Category: راولپنڈی

بایومیٹرک مانیٹرنگ کا سنسنی خیز انکشاف 40 ہزار تنخواہ کے بدلے 26 ہزار کیوں؟ غیر حاضر ملازمین کا احتجاج کے نام پر بلیک میلنگ کا دھندہ بے نقاب
عوامی حلقوں کا شدید غم و غصہ گلیاں گندگی سے تعفن زدہ، سوزوکیوں پر چکر لگا کر غائب ہونے والے بھوت ورکرز کے خلاف فوری انکوائری اور برطرفی کا مطالبہ

گوجرخان(قمرشہزاد)حکومتِ پنجاب کا اربوں روپے کا ستھرا پنجاب پروگرام گوجرخان میں افسر شاہی، سینیٹری ورکرز کی کام چوری اور مبینہ بلیک میلنگ کی نذر ہو گیا۔ ایک طرف صفائی ملازمین نے تنخواہوں کی کٹوتی اور اعزازیہ نہ ملنے کا رونا رو کر سڑکوں پر احتجاج شروع کر رکھا ہے، تو دوسری طرف شہر کی گلی محلے اور تجارتی مراکز کچرا کنڈی کا منظر پیش کر رہے ہیں، جس نے حکومتی دعووں کے پرخچے اڑا دیے ہیں۔

تفصیلات کے مطابق احتجاجی ورکرز کا مؤقف ہے کہ ان کی تنخواہ 40 ہزار روپے مقرر ہے مگر انہیں صرف 26 ہزار روپے دیے جا رہے ہیں، جو ان کے معاشی استحصال کے مترادف ہے۔ دوسری جانب آپریشنل مینیجر بابر شکیل نے اس احتجاج کا کچا چٹھا کھولتے ہوئے سنسنی خیز حقائق سامنے رکھ دیے۔ انہوں نے میڈیا کو بتایا کہ 40 ہزار روپے کی پوری تنخواہ کے لیے ماہانہ 26 دن کی حاضری لازمی ہے، جبکہ تمام ورکرز کی حاضری کا نظام مکمل طور پر بائیومیٹرک ہے۔ اس ڈیجیٹل حاضری کی مانیٹرنگ براہِ راست اعلیٰ حکام کر رہے ہیں۔ انہوں نے دوٹوک الفاظ میں کہا کہ تنخواہیں صرف ان ورکرز کی کاٹی گئی ہیں جو ڈیوٹی سے غائب رہتے ہیں اور جن کی حاضری پوری نہیں ہے۔

دوسری جانب، اس سارے ڈرامے پر گوجرخان کے شہریوں کا پیمانہ لبریز ہو چکا ہے۔ عوامی حلقوں نے شدید تحفظات کا اظہار کرتے ہوئے چشم کشا حقائق سے پردہ اٹھایا ہے کہ احتجاج کرنے والے یہ مٹھی بھر ورکرز کبھی گلیوں یا سڑکوں پر صفائی کرتے نظر نہیں آئے۔ صفائی کے نام پر صرف یہ ہوتا ہے کہ سرکاری سوزوکیاں اتی ہیں، ورکرز چکر لگا کر غائب ہو جاتے ہیں اور گندگی کے ڈھیر جوں کے توں پڑے رہتے ہیں جب ان پر سختی کی جائے یا کام لیا جائے تو یہ لوگ افسران کو بلیک میل کرنے کے لیے اوچھے ہتھکنڈے اپنائے ہیں۔شہر کی سماجی و عوامی تنظیموں نے وزیرِ اعلیٰ پنجاب اور مانیٹرنگ حکام سے اس سنگین معاملے پر فوری اور سخت ایکشن لینے کا مطالبہ کیا ہے۔

شہریوں کا کہنا ہے کہ اس معاملے کی اعلیٰ سطحی انکوائری ہونی چاہیے۔ اگر افسران ورکرز کا حق مار رہے ہیں تو ان کے خلاف کارروائی کی جائے، لیکن اگر بائیومیٹرک ریکارڈ کے مطابق ورکرز کی حاضری کم ہے اور وہ محض اپنی کام چوری چھپانے کے لیے شہر کو یرغمال بنا رہے ہیں، تو ایسے اشتعال انگیز، شر پسند اور بلیک میلر ڈیلی ویجز و سرکاری ملازمین کو فوری طور پر نوکریوں سے برخاست کیا جائے۔ گوجرخان کے عوام نے دوٹوک کہا ہے کہ ٹیکس دہندگان کا پیسہ کام چوروں اور بلیک میلروں کی جیبوں میں جانے کی اجازت ہرگز نہیں دی جا سکتی۔

وزیراعلیٰ پنجاب مریم نوازنے راولپنڈی میں “معرکہ حق سکوائر” کا باقاعدہ افتتاح کر دیا، جبکہ کچہری چوک فلائی اوور اور انڈر پاس کو بھی “معرکہ حق فلائی اوور” اور “معرکہ حق انڈر پاس” کا نام دے دیا گیا۔ افتتاحی تقریب کے دوران معرکہ حق سکوائر پراجیکٹ کے سنگِ میل کی نقاب کشائی کی گئی اور ملکی ترقی و سلامتی کیلئے خصوصی دعائے خیر بھی کی گئی۔

وزیراعلیٰ پنجاب نے افتتاح کے بعد سگنل فری کوریڈور کا تفصیلی دورہ کیا اور انیکسی چوک سے جی پی او چوک تک منصوبے کے مختلف حصوں کا معائنہ کیا۔ اس موقع پر صوبائی وزیر مواصلات و تعمیرات صہیب احمد بھرت نے بریفنگ دیتے ہوئے بتایا کہ روات سے موٹر وے تک 25 کلومیٹر طویل سگنل فری کوریڈور کے دو مراحل مکمل کر لیے گئے ہیں، جبکہ تیسرے مرحلے پر جلد کام شروع ہوگا۔حکام کے مطابق یہ منصوبہ پاکستان کا اپنی نوعیت کا پہلا منفرد پراجیکٹ ہے، جسے مقررہ 190 دن کے بجائے صرف 179 دنوں میں مکمل کیا گیا۔ منصوبے کے تحت 5 انڈر پاسز، 2 اوور ہیڈ برجز اور ایک جدید پیڈسٹرین برج تعمیر کیا گیا ہے، جبکہ اس پر مجموعی طور پر 19 ارب روپے لاگت آئی۔بریفنگ میں بتایا گیا کہ اس سگنل فری کوریڈور سے روزانہ 2 لاکھ سے زائد گاڑیاں بلا تعطل گزر سکیں گی، جس سے راولپنڈی میں ٹریفک کے مسائل میں نمایاں کمی آئے گی اور شہریوں کو بہتر سفری سہولیات میسر آئیں گی۔

اس موقع پر گفتگو کرتے ہوئے وزیراعلیٰ مریم نواز شریف نے کہا کہ یہ منصوبہ راولپنڈی کے اربن کلچر کو جدید خطوط پر استوار کرے گا۔ انہوں نے اعلان کیا کہ منصوبے کے اگلے مرحلے میں ریس کورس، چیئرنگ کراس اور اے ایف آئی سی چوک میں مزید انڈر پاسز تعمیر کیے جائیں گے، جس کے بعد اس کوریڈور میں مجموعی طور پر 9 انڈر پاسز اور 3 فلائی اوورز شامل ہوں گے۔

دفاعِ وطن کے ضامنوں پر آنچ نہیں آنے دیں گے، پوری قوم اپنے جانثاروں کے پیچھے سیسہ پلائی دیوار بن کر کھڑی ہے اسسٹنٹ کمشنر خضر ظہور گورائیہ
پاک فوج اور عوام کا رشتہ اٹوٹ ہے، معرکہ حق کے غازیوں کو سلام پیش کرتے ہیں، وطن کے دشمنوں کو چھپنے کی جگہ نہیں ملے گی ثاقب علی بیگ

گوجرخان (قمر شہزاد) معرکہ حق کا ایک سال مکمل ہونے اور افواجِ پاکستان کے ساتھ چٹان کی طرح کھڑے ہونے کا عہد کرنے کے لیے میونسپل کمیٹی گوجرخان سے ایک عظیم الشان یکجہتی ریلی ایڈمنسٹریٹر گوجر خان خضر ظہور گورائیہ کی قیادت میں حیات سر روڈ چوک تک نکالی گئی۔ ریلی میں سی او بلدیہ، بلدیہ انسپکٹرز، بلدیہ اہلکاروں، پیرا فورس، پولیس تھانہ گوجرخان، تاجروں، صحافی برادری اور شہریوں سکول کے بچوں کی کثیر تعداد نے شرکت کر کے ثابت کر دیا کہ گوجرخان کے عوام اپنے محافظوں کے ساتھ کھڑے ہیں۔

ایڈمنسٹریٹر خضر ظہور گورائیہ نے شرکاء سے خطاب کرتے ہوئے کہا افواجِ پاکستان ہماری بقا کی ضامن اور ہماری غیرت کی علامت ہیں۔ معرکہ حق کا یہ دن ہمیں یاد دلاتا ہے کہ جب بھی وطنِ عزیز پر کوئی آنچ آئی، پاک فوج کے جوانوں نے اپنے سینوں پر گولیاں کھا کر اس مٹی کی لاج رکھی۔ آج کی یہ ریلی ان مفاد پرست ٹولوں کے منہ پر طمانچہ ہے جو فوج اور عوام کے درمیان دراڑ ڈالنے کا خواب دیکھ رہے ہیں۔ ہم اپنی فوج کے وقار پر پہرہ دیتے رہیں گے کیونکہ یہ وردی صرف لباس نہیں، ہماری آزادی کی ڈھال ہے۔

معروف مسلم لیگ ن کے راہنما ثاقب علی بیگ ایڈووکیٹ نے خطاب کرتے ہوئے کہا تاریخ گواہ ہے کہ جب سرحدیں پکارتی ہیں تو پاک فوج کے غازی لبیک کہتے ہیں۔ معرکہ حق محض ایک واقعہ نہیں بلکہ حق و باطل کے درمیان وہ لکیر ہے جس نے دوست اور دشمن کی پہچان کرا دی۔ پاکستان کی سالمیت کے خلاف اٹھنے والی ہر میلی آنکھ کو پھوڑنا ہم جانتے ہیں۔ پاک فوج سے محبت ہمارے ایمان کا حصہ ہے، اور ہم واضح کر دینا چاہتے ہیں کہ ریاست کے ستونوں سے ٹکرانے والے خود پاش پاش ہو جائیں گے۔ ہماری رگوں میں دوڑتا خون بھی اس مٹی اور اس کے محافظوں پر قربان ہے۔

ریلی کے اختتام پر شرکاء نے پاک فوج کے حق میں فلک شگاف نعرے لگائے اور حیات سر چوک پر پاکستان کے دفاع کی خاطر کسی بھی قربانی سے دریغ نہ کرنے کا حلف اٹھایا۔