Category: راولپنڈی

گوجرخان (قمرشہزاد) جہاں ایک طرف وزیر اعلیٰ پنجاب مریم نواز شریف صوبے میں اصلاحات اور گڈ گورننس کے ذریعے عوام کو ریلیف فراہم کرنے اور تمام تر بنیادی سہولیات باہم دہلیز تک پہنچانے کے لیے دن رات کوشاں ہیں، وہیں گوجرخان کے حلقہ پی پی 8 میں منتخب قیادت کی پراسرار خاموشی اور مسائل سے مسلسل چشم پوشی کی بنا پر متعلقہ اداروں کے افسران وزیر اعلیٰ کے اس ویژن کو زمین بوس کرنے اور ان کی ساکھ کو سبوتاژ کرنے کے مشن پر گامزن دکھائی دیتے ہیں۔

گوجرخان سٹی میں پانی کے بحران کی گھمبیر صورتحال کی بنا پر جماعت اسلامی گوجرخان کے جنرل سیکرٹری راجہ عمیر نے اپنا شدید ردعمل دیتے ہوئے کہا ہے کہ ٹینڈرز کے اجرا میں تاخیر اور پانی کے سنگین بحران نے بلدیہ گوجرخان اور متعلقہ ڈیپارٹمنٹ کی کارکردگی پر سوالیہ نشان لگا دیا ہے۔ سماجی حلقوں کا کہنا ہے کہ ایسا محسوس ہوتا ہے جیسے افسران جان بوجھ کر عوامی غیظ و غصب کو ہوا دے رہے ہیں تاکہ حکومت کے خلاف نفرت پیدا کی جا سکے۔ اہلیانِ گوجرخان نے وزیر اعلیٰ پنجاب سے مطالبہ کیا ہے کہ وہ فوری طور پر حلقہ پی پی 8 کی صورتحال کا سختی سے نوٹس لیں اور ترجیح بنیادوں پر درپیش مسائل کو حل کروانے میں اپنا کلیدی کردار ادا کریں اور انکے ویژن کو زمین بوس کرنے والے اداروں کے افسران اور ملازمین کو فوری طور پر ضلع بدر کیا جائے۔ گوجرخان میں بجلی کی غیر اعلانیہ لوڈشیڈنگ، گیس کا زیرو پریشر جبکہ ریونیو دفاتر میں جاری لوٹ مار اور ٹی ایچ کیو ہسپتال میں آئے روز کے اسکینڈلز درجہ چہارم کے ملازمین کی غنڈہ گردی اس بات کا ثبوت ہے کہ یہاں قانون نہیں بلکہ افسر شاہی کا راج ہے۔

شہریوں کا کہنا ہے کہ ہمیں افسوس ہے کہ سی ایم پنجاب تو اصلاحات لانا چاہتی ہیں، مگر بیوروکریسی کے ماتحت ادارے مبینہ طور پر اپنی جیبیں بھرنے اور حلقہ پی پی 8 کی قیادت عوامی مسائل سے چشم پوشی کرنے میں مصروف ہیں۔ یہ افسران گڈ گورننس کے دشمن ہیں اور عوامی مینڈیٹ کی توہین کر رہے ہیں۔ جبکہ عوامی حلقوں کا پانی کے بحران پر 10 فروری بروز منگل بلدیہ دفتر کے سامنے ہونے والے مظاہرے کے متعلق کہنا ہے کہ اب محض ایک احتجاج نہیں بلکہ ان سفید ہاتھیوں کے خلاف اعلانِ جنگ ہوگا جو عوام کا خون چوس رہے ہیں۔

خونی رشتوں کی بے رحمی حسد کی آگ نے بستا گھر اجاڑ دیا تائی نہیں قصائی نے معصوم نومولود کو زندہ کنویں میں پھینک کر ممتا کا کلیجہ چھلنی کر دیا
کینٹ خلیل میں کہرام گیارہ روزہ بچے کے بہیمانہ قتل کا ڈراپ سین اپنوں کے روپ میں چھپے بھیڑیے بے نقاب ڈرامہ رچانے والی سفاک قاتلہ گرفتار
گوجرخان (قمرشہزاد) تھانہ جاتلی کے علاقے کینٹ خلیل میں انسانیت سوز واقعہ نے پورے علاقے کو ہلا کر رکھ دیا۔ حسد اور نفرت کی آگ میں اندھی ہونے والی سگی تائی نے ممتا کے تقدس کو پامال کرتے ہوئے اپنے ہی گیارہ دن کے معصوم بھتیجے کو موت کے گھاٹ اتار دیا۔

تفصیلات کے مطابق کینٹ خلیل میں پیش آنے والے اس لرزہ خیز قتل کیس کا ڈراپ سین اس وقت ہوا جب پولیس کی پیشہ ورانہ تحقیقات نے قاتلہ کا نقاب الٹ دیا۔ ملزمہ نے محض حسد کی بنیاد پر اس ننھے پھول کو اغوا کیا اور بے رحمی سے کنویں میں پھینک دیا جس سے معصوم بچہ دم توڑ گیا۔واقعے کی اطلاع ملتے ہی ایس ایچ او تھانہ جاتلی جمال نواز نے اپنی ٹیم کے ہمراہ برق رفتار کارروائی کی اور جدید سائنسی خطوط پر تفتیش کرتے ہوئے ملزمہ کو دھر لیا۔ پولیس ذرائع کا کہنا ہے کہ ملزمہ نے اپنے جرم کا اعتراف کر لیا ہے، تاہم مزید حقائق جاننے کے لیے تفتیش کا دائرہ وسیع کر دیا گیا ہے۔ علاقے میں اس بہیمانہ قتل پر شدید غم و غصہ پایا جاتا ہے، جبکہ شہریوں نے قاتلہ کو نشانِ عبرت بنانے کا مطالبہ کیا ہے۔ پولیس کی بروقت کارروائی اور ملزمہ کی گرفتاری پر اہل علاقہ نے اطمینان کا اظہار کرتے ہوئے ایس ایچ او جمال نواز کو خراجِ تحسین پیش کیا ہے۔ معصوم بچے کی لاش ملنے پر گھر میں صفِ ماتم بچھی ہوئی ہے اور ہر آنکھ اشکبار ہے۔

یوٹرن یا صلح نامہ؟ چارج نرس ماریہ عندلیب کا وضاحتی بیان جاری ایم پی اے، سی ای او ہیلتھ، ایم ایس سے اختلافات کی تردید کرتے ہوئے معذرت کی
گوجرخان (قمرشہزاد) تحصیل ہیڈ کوارٹر ہسپتال گوجرخان کی نرسسز نے اعلی الصبح ہسپتال کے باہر احتجاج کیا مظاہرین نے بینرز اور پلے کارڈ اٹھا رکھے تھے جن پر درج تھا سی ایم کی ریڈ لائن خواتین ہسپتال کی نرسسز کو ہراسانی کا سامنا، وارڈ ماسٹر کی غنڈہ گردی نامنظور جیسے دیگر تیکھے نعرے درج تھے۔ معاملے کی نزاکت اور احتجاج کی شدت کو بھانپتے ہوئے ایم ایس ڈاکٹر سرمد حسین کیانی اور سینئر ڈاکٹرز و ایڈمنز میدان میں آ گئے۔ انتظامیہ نے احتجاجی نرسوں کو مذاکرات کی میز پر بلایا اور ان کے جائز مطالبات حل کرنے کی ٹھوس یقین دہانی کروائی، جس کے بعد نرسوں نے اپنا احتجاج ختم کیا۔ دوسری جانب اس پورے معاملے میں اس وقت نیا موڑ آگیا جب متاثرہ چارج نرس ماریہ عندلیب نے ایڈمن آفس سے اپنے وضاحتی بیان میں سوشل میڈیا پر انکے تبادلے کو ایم پی اے سمیت شعبہ صحت حکام کے نام سے منسوب کرنے کی جو پوسٹیں گردش کر رہی تھیں مذکورہ نرس نے ان تمام تر الزامات کی گرد جھاڑتے ہوئے کہا کہ ان کا ایم ایس ڈاکٹر سرمد کیانی، سی ای او ہیلتھ راولپنڈی یا ایم پی اے راجہ شوکت عزیز بھٹی کے ساتھ کوئی جھگڑا یا اختلاف نہیں ہے نہ ہی ان میں سے کسی نے میرا تبادلہ کروایا ہے۔ مزید برآں انہوں نے واضح کیا کہ وہ اپنا تبادلہ واپس کروانے کے لیے سی ای او ہیلتھ راولپنڈی سے رجوع کر چکی ہیں جہاں سے انہیں مثبت اشارہ ملا ہے۔ حیرت انگیز طور پر چارج نرس نے ہسپتال انتظامیہ اور ڈی ایچ اے راولپنڈی حکام سے غلط فہمی کی بنا پر کیے گے احتجاج کی وجہ سے کسی بھی قسم کی دل آزاری پر معذرت بھی کر لی ہے، جس نے احتجاج کے پیچھے چھپے اصل حقائق پر کئی سوالیہ نشانات کھڑے کر دیے ہیں۔

گوجرخان (قمرشہزاد) گوجرخان کے نواحی علاقے کنیٹ خلیل میں انسانیت لرز اٹھی۔ گیارہ دن کا معصوم بچہ بے رحمی کی بھینٹ چڑھ گیا۔ کئی روز سے لاپتہ نومولود کی لاش گھر کے صحن میں موجود کنویں سے برآمد ہونے پر علاقے میں کہرام مچ گیا اور فضا سوگوار ہو گئی۔

تفصیلات کے مطابق، کنیٹ خلیل کے رہائشی کامران ولید کا 11 روزہ شیر خوار بچہ پراسرار طور پر غائب ہو گیا تھا، جس کا مقدمہ تھانے میں درج کرایا گیا تھا۔ والدین اپنے جگر گوشے کی واپسی کے لیے دعائیں مانگ رہے تھے، مگر آج بروز اتوار اس وقت قیامت ٹوٹ پڑی جب لاپتہ بچے کی لاش گھر کے اندر موجود کنویں میں تیرتی ہوئی پائی گئی۔ مقامی افراد نے اپنی مدد آپ کے تحت لاش کو کنویں سے نکال کر ہسپتال منتقل کیا۔ معصوم جان کے ساتھ پیش آنے والے اس وحشیانہ واقعے نے ہر آنکھ پرنم کر دی ہے۔ پولیس نے جائے وقوعہ سے شواہد اکٹھے کر لیے ہیں اور واقعے کی سنگینی کو مدنظر رکھتے ہوئے مختلف زاویوں سے تحقیقات کا آغاز کر دیا ہے۔ پولیس واقعے کی ہر پہلو سے تحقیقات کر رہی ہے۔ اس افسوسناک واقعے پر علاقہ مکینوں میں غم و غصہ پایا جاتا ہے اور وہ ذمہ داروں کی فوری گرفتاری کا مطالبہ کر رہے ہیں۔ پولیس کا کہنا ہے کہ تفتیش مکمل ہونے کے بعد ہی حقائق سامنے آئیں گے۔

راولپنڈی کے علاقے اقبال ٹاؤن میں ایک دلخراش واقعہ پیش آیا جہاں 5 سالہ معصوم بچہ سیوریج کے پانی سے بھرے کھڈے میں گر کر جان کی بازی ہار گیا۔ واقعے نے علاقے میں خوف و ہراس پھیلا دیا جبکہ شہریوں میں شدید غم و غصہ پایا جاتا ہے۔

ریسکیو حکام کے مطابق یہ افسوسناک حادثہ صادق آباد اقبال ٹاؤن کے علاقے میں نجی ہاؤسنگ اپارٹمنٹس کے قریب پیش آیا۔ بتایا گیا ہے کہ بچہ پتنگ پکڑنے کی کوشش میں کھیلتے کھیلتے اچانک کھلے کھڈے میں جا گرا، جو سیوریج کے گندے پانی سے مکمل طور پر بھرا ہوا تھا۔ریسکیو ذرائع کا کہنا ہے کہ مذکورہ نجی ہاؤسنگ اپارٹمنٹس کی جانب سے تعمیراتی مقاصد کے لیے کھدائی کروائی گئی تھی، تاہم حفاظتی اقدامات اختیار نہیں کیے گئے۔ کھدائی کے باعث ملحقہ نالہ بند ہو گیا جس کا پانی جمع ہو کر کھلے کھڈے میں بھر گیا، جس سے یہ جگہ انتہائی خطرناک بن گئی تھی۔

واقعے کی اطلاع ملتے ہی ریسکیو ٹیمیں موقع پر پہنچیں اور بچے کو نکال کر فوری طور پر قریبی ہسپتال منتقل کیا گیا، تاہم ڈاکٹرز نے بچے کی موت کی تصدیق کر دی۔ ریسکیو حکام کے مطابق پانی کی گہرائی اور گندگی کے باعث بچے کو بچایا نہ جا سکا۔بچے کی موت کے بعد تھانہ صادق آباد پولیس بھی جائے وقوعہ پر پہنچ گئی۔ پولیس حکام کا کہنا ہے کہ واقعے کی مکمل تحقیقات کی جا رہی ہیں،علاقہ مکینوں نے نجی ہاؤسنگ انتظامیہ اور متعلقہ اداروں پر شدید تنقید کرتے ہوئے مطالبہ کیا ہے کہ شہر میں کھلے کھڈوں اور غیر محفوظ تعمیراتی سرگرمیوں کے خلاف سخت کارروائی کی جائے تاکہ مستقبل میں ایسے افسوسناک واقعات سے بچا جا سکے۔

گوجرخان (قمرشہزاد) خونی کھیل پتنگ بازی کے سدباب اور انسانی جانوں کے تحفظ کے لیے پولیس نے شکنجہ مزید کس دیا۔ ایس ایچ او تھانہ گوجرخان مرزا طیب ظہیر بیگ نے ٹرانسپورٹ مافیا اور سہولت کاروں کے خلاف جارحانہ حکمت عملی اپناتے ہوئے واضح کیا ہے کہ پتنگ بازی کے سامان کی نقل و حمل میں ملوث کسی بھی شخص کو معافی نہیں ملے گی۔

تفصیلات کے مطابق گزشتہ روز اپنے دفتر میں گڈز ٹرانسپورٹ، کارگو سروس، کورئیر کمپنیوں اور ساؤنڈ سسٹم مالکان کے ایک ہنگامی اجلاس کی صدارت کرتے ہوئے انسپکٹر مرزا طیب ظہیر بیگ نے سخت ترین ہدایات جاری کرتے ہوئے دوٹوک الفاظ میں تنبیہ کی کہ کوئی بھی گڈز، کورئیر یا بس سروس پتنگ اور ڈور کی بلٹی بک نہیں کرے گی۔ اگر کسی بھی بس یا ویگن میں پتنگ بازی کا سامان پایا گیا تو نہ صرف سخت ترین ایف آئی آر درج ہوگی بلکہ وہ گاڑی بھی فوری طور پر بند کر دی جائے گی۔ اس موقع پر ساؤنڈ سسٹم مالکان کو پابند کیا گیا ہے کہ وہ کسی بھی پتنگ باز کو سسٹم فراہم نہیں کریں گے۔ کسی بھی قسم کے پروگرام کے لیے پولیس سے باقاعدہ این او سی لینا لازمی ہوگا اور اس کی پیشگی اطلاع تھانے میں دینا ہوگی، بصورتِ دیگر آلات ضبط کر کے قانونی کارروائی کی جائے گی۔ ایس ایچ او نے واضح کیا کہ حکومت کی جانب سے جاری کردہ ضابطہ اخلاق کی خلاف ورزی کرنے والوں کے خلاف آہنی ہاتھوں سے نمٹا جائے گا۔ انسانی جانوں سے کھیلنے والے کسی رعایت کے مستحق نہیں اور ان کی معاونت کرنے والے بھی برابر کے مجرم تصور ہوں گے۔ میٹنگ میں شریک تمام گڈز مالکان اور ٹرانسپورٹرز نے انسپکٹر مرزا طیب ظہیر بیگ کے اقدامات کی بھرپور حمایت کی اور یقین دہانی کروائی کہ وہ پولیس کے ساتھ مکمل تعاون کریں گے اور کسی بھی غیر قانونی سرگرمی یا مشکوک پارسل کی اطلاع فوری طور پر تھانہ میں دیں گے۔