Category: سکھر

سکھر (باغی ٹی وی،نامہ نگارمشتاق علی لغاری) نومبر 2024 سے دسمبر 2025 تک ڈی آئی جی سکھر رینج کیپٹن (ر) فیصل عبداللہ چاچڑ کی قیادت میں سکھر رینج پولیس نے امن و امان کے قیام، جرائم کے خاتمے اور عوام دوست پولیسنگ کے میدان میں نمایاں کامیابیاں حاصل کیں۔

14 ماہہ کارکردگی رپورٹ کے مطابق سکھر رینج کے تینوں اضلاع میں کچا ایریا آپریشنز کے دوران 579 پولیس مقابلے ہوئے، جن میں 40 انتہائی خطرناک ملزمان ہلاک، 182 زخمی، 864 گرفتار جبکہ 263 جرائم پیشہ گینگز کا خاتمہ کیا گیا، 25 ملزمان نے ہتھیار ڈال کر خود کو قانون کے حوالے کیا۔

پولیس نے قتل سمیت مختلف مقدمات میں 1700 سے زائد اشتہاری و مفرور ملزمان کو گرفتار کیا جبکہ 6 انعام یافتہ خطرناک ڈاکوؤں کو ہلاک کیا گیا۔ منشیات کے خلاف کارروائیوں میں 1383 مقدمات درج، 1586 گرفتار اور بھاری مقدار میں منشیات و گٹکا ماوا برآمد کیا گیا۔

چوری شدہ 9 کروڑ 56 لاکھ روپے سے زائد مالیت کی پراپرٹی، 693 موٹر سائیکلیں اور 63 گاڑیاں برآمد ہوئیں، جبکہ ناجائز اسلحہ کے خلاف 649 مقدمات میں سینکڑوں جدید و بھاری ہتھیار ضبط کیے گئے۔

اغوا برائے تاوان کے خلاف کارروائیوں میں 70 مغوی بغیر تاوان بازیاب ہوئے اور 1781 افراد کو ہنی ٹریپ اغوا سے بچایا گیا۔ رپورٹ کے مطابق اس وقت سکھر رینج میں اغوا برائے تاوان کا کوئی بھی کیس زیر التوا نہیں۔

اندرونی احتساب کے تحت 96 اہلکاروں کو میجر اور 175 کو مائنر سزائیں دی گئیں، جبکہ بہتر کارکردگی پر 360 اہلکاروں کو کیش ایوارڈ اور تعریفی اسناد دی گئیں۔ کمپلینٹ سیلز کے ذریعے 8190 شکایات موصول ہوئیں جن میں سے 7174 حل کی گئیں۔

پولیس شہداء اور ملازمین کی فلاح و بہبود کے لیے کروڑوں روپے کے فنڈز جاری کیے گئے، ہیلتھ انشورنس کارڈ سے ہزاروں اہلکاروں و اہل خانہ نے مفت علاج کی سہولت حاصل کی۔ ماڈل پولیس اسٹیشنز، ہائی وے ہالٹنگ پوائنٹس، آئی ٹی سسٹمز اور تھانہ جاتی اصلاحات پر بھی نمایاں پیش رفت کی گئی۔

ڈی آئی جی فیصل عبداللہ چاچڑ کے چارج سنبھالنے کے وقت اغوا برائے تاوان کے 9 کیسز موجود تھے جو اب صفر ہو چکے ہیں، جبکہ موٹروے اور شاہراہوں پر جرائم میں واضح کمی آئی ہے۔ گزشتہ برس ڈاکوؤں کے خلاف آپریشنز میں پولیس کی صرف 4 شہادتیں ہوئیں جو گزشتہ کئی برسوں میں کم ترین تعداد ہے۔

سکھر رینج میں امن و امان کی بہتری پر مختلف مکاتب فکر، تاجر تنظیموں اور میڈیا کی جانب سے ڈی آئی جی سکھر رینج کی کارکردگی کو سراہتے ہوئے خراج تحسین پیش کیا گیا۔

میرپور ماتھیلو (باغی ٹی وی،نامہ نگارمشتاق علی لغاری) تحصیل میرپور ماتھیلو کے شہر جروار کے قریب گاؤں خدا بخش لغاری میں حالیہ بارشوں کے بعد صورتحال انتہائی تشویشناک ہو گئی ہے۔ موسلادھار بارش کے باعث گاؤں کی تمام کچی گلیوں اور سڑکوں میں ایک سے ڈیرھ فٹ پانی کھڑا ہو گیا ہے، جس کے نتیجے میں شہریوں کی زندگی مفلوج ہو کر رہ گئی ہے اور وہ گھروں میں محصور ہیں۔

علاقہ مکینوں نے بتایا کہ سردی کے موسم میں کھڑا پانی چلنے پھرنے میں شدید مشکلات پیدا کر رہا ہے۔ بزرگ، بچے اور خواتین روزمرہ ضروریات کے لیے بھی گھروں سے نکلنے سے قاصر ہیں۔ گندے پانی کی موجودگی سے نزلہ، بخار، کھانسی اور دیگر خطرناک بیماریاں پھیلنے کا خدشہ بڑھ گیا ہے، جس سے والدین خوف زدہ ہیں۔

مقامی لوگوں کے مطابق کچی سڑکیں ٹوٹ پھوٹ کا شکار ہیں اور کیچڑ، بدبو اور گندگی نے ماحول کو مزید آلودہ کر دیا ہے۔

علاقہ مکینوں نے ضلعی انتظامیہ، میونسپل ادارے اور منتخب نمائندوں پر شدید تنقید کی ہے اور کہا ہے کہ شکایات اور درخواستوں کے باوجود کسی بھی ذمہ دار نے گاؤں کا دورہ نہیں کیا۔

گاؤں خدا بخش لغاری کے رہائشیوں نے خبردار کیا ہے کہ اگر فوری اقدامات نہ کیے گئے تو عوام کی مشکلات مزید بڑھ جائیں گی اور صورتحال ناقابلِ برداشت ہو جائے گی۔

میرپورماتھیلو(باغی ٹی وی،نامہ نگارمشتاق علی لغاری)گھوٹکی تحصیل میرپور ماتھیلو کے شہر جروار اور گرد و نواح میں بجلی کے بحران نے ایس ڈی او واپڈا کے ظالمانہ رویے کے باعث سنگین صورتحال اختیار کر لی ہے۔ گزشتہ نو روز سے مسلسل اندھیرے میں ڈوبے ہوئے شہریوں کو اس وقت شدید ذہنی اذیت کا سامنا کرنا پڑا جب بجلی بحال کرنے کے بجائے محض چند لمحوں کے لیے بجلی کے جھٹکے دے کر دوبارہ بند کر دی گئی۔ اس صورتحال پر ایس ڈی او میرپور ماتھیلو کی جانب سے مبینہ طور پر یہ تکبرانہ پیغام دیا گیا کہ بجلی ان کی ذاتی مرضی سے چلے گی اور جب وہ چاہیں گے تب ہی فراہم کی جائے گی۔ افسران کی اس کھلی من مانی اور عوامی حقوق کی پامالی نے جروار کے شہریوں کا صبر لبریز کر دیا ہے، جو پہلے ہی کاروبار کی بندش، پانی کی قلت اور زرعی نقصانات کی وجہ سے شدید پریشان ہیں۔

نو دن گزرنے کے باوجود بجلی کی مستقل بحالی نہ ہونا محکمہ واپڈا کی نااہلی اور عوامی دشمنی کا منہ بولتا ثبوت ہے جس نے جروار کی مارکیٹوں کو ویران اور صنعتی یونٹس کو بنجر بنا دیا ہے۔ رات کے وقت مکمل بلیک آؤٹ کے باعث شہری عدم تحفظ کا شکار ہیں جبکہ اعلیٰ حکام کی خاموشی نے ایس ڈی او جیسے افسران کو کھلی چھوٹ دے رکھی ہے۔ عوام نے سندھ حکومت اور سکھر ڈویژن کے اعلیٰ بجلی حکام سے مطالبہ کیا ہے کہ ایس ڈی او میرپور ماتھیلو کے خلاف فوری تادیبی کارروائی کی جائے اور بجلی کی فراہمی کو فی الفور یقینی بنایا جائے۔ شہریوں نے خبردار کیا ہے کہ اگر یہ ناروا سلوک بند نہ ہوا تو وہ ضلعی ہیڈ کوارٹر گھوٹکی میں بڑے پیمانے پر احتجاج اور دھرنا دیں گے جس کی ذمہ داری براہ راست انتظامیہ پر ہوگی۔

میرپور ماتھیلو سے باغی ٹی وی کے نامہ نگار مشتاق علی لغاری کی رپورٹ کے مطابق، تحصیل میرپور ماتھیلو کے شہر جروار اور قریبی دیہی علاقوں میں بجلی کی مسلسل اور طویل لوڈشیڈنگ نے شہریوں اور کاروباری طبقے کی چیخیں نکلوا دی ہیں۔ علاقے میں لوڈشیڈنگ کا دورانیہ روزانہ سات گھنٹے تک پہنچ چکا ہے، جس کے باعث نہ صرف مارکیٹیں اور صنعتی یونٹس غیر فعال ہو چکے ہیں بلکہ گھریلو زندگی بھی شدید متاثر ہو رہی ہے۔ شہریوں کا کہنا ہے کہ بجلی کی غیر منظم بندش کی وجہ سے اسکول، اسپتال اور دفاتر میں کام کاج ٹھپ ہو کر رہ گیا ہے، جبکہ تاجر برادری نے دہائی دی ہے کہ روزانہ کی آمدنی متاثر ہونے سے وہ ملازمین کو تنخواہیں ادا کرنے کے قابل بھی نہیں رہے۔ ستم ظریفی یہ ہے کہ جروار شہر سمیت سندھ کے دیگر بڑے شہروں کراچی، حیدرآباد، سکھر اور لاڑکانہ میں بھی اسی طرز کی بدترین لوڈشیڈنگ نے عوام کا جینا محال کر رکھا ہے۔

مقامی شہریوں اور تاجروں نے اس سنگین صورتحال پر شدید احتجاج کرتے ہوئے ڈی سی گھوٹکی، ایس ڈی او میرپور ماتھیلو اور سیپکو (SEPCO) حکام سے مطالبہ کیا ہے کہ جروار اور مضافاتی علاقوں میں بجلی کی بلا تعطل فراہمی کو فوری طور پر یقینی بنایا جائے۔ انہوں نے خبردار کیا کہ سات گھنٹے تک جاری رہنے والی یہ غیر اعلانیہ لوڈشیڈنگ کسی صورت قابلِ قبول نہیں ہے اور اگر فوری طور پر اصلاحِ احوال نہ کی گئی تو عوام سڑکوں پر نکل کر بھرپور احتجاج کرنے پر مجبور ہوں گے۔ مظاہرین نے حکومتِ سندھ اور متعلقہ سرکاری اداروں سے پرزور مطالبہ کیا ہے کہ وہ پاور ڈسٹریبیوشن کمپنیوں کی من مانیوں کا نوٹس لیں اور کاروباری و شہری طبقے کو پہنچنے والے نقصانات کا ازالہ کرنے کے لیے موثر اقدامات اٹھائے جائیں۔