Category: شوبز

پنجاب کے رکنِ صوبائی اسمبلی ثاقب چدھڑ اور اداکارہ مومنہ اقبال کے درمیان مبینہ ہراسانی اور دھمکیوں کا معاملہ مزید سنگین صورت اختیار کر گیا ہے، جہاں نیشنل سائبر کرائم انویسٹی گیشن ایجنسی (این سی سی آئی اے) نے اداکارہ کی درخواست پر فریقین کو آج طلب کر لیا ہے۔ دوسری جانب متعلقہ ایم پی اے کی جانب سے بھی اپنے آبائی ضلع میں نامعلوم افراد کے خلاف دھمکیوں کا مقدمہ درج کروایا گیا ہے۔

میڈیا رپورٹس کے مطابق اداکارہ مومنہ اقبال نے اپنی درخواست میں الزام عائد کیا تھا کہ انہیں ایک بااثر سیاسی شخصیت کی جانب سے طویل عرصے سے آن لائن ہراسانی، سائبر بُلنگ، ذہنی دباؤ اور جان سے مارنے کی دھمکیوں کا سامنا ہے۔ اداکارہ نے سوشل میڈیا پلیٹ فارم انسٹاگرام پر جاری اپنے تفصیلی بیان میں کہا تھا کہ انہوں نے اس معاملے پر متعدد بار این سی سی آئی اے، ایف آئی اے اور پنجاب پولیس سے رجوع کیا، تاہم مبینہ سیاسی اثر و رسوخ کے باعث کارروائی نہ ہو سکی۔مومنہ اقبال کا کہنا تھا کہ انصاف فراہم کرنے کے بجائے انہیں حوصلہ شکنی کا سامنا کرنا پڑا جبکہ ان کے اہلخانہ کو بھی سنگین خطرات لاحق ہیں۔ انہوں نے وزیر اعلیٰ پنجاب مریم نواز سمیت متعلقہ حکام سے مطالبہ کیا کہ معاملے کی شفاف اور غیرجانبدارانہ تحقیقات کی جائیں اور ان کے خاندان کو فوری تحفظ فراہم کیا جائے۔

اداکارہ نے اپنی سوشل میڈیا پوسٹس میں اعلیٰ حکام، اہم سرکاری دفاتر، نیوز چینلز اور مختلف میڈیا پلیٹ فارمز کو بھی ٹیگ کیا۔ بعد ازاں ایک اور انسٹاگرام اسٹوری میں مومنہ اقبال نے این سی سی آئی اے کی جانب سے کارروائی شروع کیے جانے پر مریم نواز کا شکریہ ادا کرتے ہوئے کہا کہ ان کا باضابطہ بیان ریکارڈ ہونے سے قبل کسی پر الزام عائد نہ کیا جائے اور نہ ہی کسی کا نام لیا جائے۔

اداکارہ نے مزید دعویٰ کیا کہ انہیں دیگر خواتین کے بھی پیغامات موصول ہو رہے ہیں جنہوں نے اسی ایم پی اے کی جانب سے مبینہ ہراسانی کا الزام لگایا ہے۔ دوسری طرف مذکورہ ایم پی اے کی جانب سے بھی اپنے کزن کی مدعیت میں نامعلوم افراد کے خلاف دھمکیوں کا مقدمہ درج کروا دیا گیا ہے، جس کے بعد معاملہ مزید پیچیدہ ہوگیا ہے۔

‎پاکستان شوبز انڈسٹری کی معروف اداکارہ مومنہ اقبال نے دعویٰ کیا ہے کہ انہیں ایک بااثر شخصیت کی جانب سے مسلسل ہراساں کیا جا رہا ہے اور جان سے مارنے کی دھمکیاں دی جا رہی ہیں۔
‎اداکارہ نے فوٹو اور ویڈیو شیئرنگ ایپ انسٹاگرام پر ایک تفصیلی پوسٹ شیئر کرتے ہوئے اعلیٰ حکام سے فوری کارروائی اور تحفظ فراہم کرنے کا مطالبہ کیا۔
‎مومنہ اقبال کے مطابق انہیں کافی عرصے سے آن لائن ہراسانی، سائبر بُلنگ، ذہنی اذیت اور دھمکیوں کا سامنا ہے۔
‎انہوں نے دعویٰ کیا کہ این سی سی آئی اے، ایف آئی اے اور پنجاب پولیس کو متعدد بار شکایات درج کروانے کے باوجود مطلوبہ شخص کے سیاسی اثر و رسوخ کے باعث مؤثر کارروائی نہیں کی گئی۔
‎اداکارہ نے اپنی انسٹاگرام اسٹوری میں لکھا کہ قانونی مدد فراہم کرنے کے بجائے انہیں حوصلہ شکنی کا سامنا کرنا پڑا جبکہ ان کے خاندان کو بھی شدید خطرات لاحق ہیں۔
‎مومنہ اقبال نے متعلقہ اداروں سے اپیل کی کہ معاملے کی غیر جانبدارانہ تحقیقات کی جائیں اور ان کے اہل خانہ کو سیکیورٹی فراہم کی جائے۔
‎انہوں نے کہا کہ انہیں امید ہے کہ اعلیٰ حکام اختیارات کے ناجائز استعمال اور انصاف میں رکاوٹ ڈالنے والے افراد کے خلاف قانون کے مطابق کارروائی کریں گے۔
‎اداکارہ نے اپنی پوسٹ میں مختلف سرکاری اداروں، نیوز چینلز اور میڈیا پورٹلز کو بھی ٹیگ کیا۔
‎سوشل میڈیا پر صارفین کی بڑی تعداد اداکارہ کے حق میں سامنے آ گئی ہے اور سیاسی شخصیات و حکام سے فوری ایکشن لینے کا مطالبہ کر رہی ہے۔

پاکستان کی معروف مارننگ شو میزبان ندا یاسر نے اپنی ازدواجی زندگی سے متعلق دلچسپ انکشافات کرتے ہوئے کہا ہے کہ شادی کے ابتدائی دنوں میں وہ اپنے شوہر یاسر نواز سے خوفزدہ رہتی تھیں۔

ایک حالیہ انٹرویو میں ندا یاسر نے بتایا کہ جب یاسر نواز نے انہیں شادی کی پیشکش کی تو وہ زیادہ پُرجوش نہیں تھیں، کیونکہ یاسر ان سے 7 سال بڑے تھے اور اس وقت ان کی داڑھی اور شخصیت انہیں عمر میں مزید سنجیدہ اور سخت محسوس کرواتی تھی۔ندا یاسر کے مطابق شادی کے آغاز میں وہ یاسر نواز سے کافی ڈرتی تھیں اور ان کی شخصیت انہیں بہت سخت لگتی تھی۔

اداکارہ و میزبان نے اپنی گھریلو زندگی کے حوالے سے گفتگو کرتے ہوئے کہا کہ ان کے والدین کے درمیان نہایت متوازن اور برابری پر مبنی تعلق تھا، جہاں ان کی والدہ کو کسی کام کے لیے والد سے اجازت لینے کی ضرورت پیش نہیں آتی تھی۔ تاہم ان کی اپنی شادی اس ماحول سے مختلف رہی۔ندا یاسر نے بتایا کہ انہیں اکثر مختلف معاملات میں یاسر نواز سے اجازت لینا پڑتی تھی اور ان کے خیال میں یہ طرزِ عمل یاسر نواز نے اپنے گھریلو ماحول سے سیکھا تھا۔

شیفالی شاہ ایک بار پھر اپنے بے باک بیان کے باعث خبروں کی زینت بن گئیں۔ بالی ووڈ کی معروف اداکارہ نے شادی، رشتوں اور بچوں سے متعلق ایسا مشورہ دے دیا کہ سوشل میڈیا پر نئی بحث چھڑ گئی۔

بھارتی میڈیا رپورٹس کے مطابق اداکارہ نے کامیڈین اور کنٹینٹ کریئیٹر کے ساتھ ایک انٹرویو میں نوجوان لڑکیوں کو مشورہ دیا کہ وہ زندگی کے بڑے فیصلے جلد بازی میں نہ کریں اور پہلے خود کو سمجھنے کی کوشش کریں۔شیفالی شاہ نے گفتگو کے دوران کہا کہ کم عمری میں لوگ خود کو مکمل طور پر جانتے بھی نہیں اور شادی جیسا بڑا فیصلہ کر لیتے ہیں۔ ان کے مطابق “جب آپ خود کو ہی نہیں جانتے تو شادی جیسے فیصلے میں جلدی نہیں کرنی چاہیے۔ لوگوں سے ملیں، انہیں سمجھیں، پھر فیصلہ کریں کہ کیا آپ واقعی پوری زندگی ایک رشتہ نبھا سکتے ہیں یا نہیں۔”
اداکارہ نے شادی کو “بہت محنت طلب رشتہ” قرار دیتے ہوئے کہا کہ اگر کوئی شخص شادی کے ادارے پر یقین نہیں رکھتا تو اسے صرف معاشرتی دباؤ میں آ کر یہ قدم نہیں اٹھانا چاہیے۔

انٹرویو کے دوران جب اینکرنے بتایا کہ ان کی عمر 37 سال ہے اور انہوں نے ابھی تک شادی نہیں کی تو شیفالی شاہ نے ہنستے ہوئے کہا، “میں ٹرول ہونے والی ہوں، لیکن بچے پیدا مت کرو، کتے پال لو۔” انہوں نے مزید کہا کہ انسان کو سب سے زیادہ بے لوث محبت کتوں سے ملتی ہے۔

اداکارہ کے اس بیان کے بعد سوشل میڈیا پر ملا جلا ردعمل سامنے آ رہا ہے۔ کچھ صارفین نے اسے مزاحیہ اور حقیقت پسندانہ رائے قرار دیا جبکہ کئی افراد نے اسے خاندانی نظام اور والدین بننے کے تصور کے خلاف قرار دیتے ہوئے تنقید کا نشانہ بنایا۔

واضح رہے کہ شیفالی شاہ خود دو بچوں کی ماں ہیں۔ ان کی پہلی شادی ٹی وی اداکار ہرش چھایا سسے ہوئی تھی، تاہم بعد ازاں علیحدگی ہو گئی۔ بعد میں انہوں نے فلم ساز وپل امرت لال شاہ سے شادی کی،شیفالی شاہ جانوروں سے بے حد محبت کرتی ہیں اور ان کے گھر میں دو سائبیریئن ہسکی کتے ایش اور سمبا رہتے ہیں

‎پاکستان کی معروف اداکارہ سجل علی نے اپنے نئے اور منفرد ہیئر اسٹائل سے سوشل میڈیا پر تہلکہ مچا دیا ہے۔ ہمیشہ معصوم انداز اور روایتی لمبے بالوں میں نظر آنے والی سجل اس بار ایک بالکل مختلف روپ میں سامنے آئیں، جس نے مداحوں کو حیران بھی کیا اور متاثر بھی۔
‎سجل علی نے اپنے آفیشل انسٹاگرام اکاؤنٹ پر ایک مختصر ویڈیو شیئر کی جس میں وہ نئے “پکسی کٹ” ہیئر اسٹائل کے ساتھ پوز دیتی دکھائی دیں۔ ان کا یہ شارٹ ہیئر لک ان کے مداحوں کے لیے کسی بڑے سرپرائز سے کم نہیں تھا کیونکہ وہ اپنے پورے کیریئر میں عموماً لمبے بالوں کے ساتھ نظر آتی رہی ہیں۔
‎ویڈیو میں سجل نے بائیکر جیکٹ کے ساتھ دھاری دار شرٹ پہن رکھی تھی، جو ان کی شخصیت کو مزید اسٹائلش اور بولڈ انداز دے رہی تھی۔ ان کے اعتماد بھرے انداز اور منفرد لک نے سوشل میڈیا صارفین کی توجہ فوراً اپنی جانب کھینچ لی۔
‎اداکارہ نے ویڈیو کے ساتھ مختصر کیپشن “11:11، ہائے!” لکھا، جس نے مداحوں میں مزید تجسس پیدا کر دیا۔ کچھ لوگوں نے ان کے نئے انداز کو نہایت خوبصورت اور فیشن ایبل قرار دیا جبکہ کئی مداح اس تبدیلی پر حیرانی کا اظہار کرتے دکھائی دیے۔
‎سوشل میڈیا پر ویڈیو وائرل ہوتے ہی کمنٹس کی بھرمار ہو گئی۔ بہت سے مداحوں نے سجل کے اعتماد اور نئے انداز کی تعریف کی، جبکہ کچھ لوگوں نے خواہش ظاہر کی کہ شاید یہ ان کے اصلی بال نہ ہوں۔ کئی صارفین نے لکھا کہ سجل ہر انداز میں خوبصورت لگتی ہیں جبکہ بعض نے ان کے پرانے روایتی لک کو زیادہ پسند کرنے کا اظہار کیا۔
‎شوبز ماہرین کے مطابق فنکار اکثر نئے کرداروں یا ذاتی تبدیلی کے اظہار کے لیے اپنے انداز میں تجربات کرتے ہیں، اور سجل علی کا یہ نیا روپ بھی ان کی شخصیت کے ایک مختلف پہلو کو ظاہر کرتا ہے۔
‎سجل علی پاکستان کی ان چند اداکاراؤں میں شمار ہوتی ہیں جنہیں نہ صرف اپنی شاندار اداکاری بلکہ سادگی، معصومیت اور منفرد انداز کی وجہ سے بھی بے حد پسند کیا جاتا ہے۔