Category: سائنس و ٹیکنالوجی


ترجمان سپارکو نے بتایا ہے کہ شعبان 1447 ہجری کا نیا چاند 19 جنوری کو رات 12 بج کر 52 منٹ پر پیدا ہوگا۔ تاہم 19 جنوری کی شام چاند نظر آنے کے امکانات نہ ہونے کے برابر ہیں۔
ترجمان نے امکان ظاہر کیا کہ یکم شعبان متوقع طور پر 21 جنوری 2026 کو ہوگا، تاہم حتمی اعلان رویت ہلال کمیٹی کرے گی۔
‎سپارکو کا کہنا ہے کہ عوام عبادات اور دیگر دینی تقریبات کے حوالے سے رویت ہلال کمیٹی کے اعلان کا انتظار کریں۔

واٹس ایپ صارفین کے لیے ہائی جیکنگ کے خطرات میں اضافہ ہوگیا ہے۔ کابینہ ڈویژن کے تحت نیشنل سائبر ایمرجنسی رسپانس ٹیم نے اس حوالے سے ایڈوائزری جاری کر دی ہے۔
‎ایڈوائزری میں 2026 میں واٹس ایپ ہائی جیک مہم سے خبردار کرتے ہوئے صارفین کو سائبر خطرات کے خلاف چوکس رہنے کا مشورہ دیا گیا ہے۔ بتایا گیا ہے کہ ہیکرز او ٹی پی فراڈ کے ذریعے واٹس ایپ اکاؤنٹس تک غیر مجاز رسائی حاصل کرنے کی کوشش کر رہے ہیں۔
‎ایڈوائزری کے مطابق اکاؤنٹ ہائی جیک ہونے کی صورت میں صارفین کا ذاتی ڈیٹا چرایا جا سکتا ہے اور ہیکرز کو کنٹیکٹ لسٹ، میڈیا فائلز، چیٹ ہسٹری اور ذاتی پیغامات تک رسائی حاصل ہو سکتی ہے، جسے پیسے منگوانے کے لیے استعمال کیا جاتا ہے۔
‎ایڈوائزری میں ہدایت کی گئی ہے کہ 6 ہندسوں کا ایس ایم ایس ویری فکیشن کوڈ، ٹو اسٹیپ ویری فکیشن پن اور وائس کال یا ایس ایم ایس کے ذریعے موصول ہونے والا کوئی بھی کوڈ کسی کے ساتھ شیئر نہ کیا جائے۔


چین میں ایک نئی موبائل ایپ ’آر یو ڈیڈ؟‘ (کیا آپ زندہ ہیں؟) تیزی سے مقبول ہو رہی ہے جو خاص طور پر اکیلے رہنے والے افراد کے لیے بنائی گئی ہے۔ اس ایپ میں صارف کو ہر دو دن بعد ایک بٹن دبا کر یہ تصدیق کرنی ہوتی ہے کہ وہ خیریت سے ہے۔ اگر مقررہ وقت میں چیک اِن نہ کیا جائے تو ایپ خود بخود صارف کے نامزد ایمرجنسی نمبر پر اطلاع بھیجتی ہے کہ وہ ممکنہ خطرے میں ہو سکتا ہے۔
یہ ایپ مئی 2025 میں لانچ ہوئی تھی، مگر حالیہ ہفتوں میں چینی شہروں میں نوجوانوں میں اس کی مقبولیت میں غیر معمولی اضافہ ہوا ہے، جس کی وجہ سے یہ اب ملک کی سب سے زیادہ ڈاؤن لوڈ کی جانے والی پریمیم ایپ بن چکی ہے۔
‎چینی تحقیقی اداروں کے اندازے کے مطابق 2030 تک چین میں اکیلے رہنے والے افراد کے گھر 20 کروڑ تک پہنچ سکتے ہیں، اور یہ ایپ انہی افراد کو ہدف بناتی ہے۔ کمپنی کا کہنا ہے کہ وہ نام کی وجہ سے ہونے والی تنقید کے پیش نظر تبدیلی پر غور کر رہی ہے۔
‎یہ ایپ عالمی سطح پر Demumu کے نام سے دستیاب ہے اور امریکا، سنگاپور، ہانگ کانگ میں ادائیگی والی یوٹیلٹی ایپس میں دوسرے نمبر پر ہے جبکہ آسٹریلیا اور اسپین میں ٹاپ 4 ایپس میں شامل ہے۔

‎امریکی کمپنی الیف ایرو ناٹکس نے دنیا کی پہلی اُڑنے والی کار کی تیاری کا آغاز کردیا ہے۔ کمپنی کے مطابق الیف ماڈل اے الٹرا لائٹ نامی یہ گاڑی 2026 کے اوائل میں صارفین کے لیے دستیاب ہوسکتی ہے۔
‎الیف ایرو ناٹکس کا کہنا ہے کہ یہ مکمل طور پر برقی گاڑی ہے جو زمین پر چلنے کے ساتھ ساتھ فضا میں اڑان بھرنے کی صلاحیت بھی رکھتی ہے۔ اس گاڑی کو شہری علاقوں میں ٹریفک کے شدید مسائل سے نمٹنے کے لیے تیار کیا گیا ہے۔
‎کمپنی کے مطابق اگر صارف پرواز نہ کرنا چاہے تو الیف ماڈل اے کو زمین پر اتار کر عام کار کی طرح سڑک پر بھی چلایا جاسکتا ہے۔
‎اڑنے والی اس گاڑی کی ابتدائی قیمت 3 لاکھ ڈالر مقرر کی گئی ہے جبکہ اب تک ساڑھے تین ہزار سے زائد پری آرڈرز موصول ہوچکے ہیں۔


دہائیوں بعد انسان دوبارہ چاند کے مدار پر واپسی کے لیے تیار ہیں۔ امریکی خلائی ادارے ناسا فروری 2026 میں 5 دہائیوں بعد پہلا انسان بردار خلائی مشن آرٹیمس 2 روانہ کرنے والا ہے۔
اس مقصد کے لیے ناسا کی جانب سے اسپیس لانچ سسٹم (SLS) راکٹ اور اورین اسپیس کرافٹ کو فلوریڈا کے کینیڈی اسپیس سینٹر میں منتقل کرنے کی حتمی تیاریاں کی جا رہی ہیں۔ اسپیس کرافٹ کو 17 جنوری کے بعد کسی وقت وہاں منتقل کیا جائے گا جبکہ مشن 6 فروری کو روانہ ہونے کا امکان ہے، تاہم یہ موسم اور دیگر تکنیکی عوامل پر منحصر ہوگا۔
‎آخری بار ناسا نے 1972 میں اپولو پروگرام کے تحت انسان بردار مشن چاند پر بھیجا تھا۔ اب 5 دہائیوں کے بعد دوبارہ ایسا کیا جا رہا ہے۔ آرٹیمس 2 مشن میں 4 خلا باز شامل ہوں گے جو اورین اسپیس کرافٹ میں نصب لائف سپورٹ سسٹمز کی جانچ کریں گے تاکہ مستقبل میں طویل مشنز ممکن ہو سکیں۔
‎یہ مشن پہلے دو بار زمین کے مدار میں پرواز کرے گا اور پھر چاند کے اس حصے کی جانب روانہ ہوگا جو زمین سے نظر نہیں آتا۔ اگر مشن مقررہ وقت پر روانہ ہوا تو جنوری کے آخر میں ناسا ایک ریہرسل بھی کرے گا۔
‎واضح رہے کہ نومبر 2022 میں آرٹیمس 1 مشن چاند کے گرد جا کر زمین پر واپس آیا تھا، مگر اس میں کوئی انسان شامل نہیں تھا۔ آرٹیمس 2 مشن کا مقصد انسانوں کو چاند کے گرد پہنچانا اور واپس لانا ہے، تاہم یہ خلا باز چاند کی سطح پر قدم نہیں رکھیں گے۔ یہ ناسا کے لیے 1972 کے بعد پہلا موقع ہوگا جب انسان زمین کے نچلے مدار سے باہر سفر کرے گا۔
‎آرٹیمس 2 مشن ناسا کے طاقتور ترین اسپیس لانچ سسٹم (SLS) راکٹ کے ذریعے روانہ کیا جائے گا، جبکہ اس کے بعد 2027 میں شیڈول آرٹیمس 3 مشن کے تحت انسان پہلی بار چاند کی سطح پر قدم رکھیں گے۔ آرٹیمس 3 مشن کو اسپیس ایکس کے اسٹار شپ راکٹ کے ذریعے انجام دیا جائے گا۔


جدید دور میں اسمارٹ فونز اور دیگر الیکٹرانک ڈیوائسز بیٹری پر چلتی ہیں، جنہیں بار بار چارج کرنے کی ضرورت پیش آتی ہے۔ مگر ہر جگہ بجلی تک رسائی ممکن نہیں ہوتی۔ اسی مسئلے کے حل کے طور پر ایک منفرد خودکار سولر چارجر متعارف کرا دیا گیا ہے۔
‎لاس ویگاس میں کنزیومر الیکٹرونکس شو (CES) کے دوران جیکری نامی کمپنی نے “سولر مارس بوٹ” کے نام سے ایک جدید سولر پاور اسٹیشن پیش کیا۔ اس ڈیوائس کی سب سے نمایاں خصوصیت یہ ہے کہ یہ خود حرکت کرنے کی صلاحیت رکھتا ہے اور صارف کے پیچھے پیچھے چلتا رہتا ہے۔
‎سولر مارس بوٹ میں 5 کلو واٹ کی طاقتور بیٹری نصب ہے جبکہ اس کے ساتھ چار سولر پینلز لگے ہوئے ہیں، جو سورج کی روشنی سے 300 واٹ تک بجلی پیدا کر سکتے ہیں۔ پہیوں کی موجودگی کے باعث یہ ڈیوائس کھلی جگہوں پر حرکت کرتے ہوئے سورج کی سمت کو خودکار طور پر فالو کرتی ہے تاکہ زیادہ سے زیادہ توانائی حاصل کی جا سکے۔
‎اس میں نصب جدید کیمرے صارف کی حرکات کو شناخت کرتے ہیں، جس کے باعث یہ سولر چارجر نہ صرف سورج کی روشنی بلکہ آپ کی نقل و حرکت کا بھی تعاقب کرتا رہتا ہے۔ ماہرین کے مطابق یہ ایجاد مستقبل میں متبادل توانائی کے استعمال کو مزید آسان اور مؤثر بنا سکتی ہے۔