Category: اوکاڑہ

اوکاڑہ (نامہ نگار ملک ظفر) سنٹرل اسٹیشن ریسکیو 1122 اوکاڑہ میں سیلاب کے دوران فرض شناسی اور بہادری کا مظاہرہ کرنے والے ریسکیورز کے اعزاز میں پر تکلف عشائیے کا اہتمام کیا گیا۔ تقریب میں ایڈیشنل ڈپٹی کمشنر (ریونیو) محمد شعجین وسطرو، ایڈیشنل ڈپٹی کمشنر (فنانس اینڈ پلاننگ) عبد الجبار گجر، ایڈیشنل ڈپٹی کمشنر (جنرل) میڈم علیزہ ریحان، اسسٹنٹ کمشنر اوکاڑہ راب نواز چڈھر، اسسٹنٹ ڈائریکٹر فنانس اینڈ پلاننگ رضوان وارث، چیف ایگزیکٹو آفیسر محکمہ تعلیم محمد یوسف کاہلوں، چیف آفیسر ضلع کونسل فدا افتخار میر، ڈویژنل فارسٹ آفیسر اور صدر انجمن تاجران شیخ ریاض انور نے شرکت کی۔

ڈسٹرکٹ ایمرجنسی آفیسر ظفر اقبال نے مہمانوں اور ریسکیورز کو خوش آمدید کہا اور حالیہ سیلاب کے دوران ریسکیو کی جانب سے کیے گئے آپریشنز کی تفصیلی بریفنگ دی۔ مہمانوں نے اپنے خطابات میں ریسکیو اہلکاروں کی دن رات محنت، خلوص اور بہادری کو سراہا اور ڈسٹرکٹ ایمرجنسی آفیسر ظفر اقبال کی قیادت میں کی جانے والی کامیاب ریسکیو و ریلیف کارروائیوں پر خراجِ تحسین پیش کیا۔

اوکاڑہ (نامہ نگار ملک ظفر) وزیراعلیٰ پنجاب کے فلیگ شپ پروگرام کے تحت کامیاب کاشتکاروں میں ہائی پاور گرین ٹریکٹرز کی تقسیم کے سلسلے میں ایک پروقار تقریب کا انعقاد کیا گیا۔ تقریب میں کمشنر ساہیوال ڈاکٹر آصف طفیل، ڈپٹی کمشنر احمد عثمان جاوید، ممبران صوبائی اسمبلی میاں محمد منیر، چوہدری جاوید علاؤالدین اور لیگی رہنما راؤ محمد اجمل نے بھی شرکت کی۔

وزیر زراعت و لائیو اسٹاک پنجاب سید عاشق حسین کرمانی نے تقریب میں کامیاب کاشتکاروں کو ٹریکٹرز کی چابیاں تقسیم کیں اور کہا کہ صوبہ پنجاب کے کاشتکاروں کو کل 10 ہزار ہائی پاور ٹریکٹرز سبسڈی پر فراہم کیے جا رہے ہیں۔ ہر ٹریکٹر پر 10 لاکھ روپے کی سبسڈی دی جا رہی ہے، جس پر مجموعی لاگت 10 ارب روپے بنتی ہے۔ ساہیوال ڈویژن میں 679 اور ضلع اوکاڑہ میں 280 ہائی پاور گرین ٹریکٹر فراہم کیے جا رہے ہیں۔

انہوں نے مزید کہا کہ وزیراعلیٰ پنجاب فارم میکانائزیشن کے لیے فیاضانہ وسائل فراہم کر رہی ہیں اور 10 ہزار مزید گرین ٹریکٹرز کی سبسڈی پر فراہمی کے لیے درخواستیں جلد وصول کی جائیں گی۔ وزیر زراعت نے بتایا کہ کسان کارڈ حکومت کا فلیگ شپ پروگرام ہے، جس کے تحت اب تک 7 لاکھ سے زائد کاشتکاروں کو 250 ارب روپے سے زائد بلا سود قرض فراہم کیے جا چکے ہیں۔

ہائی پاور گرین ٹریکٹرز کی تقسیم پر کسانوں و کاشتکاروں نے وزیراعلیٰ پنجاب مریم نواز شریف کا شکریہ ادا کیا اور پروگرام کو پنجاب کے زرعی شعبے کے لیے ایک اہم قدم قرار دیا۔

اوکاڑہ (نامہ نگار ملک ظفر) وزیر زراعت پنجاب سید عاشق حسین کرمانی کی زیر صدارت ڈپٹی کمشنر آفس اوکاڑہ میں گندم کی کاشت کے حوالے سے جائزہ اجلاس منعقد ہوا۔ اجلاس میں کمشنر ساہیوال ڈویژن ڈاکٹر آصف طفیل، ڈپٹی کمشنر احمد عثمان جاوید، ممبر صوبائی اسمبلی میاں محمد منیر، الیگی رہنما راؤ محمد اجمل، محکمہ زراعت کے افسران اور کسانوں کے نمائندے شریک ہوئے۔

ڈائریکٹر زراعت ساہیوال محمد شہباز نے گندم کی موجودہ صورتحال اور محکمہ کی جانب سے کیے جانے والے اقدامات پر تفصیلی بریفنگ دی۔ صوبائی وزیر زراعت نے کہا کہ پنجاب میں رواں سیزن میں گندم کی کاشت کا ہدف 1 کروڑ 65 لاکھ ایکڑ مقرر کیا گیا ہے اور ساہیوال ڈویژن میں اس ہدف کو 5 دسمبر تک یقینی بنایا جائے۔ انہوں نے کہا کہ گندم ملکی فوڈ سکیورٹی کے لیے ناگزیر ہے اور بوائی کے نتائج حوصلہ افزا ہیں۔

صوبائی وزیر نے بتایا کہ محکمہ زراعت کی جانب سے 9 لاکھ روپے فی سپر سیڈر سبسڈی فراہم کی جا رہی ہے اور پہلی دفعہ ربیع سیزن میں کھادیں مقررہ نرخوں سے کم قیمت پر وافر مقدار میں دستیاب ہیں۔ انہوں نے کہا کہ وزیراعلیٰ پنجاب کی ہدایت پر سرکاری رقبوں پر 100 فیصد گندم کی کاشت کی جائے اور محکمہ زراعت کو کسانوں کے ساتھ روابط مزید مضبوط کرنے کے لیے اقدامات کیے جا چکے ہیں۔

اجلاس میں گندم کے پیداواری مقابلوں کا بھی اعلان کیا گیا۔ صوبائی سطح پر اول، دوم اور سوم انعام کے طور پر بالترتیب 85، 75 اور 60 ہارس پاور کے ٹریکٹرز دیے جائیں گے۔ ضلعی سطح پر پہلے، دوسرے اور تیسرے انعام کے طور پر بالترتیب 10 لاکھ، 8 لاکھ اور 5 لاکھ روپے نقد انعامات مقرر کیے گئے ہیں۔

اوکاڑہ (نامہ نگار ملک ظفر)دیپالپور کے گورنمنٹ ایسوسی ایٹ خواتین کالج حجرہ شاہ مقیم میں صبر و استقامت کے موضوع پر آگاہی لیکچر کا انعقاد کیا گیا۔ لیکچر کا اہتمام پرنسپل شبانہ حسین کی زیر نگرانی کیا گیا، جس کا مقصد طالبات کی اخلاقی، فکری اور شخصی تربیت کو فروغ دینا تھا۔

لیکچر کے دوران پروفیسرز نے طالبات سے خطاب کرتے ہوئے کہا کہ صبر و استقامت ایک مضبوط شخصیت کی بنیاد ہے، جو انسان کو زندگی کے ہر امتحان میں کامیابی کی طرف لے جاتی ہے۔ مقررین نے زور دیا کہ طالبات ناکامیوں کو سیکھنے کا ذریعہ بنائیں اور مشکل حالات میں حوصلہ برقرار رکھیں۔

انہوں نے کہا کہ صبر کا مطلب صرف برداشت کرنا نہیں، بلکہ تدبر، حکمت اور مستقل مزاجی کے ساتھ آگے بڑھنے کا نام ہے۔ پروفیسرز نے معاشرتی اور تعلیمی مثالوں کے ذریعے طالبات کو صبر کی عملی اور روزمرہ زندگی میں اہمیت سے آگاہ کیا۔

آخر میں سوال و جواب کا سیشن ہوا جس میں طالبات نے بھرپور دلچسپی کا مظاہرہ کیا۔ کالج انتظامیہ نے اعلان کیا کہ اس طرح کے تربیتی پروگرامز کا سلسلہ آئندہ بھی جاری رکھا جائے گا تاکہ طالبات کی ہمہ جہت تربیت اور مثبت شخصیت سازی ممکن ہو سکے۔

اوکاڑہ (نامہ نگار ملک ظفر) ایڈیشنل ڈپٹی کمشنر جنرل علیزہ ریحان کی زیر صدارت انسدادِ سموگ کمیٹی کا جائزہ اجلاس منعقد ہوا جس میں ضلعی سطح پر سموگ کی روک تھام کے لیے تمام متعلقہ محکموں کی کارکردگی کا تفصیلی جائزہ لیا گیا۔ اجلاس میں ماحولیات، انڈسٹری، ہیلتھ، پولیس، ٹریفک، زراعت، لوکل گورنمنٹ، ایجوکیشن اور ہائی ویز کے افسران نے سموگ کے خاتمے کے لیے جاری اقدامات پر بریفنگ دی۔

اجلاس میں سموگ کی موجودہ صورتحال، جاری آگاہی مہم، شکایات کے اندراج، حکومتی پالیسی پر عملدرآمد اور فیلڈ سرگرمیوں پر بھی گفتگو ہوئی۔ ایڈیشنل ڈپٹی کمشنر علیزہ ریحان نے ہدایت کی کہ فیلڈ میں عملی اقدامات کو مزید تیز کیا جائے اور ضابطے کی ہر خلاف ورزی پر بلا امتیاز کارروائی یقینی بنائی جائے۔ انہوں نے کہا کہ زیگ زیگ ٹیکنالوجی نہ رکھنے والے بھٹوں کے خلاف کارروائی جاری رہے، فصلوں کی باقیات جلانے والوں کے خلاف فیلڈ ٹیمیں متحرک رہیں، جبکہ دھواں چھوڑنے والی گاڑیوں کے خلاف ٹریفک اور موٹروے پولیس مربوط ایکشن کرے۔

انہوں نے صفائی، چھڑکاؤ اور بیلٹس کی بہتری کے کاموں کو بھی مؤثر بنانے کی ہدایت کی۔

اوکاڑہ (نامہ نگار ملک ظفر) محتسب اعلیٰ پنجاب کی خصوصی ہدایت پر گورنمنٹ ایم سی ہائی سکول میں بچوں کے حقوق و تحفظ سے متعلق آگاہی سیمینار منعقد ہوا جس کی صدارت ضلعی ایڈوائزر صوبائی محتسب و اطفال کمشنر محمد شفیق احمد نے کی۔ لائنزان آفیسر میاں سرفراز حسین، اسسٹنٹ ڈائریکٹر عادل اصغر، صابر علی پرسنل اسسٹنٹ، اساتذہ، والدین اور بڑی تعداد میں طلباء نے شرکت کی۔

سیمینار میں لائیزان آفیسر سرفراز حسین نے بچوں کو ہراسگی سے بچاؤ، حقوق کے تحفظ اور فوری انصاف کے نظام سے متعلق اہم معلومات فراہم کیں۔ ضلعی ایڈوائزر محمد شفیق احمد نے کہا کہ صوبائی محتسب کا ادارہ عوامی شکایات کے فوری اور شفاف ازالے کے لیے سرگرم ہے جبکہ اطفال کمشنر بچوں کے حقوق کے بین الاقوامی معیار کے مطابق مؤثر حکمت عملی پر کام کر رہا ہے۔

انہوں نے واضح کیا کہ بچوں کے ساتھ تشدد، ناانصافی یا ہراسگی ناقابل برداشت ہے اور ایسے واقعات کی رپورٹنگ کے لیے ہیلپ لائن اور ضلعی دفاتر موجود ہیں۔ انہوں نے طلباء کو خود اعتمادی، اپنی حفاظت کے اصول اور خلاف ورزی کی صورت میں بروقت اطلاع دینے کی ترغیب دی۔ سیمینار کے اختتام پر آگاہی مواد تقسیم کیا گیا اور سوال و جواب کا سیشن بھی ہوا۔