Category: اوکاڑہ

اوکاڑہ (نامہ نگار ملک ظفر) اوکاڑہ شہر میں موسلادھار بارش نے حبس زدہ موسم کا خاتمہ کر دیا اور جل تھل ایک ہو گیا۔ بارش کے باعث شہریوں کو شدید گرمی اور گھٹن سے نجات ملی، جس پر عوام نے سکھ کا سانس لیا اور قدرت کے اس انعام پر شکر ادا کیا۔

بارش سے قبل شہر میں گزشتہ دو روز سے واپڈا کی جانب سے غیر اعلانیہ اور طویل لوڈشیڈنگ جاری تھی، جس سے عوام شدید اذیت میں مبتلا تھے۔ حبس زدہ موسم اور بجلی کی بندش نے بزرگوں، بچوں اور مریضوں کی حالت غیر کر دی تھی۔ تاہم جیسے ہی بارش کا آغاز ہوا، واپڈا نے بجلی بحال کر دی۔

عوامی حلقوں نے واپڈا کے اس رویے پر شدید ناراضی کا اظہار کرتے ہوئے مطالبہ کیا ہے کہ برسات کے موسم میں بجلی کی فراہمی کو یقینی بنایا جائے، کیونکہ بارش کے بعد اکثر موسم میں نمی بڑھ جاتی ہے اور حبس کی شدت میں اضافہ ہو جاتا ہے، ایسے میں بجلی کی بندش شہریوں کے لیے ناقابل برداشت ہو جاتی ہے۔ شہریوں نے حکومت سے مطالبہ کیا ہے کہ وہ واپڈا کی غیر اعلانیہ لوڈشیڈنگ کا سخت نوٹس لے تاکہ موسم کی شدت کے دوران عوام کو بنیادی سہولیات میسر رہیں۔

اوکاڑہ (نامہ نگار ملک ظفر) اسسٹنٹ کمشنر رب نواز نے مون سون بارشوں کے دوران بارشی پانی کے فوری نکاس کو یقینی بنانے کے لیے شہر کے مختلف علاقوں میں نالیوں کی صفائی اور ڈسپوزل اسٹیشنز کا تفصیلی جائزہ لیا۔ انہوں نے گول چوک سے ملحقہ بازاروں میں سینٹری ورکرز کی کارکردگی کا معائنہ کیا اور انہیں ہدایت کی کہ نکاسی آب کے لیے تمام نالیاں مکمل طور پر صاف اور فعال رکھی جائیں۔

اسسٹنٹ کمشنر نے 1/4 ایل کے واٹر ڈسپوزل اسٹیشن کی مشینری اور سٹاف کی حاضری کا بھی جائزہ لیا اور واضح احکامات جاری کیے کہ بارشوں کے دوران ڈسپوزل اسٹیشنز کی مشینیں مسلسل فعال رہیں۔ انہوں نے تمام متعلقہ افسران کو ہدایت کی کہ ڈسپوزل سٹیشنز میں جنریٹرز کے لیے وافر مقدار میں ڈیزل دستیاب رکھا جائے تاکہ کسی بھی ہنگامی صورتحال میں مشینری بند نہ ہو۔

رب نواز نے مزید کہا کہ مون سون سیزن کے دوران صفائی اور پانی کے نکاس کا عمل تسلسل کے ساتھ جاری رکھا جائے اور واٹر ڈسپوزل اسٹیشنز کو مکمل طور پر فنکشنل حالت میں رکھا جائے۔ انہوں نے تحصیل روڈ اور فیصل آباد روڈ پر بھی صفائی اور پانی کے انخلاء کے انتظامات کا جائزہ لیا اور متعلقہ عملے کو موقع پر ضروری ہدایات دیں۔

اوکاڑہ (نامہ نگار ملک ظفر) ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر نے ڈسٹرکٹ ہیڈ کوارٹر ہسپتال سٹی اوکاڑہ کا دورہ کیا اور مختلف شعبہ جات میں طبی سہولیات، صفائی ستھرائی، مفت ادویات کی فراہمی اور لیبارٹری خدمات کا تفصیلی جائزہ لیا۔ انہوں نے مریضوں کی عیادت کی اور دستیاب سہولیات سے متعلق اطمینان یا عدم اطمینان کا اظہار بھی کیا۔

اس موقع پر انہوں نے کہا کہ سرکاری اسپتالوں کی ابتر صورتحال کسی صورت برداشت نہیں کی جائے گی اور شعبہ صحت میں معیاری سہولیات کی فراہمی پر کوئی سمجھوتہ نہیں کیا جائے گا۔ چوہدری عبدالجبار گجر کا کہنا تھا کہ حکومت پنجاب، خاص طور پر وزیر اعلیٰ مریم نواز شریف، عوام سے کیے گئے صحت سہولیات کے وعدے کو ہر صورت پورا کرنے کے لیے کوشاں ہیں اور اس مقصد کے لیے مختلف شعبوں میں انقلابی اقدامات کیے جا رہے ہیں۔

انہوں نے ڈاکٹرز، پیرا میڈیکل اسٹاف اور دیگر عملے پر زور دیا کہ وہ عوامی خدمت کے جذبے کے تحت مریضوں کی دلجمعی سے دیکھ بھال کریں اور اپنی ذمہ داریوں کو پوری دیانت داری سے سرانجام دیں تاکہ حکومت کی جانب سے فراہم کردہ وسائل کا حقیقی فائدہ عوام کو پہنچ سکے۔

اوکاڑہ (نامہ نگار ملک ظفر) ڈپٹی کمشنر احمد عثمان جاوید نے کہا ہے کہ محرم الحرام کے دوران امن کی فضا کو برقرار رکھنے کے لیے تمام اداروں کو باہمی ربط کے ساتھ ذمہ دارانہ کردار ادا کرنا ہوگا۔ انہوں نے کہا کہ رواداری، محبت اور باہمی برداشت کو فروغ دے کر ہی معاشرے میں پائیدار امن قائم رکھا جا سکتا ہے، اور اس ضمن میں ہر شہری کو اپنا کردار ادا کرنا ہوگا۔

ان خیالات کا اظہار انہوں نے محرم الحرام کے دوران مجالس اور جلوسوں کے سیکیورٹی و دیگر انتظامات کے جائزہ اجلاس کی صدارت کرتے ہوئے کیا۔ اجلاس میں پولیس سمیت تمام وفاقی و صوبائی اداروں کے افسران نے شرکت کی۔

ڈپٹی کمشنر نے سرکاری اداروں کو ہدایت کی کہ مجالس اور جلوسوں کے روٹس پر صفائی، تجاوزات کا خاتمہ، لٹکتی ہوئی بجلی، ٹیلی فون و کیبل کی تاروں کو اونچا کرنے، اسٹریٹ لائٹس کی مرمت و تنصیب، پیچ ورک، طبی امداد کی فراہمی، اور پورٹ ایبل واش رومز کی بروقت تنصیب یقینی بنائی جائے۔ انہوں نے کہا کہ ان ایام میں پولیس کے علاوہ واپڈا، سوئی گیس، محکمہ صحت، سول ڈیفنس، بم ڈسپوزل اسکواڈ کے عملے کو بھی ذمہ داریاں سونپی جائیں گی تاکہ کسی بھی ہنگامی صورتِ حال سے بروقت نمٹا جا سکے۔

انہوں نے تینوں تحصیلوں کے چیف افسران کو ہدایت کی کہ حالیہ بارشوں کے تناظر میں مشینری کو فنگشنل رکھا جائے اور فیلڈ اسٹاف کو الرٹ رکھا جائے تاکہ کسی بھی صورتحال میں فوری ردعمل ممکن ہو۔ ڈپٹی کمشنر نے مزید کہا کہ وزیر اعلیٰ پنجاب مریم نواز کی ہدایات کے مطابق عاشورہ محرم کے دوران عزاداروں، ماتمی حضرات اور جلوسوں کے شرکاء کو تمام ممکنہ سہولیات فراہم کی جائیں گی، اور ضلعی انتظامیہ اس سلسلے میں مثالی اقدامات کرے گی۔

اوکاڑہ (نامہ نگار ملک ظفر)چیئرپرسن وزیراعلیٰ ڈائریکٹوریٹ انسپکشن اینڈ مانیٹرنگ پنجاب برگیڈیئر (ر) بابر علاؤالدین محرم الحرام کے موقع پر امن و امان کے انتظامات کا جائزہ لینے کے لیے اوکاڑہ پہنچے، جہاں انہوں نے ڈی سی آفس میں ضلعی امن کمیٹی کے اجلاس کی صدارت کی۔

اجلاس میں ڈپٹی کمشنر اوکاڑہ احمد عثمان جاوید، ڈی پی او محمد راشد ہدایت، سیاسی و سماجی شخصیات، سول سوسائٹی نمائندگان اور صحافیوں کی کثیر تعداد نے شرکت کی۔

برگیڈیئر (ر) بابر علاؤالدین نے اجلاس سے خطاب اور میڈیا سے گفتگو کرتے ہوئے کہا کہ محرم الحرام میں فرقہ وارانہ ہم آہنگی کو ہر صورت برقرار رکھا جائے گا، اور سوشل میڈیا پر فرقہ واریت پھیلانے والوں کے خلاف سخت قانونی کارروائی کی جائے گی۔

انہوں نے تمام مسالک اور ضلعی امن کمیٹی سے اپیل کی کہ وہ محرم کے دوران بھائی چارے، اتحاد اور امن کا پیغام عام کریں۔ چیئرپرسن نے ضلعی انتظامیہ کی جانب سے تیار کردہ سیکیورٹی پلان پر اعتماد کا اظہار کرتے ہوئے کہا کہ عوامی تعاون سے محرم الحرام پُرامن طریقے سے گزارا جا سکتا ہے۔