Category: راولپنڈی

گوجرخان (قمرشہزاد) گوجرخان انتظامیہ لاپرواہی اور غفلت کے سبب مارکیٹ کمیٹی کی مبینہ ملی بھگت نے غریب پھل فروشوں اور ریڑھی بانوں کا جینا محال کر دیا۔ چھوٹے دکاندار پھٹ پڑے، انتظامیہ کے دوغلے معیار اور آڑھتیوں کی پشت پناہی کے خلاف احتجاجی محاذ کھول دیا۔

مظاہرین کا الزام ہے کہ مارکیٹ کمیٹی کے افسران دفاتر میں بیٹھ کر خواب گاہوں میں نرخ نامے تیار کرتے ہیں جن کا زمینی حقائق سے کوئی تعلق نہیں۔منڈی میں بولی کا عمل محض ایک ڈرامہ بن چکا ہے جہاں نہ انتظامیہ اور نہ ہی کوئی سرکاری نمائندہ موجود ہوتا ہے، اور آڑھتی اپنی مرضی کے ریٹ مقرر کر کے چھوٹے دکانداروں کی جیبوں پر ڈاکہ ڈالتے ہیں۔ اگر ان لوگوں نے منڈی میں نہیں آنا ہوتا تو یہ لاکھوں روپے کس چیز تنخواہیں لیتے ہیں، عوامی حلقوں نے سوال اٹھایا ہے کہ آخر وہ کون سی ان دیکھی قوت ہے جو مارکیٹ کمیٹی کے کرپٹ اہلکاروں کو تحفظ فراہم کر رہی ہے؟ منڈی میں بولی کے وقت افسران کی پراسرار گمشدگی ثابت کرتی ہے کہ دال میں کالا نہیں بلکہ پوری دال ہی کالی ہے۔ غریب مزدور کو قربانی کا بکرا بنا کر بڑے مگرمچھوں کو کس کی ایما پر کھلا چھوڑا گیا ہے؟ کیا انتظامیہ کے اعلیٰ افسران کو اس کھلی لوٹ مار کا علم نہیں، یا پھر خاموشی کی قیمت وصول کی جا رہی ہے؟ انتظامیہ کی بے حسی کا یہ عالم ہے کہ 20 روپے والا سرکاری نرخ نامہ سرعام 30 روپے میں فروخت ہو رہا ہے۔ شہریوں نے پوچھا ہے کہ روزانہ شہر کے سینکڑوں دکانداروں سمیت تحصیل بھر کے دکانداروں سے وصول کی جانے والی یہ زائد رقم کس افسر کی تجوری میں جا رہی ہے؟ کیا یہ اوپر کی کمائی نچلے عملے تک محدود ہے یا اس کا حصہ اوپر بیٹھے صاحبانِ اقتدار تک بھی پہنچتا ہے؟ ریٹ لسٹ کے نام پر یہ اضافی وصولی کسی بھتے سے کم نہیں۔

مظاہرین کا کہنا ہے کہ ہمیں منڈی سے چیزیں مہنگی ملتی ہے لیکن لسٹ میں ریٹ کم لکھ کر ہمیں عوام سے لڑوایا جاتا ہے۔ دکانیں سیل کرنا اور جرمانے کرنا صرف چھوٹے طبقے کے لیے رہ گیا ہے، جبکہ منڈی کے ڈون افسران کی ناک کے نیچے قانون کی دھجیاں اڑا رہے ہیں۔ شہریوں نے وزیر اعلیٰ پنجاب مریم نواز سے مطالبہ کیا ہے کہ وہ گوجرخان کے اس مافیا راج کا نوٹس لیں اور ان افسران کا محاسبہ کریں جو غریب کا خون نچوڑ کر اپنی جیبیں بھر رہے ہیں۔

گوجرخان (قمرشہزاد) رمضان سے قبل مہنگائی نے شہریوں کی کمر توڑ دی ہے اور غریب کی چیخوں کو خاموش کر دیا ہے، مارکیٹوں میں پھل آسمان چھو رہے ہیں، سیب 500 روپے، کیلا درجہ دوم 350، امرود 350 اور مالٹا 300 سے 450 روپے تک! یہ نرخ عام متوسط اور محنت کش طبقے کی پہنچ سے باہر ہیں۔ رمضان کے آغاز میں محض دو دن باقی ہیں، لیکن قیمتیں پہلے ہی ساتویں آسمان پر ہیں۔ غریب پھل دیکھ کر ترسیں گے، جبکہ کچھ لوگ رمضان کو ذاتی فائدے اور حج،عمرہ کے لیے دولت جمع کرنے کا موسم بنا رہے ہیں۔ حکومتی ادارے خاموش تماشائی بنے ہیں، اور مہنگائی کے ماسٹر مائنڈز آج تک بے نقاب نہیں ہوئے۔دنیا کے ترقی یافتہ ممالک جیسے سعودی عرب، متحدہ عرب امارات، ترکی میں مذہبی تہوار یا رمضان کے موقع پر قیمتیں گرتی ہیں، عوام کو ریلیف ملتا ہے۔ وہاں سہولت بازار اور سبز بازار عوام کے لیے لگائے جاتے ہیں تاکہ ہر طبقہ خریداری کر سکے۔ مگر پاکستان میں حالات بالکل برعکس ہیں قیمتیں چھلانگیں لگاتی ہیں، سہولت بازار غائب ہیں، اور غریب عوام کی جیبیں لوٹی جا رہی ہیں۔ یہ مہنگائی کوئی معمولی مسلہ نہیں، یہ عوام پر جابرانہ ڈاکہ ہے، ہر گلی، ہر بازار میں نرخ ایسے بڑھ رہے ہیں جیسے رمضان صرف کچھ لوگوں کے فائدے کے لیے ہو۔متوسط اور کم آمدنی والے شہری رمضان کی خوشیاں صرف خوابوں میں دیکھیں گے، جبکہ حکومتی ادارے خاموشی سے یہ لوٹ مار دیکھتے رہیں گے۔ اب وقت آگیا ہے کہ حکومت اور متعلقہ ادارے خاموشی توڑیں، قیمتوں پر قابو پائیں اور عوام کو رمضان میں فوری ریلیف فراہم کریں۔ ورنہ یہ مہنگائی کا طوفان ہر گھر میں احتجاج اور ناراضگی کی آگ بھڑکا دے گا، اور عوام اپنی چیخوں میں جواب مانگیں گے۔

گوجرخان (قمرشہزاد) وزیرِ اعلیٰ پنجاب مریم نواز شریف کی جانب سے اہلیانِ گوجرخان کیلئے ترقی کا نیا سویرا طلوع ہو گیا۔

عظیم الشان منصوبوں پر اظہارِ تشکر کرتے ہوئے ایم پی اے راجہ شوکت عزیز بھٹی اور ایڈووکیٹ ثاقب علی بیگ نے اپنے مشترکہ بیان میں کہا کہ مریم نواز شریف نے گوجرخان کے عوام کا دیرینہ مطالبہ پورا کر کے ثابت کر دیا ہے کہ مسلم لیگ ن ہی عوامی خدمت کی حقیقی علمبردار ہے۔ انہوں نے کہا کہ یہ بسیں محض سواری نہیں بلکہ ایک معیاری طرزِ زندگی کی علامت ہیں، جو گوجرخان سے سوہاوہ اور گوجرخان سے ٹی چوک روات تک کے مسافروں کو بین الاقوامی معیار کی سفری سہولیات فراہم کریں گی۔ ایم پی اے راجہ شوکت عزیز بھٹی نے واضح کیا کہ سی ایم پنجاب کی خصوصی ہدایت پر بزرگ شہریوں، خواتین اور طلبا و طالبات کیلئے یہ سفر بالکل مفت ہوگا، جبکہ عام شہریوں کیلئے محض 20 روپے کا معمولی کرایہ مقرر کیا گیا ہے، جو کہ مہنگائی کے دور میں غریب پرور حکومت کا ایک بے مثال اقدام ہے۔ ایڈووکیٹ ثاقب علی بیگ نے مزید کہا کہ سی ایم مریم نواز شریف کی قیادت میں گوجرخان میں تعمیر و ترقی کا وہ سفر شروع ہو چکا ہے جس کی ماضی میں کوئی نظیر نہیں ملتی۔ سوا ارب روپے پنجاب یونیورسٹی پوٹھوہار کیمپس کے جاری کیے گے، جی ٹی روڈ پر دو انڈر پاسز کی تعمیر، میگا روڈ پراجیکٹس اور ستھرا پنجاب، اپنا گھر اپنی چھت، سولر پینلز جیسی مہمات نے شہر کا نقشہ بدل کر رکھ دیا ہے۔ ان کا کہنا تھا کہ ستھرا پنجاب مشن کے تحت گوجرخان کی گلیوں اور محلوں کی صفائی ستھرائی کے جو تاریخی کام ہوئے ہیں، انہوں نے عوام کے معیارِ زندگی کو بلند کر دیا ہے۔

دونوں رہنماؤں نے گفتگو کرتے ہوئے کہا کہ مریم نواز شریف کا پنجاب وژن ریاست کو فلاحی ریاست بنانے کی جانب ایک بڑا قدم ہے۔ اہلیان گوجرخان سمیت ہم اپنے قائدین کے اس بصیرت افروز فیصلے پر انہیں زبردست خراجِ تحسین پیش کرتے ہیں اور اس عزم کا اعادہ کرتے ہیں کہ تعمیر و ترقی کا یہ سفر کسی رکاوٹ کے بغیر جاری رہے گا۔

گوجرخان میں ن لیگ کا پاور شو گرین الیکٹرو بس افتتاحی تقریب میں عوام کا جمِ غفیر
عوامی سمندر میں مقامی قیادت ایک صف میں رنگا رنگ تقریب میں وزراء اور منتخب نمائندوں نے فیتہ کاٹ کر گرین ٹرانسپورٹ کا تحفہ دے دیا
گوجرخان میں تاریخی لمحہ سی ایم پنجاب کی قیادت میں مسلم لیگ ن کا خدمت، ترقی اور کارکردگی کا ماڈل ایک اور سنگِ میل عبور کر گیا
گوجرخان (قمرشہزاد) گوجرخان میں گرین الیکٹرو بس سروس کا باقاعدہ اور شاندار افتتاح ایک پروقار اور رنگا رنگ تقریب میں کیا گیا۔ تقریب کی میزبانی معروف سیاسی و سماجی رہنما ثاقب علی بیگ ایڈووکیٹ نے کی۔ افتتاحی تقریب میں مہمانِ خصوصی صوبائی وزیر ٹرانسپورٹ و ماس ٹرانزٹ پنجاب بلال اکبر، صوبائی وزیر منشا بٹ، عوامی ایم پی اے راجہ شوکت عزیز بھٹی اور ایم پی اے کہوٹہ راجہ صغیر نے خصوصی شرکت کی اور فیتہ کاٹ کر بس سروس کا باضابطہ افتتاح کیا۔ اس موقع پر سابق پارلیمانی سیکرٹری راجہ جاوید اخلاص، سابق چیئرمین بلدیہ شاہد صراف، سید ندیم شاہ، چیئرمین اشتیاق، طیب قریشی اور دیگر لیگی رہنماؤں نے بھی شرکت کی۔ تقریب میں شہریوں اور مسلم لیگی کارکنان کی کثیر تعداد نے بھرپور شرکت کرکے اس منصوبے کو سراہا۔ اس موقع پر مہمان خصوصی بلال اکبر، منشاء بٹ، راجہ شوکت عزیز بھٹی، ایڈووکیٹ ثاقب علی بیگ اور دیگر نے خطاب کرتے ہوئے کہا گرین الیکٹرو بس سروس کا افتتاح اس بات کا عملی ثبوت ہے کہ پاکستان مسلم لیگ ن صرف وعدوں کی سیاست نہیں بلکہ عملی خدمت پر یقین رکھتی ہے۔ پارٹی قیادت نے ایک بار پھر ثابت کیا کہ جب بھی اسے خدمت کا موقع ملتا ہے تو وہ عوام کو ریلیف، سہولت اور ترقی کے حقیقی منصوبے فراہم کرتی ہے۔ رہنماؤں نے اپنے خطابات میں کہا کہ مسلم لیگ ن کی سیاست کا محور اقتدار نہیں بلکہ عوامی خدمت ہے۔ سڑکیں ہوں، اسپتال ہوں، تعلیمی ادارے ہوں یا جدید ٹرانسپورٹ نظام ہر میدان میں پارٹی نے کارکردگی کی روشن مثالیں قائم کی ہیں۔ تقریب سے خطاب کرتے ہوئے مقررین نے واضح کیا کہ وزیر اعلیٰ پنجاب کی قیادت میں ترقی کا سفر رکا نہیں بلکہ مزید تیز ہوا ہے، اور گوجرخان میں گرین الیکٹرو بس سروس اسی وژن کی عملی جھلک ہے۔ انہوں نے کہا کہ مسلم لیگ ن نے ہمیشہ ملک کو بحرانوں سے نکالا، معیشت کو سنبھالا اور عوام کو سہولتیں فراہم کیں۔ آج بھی پارٹی کا عزم ہے کہ پنجاب کے ہر شہر اور قصبے تک جدید سہولیات پہنچائی جائیں گی تاکہ عام آدمی باوقار اور آسان زندگی گزار سکے۔ آخر میں لیگی رہنماؤں نے اس عہد کا اعادہ کیا کہ عوام کا اعتماد ہی ان کی اصل طاقت ہے، اور وہ خدمت، دیانت اور کارکردگی کی سیاست جاری رکھیں گے۔ تقریب کے اختتام پر شہریوں اور کارکنان نے وزیراعلیٰ پنجاب اور تمام معزز مہمانوں کا شکریہ ادا کرتے ہوئے کہا کہ گرین الیکٹرو بس سروس گوجرخان کے لیے ترقی کا سنگِ میل ثابت ہوگی اور عوام کو جدید، محفوظ اور باوقار سفری سہولت فراہم کرے گی۔ گوجرخان میں ترقی کا پہیہ چل پڑا اور یہ سفر اب رکے گا نہیں۔

وفاق اور پنجاب حکومت کی مشترکہ کاوشیں رنگ لے آئیں پوٹھوہار کے طلبہ کے لیے تاریخی تعلیمی سنگِ میل
سیاست سے بالاتر ہوکر پوٹھوہار کے مستقبل کا فیصلہ اعلیٰ تعلیم کا لینڈ مارک منصوبہ خطے کی تقدیر بدلنے کو تیار

گوجرخان (قمرشہزاد) پوٹھوہار میں علم کا نیا افق پنجاب یونیورسٹی کیمپس کا خواب تعبیر کے قریب، پوٹھوہار کے تعلیمی افق پر ایک نئی صبح طلوع ہونے جا رہی ہے۔برسوں سے زیرِ بحث اور عوامی امنگوں کا مرکز بننے والا پنجاب یونیورسٹی کا پوٹھوہار کیمپس اب عملی شکل اختیار کرنے کے قریب ہے۔

اس اہم پیش رفت کا اعلان سابق وزیر اعظم پاکستان راجہ پرویز اشرف نے ایک ہنگامی پریس کانفرنس میں کیا، جہاں انہوں نے اس منصوبے کو خطے کی تقدیر بدلنے والا لینڈ مارک پروجیکٹ قرار دیا۔ راجہ پرویز اشرف نے بتایا کہ وزیراعلیٰ پنجاب مریم نواز نے اس معاملے میں غیر معمولی دلچسپی لیتے ہوئے کیس کو کابینہ کے سامنے پیش کیا، جس کے بعد یونیورسٹی کے لیے تقریباً سوا ارب روپے کی رقم جاری کی گئی۔ ان کے بقول اگر وزیراعلیٰ ذاتی طور پر اس معاملے کو نہ دیکھتیں تو منصوبہ مزید تاخیر کا شکار ہو سکتا تھا۔ انہوں نے اس اقدام کو فیصلہ کن موڑ قرار دیتے ہوئے کہا کہ زمین کی فراہمی اور اسے یونیورسٹی کے نام منتقل کرنے میں وزیراعلیٰ کا کردار کلیدی رہا، جس سے عملی پیش رفت کی راہ ہموار ہوئی۔ انہوں نے یاد دلایا کہ جب وہ قومی اسمبلی پاکستان کے اسپیکر تھے تو ان کی یہ دیرینہ خواہش تھی کہ گوجرخان اور گردونواح کے طلبہ و طالبات کو اعلیٰ تعلیم کے لیے لاہور یا اسلام آباد کا رخ نہ کرنا پڑے بلکہ انہیں اپنے علاقے میں ہی عالمی معیار کی سہولیات میسر آئیں۔ اسی سلسلے میں اُس وقت کے وزیر اعظم شہباز شریف نے تقریباً 6 ارب روپے اس شرط پر جاری کیے تھے کہ بشرطیکہ پنجاب حکومت زمین فراہم کرے۔

راجہ پرویز اشرف نے اس قومی مقصد میں معاونت کرنے والی شخصیات کو بھی خراجِ تحسین پیش کیا جن میں اسحاق ڈار، رانا ثناء اللہ، مریم اورنگزیب اور گورنر پنجاب سمیت دیگر اعلی شخصیات شامل ہیں۔ انہوں نے کہا کہ یہ منصوبہ کسی ایک جماعت یا فرد کا نہیں بلکہ پورے پوٹھوہار کے عوام کا مشترکہ خواب ہے، جس کی تعبیر میں سب نے سیاست سے بالاتر ہو کر کردار ادا کیا۔ مزید بتایا گیا کہ مرکز کے پلاننگ ڈیپارٹمنٹ نے 12 فروری کو پنجاب یونیورسٹی کو باضابطہ خط ارسال کیا ہے جس میں متعلقہ اراضی کے دورے اور منصوبے کے عملی آغاز کے اقدامات کا عندیہ دیا گیا ہے۔ اس پیش رفت کو تعلیمی حلقوں میں غیر معمولی اہمیت دی جا رہی ہے، کیونکہ اس سے نہ صرف اعلیٰ تعلیم کے مواقع بڑھیں گے بلکہ مقامی سطح پر معاشی سرگرمیوں اور ترقیاتی امکانات کو بھی نئی جِلا ملے گی۔پریس کانفرنس کے دوران راجہ پرویز اشرف نے سیاسی ہم آہنگی پر زور دیتے ہوئے کہا کہ ہمیں ذاتی یا جماعتی مفادات سے بالاتر ہو کر اپنے بچوں کے مستقبل کو مقدم رکھنا ہوگا۔ انہوں نے واضح کیا کہ انہوں نے کبھی انتظامی معاملات میں مداخلت یا روایتی سیاسی دباؤ کی سیاست نہیں کی، بلکہ ہمیشہ عوامی مفاد، تعلیمی فروغ اور تعمیر و ترقی کو ترجیح دی ہے۔ ان کے الفاظ میں، کریڈٹ کسی فرد کو نہیں بلکہ اللہ تعالیٰ کی ذات دیتی ہے، اصل مقصد عوام کی خدمت اور آنے والی نسلوں کے لیے مضبوط بنیاد رکھنا ہے۔سیاسی و سماجی حلقوں نے اس اقدام کو تاریخی قرار دیتے ہوئے کہا ہے کہ اگر وفاق اور صوبہ اسی جذبے اور ہم آہنگی کے ساتھ آگے بڑھتے رہے تو پوٹھوہار کا یہ خطہ نہ صرف تعلیمی بلکہ معاشی و سماجی ترقی کا مرکز بن سکتا ہے۔ گوجرخان میں پنجاب یونیورسٹی پوٹھوہار کیمپس کا قیام محض ایک تعلیمی منصوبہ نہیں بلکہ اجتماعی بصیرت، سیاسی ہم آہنگی اور مستقبل بینی کی روشن مثال ہے ایک ایسا خواب جو اب تعبیر کے دہانے پر کھڑا ہے اور جس سے پورے خطے کی تقدیر وابستہ ہے۔

اے ایس پی سید دانیال حسن کا سخت انتباہ غیر رجسٹرڈ کرایہ داروں اور لاپرواہ مالکان کی اب خیر نہیں
گوجرخان، مندرہ اور جاتلی میں پولیس ٹیمیں متحرک کرایہ داری اندراج نہ کرانے والوں کے خلاف بلاامتیاز کارروائی کا فیصلہ
گوجرخان(قمرشہزاد) سرکل گوجرخان میں امن و امان کی صورتحال کو برقرار رکھنے اور سکیورٹی اقدامات کو مزید موثر بنانے کے لیے اے ایس پی سید دانیال حسن کی خصوصی ہدایات پر کرایہ داری ایکٹ کی خلاف ورزی کرنے والوں کے خلاف سخت قانونی کریک ڈاؤن کا فیصلہ کیا گیا ہے۔ اس سلسلے میں گوجرخان، مندرہ اور جاتلی سمیت مختلف علاقوں میں پولیس کی خصوصی ٹیمیں تشکیل دے دی گئی ہیں جو گھر گھر جا کر کرایہ داروں کے کوائف کی پڑتال کریں گی۔ پولیس حکام کے مطابق، ایسے مالکانِ مکان جو اپنے کرایہ داروں کی رجسٹریشن کرانے میں ناکام رہے ہیں اور وہ کرایہ دار جو بغیر قانونی اندراج کے رہائش پذیر ہیں، ان کے خلاف بلاامتیاز قانونی کارروائی عمل میں لائی جائے گی۔ اے ایس پی سید دانیال حسن نے واضح کیا ہے کہ اس معاملے میں کسی قسم کی رعایت یا سمجھوتہ نہیں کیا جائے گا اور باقاعدہ کریک ڈاؤن کا آغاز کر دیا گیا ہے۔ اے ایس پی کا مزید کہنا تھا کہ شہری ذمہ داری کا مظاہرہ کریں اور کسی بھی قسم کی قانونی پریشانی یا گرفتاری سے بچنے کے لیے کرایہ داری ایکٹ پر سو فیصد عمل درآمد یقینی بنائیں۔ پولیس نے عوام سے پرزور اپیل کی ہے کہ وہ ایک محب وطن شہری ہونے کا ثبوت دیں اور فوری طور پر اپنے کرایہ داروں کا اندراج متعلقہ تھانے میں کروائیں۔ خلاف ورزی کی صورت میں سخت قانونی ایکشن لیا جائے گا جس کی تمام تر ذمہ داری متعلقہ مالک مکان اور کرایہ دار پر ہوگی۔