شکارپور کے قریب قومی شاہراہ بائی پاس کے مقام پر ٹرک حادثے میں 7 افراد جاں بحق اور 6 افراد زخمی ہو گئے۔
پولیس کے مطابق سبزی سے لدے ٹرک نے سڑک کنارے سوئے ہوئے افراد کو روند ڈالا، جاں بحق افراد کی لاشوں اور زخمیوں کو سول اسپتال منتقل کر دیا گیا ہے،پولیس حکام کا کہنا ہے ابتدائی طور پر حادثہ تیز رفتاری کا نتیجہ معلوم ہوتا ہے، تاہم ٹرک کو تحویل میں لیکر تحقیقات کا آغاز کر دیا گیا ہے اور مکمل تحقیقات کے بعد ہی کسی حتمی نتیجے پر پہنچ سکتے ہیں۔
گھوٹکی (باغی ٹی وی، نامہ نگار مشتاق علی لغاری) عادلپور تھانے کی حدود میں یونین کونسل مٹھڑی منگریا مارکیٹ کے سامنے تقریباً 96 ایکڑ زمین پر غیر ملکیوں کی آبادکاری کا سلسلہ جاری ہے۔ اطلاعات کے مطابق افغانستان سے آنے والے شہری بڑی تعداد میں پلاٹ اور دکانیں خرید رہے ہیں، جبکہ کچھ افغان پٹھان پہلے ہی اس علاقے میں مکانات تعمیر کرکے آباد ہو چکے ہیں۔ سینکڑوں ٹرالیاں مٹی ڈالنے میں مصروف ہیں، جس سے علاقے میں تعمیراتی سرگرمیاں تیز ہو گئی ہیں۔
ذرائع کے مطابق پلاٹنگ کے مالک فیضان آرائیں مبینہ طور پر غیر ملکیوں کو زمین فروخت کرنے میں مرکزی کردار ادا کر رہے ہیں، جبکہ ریاستی اور ضلعی ادارے خاموش تماشائی بنے ہوئے ہیں۔
اس صورتحال پر جسقم بشیر خان قریشی ضلع گھوٹکی کے رہنماؤں نے شدید ردعمل دیتے ہوئے اعلان کیا ہے کہ اگر غیر ملکیوں کو یوسی سطح پر دیہاتوں اور شہروں میں آباد کیا گیا تو وہ فیضان آرائیں سمیت تمام ملوث افراد کے خلاف عدالت میں پٹیشن دائر کریں گے۔ ساتھ ہی کشمور سے کراچی تک احتجاجی تحریک شروع کی جائے گی تاکہ غیر ملکی آبادکاری کے خلاف عوامی آواز بلند کی جا سکے۔
سکھر (باغی ٹی وی،نامہ نگار مشتاق علی لغاری)کوٹ ڈیجی کی یونین کونسل لیاری میں 33 لاکھ روپے کے مبینہ غبن پر منتخب کونسلروں اور وائس چیئرمین نے شدید احتجاج کیا۔ اس سلسلے میں چیئرمین مختیار حسین کانہڑو کے خلاف ہنگامی پریس کانفرنس کی گئی جس میں کونسلروں نے سنگین الزامات عائد کیے۔
کونسلروں نے انکشاف کیا کہ گزشتہ 28 ماہ کی آڈٹ رپورٹ اب تک پیش نہیں کی گئی جبکہ 10 سے 13 روز قبل یونین کونسل کے اکاؤنٹ سے 33 لاکھ روپے کا غبن کیا گیا ہے جس کا کوئی ریکارڈ دستیاب نہیں۔ انہوں نے کہا کہ عوامی نمائندوں کو اعتماد میں لیے بغیر فنڈز کی اس بڑی رقم کا غائب ہونا سنگین بدعنوانی ہے۔
مقررین نے مطالبہ کیا کہ فوری طور پر یونین کونسل کا اجلاس طلب کیا جائے اور مکمل ریکارڈ سامنے لایا جائے، بصورتِ دیگر پیر سے چیئرمین کے خلاف اینٹی کرپشن حکام اور اعلیٰ عدالتوں سے رجوع کیا جائے گا۔
گھوٹکی (نامہ نگار باغی ٹی وی مشتاق علی لغاری) ایس ایس پی گھوٹکی محمد انور کھیتران کی ہدایات پر ضلع بھر میں جرائم پیشہ عناصر کے خلاف پولیس کی کارروائیاں تیز کر دی گئی ہیں۔ اسی سلسلے میں تھانہ اوباڑو پولیس نے کار چوری کے مقدمے میں مطلوب ملزم کو مسروقہ کار سمیت گرفتار کر لیا۔
ایس ایچ او تھانہ اوباڑو رفیق احمد سومرو بمعہ اسٹاف نے دورانِ گشت خفیہ اطلاع پر کارروائی کرتے ہوئے نیشنل ہائی وے نزد آدھی بنگلو سے کرائم نمبر 400/2025 دفعہ 381 اے ت پ تھانہ گلشن معمار ضلع ویسٹ کراچی کے مقدمے میں مطلوب ملزم عامر عرف شہزاد ولد نیاز احمد بھٹو سکنہ سیکٹر 4 رحموانی موڑ ضلع سینٹرل کراچی کو گرفتار کر لیا۔ پولیس نے ملزم کے قبضے سے چوری شدہ کار بھی برآمد کر لی۔
ایس ایس پی گھوٹکی محمد انور کھیتران نے کامیاب کارروائی پر پولیس پارٹی کو شاباش دیتے ہوئے کہا کہ ضلع بھر میں اشتہاریوں اور جرائم پیشہ افراد کے خلاف آپریشن مزید تیز کیا جائے گا تاکہ عوام کو امن و امان کی بہتر فضا فراہم کی جا سکے۔
گھوٹکی ( باغی ٹی وی ،نامہ نگارمشتاق علی لغاری) محمد انور کھیتران کے احکامات پر ضلع بھر میں جرائم پیشہ عناصر کے خلاف کارروائیاں جاری ہیں۔ امن و امان کو برقرار رکھنے کے لیے ضلع کے داخلی و خارجی راستوں پر سخت ناکہ بندی اور سنیپ چیکنگ کا عمل تیز کر دیا گیا ہے۔
ایس ایچ او تھانہ کھمبڑا ظہیر حسین بھٹو بمعہ اسٹاف نے حساس ادارے کی نشاندہی پر کراس بند پکٹ پر کارروائی کے دوران نان کسٹم کپڑوں سے بھرا ایک رکشہ برآمد کر لیا۔ پولیس پارٹی کو چیکنگ کرتا دیکھ کر ایک نامعلوم ملزم تقریباً 13 من نان کسٹم کپڑوں سے لوڈ رکشہ چھوڑ کر موقع سے فرار ہو گیا۔
پولیس نے چھکڑے کو نان کسٹم کپڑوں سمیت اپنی تحویل میں لے کر قانونی کارروائی کے بعد کسٹم حکام کے حوالے کر دیا۔ ترجمان پولیس کے مطابق ضلع بھر میں امن و امان کی فضا قائم رکھنے اور قانون کی بالادستی برقرار رکھنے کے لیے پولیس کو سخت احکامات جاری کیے گئے ہیں، جبکہ جرائم پیشہ عناصر اور سماجی برائیوں کے خلاف بلا تفریق کارروائی جاری رہے گی۔
گھوٹکی (نامہ نگار باغی ٹی وی مشتاق علی لغاری)میرپورماتھیلو ،جروار ،گاؤں خدابخش لغاری اور ضلع گھوٹکی کےنواحی علاقہ قادرپور کے گاؤں محمد رمضان چاچڑ میں جانوروں میں مبینہ طور پر خطرناک بیماری لمپی اسکن تیزی سے پھیلنے لگی ہے، جس کے باعث متعدد مویشی متاثر ہو چکے ہیں۔ مقامی افراد نے خدشہ ظاہر کیا ہے کہ اگر بروقت اقدامات نہ کیے گئے تو یہ بیماری قریبی دیہات اور پورے علاقے میں تباہی پھیلا سکتی ہے۔
گاؤں کے کسانوں اور مویشی پال حضرات نے انتظامیہ کی غیر سنجیدگی پر شدید ناراضگی کا اظہار کیا ہے۔ ان کا کہنا ہے کہ محکمہ لائیوسٹاک یا ضلعی انتظامیہ نے اب تک کوئی نوٹس نہیں لیا، نہ ہی ویکسینیشن یا قرنطینہ جیسی حفاظتی کارروائیاں کی گئی ہیں۔دوسری طرف پرائیویٹ اتائی وٹرنری ڈاکٹروں نے ات مچائی ہوئی ہے ،علاج کے نام پر مویشی پال سادہ لوگوں سے ہزاروں روپے لوٹنےلگے ،ہزاروں روپے خرچ کرنے کے باوجود جانور موت کا شکار ہونے لگے.
مقامی شہریوں نے حکومتِ سندھ اور ضلعی انتظامیہ سے فوری ایکشن کا مطالبہ کرتے ہوئے کہا ہے کہ متاثرہ گاؤں میں ہنگامی بنیادوں پر فیلڈ ٹیم بھیجی جائے، مویشیوں کی ویکسینیشن اور بیماری کے پھیلاؤ کو روکنے کے لیے سخت حفاظتی اقدامات کیے جائیں، بصورتِ دیگر نقصان ناقابلِ تلافی ہوگا۔
گھوٹکی (نامہ نگار باغی ٹی وی مشتاق علی لغاری) یونین کونسل جروار کے گاؤں خدا بخش لغاری کے مکین پینے کے صاف پانی اور سڑکوں جیسی بنیادی سہولتوں سے محروم ہو کر شدید مشکلات اور غم و غصے کا شکار ہیں۔ مقامی افراد کے مطابق گاؤں میں نہ پینے کا پانی دستیاب ہے اور نہ ہی قابلِ استعمال سڑکیں، جس کے باعث ایمرجنسی کی صورت میں لوگوں کی زندگیاں خطرے میں پڑ جاتی ہیں اور حالات دن بہ دن بگڑتے جا رہے ہیں۔
گاؤں کی خواتین، بچے اور بیمار افراد روزانہ کئی کلومیٹر پیدل پانی لانے پر مجبور ہیں، جبکہ کچے اور ٹوٹے ہوئے راستے ایمبولینس یا دیگر امدادی گاڑیوں کی آمدورفت ناممکن بنا دیتے ہیں۔ مکینوں کا کہنا ہے کہ منتخب عوامی نمائندے اور متعلقہ ادارے برسوں سے خاموش تماشائی بنے ہوئے ہیں، وعدے صرف کاغذوں اور تصویری بیانات تک محدود ہیں۔
مقامی رہائشیوں نے کہا: “ہم ترس رہے ہیں، بچوں کو صاف پانی نہیں ملتا، مریض یا زخمی کو اسپتال لے جانے کے لیے راستہ نہیں۔ نمائندے صرف تصویروں اور تقریروں تک محدود ہیں۔”
گاؤں کے باسیوں نے حکومتِ سندھ، ڈپٹی کمشنر گھوٹکی اور مقامی نمائندوں سے مطالبہ کیا ہے کہ:
ہر گھر تک پینے کے صاف پانی کی مستقل لائن فراہم کی جائے۔
تمام کچے اور ٹوٹے ہوئے راستوں کو پختہ سڑکوں میں تبدیل کیا جائے۔
مقامی نمائندے اپنی ذمہ داریاں نبھائیں اور عوامی مسائل حل کریں۔
عبوری بنیادوں پر ایمرجنسی سہولتیں فراہم کی جائیں، جب تک مستقل حل مکمل نہ ہو جائے۔
مکینوں نے خبردار کیا ہے کہ اگر فوری اقدامات نہ کیے گئے تو وہ منظم، پُرامن مگر بھرپور احتجاج کریں گے اور ضلع بھر میں اپنے مطالبات کے لیے آواز بلند کریں گے۔
میرپور ماتھیلو (نامہ نگار باغی ٹی وی مشتاق علی لغاری)ڈہرکی داد روڈ پھاٹک کے قریب المناک حادثہ پیش آیا، جہاں تیز رفتار ٹرین کی زد میں آکر ایک شخص موقع پر ہی جاں بحق ہوگیا۔ جاں بحق شخص کی شناخت کوجو برادری سے تعلق رکھنے والے شانتی نگر ڈہرکی کے رہائشی کے طور پر کی گئی ہے۔
حادثے کی اطلاع ملتے ہی مقامی لوگ بڑی تعداد میں جائے وقوعہ پر جمع ہوگئے جبکہ ریلوے عملہ اور پولیس نے موقع پر پہنچ کر ضروری کارروائی مکمل کی۔ لاش کو پوسٹ مارٹم کے بعد ورثاء کے حوالے کردیا گیا۔
حادثے کے بعد علاقے میں سوگ کی فضا چھا گئی اور شہریوں نے گہرے دکھ اور افسوس کا اظہار کیا۔
گھوٹکی (نامہ نگار،مشتاق علی لغاری) سندھ ایمپلائز الائنس کی کال پر گھوٹکی سمیت صوبے بھر میں سرکاری ملازمین کا احتجاج جاری ہے۔ گھوٹکی ڈی ایچ کیو سول اسپتال میں دوسرے روز بھی پیرامیڈیکل اسٹاف اور دیگر ملازمین نے کام چھوڑ ہڑتال کی، جس کے باعث اسپتال کے مختلف شعبہ جات بند رہے اور علاج کے لیے آنے والے مریضوں کو شدید مشکلات کا سامنا کرنا پڑا۔
احتجاج کی قیادت انعام اللہ، نصیر احمد کھاؤڑ، امان اللہ، الیاس احمد، علی شیر شیخ، لیاقت علی، واجد علی، ماجد علی مہر اور دیگر رہنماؤں نے کی۔ اس موقع پر رہنماؤں نے خطاب کرتے ہوئے سندھ حکومت پر ملازمین سے زیادتی کا الزام لگایا اور کہا کہ پینشن رولز میں ترمیم ملازم دشمن پالیسی ہے، جس کے ذریعے دہائیوں تک خدمت کرنے والے ملازمین کے مالی حقوق سلب کیے جا رہے ہیں۔
رہنماؤں نے الزام لگایا کہ وفاق اور دیگر تین صوبوں کے ملازمین ڈسپیرٹی الاؤنس سے مستفید ہو رہے ہیں جبکہ صرف سندھ کے ملازمین کو اس حق سے محروم رکھا گیا ہے، جو کھلا امتیاز ہے۔ انہوں نے مطالبہ کیا کہ پینشن رولز میں کی گئی ترمیم واپس لی جائے اور ڈسپیرٹی الاؤنس فوری طور پر دیا جائے۔
مقررین نے خبردار کیا کہ اگر مطالبات تسلیم نہ کیے گئے تو احتجاج کا دائرہ مزید وسیع کر کے صوبے بھر میں سخت تحریک چلائی جائے گی، جس کی مکمل ذمہ داری سندھ حکومت پر عائد ہوگی۔
گھوٹکی (نامہ نگار،مشتاق لغاری) گھوٹکی کے قریب تھانہ عادلپور کی حدود میں پانی کے حصے پر چاچڑ برادری کے دو گروپوں کے درمیان ہونے والے جھگڑے میں ایک نوجوان زخمی ہو گیا۔
یہ واقعہ گاؤں اللہ بخش چاچڑ عرف جھنڈانی چاچڑ میں پیش آیا، جہاں پانی کی تقسیم پر تنازعہ شدت اختیار کر گیا۔ جھگڑے کے دوران کلہاڑی اور مکوں کے وار سے علی گوہر چاچڑ شدید زخمی ہو گیا۔
زخمی نوجوان کو فوری طور پر تعلقہ اسپتال گھوٹکی منتقل کیا گیا، جہاں اس کا علاج جاری ہے۔ علی گوہر چاچڑ نے اپنے چچا عبدالحمید، عبدالجبار اور عبدالکریم چاچڑ پر حملہ کرنے کا الزام لگایا اور بتایا کہ ملزمان واردات کے بعد موقع سے فرار ہو گئے۔
واقعے کی اطلاع ملتے ہی عادلپور پولیس نے رپورٹ درج کر کے ملزمان کی گرفتاری کے لیے چھاپے مارنا شروع کر دیے ہیں۔ مقامی افراد کا کہنا ہے کہ اس علاقے میں پانی اور زمین کے تنازعات پر جھگڑے عام ہیں، جو اکثر کشیدگی کا باعث بنتے ہیں۔