Category: اوکاڑہ

اوکاڑہ (نامہ نگار: ملک ظفر) پاکستان میں آزادیٔ صحافت کی جدوجہد کو خراجِ تحسین پیش کرنے کے لیے لاہور پریس کلب میں "یومِ عزم” کی تقریب منعقد ہوئی، جس میں مقررین نے اعتراف کیا کہ پاکستان میں صحافی نہ پہلے آزاد تھے نہ آج آزادیٔ صحافت میسر ہے، لیکن صحافی آج بھی اس جدوجہد کے لیے پوری طرح پرعزم ہیں۔

تقریب کا انعقاد پی ایف یو جے کی کال پر پنجاب یونین آف جرنلسٹس اور لاہور پریس کلب کے اشتراک سے کیا گیا، جس میں 13 مئی 1978 کو آمر ضیاء الحق کے دور میں کوڑے کھانے والے صحافیوں خاور نعیم ہاشمی، ناصر زیدی، اقبال جعفری اور مسعود اللہ خان کی قربانیوں کو یاد کیا گیا۔ تقریب میں پی ایف یو جے کے سیکرٹری جنرل ارشد انصاری، سینئر صحافی خاور نعیم ہاشمی، پی یو جے کے صدر نعیم حنیف، جنرل سیکرٹری قمرالزمان بھٹی، انسانی حقوق کمیشن پاکستان کے نائب صدر راجہ اشرف، معروف شاعر بابا نجمی اور لارڈ ایم کے پاشا سمیت صحافی برادری کی بڑی تعداد نے شرکت کی۔

ارشد انصاری نے تقریب سے خطاب کرتے ہوئے اعلان کیا کہ آئندہ سال سے پی ایف یو جے ان صحافیوں کی جدوجہد کے اعتراف میں ہر سال ایک خصوصی ایوارڈ دے گی۔ انہوں نے حکومت سے مطالبہ کیا کہ پیکا جیسے "کالے قانون” کو فی الفور ختم کیا جائے، بصورتِ دیگر پی ایف یو جے جوائنٹ ایکشن کمیٹی کے تحت تحریک چلائے گی۔

خاور نعیم ہاشمی نے جنرل ضیاء الحق کے دور کی یادیں تازہ کرتے ہوئے کہا کہ اس وقت صحافیوں کو دانستہ طور پر تقسیم کیا گیا تاکہ آزادیٔ صحافت کو کچلا جا سکے، لیکن آج صحافی پی ایف یو جے کے تحت متحد ہیں اور ہمیں اس اتحاد کو مزید مضبوط بنا کر آئینی حقوق کے تحفظ کی تحریک کو آگے بڑھانا ہوگا۔

پی یو جے کے صدر نعیم حنیف نے کہا کہ صحافیوں نے ہمیشہ آزادیٔ اظہار کے لیے قربانیاں دی ہیں، اور آج بھی تیار ہیں۔ تقریب کے آخر میں خاور نعیم ہاشمی نے پی ایف یو جے کے سابق صدر احفاظ الرحمن کی کتاب "آزادیٔ صحافت کی سب سے بڑی جنگ” اپنے دستخط کے ساتھ شرکاء میں تقسیم کی۔

تقریب میں لاہور پریس کلب کے سینئر نائب صدر افضال طالب، نائب صدر صائمہ نواز، پی یو جے کے سینئر نائب صدر یوسف رضا عباسی، خزانچی نسیم قریشی، جوائنٹ سیکرٹری عمران شیخ، خزانچی سالک نواز، سینئر صحافی سعید اختر، رفیق خان، صلاح الدین بٹ، حامد نواز، ڈاکٹر شجاعت حامد، جمال احمد، ندیم سلیمی اور جاوید ہاشمی سمیت صحافی برادری کی کثیر تعداد نے شرکت کی۔

اوکاڑہ (باغی ٹی وی، نامہ نگار: ملک ظفر)معروف کیمیکل انجینئر علی نے کہا ہے کہ افواجِ پاکستان نے ایک مرتبہ پھر اپنی پیشہ ورانہ مہارت، جرات اور جذبۂ شہادت سے دشمن کے ناپاک عزائم کو خاک میں ملا دیا ہے۔ اوکاڑہ میں مقامی صحافیوں سے گفتگو کرتے ہوئے انہوں نے کہا کہ دشمن نے رات کی تاریکی میں بزدلی کا مظاہرہ کیا، مگر ہماری افواج نے دن کی روشنی میں ایسا منہ توڑ جواب دیا کہ وہ عالمی سطح پر شرمندگی کا شکار ہو گیا۔

انجینئر علی کا کہنا تھا کہ پاکستان ایک پرامن ملک ہے لیکن دشمن کی کسی بھی جارحیت کا جواب پوری طاقت اور بروقت حکمت عملی سے دیا جائے گا۔ انہوں نے کہا کہ ہماری بہادر افواج ہر محاذ پر چوکنا ہیں اور دشمن کے ہر حملے کو نہ صرف ناکام بنانے بلکہ اُسے سبق سکھانے کی مکمل صلاحیت رکھتی ہیں۔

انہوں نے اس بات پر زور دیا کہ پوری پاکستانی قوم افواج پاکستان کے شانہ بشانہ کھڑی ہے، اور وطنِ عزیز کی بقاء، خودمختاری اور سلامتی کے لیے ہر قربانی دینے کو تیار ہے۔ انجینئر علی نے کہا کہ ہماری مسلح افواج قوم کا فخر ہیں، اور ان کی حالیہ کامیاب کارروائیوں نے ثابت کر دیا ہے کہ دشمن کے عزائم ناکام ہونے کے سوا کوئی راستہ نہیں رکھتے۔

اس موقع پر کیمیکل انجینئر صدام حسین، محمد وقار، ساجد علی، منیب، ملک یاور علی اور محمد ارسلان بھی موجود تھے۔ شرکاء نے افواجِ پاکستان کو خراج تحسین پیش کرتے ہوئے کہا کہ ملک کا ہر فرد اپنی فوج کی پشت پر کھڑا ہے اور وہ دن دور نہیں جب دشمن مایوس ہو کر پسپائی اختیار کرے گا۔

اوکاڑہ (نامہ نگار ملک ظفر اقبال) ایپیکس گروپ آف کالجز گیمبر کیمپس نے افواجِ پاکستان کی تاریخی کامیابی "آپریشن بنیان مرصوص” پر اظہارِ تشکر کے طور پر ایک شاندار ریلی کا انعقاد کیا۔ اس ریلی کا مقصد افواجِ پاکستان کو خراجِ تحسین پیش کرنا اور ملک بھر میں اتحاد، یکجہتی اور حب الوطنی کا پیغام دینا تھا۔

ریلی میں ایپیکس گروپ آف کالجز گیمبر کے طلبہ نے قومی پرچم اور پاک فوج کے حق میں کتبے اُٹھا رکھے تھے اور "پاکستان زندہ باد” و "افواجِ پاکستان پائندہ باد” کے فلک شگاف نعرے گونجتے رہے۔ اس پروقار تقریب میں کالج کے ڈائریکٹر و پرنسپل راؤ رشید احمد سمیت دینی، سیاسی، سماجی، اور صحافتی شخصیات نے شرکت کی۔

ڈائریکٹر راؤ رشید احمد نے خطاب کرتے ہوئے کہا کہ "افواجِ پاکستان نے قوم کے وقار، سلامتی اور دفاع کے لیے جو قربانیاں دی ہیں، وہ ناقابلِ فراموش ہیں۔ آپریشن بنیان مرصوص دشمن کے عزائم کو خاک میں ملانے کی ایک درخشاں مثال ہے، اور پوری قوم کو اس فتح پر فخر ہے۔”

ریلی کے اختتام پر ملکی سلامتی، استحکام اور افواجِ پاکستان کی کامیابیوں کے تسلسل کے لیے دعا بھی کی گئی۔ شہریوں نے اس جذبے کو سراہتے ہوئے اسے وطن سے محبت کا ایک خوبصورت مظہر قرار دیا۔

اوکاڑہ،باغی ٹی وی (نامہ نگار ملک ظفر) انسداد تجاوزات مہم کے تحت اوکاڑہ میں سب ڈویژن انفورسمنٹ آفیسر وسیم جاوید نے کارروائی کرتے ہوئے عید گاہ روڈ، گڑ بازار اور بینظیر روڈ پر چیکنگ کی۔ تجاوزات کی خلاف ورزی کرنے والے متعدد دکانداروں کا سامان قبضے میں لے لیا گیا جبکہ عید گاہ روڈ پر موجود دو دکانداروں کو بھاری جرمانے بھی عائد کیے گئے۔

وسیم جاوید کا کہنا تھا کہ دکانداروں کو بارہا تنبیہ کے باوجود خلاف ورزیوں سے باز نہیں آ رہے، اس لیے اب سخت کارروائی کی جا رہی ہے۔ انہوں نے دکانداروں کو خبردار کیا کہ اپنی مقررہ حدود میں رہیں، بصورت دیگر انہیں جرمانوں اور قانونی کارروائی کا سامنا کرنا پڑے گا۔ انسداد تجاوزات مہم کو شہر بھر میں مؤثر طریقے سے جاری رکھا جائے گا تاکہ عوام کو درپیش مشکلات کا خاتمہ کیا جا سکے۔

اوکاڑہ ،باغی ٹی وی (نامہ نگار ملک ظفر) گیمبر اوکاڑہ کینٹ کے سول ایریا میں پاک فوج اور ایئر فورس کے شاہینوں کو خراجِ تحسین پیش کرنے اور بھارتی جارحیت کے خلاف یکجہتی کے اظہار کے لیے ایک پُرجوش ریلی کا انعقاد کیا گیا۔ ریلی کی قیادت کنٹونمنٹ بورڈ اوکاڑہ کینٹ کے وائس پریذیڈنٹ چوہدری عمیر خادم نے کی۔

ریلی میں مختلف سیاسی، سماجی، دینی، صحافتی اور کاروباری شخصیات کے علاوہ شہریوں کی بڑی تعداد نے شرکت کی۔ شریک افراد میں ممبر کینٹ بورڈ شہزاد شفیع محمد، سابق وائس پریذیڈنٹ چوہدری اختر حمید، مرزا ماجد بیگ، مرزا مسعود بیگ، مرزا کامران بیگ، ملک کاظم نیاز جھکڑ، چوہدری اطہر اقبال، راجہ شفقت محمود، محمد فاطر علی اور دیگر معززین شامل تھے۔

شرکاء نے ہاتھوں میں بینرز اور پلے کارڈز اٹھا رکھے تھے جن پر چیف آف آرمی اسٹاف جنرل حافظ سید عاصم منیر اور وزیرِاعظم میاں محمد شہباز شریف کی تصاویر آویزاں تھیں۔ بینرز پر "پاک فوج زندہ باد”، "پاکستان پائندہ باد” اور "دشمن کو گھر میں گھس کر مارا” جیسے فلک شگاف نعرے درج تھے۔

ریلی کے دوران شرکاء نے چیک پوسٹ پر موجود فوجی جوانوں کو سیلوٹ پیش کیے اور ان کی جرات و بہادری کو خراجِ تحسین پیش کیا۔ اس موقع پر بھارتی جارحیت کے خلاف قومی یکجہتی کے مظاہرے کے طور پر مٹھائی تقسیم کی گئی اور وطن عزیز کی سلامتی کے لیے خصوصی دعائیں کی گئیں۔

ریلی سے خطاب کرتے ہوئے چوہدری عمیر خادم نے کہا کہ پاک فوج اور ہماری ایئر فورس کے جانباز بھارتی جارحیت کا منہ توڑ جواب دینے کی بھرپور صلاحیت رکھتے ہیں۔ ہماری افواج نے دشمن کو اس کے گھر میں گھس کر شکست دی، جس کی مثال تاریخ میں کم ہی ملتی ہے۔

یہ ریلی نہ صرف دشمن کو واضح پیغام تھی بلکہ پاک افواج کے حوصلے بلند کرنے اور قوم کی یکجہتی کا عملی مظاہرہ بھی ثابت ہوئی۔

اوکاڑہ (نامہ نگار ملک ظفر) پاکستان مسلم لیگ (ن) کے سینئر رہنما اور سماجی کارکن ملک خالد یعقوب نے کہا ہے کہ پاکستانی عوام اپنی مسلح افواج کے ساتھ چٹان کی طرح کھڑی ہے، اور ماضی کی طرح ہر مشکل گھڑی میں فوج کا ساتھ دیتی رہی ہے۔ انہوں نے واضح کیا کہ سیاست میں اختلافات جمہوریت کا حسن ہوتے ہیں، لیکن کوئی بھی سیاسی جماعت یا رہنما پاک فوج کو تنہا نہیں چھوڑ سکتا۔

اپنے بیان میں ملک خالد یعقوب نے کہا کہ ملک کی سرحدوں کی حفاظت پر معمور فوج کے بدولت ہی عوام گھروں میں سکون سے زندگی گزار رہے ہیں۔ ان کا کہنا تھا کہ بھارت ایک منظم سازش کے تحت پاکستان کو جنگ میں دھکیلنا چاہتا ہے، لیکن پاکستانی قوم ایک امن پسند قوم ہے جو دفاع کا حق بھی رکھتی ہے اور دشمن کو منہ توڑ جواب دینے کی مکمل صلاحیت بھی۔

انہوں نے کہا کہ اگر جنگ مسلط کی گئی تو ہمارا دفاع ایسا ہوگا کہ بھارت کی آنے والی نسلیں بھی اسے یاد رکھیں گی۔ ملک خالد یعقوب نے زور دیا کہ بھارت اور پاکستان کو جنگ کے بجائے مذاکرات کی میز پر آنا چاہیے کیونکہ دونوں ایٹمی طاقتیں ہیں اور جنگ کسی کے مفاد میں نہیں۔ انہوں نے کہا کہ جنگ بچوں کا کھیل نہیں بلکہ خطے اور دنیا کے امن کے لیے بڑا خطرہ بن سکتی ہے، اس لیے ہوش مندی اور حکمت کی ضرورت ہے۔

اوکاڑہ (نامہ نگار ملک ظفر) حکومت پنجاب کی ہدایات پر ڈپٹی کمشنر و کنٹرولر سول ڈیفنس احمد عثمان جاوید کی زیر نگرانی خالد شیر دل جمنیزیم اوکاڑہ میں بھارتی جنگی جارحیت کے خطرے کے پیش نظر شہری دفاعی مشقوں کا عملی مظاہرہ کیا گیا۔ ان مشقوں میں پولیس، ریسکیو 1122، سول ڈیفنس، بم ڈسپوزل، سی ٹی ڈی، اسپیشل برانچ، ٹریفک پولیس اور ایلیٹ فورس کے اہلکاروں نے شرکت کی۔

تربیتی مشق میں ہوائی حملے کی فرضی صورتحال پیدا کی گئی جس میں سول ڈیفنس اہلکاروں نے عوام کو محفوظ مقامات پر منتقل کرنے، زخمیوں کو فرسٹ ایڈ فراہم کرنے، آگ بجھانے اور بم کو ناکارہ بنانے جیسے اقدامات کا عملی مظاہرہ پیش کیا۔ ریسکیو 1122 نے جدید مشینری کی مدد سے فائر فائٹنگ اور ریسکیو آپریشنز انجام دیے جبکہ بم ڈسپوزل اسکواڈ نے تمام حفاظتی اقدامات کے تحت آئی ای ڈی کو ناکارہ بنایا۔

ڈپٹی کمشنر احمد عثمان جاوید اور ڈی پی او راشد ہدایت، ایڈیشنل ڈپٹی کمشنر ریونیو محمد ابراہیم ارباب، سول ڈیفنس آفیسر وقار اکبر اور دیگر افسران نے مشقوں کی نگرانی کی اور تمام محکموں کے فوری رسپانس اور پیشہ ورانہ تیاریوں کو سراہا۔

ڈپٹی کمشنر نے کہا کہ بھارتی جنگی جنون کے تناظر میں شہریوں کے تحفظ کے لیے سول اداروں کی بھرپور تیاری اور حب الوطنی کا جذبہ لائق تحسین ہے۔ انہوں نے تمام متعلقہ محکموں کو ہدایت کی کہ ملکی دفاع اور عوامی سلامتی کے لیے اسی جوش و جذبے کے ساتھ اپنی ذمہ داریاں سر انجام دیں۔

اوکاڑہ (نامہ نگار ملک ظفر) بھارتی جارحیت کے خلاف اور پاک فوج سے اظہارِ یکجہتی کے لیے آل پاکستان کلرکس ایسوسی ایشن (ایپکا) کے زیرِ اہتمام ایک بڑی ریلی کا انعقاد کیا گیا، جس میں سینکڑوں کارکنوں نے شرکت کی۔ ریلی ڈسٹرکٹ ایجوکیشن آفس سے شروع ہوئی اور ڈپٹی کمشنر آفس تک پہنچی، جہاں پہلے سے موجود شہریوں نے ریلی کا پرتپاک استقبال کیا اور اس میں شامل ہو گئے۔

ریلی کے شرکاء نے قومی پرچم تھام رکھے تھے اور فضا "پاک فوج زندہ باد” اور "بھارت مردہ باد” کے نعروں سے گونجتی رہی۔ مظاہرین کا کہنا تھا کہ بھارت کی طرف سے جاری جارحیت صرف فوج کے خلاف نہیں بلکہ پوری پاکستانی قوم کے خلاف ہے۔ ان کا کہنا تھا کہ یہ جنگ 25 کروڑ پاکستانیوں کی جنگ ہے، اور پوری قوم اپنی بہادر افواج کے ساتھ شانہ بشانہ کھڑی ہے۔

ریلی کا مقصد نہ صرف دشمن کو واضح پیغام دینا تھا بلکہ اندرون ملک اتحاد، یکجہتی اور قومی شعور کو اجاگر کرنا بھی تھا۔ ایپکا کے رہنماؤں نے کہا کہ دشمن کی ہر سازش کو ناکام بنانے کے لیے قوم متحد ہے، اور عوام فوج کی ہر قربانی کو قدر کی نگاہ سے دیکھتے ہیں۔

اوکاڑہ ،باغی ٹی وی(نامہ نگار، ملک ظفر) اوکاڑہ یونیورسٹی کے دوسرے کانووکیشن کی شاندار اور پروقار تقریب کا انعقاد کیا گیا جس میں مختلف شعبہ جات کے 10,654 طلباء و طالبات کو ڈگریاں تفویض کی گئیں، جبکہ نمایاں کارکردگی دکھانے والے طلباء و طالبات کو گولڈ میڈلز سے نوازا گیا۔

تقریب کے مہمانِ خصوصی گورنر پنجاب و چانسلر سردار سلیم حیدر خان تھے، جنہوں نے فارغ التحصیل طلباء میں ڈگریاں تقسیم کیں اور ان کی علمی کاوشوں کو سراہا۔ انہوں نے تقریب سے خطاب کرتے ہوئے کہا کہ:
"اوکاڑہ یونیورسٹی ایک نئی درسگاہ ہونے کے باوجود بہت تیزی سے ترقی کی منازل طے کر رہی ہے۔ وائس چانسلر ڈاکٹر سجاد مبین کی قیادت میں یہ ادارہ نہ صرف قومی بلکہ عالمی سطح پر مقام حاصل کرے گا۔”

انہوں نے اساتذہ، انتظامیہ اور طلباء کو مبارک باد پیش کی اور کہا کہ چانسلر آفس آئندہ بھی یونیورسٹی کے ساتھ ہر ممکن تعاون جاری رکھے گا۔ گورنر پنجاب نے نوجوانوں کو محنت، دیانت اور کردار سازی کی تلقین کرتے ہوئے کہا کہ:
"پاکستان کی نوجوان نسل باصلاحیت ہے، ہمیں ان کی اخلاقی و علمی تربیت پر بھرپور توجہ دینی چاہیے تاکہ وہ دنیا بھر میں ملک و ملت کا نام روشن کریں۔”

تقریب سے خطاب کرتے ہوئے وائس چانسلر پروفیسر ڈاکٹر سجاد مبین نے کہا کہ اوکاڑہ یونیورسٹی کا یہ دن ایک تاریخی سنگِ میل کی حیثیت رکھتا ہے۔ انہوں نے کہا:
"ہماری یونیورسٹی اعلیٰ تعلیم کے ساتھ ساتھ تحقیق، اخلاقیات اور قومی خدمت کے جذبے کو فروغ دے رہی ہے۔ ہماری ٹیم کی انتھک محنت سے ادارے کی ساکھ مستحکم ہوئی ہے۔”

کانووکیشن میں سابق اراکینِ قومی اسمبلی میاں علی حسن، سجاد الحسن، سماجی رہنما رائے غلام مجتبیٰ، رانا عبد الرحمن ایڈووکیٹ، شبیر حسین جعفری، سلیمان غنی سمیت دیگر اہم شخصیات نے شرکت کی۔

تقریب کے دوران سکیورٹی کے سخت انتظامات کیے گئے، جن کی نگرانی ڈی پی او اوکاڑہ راشد ہدایت اور ایس پی انویسٹیگیشن ملک داؤد احمد خان نے کی۔ سکیورٹی اہلکاروں نے پیشہ ورانہ انداز میں تقریب کو پرامن اور منظم بنایا۔