Category: راولپنڈی

گوجرخان خون کی ہولی دوہرے قتل کو دو ہفتے بیت گئے، پولیس اور سی سی ڈی کی پراسرار خاموشی نے کئی سوالات کھڑے کر دیے
سفید پوشی کا جنازہ نام نہاد سماجی تنظیمیں اور سیاسی پیشوا مصلحت کا شکار، حافظ آباد کے بااثر پٹواری کے سامنے قانون بے بس؟
انصاف کا تقاضا یا بااثر کی لونڈی؟ مقتولین کے ورثاء کی دہائی، کیا گوجرخان میں قانون کی رٹ صرف غریب کے لیے ہے؟ وزیر اعلی سے نوٹس کی اپیل

گوجرخان(قمرشہزاد)گوجرخان کے قلب ریلوے روڈ پر دن دیہاڑے دو تاجر بھائیوں کے بہیمانہ قتل کی لرزہ خیز واردات خون کی ہولی کھیلے ہوئے 14 دن گزرنے کے باوجود قانون نافذ کرنے والے ادارے کسی بڑی پیش رفت میں ناکام نظر آتے ہیں۔ مقتول کے کمسن بیٹے نے سرِعام نصیر پٹواری کے بیٹوں معظم اور احسن کو اپنے والد اور چچا کا قاتل نامزد کیا، ایف آئی آر درج ہوئی، لیکن پولیس اور سی سی ڈی حکام کی جانب سے تاحال ملزمان کی گرفتاری کے حوالے سے کوئی آفیشل بیان سامنے نہ آنا کئی شکوک و شبہات کو جنم دے رہا ہے۔ گوجرخان شہر، جو کہنے کو تو سماجی تنظیموں، صدور اور نام نہاد عوامی نمائندوں سے بھرا پڑا ہے، اس وقت ایک مجرمانہ خاموشی کی لپیٹ میں ہے۔ ذرائع کا کہنا ہے کہ ملزمان کے والد نصیر پٹواری کے سیاسی و انتظامی حلقوں میں گہرے مراسم انصاف کی راہ میں سب سے بڑی دیوار بن چکے ہیں۔ ہر گلی محلے میں مصلحت کی چادر اوڑھ کر بیٹھنے والے سیاسی نمائندے اور سماج سیوک مقتولین کے لہو پر خاموش تماشائی بنے ہوئے ہیں، جس سے یہ تاثر قوی ہو رہا ہے کہ حافظ آباد کے یہ ملزمان قانون سے بالاتر ہیں۔

عوامی حلقوں میں یہ سوال شدت سے گردش کر رہا ہے کہ پنجاب کے دیگر اضلاع میں سنگین وارداتوں کے ملزمان چند ہی دنوں میں اپنے انجام کو پہنچ جاتے ہیں، تو کیا گوجرخان کیس کے ملزمان کو کسی مخصوص ایجنڈے کے تحت تحفظ فراہم کیا جا رہا ہے؟ کیا سی سی ڈی اور مقامی پولیس اس کیس کو سرد خانے کی نذر کرنے کے لیے فائل پر مٹی ڈالنے کی منتظر ہے؟ شہریوں کا کہنا ہے کہ یہ کیس گوجرخان پولیس اور بالخصوص سی سی ڈی کے لیے ایک کڑا امتحان ہے کہ آیا وہ اپنی پیشہ ورانہ ساکھ بحال کرتے ہیں یا قانون ایک بار پھر بااثر طبقات کے گھر کی لونڈی ثابت ہوگا۔ اہلیانِ گوجرخان نے وزیر اعلی پنجاب مریم نواز سے سختی سے نوٹس لینے کا مطالبہ کرتے ہوئے کہا ہے کہ فوری طور پر ملزمان کو نشانِ عبرت بنایا جائے، ورنہ یہ خاموشی کسی بڑے عوامی لاوے کے پھٹنے کا پیش خیمہ ثابت ہو سکتی ہے۔

مرکزی انجمن تاجراں کے سینئر نائب صدر ملک محبوب اور ان کے بھائی کے سفاکانہ قتل پر تاجر برادری سراپا احتجاج، شہر بھر میں بینرز آویزاں
پولیس ایکشن میں آئے یا تاجر خود سڑکوں پر نکلیں؟ مقتولین کے لواحقین تاجروں کا نصیر پٹواری کے بیٹوں کی فوری گرفتاری اور انصاف کا مطالبہ
گوجرخان (قمرشہزاد) ریلوے روڈ گوجرخان پر دن دیہاڑے سرعام دو تاجر بھائیوں کے لرزہ خیز دوہرے قتل کی سنگین واردات کو 6 روز بیت گئے، مگر پولیس نامزد ملزمان کو گرفتار کرنے میں بری طرح ناکام نظر آ رہی ہے۔ مقتولین میں مرکزی انجمن تاجراں گوجرخان کے سینئر نائب صدر ملک محبوب اور ان کے بھائی شامل ہیں، جنہیں فائرنگ کرکے بے دردی سے موت کے گھاٹ اتار دیا گیا تھا۔ واقعے میں نامزد مرکزی ملزمان، نصیر پٹواری کے بیٹوں معظم اور احسن کی تاحال عدم گرفتاری پر شہر کی تاجر برادری اور شہریوں میں شدید غم و غصہ پایا جا رہا ہے۔ ملزمان کی گرفتاری میں تاخیر کے خلاف تاجر برادری نے باقاعدہ احتجاجی مہم کا آغاز کر دیا ہے۔ مقتولین سے یکجہتی اور انصاف کی فراہمی کے لیے شہر کے تمام اہم چوک چوراہوں، مارکیٹوں اور شاہراہوں پر بڑے بڑے احتجاجی بینرز آویزاں کر دیے گئے ہیں۔ ان بینرز پر قاتلوں کی فوری گرفتاری، پولیس انتظامیہ سے کارروائی کے مطالبات اور مقتول تاجر رہنما کے لیے انصاف کی اپیلیں درج ہیں۔

سرکل میں ڈاکو اور چور بے لگام مویشی اور وہیکلز غائب، شہریوں کی راتوں کی نیندیں حرام، پولیس کا گشت کا نظام موثر بنانے کا مطالبہ
سرکل میں بڑھتی ہوئی وارداتیں امن و امان کی مخدوش صورتحال پر شہریوں میں شدید تشویش، آر پی او اور سی پی او راولپنڈی سے اصلاح و احوال کی اپیل
گوجرخان (قمرشہزاد) سرکل گوجرخان اور اس کے مضافاتی علاقوں میں چوری، ڈکیتی، مویشی چوری اور وہیکل لفٹنگ کی بڑھتی ہوئی وارداتوں نے شہریوں کا جینا محال کر دیا۔ بڑھتے ہوئے واقعات کے باعث شہریوں میں شدید خوف و ہراس پھیل گیا ہے، جس پر عوامی و سماجی حلقوں میں گہری تشویش پائی جاتی ہے۔ ذرائع کے مطابق، گزشتہ چند ہفتوں کے دوران گوجرخان شہر سمیت سرکل بھر کے مختلف علاقوں میں چوروں اور ڈاکوؤں نے اودھم مچا رکھا ہے۔ چور قیمتی مویشی ہانک کر لے جاتے ہیں، جبکہ چوک چوراہوں اور گھروں کے باہر سے گاڑیاں اور موٹر سائیکلیں چوری ہونا معمول بن چکا ہے۔ راہزنوں نے شہریوں سے نقدی اور موبائل فون چھیننے کی مہم شروع کر رکھی ہے، جس سے عام آدمی خود کو غیر محفوظ تصور کر رہا ہے۔شہری اور سماجی حلقوں نے بدامنی کی اس صورتحال پر گہری تشویش کا اظہار کرتے ہوئے کہا ہے کہ پولیس کا روایتی گشت کا نظام مکمل طور پر ناکام ہو چکا ہے۔ شہریوں نے اعلیٰ پولیس حکام، بالخصوص آر پی او راولپنڈی اور سی پی او سے مطالبہ کیا ہے کہ وہ سرکل گوجرخان میں امن و امان کی مخدوش صورتحال کا سخت نوٹس لیں۔ انہوں نے اپیل کی کہ سرکل بھر میں پولیس گشت کے نظام کو جدید اور مؤثر خطوط پر استوار کیا جائے، مشکوک عناصر پر کڑی نظر رکھی جائے، اور جرائم پیشہ افراد کے خلاف بلاامتیاز گرینڈ آپریشن کر کے شہریوں کے جان و مال کا تحفظ یقینی بنایا جائے۔

وزیر اعلیٰ پنجاب کے ویژن کے مطابق گلیانہ موڑ ذبح خانہ کے پاس مثالی انتظامات مکمل، بیوپاریوں اور خریداروں سے کوئی فیس یا ٹیکس نہیں لیا جائے گا
منڈی میں ویٹرنری، ریسکیو 1122 اور پیرامیڈیکل سٹاف کے کاؤنٹرز فعال، شکایات کے فوری ازالے کے لیے سپیشل سیل قائم، خضر ظہور گورائیہ کا دورہ
گوجرخان (نمائندہ خصوصی) وزیر اعلیٰ پنجاب کے ویژن کے مطابق عید الاضحیٰ کے مبارک موقع پر عوام اور بیوپاریوں کی سہولت کے لیے گوجرخان میں گلیانہ موڑ ذبح خانہ کے روایتی مقام پر شاندار ٹیکس فری قربانی کے جانوروں کی مویشی منڈی قائم کر دی گئی ہے۔ اسسٹنٹ کمشنر گوجرخان خضر ظہور گورائیہ نے منڈی کا تفصیلی دورہ کر کے انتظامات کا جائزہ لیا اور موقع پر موجود عملے کو ہدایات جاری کیں۔ میڈیا سے گفتگو کرتے ہوئے اسسٹنٹ کمشنر خضر ظہور گورائیہ نے واضح کیا کہ وزیر اعلیٰ پنجاب کے احکامات کے تحت مویشی منڈی میں کسی قسم کا کوئی ٹھیکیداری نظام نہیں ہے۔ بیوپاریوں، مویشی پال حضرات اور خریداروں سے جانور لانے، لے جانے، شہریوں کی گاڑیوں، موٹر سائیکلوں، رکشوں کی پارکنگ یا کھانے پینے کے سٹالز کی مد میں ایک روپیہ بھی وصول نہیں کیا جائے گا۔ منڈی مکمل طور پر ٹیکس اور فیس سے پاک ہے۔ انہوں نے مزید بتایا کہ منڈی میں صفائی ستھرائی کے بہترین انتظامات کے لیے ستھرا پنجاب گوجرخان جے وی کمپنی کا کاونٹر، لائیوسٹاک کا ویٹرنری کاؤنٹر، ریسکیو 1122 اور پیرامیڈیکل سٹاف چوبیس گھنٹے الرٹ رہیں گے۔ مویشی پال حضرات بیوپاریوں خریداروں اور قربانی کے جانوروں کے لیے پینے کے پانی اور سائے دار ٹینٹ اور کنوپیوں کا بہترین بندوبست کیا گیا ہے۔ کسی بھی ناجائز وصولی یا شکایت کی صورت میں فوری کارروائی کے لیے موقع پر شکایت سیل قائم کر دیا گیا ہے تاکہ خریداروں اور بیوپاریوں کو کسی پریشانی کا سامنا نہ کرنا پڑے۔