چین میں ایک نئی موبائل ایپ ’آر یو ڈیڈ؟‘ (کیا آپ زندہ ہیں؟) تیزی سے مقبول ہو رہی ہے جو خاص طور پر اکیلے رہنے والے افراد کے لیے بنائی گئی ہے۔ اس ایپ میں صارف کو ہر دو دن بعد ایک بٹن دبا کر یہ تصدیق کرنی ہوتی ہے کہ وہ خیریت سے ہے۔ اگر مقررہ وقت میں چیک اِن نہ کیا جائے تو ایپ خود بخود صارف کے نامزد ایمرجنسی نمبر پر اطلاع بھیجتی ہے کہ وہ ممکنہ خطرے میں ہو سکتا ہے۔
یہ ایپ مئی 2025 میں لانچ ہوئی تھی، مگر حالیہ ہفتوں میں چینی شہروں میں نوجوانوں میں اس کی مقبولیت میں غیر معمولی اضافہ ہوا ہے، جس کی وجہ سے یہ اب ملک کی سب سے زیادہ ڈاؤن لوڈ کی جانے والی پریمیم ایپ بن چکی ہے۔
چینی تحقیقی اداروں کے اندازے کے مطابق 2030 تک چین میں اکیلے رہنے والے افراد کے گھر 20 کروڑ تک پہنچ سکتے ہیں، اور یہ ایپ انہی افراد کو ہدف بناتی ہے۔ کمپنی کا کہنا ہے کہ وہ نام کی وجہ سے ہونے والی تنقید کے پیش نظر تبدیلی پر غور کر رہی ہے۔
یہ ایپ عالمی سطح پر Demumu کے نام سے دستیاب ہے اور امریکا، سنگاپور، ہانگ کانگ میں ادائیگی والی یوٹیلٹی ایپس میں دوسرے نمبر پر ہے جبکہ آسٹریلیا اور اسپین میں ٹاپ 4 ایپس میں شامل ہے۔
’کیا آپ زندہ ہیں؟‘ اکیلے رہنے والوں کیلئے چینی ایپ وائرل
