Category: راولپنڈی

راولپنڈی میں شاہد آفریدی کے خلاف کوئی مقدمہ درج نہیں ہوا ہے۔راولپنڈی پولیس نے سوشل میڈیا پر سابق قومی کرکٹر شاہد آفریدی کے خلاف درج مقدمے کی تردید کردی ہے۔سوشل میڈیا پر گردش کرتی افواہوں کے مطابق عابد بن عبدالقدوس نامی شہری نے شاہد آفریدی سمیت 10 افراد پر فراڈ کا مقدمہ تھانہ روات میں درج کروایا ہے۔مقدمے میں کہا گیا کہ شاہد آفریدی نے ایک پراپرٹی فراڈ کی تشہیر کی، جس پر مدعی نے سرمایہ کاری کی اور اس کے پیسے ڈوب گئے۔تاہم اس حوالے سے راولپنڈی پولیس کا کہنا ہے کہ بیان کردہ اطلاعات قطعی بے بنیاد اور حقائق کے برخلاف ہیں،پولیس کے مطابق تھانہ روات میں معزز عدالت کے حکم پر شہری عابد بن عبدالقدوس کی درخواست پر پراپرٹی کے فراڈ کے حوالہ سے چند نامزد ملزمان کا خلاف مقدمہ درج کیا گیا، جس کے متن میں میڈیا ایڈورٹائزمنٹ کا حوالہ ہے، شاہد آفریدی کا مذکورہ مقدمہ سے کوئی تعلق نہیں۔بیان میں کہا گیا کہ راولپنڈی پولیس سوشل میڈیا پر سامنے آنے والی بے بنیاد خبروں کی تردید کرتی ہے۔

ریجنل پولیس آفیسر (آر پی او) راولپنڈی سید خرم علی چھٹی پر بیرون ملک روانہ ہوگئے جبکہ ترجمان آر پی او کا کہنا ہے کہ سید خرم علی فیملی کے ہمراہ برطانیہ گئے، 2 مارچ کو واپسی ہے۔ترجمان آر پی او کے مطابق آر پی او راولپنڈی سید خرم علی 16 فروری کو ہی رخصت پر چلے گئے تھے۔ترجمان آر پی او راولپنڈی کے مطابق سید خرم علی 15 روز کی چھٹی پر بیرون ملک گئے ہیں، سابق کمشنر راولپنڈی لیاقت علی چھٹہ کی پریس کانفرنس میں آر پی او کی شرکت کا بھی بتایا گیا تھا۔ترجمان کا کہنا ہے کہ گزشتہ روز کی پریس کانفرنس میں آرپی او کا نام شامل ہونے پر پوچھ گچھ کی جا رہی ہے، آرپی او سید خرم علی فیملی کے ہمراہ برطانیہ گئے ہیں، 2 مارچ کو واپس آئیں گے۔آر پی او راولپنڈی کے ترجمان نے مزید بتایا کہ آر پی او سید خرم علی نے انتخابات سے قبل چھٹی کی درخواست دی تھی۔ترجمان راولپنڈی پولیس کے مطابق آر پی او سید خرم علی ایک ماہ قبل چھٹی اپلائی کی تھی، جو دو ہفتے قبل منظور ہوئی، خرم علی 18 فروری سے 02 مارچ تک ایکس پاکستان لیو پر ہیں، آر پی او کے عہدے کا چارج سی پی او راولپنڈی سید خالد ہمدانی کے پاس ہے۔

سابق کمشنر راولپنڈی لیاقت علی چٹھہ کے الزامات کی تحقیقات کیلئے الیکشن کمیشن کی انکوائری کمیٹی کا پہلا اجلاس آج ہوگا۔ کمیٹی کی رپورٹ آنے کے بعد کمشنر راولپنڈی کے خلاف توہین الیکشن کمیشن کی کارروائی اور قانونی چارہ جوئی کے بارے میں فیصلہ کیا جائے گا۔انکوائری کمیٹی کے اجلاس کی سربراہی سینئر ممبر الیکشن کمیشن نثار درانی کریں گے، اجلاس میں کمیٹی ٹی او آرز طے کرے گی، کمیٹی راولپنڈی کے ڈی آر اوز اور متعلقہ آر اوز کے اس سلسلہ میں بیانات قلمبند کر کے 3 دن میں اپنی رپورٹ الیکشن کمیشن کو پیش کرے گی۔دوسری جانب راولپنڈی ڈویژن کے قائم مقام کمشنر اور ڈی آر اوز نے سابق کمشنر کے تمام تر الزامات کو مسترد کر دیا ہے۔قائم مقام کمشنر راولپنڈی سیف انور جپہ نے پریس کانفرنس کرتے ہوئے کہا کہ حالیہ انتخابات میں کمشنر کا کوآرڈینیشن کے علاوہ کوئی کردار نہیں، سابق کمشنر کے الزامات کی تردید کرتا ہوں۔

ڈی آر اوز نے سابق کمشنر راولپنڈی کے الزامات کی تردید کرتے ہوئے کہا ہے کہ الزامات کی آزادانہ انکوائری کروائی جائے، الیکشن شفاف کروائے، ہم پر کوئی دباؤ تھا نہ ہی کوئی بے ضابطگی کی گئی، تمام حلقوں میں انتخاب صاف شفاف اور بغیر کسی اثر کے کروائے۔ادھر نگران وزیراعلیٰ پنجاب نے بھی کمشنر راولپنڈی ڈویژن کے دھاندلی کے الزامات کا نوٹس لے لیا۔محسن نقوی نے انکوائری کیلئے اعلیٰ سطح کی کمیٹی تشکیل دینے کا حکم دیتے ہوئے کہا کہ انتخابات میں بے ضابطگیوں کے الزامات سے متعلق حقائق قوم کے سامنے لائے جائیں۔ چیف جسٹس آف پاکستان نے بھی کمشنر راولپنڈی کے الزامات کو بے بنیاد قرار دیا ہے۔چیف جسٹس قاضی فائز عیسیٰ کا کہنا تھا کہ الزامات لگانا حق ہے، لیکن ثبوت بھی دیں، لوگ بے بنیاد الزامات بھی لگاتے ہیں، جن الزامات میں کوئی صداقت نہیں۔ انہوں نے کہا کہ کل کو آپ قتل یا چوری کا الزام لگا دیں، سچائی اور صداقت ہے تو ثبوت دیں، سمجھ نہیں آتا کمشنر راولپنڈی نے میرے خلاف الزام کیوں لگائے، ہمارا الیکشن سے کوئی تعلق نہیں، انتخابات کرانا الیکشن کمیشن کی ذمہ داری ہے۔ واضح رہے کہ گزشتہ روز سابق کمشنر راولپنڈی لیاقت علی چٹھہ نے الیکشن میں دھاندلی کرانے کا اعتراف کیا تھا۔

لیاقت علی چٹھہ نے پریس کانفرنس کرتے ہوئے کہا کہ میں راولپنڈی میں دھاندلی کی ذمہ داری قبول کرتا ہوں، عہدے اور سروس سے استعفیٰ دیتا ہوں، میں نے پوری قوم کے ساتھ ظلم کیا، مجھے راولپنڈی کے کچہری چوک میں سزائے موت دی جائے، خود کو پولیس کے حوالے کر رہا ہوں۔انہوں نے کہا کہ ملک کی پیٹھ میں جو چھرا گھونپا وہ مجھے سونے نہیں دیتا، پاکستان توڑنے کے جرم میں شریک نہیں ہوسکتا، میرے ساتھ چیف الیکشن کمشنر اور چیف جسٹس کو بھی پھانسی پر لگایا جائے، یہ سب جرم میں برابر کے شریک ہیں۔