Category: راولپنڈی

96 لاکھ کہاں لگے؟ نالا بپھرا تو سوال اٹھا طارق ضیا کے دور کی انکوائری رکی کیوں، کس کی پشت پناہی؟
عوام ڈوبتے رہے، جواب دہی کہاں؟ طارق ضیا کے دور کے فنڈز کا حساب دو، سانحے سے پہلے انکوائری کرو

گوجرخان (قمرشہزاد) گزشتہ شب کے دو موسلا دھار بارشی سپیلوں نے گوجرخان کے مرکزی نالے کی صفائی کے دعووں کا پول کھول دیا۔ نالا بپھرا تو ملحقہ آبادیوں میں کئی کئی فٹ پانی گھس گیا، گھروں کا قیمتی سامان برباد ہوگیا جبکہ نالے کا گندا پانی شہریوں کی بورنگز میں داخل ہونے سے صاف پانی کے ذخائر بھی آلودہ ہونے لگے۔ذرائع و شہری حلقوں کے مطابق سابق سی او بلدیہ طارق ضیا کے دور میں مرکزی نالے کی صفائی پر 96 لاکھ روپے خرچ کیے گئے، مگر دو بارشوں نے اس صفائی کا عملی نتیجہ سب کے سامنے رکھ دیا۔ شہریوں نے دوٹوک سوال اٹھایا ہے کہ اگر نالا واقعی صاف کیا گیا تھا تو معمول کی شدید بارش میں ہی یہ بپھر کر آبادیوں کو ڈبونے پر کیوں اتر آیا؟نالے کی صفائی کے دوران بھی ناقص صفائی اور فوٹو سیشن کے حوالے سے سوشل میڈیا پر مسلسل آوازیں اٹھتی رہیں اور معاملہ میڈیا کی زینت بنتا رہا، مگر تاحال نہ مؤثر انکوائری ہوئی، نہ کمیٹی بنی اور نہ ہی اخراجات کا شفاف آڈٹ سامنے آیا۔ شہریوں کا کہنا ہے کہ خاموشی نے سوالات ختم نہیں کیے بلکہ مزید گہرے کر دیے ہیں۔ عوامی حلقوں نے سوال اٹھایا ہے کہ کیا سابق سی او بلدیہ طارق ضیا اتنے بااثر ہیں کہ کروڑوں نہیں تو لاکھوں کے سرکاری اخراجات بھی جواب دہی سے بالاتر ہیں، یا کوئی بااثر حلقہ ان کے پیچھے کھڑا ہے؟ اگر ایسا نہیں تو پھر 96 لاکھ روپے کی صفائی، اس کے معیار اور نگرانی کا حساب لینے میں تاخیر کیوں؟

متاثرہ شہریوں کا کہنا ہے کہ گھروں میں داخل ہونے والے گندے پانی سے ہونے والے نقصانات کا ذمہ دار کون ہے؟ عوام کے خون پسینے کی کمائی سے خرچ ہونے والے پیسے کا حساب کون دے گا اور ناقص منصوبہ بندی یا ناقص صفائی سے پیدا ہونے والی مشکلات کا ازالہ کون کرے گا؟ شہریوں نے وزیراعلیٰ پنجاب مریم نواز شریف سے مطالبہ کیا ہے کہ سابق سی او بلدیہ طارق ضیا کے دورِ تعیناتی کے تمام ترقیاتی فنڈز، منصوبوں اور بالخصوص نالوں کی صفائی کے اخراجات کا فوری، غیرجانبدارانہ اور خصوصی آڈٹ کرایا جائے، حقائق سامنے لانے کے لیے اعلیٰ سطحی انکوائری کمیٹی تشکیل دی جائے اور ذمہ داروں کے خلاف قانون کے مطابق کارروائی کی جائے۔

شہریوں کا کہنا ہے کہ سرکاری خزانہ کسی افسر یا ٹھیکیدار کی جاگیر نہیں، عوام کی امانت ہے، اس امانت کا حساب دینا ہوگا۔ حکام کو کسی بڑے سانحے کا انتظار کرنے کے بجائے ابھی حرکت میں آنا ہوگا، کیونکہ دو بارشوں نے صرف نالا نہیں بپھیر ا—سرکاری صفائی کے دعووں پر بھی سوالیہ نشان لگا دیا ہے۔

راولپنڈی کے شہر گوجر خان میں 2 روز قبل اپنی بہن کو مبینہ طور پر قتل کرنے والے ملزم کو پولیس نے گرفتار کر لیا۔

پولیس کے مطابق ملزم پر الزام ہے کہ اس نے پسند کی شادی کرنے پر اپنی بہن کو فائرنگ کرکے قتل کیا۔ واقعے کا مقدمہ مقتولہ کے والد کی مدعیت میں تھانہ گوجر خان میں درج کیا گیا ہے۔مقتولہ کے والد نے پولیس کو بتایا کہ ان کی بیٹی کو ان کے بیٹے نے فائرنگ کرکے قتل کیا۔والد کے مطابق مقتولہ نے رواں سال جنوری میں اپنی رخصتی کے روز گھر سے فرار ہوکر پسند کی شادی کی تھی اور اپنے شوہر کے ساتھ کراچی میں رہائش پذیر تھی۔

انہوں نے بتایا کہ واقعے سے 4 روز قبل مقتولہ کا بھائی صلح صفائی کے بعد اسے کراچی سے واپس گھر لے کر آیا تھا، تاہم 2 روز بعد اسے فائرنگ کرکے قتل کر دیا گیا۔پولیس نے ملزم کو گرفتار کرکے واقعے کی مزید تفتیش شروع کر دی ہے۔

تحصیلدار سمیت 4 اہم نشستیں خالی، شہری سرکاری فیسیں جمع کراکے بھی خوار
ایک ماہ سے انتظامی خلا، پنجاب حکومت کی گڈ گورننس پر سوالیہ نشان فوری تعیناتی کا مطالبہ
گوجرخان (قمرشہزاد) تحصیل آفس گوجرخان میں گزشتہ ایک ماہ سے تحصیلدار اور متعدد نائب تحصیلداروں کی نشستیں خالی ہونے کے باعث رجسٹریوں سمیت اراضی کے دیگر اہم معاملات شدید متاثر ہو رہے ہیں، جبکہ دور دراز علاقوں سے آنے والے شہری کاغذات مکمل اور سرکاری فیسیں جمع کرانے کے باوجود کام نہ ہونے پر شدید ذہنی کوفت کا شکار ہیں۔ تحصیل آفس میں اس وقت صرف ایک نائب تحصیلدار موجود ہے، جبکہ تحصیلدار سمیت تین نائب تحصیلداروں کی نشستیں تاحال خالی پڑی ہیں۔ ذرائع کے مطابق تحصیل آفس میں تعینات تحصیلدار کورس پر جانے کے باعث کئی روز قبل خالی ہونے والی نشست پر تاحال متبادل تحصیلدار تعینات نہیں کیا جا سکا، جبکہ نائب تحصیلداروں کی خالی نشستوں پر بھی تقرری نہ ہونے سے انتظامی امور کا بوجھ محدود عملے پر پڑ گیا ہے۔ تحصیلدار کی عدم موجودگی کے باعث متعدد رجسٹریاں التوا کا شکار ہیں بعض شہریوں کی سرکاری فیسیں بھی جمع ہو چکی ہیں اور کاغذات مکمل ہونے کے باوجود صرف مجاز افسر کی عدم موجودگی کے باعث ان کی رجسٹریاں آگے نہیں بڑھ رہیں۔ شہریوں کا کہنا ہے کہ زمینوں کی خرید و فروخت، انتقالات اور دیگر معاملات میں تاخیر سے نہ صرف انہیں بار بار تحصیل آفس کے چکر لگانا پڑ رہے ہیں بلکہ مالی اور ذہنی مشکلات بھی بڑھ رہی ہیں۔ ایک ماہ کے قریب عرصہ گزرنے کے باوجود اہم انتظامی نشستوں پر افسران کی تعیناتی نہ ہونا باعث تشویش ہے۔ شہری حلقوں نے سوال اٹھایا ہے کہ اگر ایک تحصیل میں اتنے اہم عہدے خالی ہوں اور عوام کے بنیادی ریونیو معاملات متاثر ہو رہے ہوں تو متعلقہ حکام کی جانب سے فوری متبادل انتظام کیوں نہیں کیا گیا۔شہریوں نے وزیراعلیٰ پنجاب اور اعلیٰ حکام سے مطالبہ کیا ہے کہ گوجرخان تحصیل آفس کی صورتحال کا فوری نوٹس لے کر تحصیلدار اور خالی تمام نائب تحصیلداروں کی نشستوں پر بلا تاخیر تعیناتیاں عمل میں لائی جائیں تاکہ رجسٹریوں اور اراضی سے متعلق زیرالتوا معاملات نمٹائے جا سکیں اور عوام کو غیرضروری دفتری چکروں، ذہنی اذیت اور مالی نقصان سے نجات مل سکے۔ شہریوں کے مطابق موجودہ صورتحال انتظامی کارکردگی اور حکومت پنجاب کی گڈ گورننس کے دعوؤں پر بھی سوالیہ نشان بن رہی ہے۔

گوجرخان میں منشیات کا مبینہ پھیلاؤ ٹھکانے بدلنے کا سلسلہ جاری نو تعینات ایس ایچ او کیلئے منشیات و قبضہ مافیا بڑا چیلنج
منشیات و قبضہ مافیا سے نجات کیلئے مؤثر کریک ڈاؤن ناگزیر شہریوں کا طویل تعیناتیوں کا جائزہ لینے اور قانون کی عملداری یقینی بنانے پر زور
گوجرخان (قمرشہزاد) گوجرخان میں منشیات کے مبینہ پھیلاؤ، قبضہ مافیا اور دیگر جرائم کے خلاف مؤثر کارروائی کے حوالے سے شہریوں کی نظریں پولیس پر مرکوز ہیں، تاہم تھانہ گوجرخان میں مبینہ ٹاؤٹ مافیا کی آمدورفت اور کئی کانسٹیبلز و ہیڈ کانسٹیبلز کی طویل عرصے سے تعیناتی شہری حلقوں کیلئے سوالیہ نشان بن گئی ہے۔ شہریوں کا کہنا ہے کہ تھانے میں ایسے افراد کی مسلسل آمدورفت جو عوامی سطح پر ٹاؤٹ مافیا سے منسوب کیے جاتے ہیں، پولیس حکام کی توجہ کا متقاضی معاملہ ہے، جبکہ کئی اہلکاروں کی سالہا سال ایک ہی تھانے میں تعیناتی کے باعث بھی عوامی سطح پر سوالات اٹھ رہے ہیں۔ شہری حلقوں نے مطالبہ کیا ہے کہ تھانہ گوجرخان میں طویل عرصے سے تعینات کانسٹیبلز، ہیڈ کانسٹیبلز اور دیگر اہلکاروں کی تعیناتی کا محکمانہ طور پر جائزہ لے کر پالیسی اور انتظامی تقاضوں کے مطابق ان کے تبادلے کیے جائیں۔ شہریوں کا کہنا ہے کہ طویل تعیناتی کسی اہلکار کے خلاف الزام یا جرم کا ثبوت نہیں، تاہم اہلکاروں کی باقاعدہ روٹیشن سے شفافیت، غیرجانبداری اور عوامی اعتماد کو تقویت ملتی ہے۔ دوسری جانب شہریوں کے مطابق منشیات فروشوں نے مبینہ طور پر اپنے ٹھکانے تبدیل کرکے شہر کے مختلف وارڈز اور علاقوں میں منشیات کی سپلائی کا سلسلہ جاری رکھا ہوا ہے، جس سے نوجوان نسل کے مستقبل کے حوالے سے تشویش بڑھ رہی ہے۔ شہریوں نے منشیات کے خلاف محض وقتی کارروائیوں کے بجائے سپلائی نیٹ ورک کے خلاف مستقل اور بلاامتیاز کریک ڈاؤن کا مطالبہ کیا ہے۔ نو تعینات ایس ایچ او تھانہ گوجرخان کیلئے منشیات فروشوں، قبضہ مافیا اور دیگر جرائم پیشہ عناصر کے خلاف کارروائیاں ایک بڑا امتحان قرار دی جا رہی ہے۔ شہریوں کو امید ہے کہ نئے ایس ایچ او قانون کی عملداری، شفافیت اور بلاامتیاز کارروائی کو یقینی بناتے ہوئے شہر کو منشیات اور قبضہ مافیا جیسے مسائل سے نجات دلانے کیلئے مؤثر اقدامات کریں گے۔ اب دیکھنا یہ ہے کہ نو تعینات ایس ایچ او اس چیلنج سے کس حد تک کامیابی سے نمٹتے ہیں۔ شہریوں نے اعلیٰ پولیس حکام سے مطالبہ کیا ہے کہ عوامی شکایات کا غیرجانبدارانہ جائزہ لیا جائے، مقامی و غیر مقامی ہیڈ کانسٹیبلز اور کانسٹیبلز کی طویل تعیناتیوں کے معاملے کو محکمانہ پالیسی کے مطابق دیکھا جائے اور گوجرخان میں قانون کی عملداری اور عوامی اعتماد کو ہر صورت مقدم رکھا جائے۔

سفارشی صفائی اہلکاروں کی من پسند ڈیوٹیاں، نجی کمپنی کا نظام ناکام ہسپتال گندگی کے نرغے میں مریضوں کی صحت داؤ پر
واش رومز بدبودار فرشوں پر خون کی دھبے نجی کنٹریکٹ ختم کرکے محکمہ صحت کے براہِ راست ماتحت صفائی عملہ بھرتی کرنے کا عوامی مطالبہ
گوجرخان (قمرشہزاد) تحصیل ہیڈکوارٹر اسپتال گوجرخان میں صفائی کا نظام سوالیہ نشان بن گیا، نجی کمپنی کے صفائی عملے کو مبینہ طور پر تقریباً تین ماہ سے تنخواہیں نہ ملنے کے باعث مالی مشکلات اور احتجاج کا سامنا ہے، جبکہ دوسری جانب شہری ہسپتال کی ابتر صفائی صورتحال پر پھٹ پڑے۔ شہریوں کے مطابق فرشوں کی باقاعدہ ڈیپ کلیننگ کا فقدان ہے اور بعض مقامات پر مبینہ طور پر خون کے دھبے تک دکھائی دیتے ہیں، جو انفیکشن کنٹرول کے حوالے سے سنگین تشویش کا باعث ہیں واش رومز میں بدبو اور تعفن پھیلا ہوتا ہے۔ ذرائع نے صفائی عملے میں مبینہ سفارشی بھرتیوں اور من پسند تعیناتیوں کا دعویٰ کرتے ہوئے کہا ہے کہ بعض بااثر افراد کے سفارشی اہلکار مبینہ طور پر اپنی مرضی کی جگہوں اور ڈیوٹیوں کا انتخاب کرتے، سہولت کے مطابق کام کرتے اور مطلوبہ ذمہ داریاں پوری نہیں کرتے، جس سے صفائی کا نظام مزید متاثر ہو رہا ہے۔ شہریوں کے مطابق تنخواہوں کی عدم ادائیگی کے بعد ہڑتال، دباؤ اور پھر وقتی صلح کا سلسلہ بھی مسئلے کا مستقل حل ثابت نہیں ہو سکا۔ شہریوں کا کہنا ہے کہ ملازمین کو اجرت نہ ملنا ظلم ہے، مگر مریضوں کو ناقص صفائی کے حوالے کرنا بھی کسی صورت قابل قبول نہیں۔ اگر نجی کمپنی نہ بروقت تنخواہیں دے پا رہی ہے اور نہ صفائی کا معیار برقرار رکھ پا رہی ہے تو ایسے نظام کی افادیت پر سوال اٹھنا فطری ہے۔ شہریوں نے مطالبہ کیا ہے کہ نجی صفائی کمپنیوں کے کنٹریکٹس کا فوری جائزہ لے کر انہیں ختم کیا جائے اور اسپتالوں میں صفائی کا عملہ براہِ راست محکمہ صحت کے ماتحت میرٹ پر بھرتی کیا جائے، جبکہ ضلعی سطح پر کمشنر اور سی ای او ہیلتھ کو حاضری، ڈیوٹی، کارکردگی اور تنخواہوں کی براہِ راست نگرانی کا پابند بنایا جائے۔ ساتھ ہی صفائی عملے کی بھرتیوں، حاضری، ڈیوٹی روسٹر، کمپنی کو ہونے والی ادائیگیوں اور تنخواہوں کا مکمل آڈٹ کرکے مبینہ سفارشی کلچر کی تحقیقات کی جائیں۔ شہریوں کا دوٹوک مؤقف ہے کہ اسپتال علاج گاہ ہے، گندگی اور جراثیم پھیلانے کی جگہ نہیں، ٹھیکوں، سفارشوں، من پسند ڈیوٹیوں اور وقتی ہڑتالوں کے بجائے ایسا شفاف نظام دیا جائے جس میں صفائی بھی نظر آئے اور ذمہ دار بھی۔

راولپنڈی میں شادی کا جھانسہ دے کر بنکاک سے پاکستان لائی گئی خاتون سے مبینہ زیادتی کے الزام میں پولیس نے ملزم کو گرفتار کرلیا۔

پولیس کے مطابق متاثرہ خاتون کی مدعیت میں تھانہ روات میں مقدمہ درج کرلیا گیا ہے۔ ایف آئی آر کے مطابق خاتون کی تقریباً دو سال قبل بنکاک میں ملزم سے ملاقات ہوئی، جس کے بعد دونوں میں دوستی ہوگئی۔خاتون نے پولیس کو دی گئی درخواست میں الزام عائد کیا کہ ملزم نے تقریباً چار ماہ قبل راولپنڈی کی ایک نجی ہاؤسنگ سوسائٹی میں کرائے پر فلیٹ حاصل کیا اور وہاں رہائش اختیار کی۔ایف آئی آر کے مطابق ملزم نے مبینہ طور پر خاتون کو شادی کا جھانسہ دے کر متعدد مرتبہ زیادتی کا نشانہ بنایا، جبکہ شادی کے مطالبے پر وہ مسلسل ٹال مٹول سے کام لیتا رہا۔متاثرہ خاتون نے الزام لگایا کہ ملزم اسے فلیٹ سے باہر جانے کی اجازت بھی نہیں دیتا تھا۔ خاتون کے مطابق واقعے کے روز ملزم نے اسے تشدد کا نشانہ بنایا اور جاتے ہوئے اس کے پیسے بھی اپنے ساتھ لے گیا۔

پولیس کا کہنا ہے کہ مقدمہ درج ہونے کے بعد کیس کی تفتیش ایس ایس آئی او یونٹ کے سپرد کردی گئی ہے، جبکہ گرفتار ملزم سے واقعے سے متعلق مزید تفتیش جاری ہے۔پولیس کے مطابق مقدمے میں عائد الزامات کی مزید قانونی کارروائی اور شواہد کی روشنی میں تحقیقات کی جارہی ہیں۔