میں بہتری کے لئے جو کرنا پڑاکروں گی، سختی برتنا پڑی تو سختی بھی برتیں گے۔ گلبرگ میں گاڑی کی بیٹری چوری ہونے کی ویڈیوشرمناک ہے،گجرات میں کرائم کا برا حال ہے،بس روک کر بیگ چھینے گئے، ایسے واقعات خوف وہراس پید کرتے ہیں،ڈکیتی ہوسکتی ہے تو قتل بھی ہوسکتا ہے۔صوبہ بھر میں سیف سٹی قائم ہونے کے باوجودجرائم سرزد ہونا قابل فکر ہے،منشیات کے واقعات کے اعداد شمار دیکھ کر شرم آتی ہے۔سپیڈو بس کے کنڈیکٹر نے بچی کو مارا، اگر قانون کا خوف ہوتو ایسے واقعات نہیں ہوسکتے۔پولیس کو دو سال میں مجموعی طور پر 527 ارب روپے کا ریکارڈ بجٹ دیا جس کی ماضی میں مثال نہیں ملتی۔

لاہور: خاتون ٹک ٹاکر کی پنجاب انفورسمنٹ اینڈ ریگولیٹری اتھارٹی (پیرا) کی سرکاری گاڑی پر چڑھ کر ماڈلنگ کرنے کی تصاویر اور ویڈیو سوشل میڈیا پر وائرل ہوگئیں، جس کے بعد صارفین کی جانب سے مختلف ردعمل سامنے آ رہا ہے۔

سوشل میڈیا پر گردش کرنے والی تصاویر اور ویڈیوز میں دیکھا جا سکتا ہے کہ خاتون ٹک ٹاکر پیرا فورس کی گاڑی پر چڑھ کر ویڈیو بنا رہی ہیں اور مختلف انداز میں پوز دے رہی ہیں۔ ویڈیو وائرل ہونے کے بعد سرکاری املاک کے استعمال اور سیکیورٹی انتظامات سے متعلق سوالات بھی اٹھائے جا رہے ہیں۔اس معاملے پر ترجمان پیرا نے وضاحت کرتے ہوئے کہا ہے کہ مذکورہ گاڑی ایک پارکنگ ایریا میں کھڑی تھی، اسی دوران لڑکی نے گاڑی پر چڑھ کر ٹک ٹاک ویڈیو بنائی۔ ترجمان کے مطابق ویڈیو بنائے جانے کے وقت گاڑی کے قریب کوئی افسر یا اہلکار موجود نہیں تھا۔ترجمان نے مزید بتایا کہ یہ معلوم کرنے کی کوشش کی جا رہی ہے کہ ویڈیو بنانے والی خاتون کون ہے اور وہ وہاں کیسے پہنچی۔ واقعے کی مزید جانچ جاری ہے۔

دوسری جانب سوشل میڈیا صارفین نے واقعے پر تنقید کرتے ہوئے کہا ہے کہ سرکاری گاڑیوں اور اداروں کی امیج کو نقصان پہنچانے والے ایسے واقعات کی روک تھام کے لیے مؤثر اقدامات کیے جانے چاہییں۔ بعض صارفین نے اسے سیکیورٹی غفلت قرار دیا ہے جبکہ کچھ افراد نے اسے صرف سوشل میڈیا اسٹنٹ قرار دیا۔

معروف اور متنازع مذہبی اسکالر مفتی عبدالقوی کی ایک اور ویڈیو سامنے آئی ہے

سوشل میڈیا پر ایک ویڈیو تیزی سے وائرل ہو رہی ہے جس میں مفتی عبدالقوی کو ایک ریو پارٹی میں دیکھا گیا ہے۔ ریو پارٹی سے مراد ایسی تقریب ہوتی ہے جہاں بلند آواز موسیقی، ڈی جے اور رقص کا اہتمام کیا جاتا ہے،وائرل ہونے والی اس ویڈیو میں مفتی عبدالقوی ٹوپی پہنے موجود ہیں،مفتی عبدالقوی نے شلوار قمیض پہن رکھی ہے جبکہ چادر بھی اوڑھی ہوئی ہے،ویڈیو دیکھ کر ایسے لگتا ہے جیسے مفتی عبدالقوی مہمان خاص ہوں، مفتی عبدالقوی کے بالکل سامنے رقص جاری ہے، ایک نائٹ کلب نما ماحول ہے،اردگرد موجود افراد موسیقی پر رقص کر رہے ہیں۔

یہ پہلا موقع نہیں کہ مفتی عبدالقوی تنازعات کی زد میں آئے ہوں۔ اس سے قبل بھی وہ مختلف نوعیت کے اسکینڈلز اور تنازعات کے باعث خبروں میں رہ چکے ہیں، جن میں قندیل بلوچ کیس اور ٹک ٹاکر حریم شاہ سے متعلق معاملات بھی شامل رہے ہیں۔ویڈیو سامنے آنے کے بعد سوشل میڈیا پر صارفین کی جانب سے مختلف ردعمل دیکھنے میں آ رہے ہیں۔

لاہور ہائیکورٹ نے عظمیٰ بخاری کی مبینہ فیک ویڈیو کیس میں سوشل میڈیا ایکٹوسٹ،پی ٹی آئی کارکن فلک جاوید کی ضمانت منظور کرلی ۔

لاہور ہائیکورٹ میں صوبائی وزیر اطلاعات عظمیٰ بخاری کی مبینہ فیک ویڈیو وائرل کرنے کے مقدمے کی سماعت کے دوران عدالت نے پی ٹی آئی سے تعلق رکھنے والی سوشل میڈیا ایکٹوسٹ فلک جاوید کی ضمانت منظور کر لی۔عدالت نے ملزمہ کو ایک لاکھ روپے کے ضمانتی مچلکے جمع کرانے کی ہدایت بھی جاری کر دی، کیس کی سماعت جسٹس شہرام سرور چوہدری نے کی، جبکہ ملزمہ کی جانب سے بیرسٹر میاں علی اشفاق پیش ہوئے،این سی سی آئی اے کی جانب سے عظمیٰ بخاری کی مبینہ فیک ویڈیو وائرل کرنے کے الزام میں فلک جاوید سمیت دیگر افراد کے خلاف مقدمہ درج کیا گیا تھا، فلک جاوید اس مقدمے میں 24 ستمبر 2025 سے زیر حراست ہے

‎لاہور: پنجاب میں آٹے کی قیمتوں میں ایک بار پھر اضافہ دیکھنے میں آیا ہے جس کے باعث عوام کی مشکلات میں مزید اضافہ ہو گیا ہے۔
‎تفصیلات کے مطابق حکومت کی جانب سے گندم کی سرکاری قیمت 3500 روپے فی من مقرر کی گئی ہے، تاہم اوپن مارکیٹ میں گندم کی قیمت اس سے کہیں زیادہ ہو چکی ہے اور فی کلو 88 روپے تک پہنچ گئی ہے۔ اس فرق کے باعث آٹے کی قیمتوں پر بھی براہ راست اثر پڑ رہا ہے۔
‎مارکیٹ ذرائع کے مطابق نجی کمپنیوں کی جانب سے آٹا تقریباً 180 روپے فی کلو فروخت کیا جا رہا ہے، جبکہ 40 کلو آٹے کی بوری کی قیمت 7200 روپے تک پہنچ چکی ہے۔ اس تیزی سے بڑھتی ہوئی قیمت نے عام شہریوں کے بجٹ کو بری طرح متاثر کیا ہے، خاص طور پر متوسط اور کم آمدنی والے طبقے کو شدید مشکلات کا سامنا ہے۔
‎ماہرین کے مطابق گندم کی پسائی پر فی من تقریباً 400 سے 500 روپے تک لاگت آتی ہے، جس کے بعد آٹے کی مجموعی قیمت تقریباً 4000 روپے فی من بنتی ہے۔ تاہم مارکیٹ میں اس سے کہیں زیادہ قیمت وصول کی جا رہی ہے، جس پر سوالات اٹھ رہے ہیں۔
‎شہریوں کا کہنا ہے کہ آٹے جیسی بنیادی ضرورت کی قیمت میں مسلسل اضافہ ان کے لیے ناقابل برداشت ہو چکا ہے اور حکومت کو فوری اقدامات کرنے چاہئیں تاکہ قیمتوں کو کنٹرول کیا جا سکے۔
‎دوسری جانب حکومتی حلقوں کا کہنا ہے کہ مارکیٹ میں قیمتوں کے اتار چڑھاؤ پر نظر رکھی جا رہی ہے اور ناجائز منافع خوری کے خلاف کارروائی کی جائے گی۔