Category: کوئٹہ

کوئٹہ (اے پی پی) ڈپٹی کنزرویٹر فاریسٹ لسبیلہ مقبول حسن دشتی کی خصوصی ہدایت پر فاریسٹ آفیسر اوتھل سید طارق شاہ نے اپنی ٹیم کے ہمراہ مکران کوسٹل ہائی وے لیاری کے قریب کامیاب کارروائی کرتے ہوئے 3 شکاریوں کو گرفتار کرکے 29 کونج برآمد کرکے انہیں محکمہ وائلڈ لائف ایکٹ کے تحت چالان کر کے مزید تفتیش شروع کردی ہے۔ان خیالا ت کا اظہار ڈپٹی کنزرویٹر فاریسٹ لسبیلہ مقبول حسن دشتی نے اپنے دفتر میں دی گئی بریفنگ میں بتایا کہ رواں سیزن کے دوران یہ ہماری دوسری کامیاب کاروائی ہے۔گزشتہ ماہ بین الصوبائی شکاریوں کے خلاف کریک ڈاؤن کیا،انہوں نے کہا کہ ہمیں اطلاح ملی تھی کہ پشاور کے علاقہ کرک سے تعلق رکھنے والے شکاری غیر قانونی طور پر سائبریا سے آنے والے مہمان پرندوں کا شکار کررہے ہیں،جس پر ہم نے پٹرو لنگ پر مامور ٹیم کو فوری کاروائی کے احکامات جاری کیں۔انہوں نے کہا کہ گرفتار کئے گئے شکاریوں سے آلات نیٹ سمیت 29 کونج برآمد کئے جن میں سے 12کونج گرمی کی وجہ سے مرگئے انہیں تحویل میں لیکر قانونی کاروائی کا آغاز کردیا ہے، مقبول حسن دشتی کامزید کہنا تھا کہ لسبیلہ میں کسی کو غیر قانونی شکار کرنے کی اجازت نہیں دینگے شکار میں ملوث افراد کے خلاف کاروائیاں جاری رہیں گی جنگلی حیات اور سائبیریا سے آنے والے مہمان پرندوں کا تحفظ ہر صورت میں یقینی بنایا جائے گا، انہوں نے کہا لسبیلہ کے مقامی لوگ باہر سے آنے والے لوگوں کی پشت پناہی کی بجائے محکمہ جنگلات لسبیلہ سے تعاون کریں،ا نہوں نے کہا کہ پرندوں کی نسل کشی کرنے والوں کے خلاف کاروائیاں جاری وساری رہیں گی۔

کوئٹہ۔07 اکتو بر (اے پی پی)صوبائی وزیر ریونیو بلوچستان میر سلیم خان کھوسہ نے کہا ہے کہ موجودہ صوبائی حکومت صوبے سے پسماندگی کے خاتمے اور عوام کی معیار زندگی کو بلند کرنے کے لیئے ہر ممکن وسائل کو بروئے لا رہی ہے تمام علاقوں کو یکساں طور پر تر قی یافتہ بنانے کے لیئے مختلف ترقیاتی اسکیمات کی منظوری دے دی گئی ہے جن میں رو ڈ سیکٹر،ایجو کیشن،ہیلتھ،آب نوشی،ز راعت اور ایریگیشن سمیت دیگر عوامی مفاد عامہ کی ترقیاتی اسکیمات شامل ہیں حکومت کی بھر پو ر کوشش ہے کہ تر قیا تی عمل سے عوا م کے بنیادی مسائل احسن طریقے سے حل ہو سکیں، ان خیالات کا اظہار انہوں نے میڈیا سے بات چیت کر تے ہوئے کیا،میر سلیم خان کھوسہ نے کہا کہ محکمہ ریو نیو بورڈ میں پائی جانے والی خامیوں کو دور کیا جا رہا ہے اور ریونیو ریکارڈ کو جدید طرز کے مطابق بنانے کے لیئے کوششیں کی جا رہی ہیں زرعی ریو نیو ٹیکس کی وصولی کے لیئے سختی سے احکامات جا ری کر دیئے گئے ہیں ماضی کے مقابلے میں اب کی بار زرعی ٹیکس کی وصولی میں بہتری آئی ہے، انہوں نے کہاکہ وزیر اعلیٰ بلوچستان جام کمال خان کی قیادت میں مو جودہ حکومت عوام کی فلاح و بہبود اور ان سے کئے گئے وعدوں کی تکمیل کے لیئے ہر ممکن وسائل کو خرچ کر رہی ہے ضلع صحبت پور میں بھی تر قیا تی کاموں کا آغازکر دیا گیا ہے شہری اور دیہی علاقوں میں عوام کو سہولیات کی فراہمی کے لیئے مختلف اسکیمات پر کام شروع کر دیا گیا ہے تاکہ ان تر قیا تی کاموں کی تکمیل سے علاقے کی تعمیر و ترقی میں بہتری آنے کے ساتھ عوام زیادہ سے زیادہ مستفید ہو سکیں، انہوں نے کہا کہ موجودہ حکومت صحیح سمت میں جا رہی ہے مگر تنقید کرنے والے عوام کو کچھ نہیں دے سکتے عوام بخوبی آگاہ ہیں کہ وہ حکومت کے ساتھ ہیں اور کسی کے سازش کا شکا ر نہیں ہوں گے بلکہ حکو متی پالیسیوں کے ساتھ مل کر اپنا مثبت کردار ادا کریں گے۔

چاغی۔ (اے پی پی)چاغی کے پاک ایران اور پاک افغان سرحدی علاقوں میں گرج چمک کے ساتھ بارش کے بعد موسم خوشگوار ہوگیا۔تفصیل کے مطابق پاک ایران سرحدی علاقے تفتان و گرد و نواح سمیت سیندک اور پاک افغان سرحدی علاقے برآب چاہ و گرد و نواح سمیت چارسر میں بھی بارش ہوئی جبکہ ضلعی صدر مقام دالبندین میں گہرے بادل چھاگئے رہنے کے بعد شدید طوفانی ہوائیں چلتی رہیں جبکہ اس دوران ہلکی بارش بھی ہوئی۔طوفانی ہواؤں کے باعث آر سی ڈی شاہراہ پر حد نگاہ محدود ہونے کی وجہ سے ٹریفک کی روانی متاثر ہوئی جبکہ لوگ گھروں تک محصور ہوگئے۔

چاغی۔ (اے پی پی)غیر قانونی طور پر ایران میں داخل ہونے والے مزید 48 پاکستانی شہریوں کو ایرانی حکام نے گرفتار کرکے ضلع چاغی میں تفتان سرحد پر لیویز حکام کے حوالے کردیا۔ لیویز ذرائع کے مطابق زیر حراست افراد قانونی دستاویزات کے بغیر ایران کے مختلف علاقوں میں مقیم تھے اور بہتر روزگار کی تلاش میں یورپ جانے کی کوشش کر رہے تھے۔لیویز حکام نے مذکورہ افراد کو مزید تحقیقات کی غرض سے ایف آئی اے کے حوالے کر دیا۔

کوئٹہ (اے پی پی) پسنی سے کراچی جانے والی مسافر کوچ گہری کھائی میں جاگری، 10 افراد جاں بحق، 11 شدید زخمی، زخمیوں کو اورماڑہ ہسپتال میں طبی امداد کے بعد کراچی ریفر کردیا گیا، جاں بحق ہونے والوں میں خواتین اور بچے بھی شامل، زخمیوں میں سے بیشتر کی حالت نازک،سرکاری ذرائع کے مطابق ہفتہ کی صبح پسنی سے کراچی جانے والی الجنید مسافر کوچ لسبیلہ کے صدر مقام اوتھل سے 155 کلومیٹر دور بزی ٹاپ کے مقام پر ٹائر برسٹ ہونے کی وجہ سے گہری کھائی میں جاگری جس کے نتیجے میں 10 افراد موقع پر جاں بحق ہوگئے،جاں بحق ہونے والوں میں 5 مرد، تین خواتین اور دو کمسن بچے بھی شامل ہیں جبکہ 11 افراد شدید زخمی ہوگئے، زخمیوں میں خواتین اور بچے بھی شامل ہیں، واقعے کی اطلاع ملتے ہی اورماڑہ سے پاکستان نیوی اور دیگر ریسکیو کی ٹیمیں جائے حادثہ کیلئے روانہ ہوگئیں لاشوں اور زخمیوں کو اورماڑہ ہسپتال منتقل کردیا گیا جہاں پر زخمیوں کو ابتدائی طبی امداد کے بعد انہیں کراچی منتقل کردیا گیا زخمیوں میں سے بیشتر کی حالت نازک بتائی جاتی ہے.
وزیر اعلیٰ بلوچستان جام کمال خان نے پسنی سے کراچی جانے والی مسافر کوچ کے حادثہ پر افسوس کا اظہارکرتے ہوئے جاں بحق افراد کیلئے مغفرت کی دعا کی، زخمیوں کی بہترین نگہداشت کیلئے ہسپتالوں میں ایمرجنسی نافذ کرنے کے احکامات جاری کردئیے،انہوں نے ضلعی انتظامیہ کو دیگر مسافروں کو سہولیات فراہم کرنے کی ہدایت کردی۔