Category: شوبز

بالی ووڈ کے سپر اسٹار شاہ رخ خان کے بیٹے آریان خان ایک بار پھر اپنی نجی زندگی کے باعث خبروں میں آ گئے ہیں۔ لندن میں ایک خاتون کے ساتھ ان کی موجودگی کی ویڈیوز اور تصاویر سوشل میڈیا پر وائرل ہونے کے بعد دونوں کے درمیان ممکنہ رومانوی تعلق سے متعلق قیاس آرائیاں زور پکڑ گئی ہیں۔

سوشل میڈیا صارفین نے آریان خان کے ساتھ نظر آنے والی خاتون کی شناخت معروف کنٹینٹ کری ایٹر وینی تاکیار کے طور پر کی ہے۔ رپورٹس کے مطابق دونوں کو لندن کے ایک کیسینو سے ایک ساتھ باہر نکلتے ہوئے دیکھا گیا، جس کے بعد ان کی ڈیٹنگ سے متعلق افواہیں تیزی سے پھیلنے لگیں۔وائرل تصاویر اور ویڈیوز میں آریان خان اور وینی تاکیار کو سیاہ لباس میں دیکھا جا سکتا ہے، جبکہ آریان نے سادہ بلیک ٹی شرٹ اور پینٹ زیب تن کر رکھی تھی۔

دوسری جانب وینی تاکیار نے بھی لندن کے سفر کی تصاویر اپنے انسٹاگرام اکاؤنٹ پر شیئر کیں، جن کے کیپشن میں انہوں نے مختصر الفاظ میں "آئی لو یو لندن” لکھا۔ مداحوں نے یہ بھی نوٹ کیا کہ آریان خان اور وینی تاکیار انسٹاگرام پر ایک دوسرے کو فالو کرتے ہیں، جس کے بعد ان کے تعلقات سے متعلق مزید قیاس آرائیاں شروع ہو گئیں۔تاہم آریان خان یا وینی تاکیار کی جانب سے ان خبروں پر تاحال کوئی باضابطہ ردعمل سامنے نہیں آیا، اس لیے ان کے تعلقات کی تصدیق نہیں ہو سکی اور تمام دعوے فی الحال سوشل میڈیا پر گردش کرنے والی اطلاعات اور قیاس آرائیوں تک محدود ہیں۔

یہ پہلا موقع نہیں کہ آریان خان کی نجی زندگی خبروں کا حصہ بنی ہو۔ اس سے قبل بھی ان کا نام برازیلین ماڈل اور اداکارہ لاریسا بونسی کے ساتھ جوڑا جاتا رہا ہے۔ اس وقت یہ افواہیں اس وقت سامنے آئیں جب لاریسا نے آریان کے لگژری اسٹریٹ ویئر برانڈ کی تشہیری مہم میں حصہ لیا اور بعد ازاں ان کی ہدایت کاری میں بننے والی ویب سیریز کے پریمیئر میں بھی شریک ہوئیں۔واضح رہے کہ آریان خان نے اپنے والد شاہ رخ خان کے برعکس اداکاری کے بجائے ہدایت کاری اور پروڈکشن کے شعبے میں کیریئر بنانے کا فیصلہ کیا ہے۔ انہوں نے پہلے اپنے لگژری اسٹریٹ ویئر برانڈ کے ذریعے کاروباری میدان میں قدم رکھا اور بعد ازاں ویب سیریز کے ذریعے بطور ہدایت کار اپنے کیریئر کا آغاز کیا۔

‎آئرش گلوکار، نغمہ نگار اور معروف اداکار گلین ہینسارڈ 56 برس کی عمر میں انتقال کر گئے۔ غیر ملکی میڈیا رپورٹس کے مطابق وہ موٹر سائیکل حادثے میں شدید زخمی ہوئے تھے اور کئی روز تک زیرِ علاج رہنے کے بعد بدھ کے روز آئرلینڈ کے دارالحکومت ڈبلن میں دم توڑ گئے۔ ان کی وفات کی خبر سامنے آنے کے بعد دنیا بھر میں ان کے مداحوں، موسیقاروں اور شوبز شخصیات نے گہرے دکھ اور افسوس کا اظہار کیا ہے۔
‎گلین ہینسارڈ کو موسیقی کی دنیا میں ایک منفرد مقام حاصل تھا۔ انہوں نے کم عمری ہی میں گلوکاری اور نغمہ نگاری کا آغاز کیا اور اپنی منفرد آواز اور دل کو چھو لینے والے انداز کی بدولت جلد ہی شہرت حاصل کر لی۔ سن 1990 میں انہوں نے آئرش راک بینڈ دی فریمز کی بنیاد رکھی، جس نے کئی کامیاب گانے پیش کیے اور بین الاقوامی سطح پر بھی اپنی شناخت بنائی۔
‎گلین ہینسارڈ کو عالمی شہرت 2007 میں ریلیز ہونے والی میوزیکل فلم ونس سے ملی، جس میں انہوں نے مرکزی کردار ادا کیا۔ اس فلم میں ان کی اداکاری اور موسیقی دونوں کو بے حد سراہا گیا۔ فلم کا مشہور گانا فالنگ سلولی نہ صرف دنیا بھر میں مقبول ہوا بلکہ اسے بہترین اوریجنل گانے کا اکیڈمی ایوارڈ، یعنی آسکر بھی ملا۔ اس کامیابی نے گلین ہینسارڈ کو بین الاقوامی موسیقی اور فلمی دنیا کے نمایاں فنکاروں میں شامل کر دیا۔
‎اپنے طویل کیریئر کے دوران انہوں نے متعدد کامیاب البمز، لائیو پرفارمنسز اور بین الاقوامی موسیقی کے منصوبوں میں حصہ لیا۔ ان کے گیت محبت، امید اور انسانی جذبات کی عکاسی کرتے تھے، یہی وجہ ہے کہ مختلف نسلوں کے سامعین ان کی موسیقی سے گہرا تعلق محسوس کرتے تھے۔
‎ان کی وفات پر سوشل میڈیا پر مداحوں نے انہیں شاندار خراجِ عقیدت پیش کیا اور ان کی یادگار موسیقی کو ہمیشہ زندہ رکھنے کے عزم کا اظہار کیا۔ موسیقی سے وابستہ شخصیات کا کہنا ہے کہ گلین ہینسارڈ نے اپنی آواز، تخلیقی صلاحیت اور لازوال گیتوں کے ذریعے ایسی میراث چھوڑی ہے جو آنے والے برسوں تک موسیقی کے شائقین کے دلوں میں زندہ رہے گی۔

‎پاکستان شوبز انڈسٹری کی سینئر اداکارہ صائمہ نور ایک بار پھر اپنی فٹنس اور صحت مند طرزِ زندگی کے باعث سوشل میڈیا پر توجہ کا مرکز بن گئی ہیں۔ 58 سالہ اداکارہ کی حالیہ ویڈیوز وائرل ہونے کے بعد مداح ان کی جسمانی فٹنس، توانائی اور نوجوانوں جیسی چستی کی بھرپور تعریف کر رہے ہیں۔
‎سوشل میڈیا پر گردش کرنے والی ویڈیوز میں صائمہ نور کو جم میں مختلف سخت ورزشیں کرتے دیکھا جا سکتا ہے۔ وہ اسکواٹس، کیٹل بیل سوئنگز اور دیگر جسمانی مشقیں نہایت اعتماد اور مہارت سے انجام دے رہی ہیں۔ ان کی ورزش کے انداز اور جسمانی طاقت نے صارفین کو متاثر کیا، جبکہ متعدد افراد نے انہیں صحت مند طرزِ زندگی اپنانے کی بہترین مثال قرار دیا۔
‎ایک اور وائرل ویڈیو میں اداکارہ کو ایک بیوٹی سیلون کے دورے کے دوران دیکھا گیا، جہاں ان کے وزن میں نمایاں کمی اور تازہ انداز نے بھی مداحوں کی توجہ حاصل کی۔ سوشل میڈیا صارفین نے ان کے نئے لک کو سراہتے ہوئے کہا کہ صائمہ نور آج بھی اپنی شخصیت اور فٹنس کے باعث نوجوان اداکاراؤں کا مقابلہ کرتی نظر آتی ہیں۔
‎مداحوں نے اداکارہ کو "ایور گرین” قرار دیتے ہوئے ان کی مستقل محنت اور خود کو فٹ رکھنے کے جذبے کو قابلِ تعریف قرار دیا۔ بعض صارفین نے مزاحیہ انداز میں تبصرہ کیا کہ ان کی ویڈیوز اتنی شاندار ہیں کہ پہلی نظر میں مصنوعی ذہانت سے تیار کردہ محسوس ہوتی ہیں، تاہم زیادہ تر صارفین نے ان کی محنت اور نظم و ضبط کو اصل کامیابی قرار دیا۔
‎حالیہ ویڈیوز کے بعد صائمہ نور کے پرانے انٹرویوز بھی دوبارہ وائرل ہو رہے ہیں، جن میں انہوں نے اپنی صحت اور فٹنس کے بارے میں کھل کر بات کی تھی۔ اداکارہ نے بتایا تھا کہ ایک وقت ایسا بھی آیا جب انہیں محسوس ہوا کہ ان کا وزن بڑھ رہا ہے، جس کے بعد انہوں نے اپنی خوراک، روزمرہ معمولات اور ورزش پر خصوصی توجہ دینا شروع کی۔
‎صائمہ نور کے مطابق صحت مند زندگی اختیار کرنے کے لیے مستقل مزاجی، متوازن غذا اور باقاعدہ ورزش بنیادی عناصر ہیں۔ ان کا کہنا تھا کہ عمر بڑھنے کے باوجود اگر انسان اپنی صحت کا خیال رکھے تو وہ خود کو تندرست اور متحرک رکھ سکتا ہے۔
‎صائمہ نور کی حالیہ فٹنس ٹرانسفارمیشن کو سوشل میڈیا پر نہ صرف خوب سراہا جا رہا ہے بلکہ کئی صارفین اسے دوسروں کے لیے بھی ایک مثبت مثال قرار دے رہے ہیں کہ مستقل محنت اور صحت مند عادات کے ذریعے کسی بھی عمر میں خود کو فٹ رکھا جا سکتا ہے۔

لاہور: پاکستانی اداکارہ عروبہ مرزا نے رکنِ صوبائی اسمبلی ثاقب چدھڑ سے منسوب مبینہ انسٹاگرام پیغامات کے اسکرین شاٹس شیئر کرتے ہوئے دعویٰ کیا ہے کہ سیاستدان نے ان سے بھی متعدد بار رابطہ کرنے کی کوشش کی۔

اداکارہ نے اپنی انسٹاگرام اسٹوریز پر مبینہ اسکرین شاٹس شیئر کیے، جن میں ثاقب چدھڑ کی جانب سے گفتگو شروع کرنے اور اسنیپ چیٹ پر بات چیت جاری رکھنے کی درخواستیں دکھائی گئی ہیں۔ اس کے ساتھ عروبہ مرزا نے لکھا، "مومنہ اقبال، سیدہ طوبیٰ اور اب میں بھی۔”عروبہ مرزا کی یہ پوسٹ ایسے وقت سامنے آئی ہے جب ثاقب چدھڑ پہلے ہی ایک اور تنازع کے باعث خبروں میں ہیں۔ اس سے قبل ان پر اداکارہ اور میزبان سیدہ طوبیٰ کو بطور تحفہ آئی فون دینے کی پیشکش کرنے کا الزام بھی سامنے آ چکا ہے۔

دوسری جانب اداکارہ مومنہ اقبال بھی ثاقب چدھڑ کے خلاف قانونی کارروائی کر رہی ہیں۔ مومنہ اقبال کی درخواست کے مطابق انہوں نے رکنِ اسمبلی پر سائبر اسٹاکنگ، ہراسانی، بلیک میلنگ اور شادی کی پیشکش مسترد کیے جانے کے بعد دھمکیاں دینے جیسے الزامات عائد کیے ہیں۔یہ مقدمہ پریوینشن آف الیکٹرانک کرائمز ایکٹ (پیکا) کے تحت درج کیا گیا ہے، جس کی تحقیقات نیشنل سائبر کرائم انویسٹی گیشن ایجنسی (این سی سی آئی اے) کر رہی ہے۔

مومنہ اقبال متعدد مواقع پر کہہ چکی ہیں کہ وہ صرف انصاف چاہتی ہیں اور عدالت سے باہر کسی بھی سمجھوتے کی خبروں کی تردید کرتی ہیں۔ ان کا مؤقف ہے کہ فرانزک شواہد نے تحقیقات کو مزید مضبوط کیا ہے، جبکہ مقدمہ تاحال عدالت میں زیرِ سماعت ہے۔

ممبئی: بالی ووڈ کے معروف اداکار عامر خان کو موصول ہونے والی دھمکی آمیز آڈیو کے معاملے میں تحقیقات کے دوران اہم پیش رفت سامنے آئی ہے۔

بھارتی میڈیا کے مطابق پولیس نے ابتدائی تفتیش میں آڈیو پیغام کے ذریعے استعمال ہونے والے تکنیکی ذرائع سے متعلق اہم شواہد حاصل کر لیے ہیں۔پولیس ذرائع کے مطابق دھمکی آمیز آڈیو پیغام بھیجنے کے لیے مبینہ طور پر سویڈن میں قائم وی پی این استعمال کیا گیا، جبکہ ابتدائی تحقیقات میں آئی پی ایڈریس سویڈن سے ٹریس ہوا ہے۔ تاہم حکام کو شبہ ہے کہ اصل مقام اور شناخت چھپانے کے لیے وی پی این کے ساتھ ٹور براؤزر بھی استعمال کیا گیا۔

تحقیقات کے مطابق وائرل آڈیو پیغام کو مبینہ طور پر لارنس بشنوئی گینگ سے جوڑا جا رہا ہے۔ آڈیو میں خود کو "آرزو بشنوئی” ظاہر کرنے والے شخص نے عامر خان پر "لو جہاد” کو فروغ دینے کا الزام عائد کرتے ہوئے انہیں سنگین نتائج کی دھمکی دی ہے۔ذرائع کا کہنا ہے کہ پولیس آڈیو پیغام بھیجنے والے شخص کی شناخت اور اس کے اصل مقام کا تعین کرنے کے لیے مختلف تکنیکی پہلوؤں کا جائزہ لے رہی ہے۔

یاد رہے کہ عامر خان کو 18 جولائی کو مبینہ طور پر لارنس بشنوئی گینگ سے منسلک افراد کی جانب سے سوشل میڈیا کے ذریعے دھمکی موصول ہوئی تھی، جس میں ان پر "لو جہاد” کو فروغ دینے کا الزام عائد کیا گیا تھا۔بھارتی میڈیا رپورٹس کے مطابق اس دھمکی کو عامر خان کی اپنی دیرینہ ساتھی گوری سپراٹ سے حالیہ شادی کے تناظر میں بھی دیکھا جا رہا ہے۔

کراچی: پاکستانی شوبز انڈسٹری کے معروف اداکار فہد شیخ نے سینئر اداکار سید محمد احمد کے ساتھ مبینہ بدسلوکی اور ہراسانی کے الزامات کو مسترد کرتے ہوئے کہا ہے کہ سوشل میڈیا پر وائرل ہونے والی ویڈیو کو سیاق و سباق سے ہٹ کر پیش کیا گیا، جس سے غلط تاثر پیدا کیا گیا۔

انسٹاگرام پر جاری اپنے وضاحتی بیان میں فہد شیخ نے کہا کہ شوٹنگ سیٹ پر فنکار ایک خاندان کی طرح ہوتے ہیں، جہاں خوشگوار ماحول میں مذاق بھی ہوتا ہے، تاہم وائرل ویڈیو کو اصل پس منظر سے الگ کر کے پیش کیا گیا۔ ان کا کہنا تھا کہ یہ سید محمد احمد کے ساتھ ان کا پہلا پراجیکٹ نہیں بلکہ وہ ماضی میں بھی متعدد ڈراموں میں ایک ساتھ کام کر چکے ہیں اور دونوں کے درمیان ہمیشہ اچھے تعلقات رہے ہیں۔اداکار نے کہا کہ انہیں معلوم نہیں کہ وہ مذاق، جس کا آغاز خود سید محمد احمد نے کیا تھا، کس مرحلے پر ناگوار محسوس ہونے لگا، تاہم ان کا کسی بھی صورت بے ادبی یا دل آزاری کا کوئی ارادہ نہیں تھا۔فہد شیخ نے انکشاف کیا کہ تنازع سامنے آنے سے پہلے ہی وہ سید محمد احمد سے ذاتی طور پر معذرت کر چکے تھے۔ انہوں نے کہا کہ اگر ان کی نجی معذرت کافی نہیں تھی تو وہ عوامی سطح پر بھی معذرت کرتے ہیں، کیونکہ وہ اپنے بزرگوں کی بے عزتی کا تصور بھی نہیں کر سکتے۔انہوں نے مزید اعلان کیا کہ ان افراد کے خلاف قانونی کارروائی شروع کی جا رہی ہے جنہوں نے مبینہ طور پر ویڈیو کو اصل تناظر سے ہٹ کر سوشل میڈیا پر پھیلا کر عوام کو گمراہ کرنے کی کوشش کی۔

یہ معاملہ اس وقت زیرِ بحث آیا جب سید محمد احمد نے ایک حالیہ پوڈکاسٹ میں شوٹنگ کے دوران ایک کم عمر اداکار کی جانب سے تضحیک آمیز رویے کا ذکر کیا، اگرچہ انہوں نے کسی کا نام نہیں لیا تھا، تاہم سوشل میڈیا پر فہد شیخ کا نام سامنے آیا اور ایک ویڈیو بھی وائرل ہو گئی۔

دوسری جانب سید محمد احمد نے بھی انسٹاگرام پر جاری اپنے بیان میں شوبز انڈسٹری سے تعلق رکھنے والے ساتھی فنکاروں کی محبت، حمایت اور اظہارِ یکجہتی پر شکریہ ادا کرتے ہوئے کہا کہ انہیں موصول ہونے والے پیغامات، فون کالز اور وائس نوٹس نے ان کے حوصلے بلند کیے اور وہ سب کے تعاون پر دل کی گہرائیوں سے شکر گزار ہیں۔

‎پاکستان کے معروف سینئر اداکار، موسیقار اور کامیڈین خالد نظامی کراچی میں طویل علالت کے بعد انتقال کر گئے۔ ان کے انتقال کی خبر سے شوبز انڈسٹری اور مداحوں میں گہرے رنج و غم کی لہر دوڑ گئی۔
‎اہل خانہ کے مطابق خالد نظامی کافی عرصے سے علیل تھے اور زیر علاج تھے۔ ان کی نماز جنازہ کل بعد نماز ظہر عثمانیہ مسجد، بفر زون سیکٹر 15، کراچی سینٹرل میں ادا کی جائے گی، جس میں اہل خانہ، دوست احباب، فنکار برادری اور مداحوں کی بڑی تعداد کی شرکت متوقع ہے۔
‎خالد نظامی 1947 میں برصغیر کے شہر مسوری، ضلع ڈیرہ دون، موجودہ ریاست اتراکھنڈ، بھارت میں پیدا ہوئے۔ قیام پاکستان کے بعد ان کا خاندان کراچی منتقل ہوا، جہاں انہوں نے کراچی گرامر اسکول سے ابتدائی تعلیم حاصل کی اور بعد ازاں اسلامیہ کالج کراچی سے بی اے کی ڈگری حاصل کی۔
‎انہوں نے اپنے فنی سفر کا آغاز ٹیلی ویژن سے کیا اور 1972 میں نشر ہونے والے پی ٹی وی کے مقبول ڈرامہ انکل عرفی سے نمایاں شناخت حاصل کی۔ بعد ازاں شہزوری، ان کہی اور حسینہ معین کے مشہور ڈرامے عید کا جوڑا سمیت متعدد کامیاب ڈراموں میں اپنی منفرد اداکاری سے ناظرین کے دل جیت لیے۔ ان کی برجستہ مزاح، قدرتی اداکاری اور منفرد انداز نے انہیں پاکستان ٹیلی ویژن کے یادگار فنکاروں میں شامل کر دیا۔
‎ٹیلی ویژن کے ساتھ ساتھ خالد نظامی نے فلمی دنیا میں بھی اپنی صلاحیتوں کا لوہا منوایا۔ انہوں نے نذر الاسلام کی فلم حقیقت (1974)، پہچان (1975) اور پنجابی فلم اج دیاں کڑیاں (1977) سمیت کئی فلموں میں اہم کردار ادا کیے، جنہیں شائقین نے خوب سراہا۔
‎خالد نظامی کی وفات سے پاکستان کی فنکار برادری ایک ایسے باصلاحیت اداکار سے محروم ہو گئی ہے، جس نے کئی دہائیوں تک اپنی بہترین اداکاری اور موسیقی کے ذریعے شائقین کو معیاری تفریح فراہم کی۔ ان کے یادگار کردار ہمیشہ پاکستانی ڈرامہ اور فلم کی تاریخ کا اہم حصہ رہیں گے۔

‎لاہور کے تھانہ نواب ٹاؤن میں معروف ٹک ٹاکر اور یوٹیوبر رجب بٹ کے خلاف ایک اور مقدمہ درج کر لیا گیا ہے۔ یہ مقدمہ خاتون عائشہ شرافت کی مدعیت میں درج کیا گیا، جس میں رجب بٹ سمیت دیگر افراد پر حملے اور دھمکیوں کے سنگین الزامات عائد کیے گئے ہیں۔
‎پولیس کے مطابق ایف آئی آر میں عائشہ شرافت نے مؤقف اختیار کیا ہے کہ وہ 25 جولائی کو اپنی چند دوستوں کے ہمراہ ایک نجی کیفے میں کھانا کھانے گئی تھیں۔ ان کے مطابق اسی دوران وہاں موجود دو لڑکوں اور دو لڑکیوں نے ان کی ایک دوست کے ساتھ بدتمیزی شروع کر دی، جس پر دونوں گروپوں کے درمیان تلخ کلامی ہو گئی۔
‎مدعیہ کا الزام ہے کہ صورتحال کشیدہ ہونے کے بعد ملزمان نے نہ صرف ان کی دوست کو تھپڑ مارے بلکہ اسلحہ بھی نکال لیا۔ ایف آئی آر کے مطابق میر شفیع نامی ایک ملزم نے مبینہ طور پر موقع پر فائرنگ بھی کی، جس سے کیفے میں خوف و ہراس پھیل گیا۔
‎شکایت کنندہ نے اپنے بیان میں یہ بھی الزام عائد کیا ہے کہ یہ حملہ رجب بٹ کے کہنے پر کیا گیا۔ ایف آئی آر میں ان الزامات کی بنیاد پر متعلقہ دفعات کے تحت مقدمہ درج کر لیا گیا ہے۔
‎دوسری جانب نواب ٹاؤن پولیس کا کہنا ہے کہ واقعے کی تحقیقات شروع کر دی گئی ہیں اور تمام شواہد، سی سی ٹی وی فوٹیج اور گواہوں کے بیانات کی روشنی میں حقائق کا جائزہ لیا جا رہا ہے۔ پولیس کے مطابق تحقیقات مکمل ہونے کے بعد قانون کے مطابق کارروائی عمل میں لائی جائے گی۔
‎واضح رہے کہ حالیہ دنوں میں رجب بٹ مختلف قانونی معاملات کی وجہ سے خبروں میں رہے ہیں۔ تاہم اس نئے مقدمے میں عائد الزامات کے حوالے سے رجب بٹ یا ان کے وکیل کی جانب سے تاحال کوئی باضابطہ مؤقف سامنے نہیں آیا۔ اس لیے مقدمے میں درج الزامات کی تصدیق عدالت یا تفتیشی عمل مکمل ہونے تک نہیں کی جا سکتی۔