Category: اوکاڑہ

اوکاڑہ (نامہ نگار ملک ظفر) فارن اسٹڈی کنسلٹنٹس ایسوسی ایشن (ایف ایس سی پاکستان) کے وفد نے چیئرمین راؤ شہزاد کی سربراہی میں گورنر پنجاب سردار سلیم حیدر خان سے گورنر ہاؤس لاہور میں ملاقات کی۔ ملاقات میں بیرونِ ممالک اعلیٰ تعلیم کے لیے جانے والے طلبہ کو درپیش مسائل اور ان کے حل پر تفصیلی تبادلۂ خیال کیا گیا۔

وفد نے تجویز دی کہ ایئرپورٹس پر ایسے طلبہ کی سہولت کے لیے خصوصی کاؤنٹر قائم کیے جائیں تاکہ کلیرنس اور دیگر مسائل کا بروقت سدباب کیا جا سکے۔ اس موقع پر میڈیا سے گفتگو کرتے ہوئے چیئرمین راؤ شہزاد نے کہا کہ ایسوسی ایشن اپنی صفوں میں احتساب کی مکمل صلاحیت رکھتی ہے اور کسی بھی غیر قانونی سرگرمی کی مذمت اور روک تھام کی جائے گی۔

انہوں نے مزید کہا کہ ایسے بدعنوان عناصر جو ملک و قوم کی بدنامی کا باعث بنتے ہیں، انہیں قانون کے کٹہرے میں لانا ناگزیر ہے۔ چیئرمین نے واضح کیا کہ فارن اسٹڈی کنسلٹنٹس ایسوسی ایشن (ایف ایس سی پاکستان) ہر قدم پر اداروں کے ساتھ کھڑی ہے۔

اوکاڑہ(نامہ نگارملک ظفر) ایڈیشنل ڈپٹی کمشنر (ریونیو) محمد شجین وسطرو کی زیر صدارت ڈسٹرکٹ اوورسیز کمیٹی کا ایک اہم اجلاس منعقد ہوا، جس میں سمندر پار پاکستانیوں کو درپیش مسائل کے حل کا جائزہ لیا گیا۔ اجلاس میں تمام متعلقہ محکموں کے افسران بھی شریک تھے۔

اجلاس کے دوران اوورسیز پاکستانیوں کی جانب سے پیش کیے گئے مختلف کیسز پر تفصیلی تبادلہ خیال کیا گیا۔ ایڈیشنل ڈپٹی کمشنر نے تمام کیسز کو فوری طور پر حل کرنے کے احکامات جاری کیے۔ انہوں نے اس موقع پر کہا کہ سمندر پار پاکستانی ہمارے لیے ایک قیمتی اثاثہ ہیں، اور ان کے جان و مال اور جائیدادوں کے تحفظ کو یقینی بنانا ہماری اولین ترجیح ہے۔

محمد شجین وسطرو نے وزیراعلیٰ پنجاب مریم نواز شریف کے خصوصی احکامات کا حوالہ دیتے ہوئے کہا کہ اوورسیز پاکستانیوں کو سہولیات فراہم کرنے کے لیے ہر ممکن کوشش کی جا رہی ہے۔ انہوں نے تمام متعلقہ افسران کو ہدایت کی کہ وہ ذاتی دلچسپی لیتے ہوئے اوورسیز کے مسائل کو ترجیحی بنیادوں پر حل کریں اور جائیدادوں کے تنازعات کو قانون کے مطابق میرٹ پر اور بروقت نمٹائیں۔

انہوں نے واضح کیا کہ سمندر پار پاکستانیوں کو کسی بھی قسم کی مشکلات کا سامنا نہیں ہونا چاہیے، اور انتظامیہ ان کے حقوق کے تحفظ کے لیے مکمل طور پر پرعزم ہے۔

اوکاڑہ (نامہ نگار،ملک ظفر) وزیراعلیٰ پنجاب مریم نواز شریف کے خصوصی پروگرام کے تحت اوکاڑہ میں ایک پروقار تقریب منعقد ہوئی جس میں خصوصی افراد میں وہیل چیئرز اور ٹرائی سائیکلز تقسیم کیے گئے۔ اس موقع پر صوبائی اسمبلی کے ممبران، چوہدری غلام رضا ربیرہ اور چوہدری جاوید علاؤالدین، نے ایڈیشنل ڈپٹی کمشنر جنرل علیزہ ریحان کے ہمراہ 52 خصوصی افراد کو امدادی آلات فراہم کیے۔

اس تقریب میں ڈپٹی ڈائریکٹر سوشل ویلفیئر محمد اشتیاق خان سمیت متعدد سرکاری افسران، خصوصی افراد اور ان کے اہل خانہ نے شرکت کی۔ معاون آلات حاصل کرنے والے افراد اور ان کے لواحقین نے وزیراعلیٰ پنجاب مریم نواز شریف کا شکریہ ادا کیا۔

ممبر صوبائی اسمبلی چوہدری غلام رضا ربیرہ نے کہا کہ مریم نواز کی حکومت خصوصی افراد کے لیے نچلی سطح پر کام کر رہی ہے اور ان کی مدد کے لیے ہمیشہ تیار ہے۔ انہوں نے صوبائی وزیر سوشل ویلفیئر اینڈ بیت المال، شوکت سہیل بٹ کی عوامی خدمات کو بھی سراہا۔

دوسری جانب نممبر صوبائی اسمبلی چوہدری جاوید علاؤالدین نے خصوصی بچوں کے والدین کی کاوشوں کو سراہتے ہوئے کہا کہ خصوصی افراد کو سہولیات فراہم کرنا ہم سب کی ذمہ داری ہے۔ انہوں نے وزیراعلیٰ کی مختصر مدت میں شاندار کارکردگی کی تعریف بھی کی۔

ایڈیشنل ڈپٹی کمشنر جنرل علیزہ ریحان نے خصوصی افراد کو معاشرے کا قیمتی حصہ قرار دیا اور کہا کہ ان کی امداد کرنا ایک فرض ہے اور حکومت اور ضلعی انتظامیہ اس سلسلے میں ہمیشہ ان کے ساتھ ہیں۔

اوکاڑہ(باغی ٹی وی،نامہ نگارملک ظفر) ڈپٹی کمشنر احمد عثمان جاوید کی ہدایت پر اسسٹنٹ کمشنر چوہدری رب نواز کی زیر نگرانی اکبر روڈ سے کوڑے کے ڈھیروں کا صفایا کر دیا گیا۔ شہر کو صاف ستھرا اور خوبصورت بنانے کی مہم کے تحت یہ کارروائی کی گئی جس میں بھاری مشینری کی مدد سے سڑک کے اطراف سے گندگی کے ڈھیر ہٹائے گئے۔

اس موقع پر اسسٹنٹ کمشنر چوہدری رب نواز نے کہا کہ شہر کی صفائی ستھرائی کو یقینی بنانے کے لیے صفائی ٹیموں کی نگرانی جاری ہے۔ انہوں نے مزید کہا کہ بیوٹیفیکیشن پلان کے تحت اکبر روڈ پر گرین بیلٹس بھی بنائی جائیں گی تاکہ صفائی کے ساتھ ساتھ روڈ کی خوبصورتی میں بھی اضافہ ہو سکے۔

انہوں نے اس بات پر زور دیا کہ ایک صاف ستھرا ماحول صحت مند زندگی کی ضمانت ہوتا ہے۔ انتظامیہ شہر کو صاف اور خوبصورت بنانے کے لیے مسلسل اقدامات کر رہی ہے تاکہ شہریوں کو ایک بہتر اور صحت مند ماحول فراہم کیا جا سکے۔

اوکاڑہ(باغی ٹی وی،نامہ نگار) حلقہ پی پی 190 کے دیہی علاقوں کی سڑکیں شدید ٹوٹ پھوٹ اور خستہ حالی کا شکار ہیں، جس پر شہریوں نے فوری مرمت اور تعمیر نو کا مطالبہ کیا ہے۔ آل پاکستان بھوہڑ ایسوسی ایشن کے رہنما اور سماجی کارکن ملک ظفر اقبال نے ایک بیان میں کہا کہ ان سڑکوں کی حالت اب اتنی خراب ہو چکی ہے کہ روزانہ کی بنیاد پر سفر کرنے والے افراد کو شدید مشکلات کا سامنا ہے۔

ملک ظفر اقبال نے بتایا کہ 22 فور ایل تا 31 فور ایل کوڑی روڈ گزشتہ 25 سال سے زبوں حالی کا شکار ہے۔ اس سڑک پر جگہ جگہ گڑھے اور ٹوٹ پھوٹ کی وجہ سے سفر کرنا مشکل ہو چکا ہے اور حادثات کا خطرہ بھی بڑھ گیا ہے۔

اسی طرح 31 فور ایل تا شاہبھور طبروق روڈ جو کروڑوں روپے کی لاگت سے تعمیر ہوا تھا، اب مناسب دیکھ بھال نہ ہونے کی وجہ سے خستہ حالی کا شکار ہے۔ سڑک کے کناروں پر حفاظتی دیوار نہ ہونے کے باعث یہ ٹوٹ رہی ہے، جس کے نتیجے میں کئی چھوٹے بڑے حادثات ہو چکے ہیں۔

ملک ظفر اقبال نے ڈپٹی کمشنر اوکاڑہ اور کمشنر ساہیوال سے فوری نوٹس لینے کا مطالبہ کیا ہے۔ انہوں نے کہا کہ اگر ان سڑکوں کی بروقت مرمت اور تعمیر نو نہ کی گئی تو یہ مکمل طور پر ناقابل استعمال ہو جائیں گی، جس سے پورے علاقے کو نقصان ہوگا۔ انہوں نے حکام سے اپیل کی کہ عوامی مشکلات کو ختم کرنے کے لیے فوری اقدامات کیے جائیں۔

اوکاڑہ(نامہ نگارملک ظفر) ڈپٹی کمشنر اوکاڑہ احمد عثمان جاوید کی زیر صدارت ضلعی انتظامیہ کے افسران کا ایک اہم اجلاس منعقد ہوا۔ اجلاس میں ایڈیشنل ڈپٹی کمشنرز اور اسسٹنٹ کمشنرز سمیت تمام متعلقہ افسران نے شرکت کی۔

اجلاس میں ایڈیشنل ڈپٹی کمشنر ریونیو محمد شجعین وسطرو، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ایڈیشنل ڈپٹی کمشنر جنرل علیزہ ریحان، اسسٹنٹ کمشنر چوہدری رب نواز اور دیگر افسران نے شرکت کی، جبکہ اسسٹنٹ کمشنر دیپال پور فیصل ولید اور اسسٹنٹ کمشنر رینالہ خورد انعم علی خان نے بذریعہ ویڈیو لنک شرکت کی۔

ڈپٹی کمشنر احمد عثمان جاوید نے افسران کو ہدایات جاری کرتے ہوئے کہا کہ ضلع کی خوبصورتی (بیوٹیفکیشن) کے جاری منصوبوں کی نگرانی کی جائے اور ریونیو سے متعلق معاملات کو ترجیحی بنیادوں پر حل کیا جائے۔ انہوں نے زور دیا کہ ترقیاتی منصوبوں کی پیش رفت جاننے کے لیے تواتر سے فیلڈ وزٹس کیے جائیں۔

احمد عثمان جاوید نے تمام افسران پر زور دیا کہ عوام کی خدمت ان کی اولین ترجیح ہونی چاہیے۔ انہوں نے ہدایت کی کہ عوامی مسائل کے حل کے لیے تمام افسران فیلڈ میں موجود رہیں تاکہ شہریوں کو کسی بھی قسم کی دشواری کا سامنا نہ کرنا پڑے۔