Category: شوبز

بھارتی ٹیلی وژن اور تھیٹر کی معروف اداکارہ نارائنی شاستری نے شوبز انڈسٹری میں منشیات کے استعمال سے متعلق چونکا دینے والے دعوے کرتے ہوئے کہا ہے کہ ٹی وی انڈسٹری میں کوکین اور ایم ڈی ایم اے جیسی منشیات کا استعمال عام ہوتا جا رہا ہے۔

48 سالہ اداکارہ نے ایک انٹرویو میں بغیر کسی کا نام لیے کہا کہ تفریحی صنعت میں منشیات کا استعمال لوگوں کی سوچ سے کہیں زیادہ پھیل چکا ہے اور وہ خود اس کا مشاہدہ کر چکی ہیں۔ انہوں نے اعتراف کیا کہ ماضی میں محض تجربے کی غرض سے ایک مرتبہ منشیات استعمال کی تھیں، تاہم انہیں کبھی اس کی لت نہیں لگی۔نارائنی شاستری نے بتایا کہ ماضی میں شوبز پارٹیوں میں صرف شراب کے لیے الگ بجٹ رکھا جاتا تھا، لیکن اب غیر قانونی منشیات کے لیے بھی باقاعدہ بجٹ مختص کیا جاتا ہے۔ ان کے مطابق یہی وجہ ہے کہ انہوں نے کئی برس قبل ایسی پارٹیوں میں جانا چھوڑ دیا کیونکہ ان کا ماحول مکمل طور پر تبدیل ہو چکا ہے۔اداکارہ کا کہنا تھا کہ بڑی تقریبات میں منشیات کا استعمال خفیہ انداز میں کیا جاتا ہے، جبکہ چھوٹی اور نجی محفلوں میں سب کو معلوم ہوتا ہے کہ کون کیا استعمال کر رہا ہے۔

شوٹنگ کے دوران اداکاروں کی جانب سے منشیات کے استعمال سے متعلق سوال پر نارائنی شاستری نے دعویٰ کیا کہ ایسے واقعات اکثر پیش آتے ہیں۔ ان کے مطابق بعض اوقات اداکار نشے کی حالت میں شوٹنگ کے قابل نہیں ہوتے، جس کے باعث شوٹنگ منسوخ کرنا پڑتی ہے اور پروڈیوسرز کو مالی و تخلیقی مشکلات کا سامنا کرنا پڑتا ہے، کیونکہ کسی مقبول اداکار کو تبدیل کرنا آسان نہیں ہوتا۔

واضح رہے کہ نارائنی شاستری نے اپنے ٹیلی وژن کیریئر کا آغاز بھارتی ڈرامے "کہانی سات پھیروں کی” سے کیا تھا، جبکہ انہیں "ساس بھی کبھی بہو تھی” اور "پیا کا گھر” سمیت متعدد مقبول ڈراموں سے شہرت حاصل ہوئی۔

بھارت میں نیٹ پیپر لیک تنازع اور طلبہ کے احتجاج پر خاموش رہنے پر تنقید کے بعد بالی ووڈ اداکار عامر خان کی بیٹی اور ذہنی صحت کی کارکن آئرا خان نے اپنی خاموشی کی وجہ بیان کرتے ہوئے وضاحت پیش کی ہے۔

آئرا خان نے انسٹاگرام پر شیئر کی گئی ایک طویل ویڈیو میں کہا کہ وہ ذہنی صحت کے شعبے سے وابستہ ہیں اور عموماً خبروں، احتجاج اور تشدد سے متعلق ویڈیوز دیکھنے سے گریز کرتی ہیں کیونکہ ایسی چیزیں انہیں ذہنی طور پر بےبس اور پریشان کر دیتی ہیں۔انہوں نے بتایا کہ انہوں نے طلبہ کے احتجاج کی ویڈیوز نہیں دیکھیں اور نہ ہی خود کو سوشل میڈیا پر گردش کرنے والے مناظر سے جذباتی طور پر متاثر ہونے دیا۔ ان کا کہنا تھا کہ اگر ان کی خاموشی سے کسی کو یہ تاثر ملا کہ انہیں اس معاملے کی پروا نہیں تو وہ اس پر معذرت خواہ ہیں، کیونکہ ان کا مقصد کسی کے جذبات کو ٹھیس پہنچانا نہیں تھا۔آئرا خان نے مزید انکشاف کیا کہ جب انہیں اپنی کزن کی احتجاج کے دوران گرفتاری کی اطلاع ملی تو وہ شدید پریشان ہو گئی تھیں، تاہم بعد میں اس کی خیریت کی خبر ملنے پر انہیں اطمینان ہوا اور وہ دوبارہ اپنی معمول کی سرگرمیوں میں مصروف ہو گئیں۔

ویڈیو کے کیپشن میں آئرا خان نے اعتراف کیا کہ خبروں اور احتجاج سے دور رہنا ایک طرح کا "امتیاز” ہے۔ انہوں نے کہا کہ وہ اس بات پر غور کر رہی ہیں کہ اپنی صلاحیتوں اور وسائل کے مطابق معاشرے میں مثبت کردار کیسے ادا کیا جا سکتا ہے۔

واضح رہے کہ بھارت میں نیٹ پیپر لیک تنازع کے خلاف نئی دہلی کے جنتر منتر پر طلبہ کا احتجاج جاری ہے۔ مظاہرین، جن کی قیادت "کاکروچ جنتا پارٹی” اور سماجی کارکن سونم وانگ چک کر رہے ہیں، وفاقی وزیر تعلیم دھرمیندر پردھان کے استعفے اور تعلیمی نظام میں جامع اصلاحات کا مطالبہ کر رہے ہیں۔اس سے قبل سلمان خان، عالیہ بھٹ، کرینہ کپور اور دیگر معروف شخصیات بھی طلبہ کے احتجاج اور پیپر لیک معاملے پر اپنی آواز بلند کر چکی ہیں، جبکہ حال ہی میں گلوکار و اداکار دلجیت دوسانجھ نے بھی کہا تھا کہ طلبہ کے احتجاج کی حمایت پر انہیں ایک بار پھر "ملک دشمن” قرار دیا جا سکتا ہے۔

پاکستانی اداکار علی انصاری نے اسکرین پر رومانوی مناظر کی عکس بندی سے متعلق اپنے خیالات کا اظہار کرتے ہوئے کہا ہے کہ اگر مکالمے اور منظر فطری انداز میں لکھے گئے ہوں تو انہیں ادا کرنے میں کسی قسم کی جھجک محسوس نہیں ہوتی۔

حال ہی میں ایک یوٹیوب شو میں گفتگو کرتے ہوئے علی انصاری نے کہا کہ رومانوی مناظر کی کامیابی کا انحصار اسکرپٹ پر ہوتا ہے۔ ان کے مطابق اگر مکالمے غیر فطری ہوں یا کہانی کے تناظر سے مطابقت نہ رکھتے ہوں تو ایسے مناظر کی عکس بندی فنکاروں کے لیے مشکل ہو جاتی ہے۔اداکار نے کہا کہ اسکرپٹ پڑھتے ہوئے ہی بعض اوقات اندازہ ہو جاتا ہے کہ کوئی مخصوص مکالمہ یا منظر کہانی کے لیے ضروری نہیں۔ تاہم وہ لکھاریوں کا احترام کرتے ہیں کیونکہ وہ کہانی کے تسلسل کو مدنظر رکھتے ہوئے ایسے مناظر شامل کرتے ہیں۔

علی انصاری کے مطابق شوٹنگ کے دوران اگر محسوس ہو کہ کوئی منظر ضرورت سے زیادہ ہے تو ہدایت کار اور ٹیم کی مشاورت سے مکالموں میں معمولی رد و بدل کر لیا جاتا ہے، جس سے منظر زیادہ مؤثر اور فطری انداز میں فلمایا جا سکتا ہے۔انہوں نے مزید کہا کہ ایک مضبوط اور حقیقت سے قریب اسکرپٹ نہ صرف فنکاروں کے لیے اداکاری کو آسان بناتی ہے بلکہ ناظرین پر بھی بہتر تاثر چھوڑتی ہے۔

بھارت کے سابق کرکٹر اور سابق بھارتی بیٹنگ کوچ سنجے بنگر کی صاحبزادی انایا بنگر نے جنس کی تبدیلی کے آپریشن کے بعد اپنی نئی زندگی، شادی، والدین کی حمایت اور مستقبل میں ماں بننے کی خواہش سے متعلق پہلی بار تفصیل سے گفتگو کی ہے۔

ایک حالیہ انٹرویو میں انایا بنگر نے بتایا کہ وہ مستقبل میں شادی کرنا اور بچوں کی پرورش کرنا چاہتی ہیں، تاہم اس وقت ان کی تمام توجہ جنس کی تبدیلی کے آپریشن کے بعد صحت کی مکمل بحالی پر مرکوز ہے۔انہوں نے کہا کہ فی الحال شادی کا کوئی ارادہ نہیں کیونکہ ان کے لیے یہ زندگی کا ایک نیا باب ہے اور وہ اس مرحلے سے خود کو جسمانی اور ذہنی طور پر ہم آہنگ کرنے میں مصروف ہیں۔ماں بننے کے حوالے سے انایا بنگر نے کہا کہ وہ بچوں سے بے حد محبت کرتی ہیں، لیکن جنس کی تبدیلی کے آپریشن کے بعد وہ قدرتی طور پر ماں نہیں بن سکتیں۔ ان کے مطابق مستقبل میں سروگیسی کے ذریعے بچے کی پیدائش یا کسی بچے کو گود لینا ان کے لیے ممکنہ راستے ہو سکتے ہیں۔انایا نے اپنی خاندانی زندگی پر بات کرتے ہوئے بتایا کہ آپریشن کے بعد ان کے والدین نے انہیں مکمل طور پر اپنی بیٹی کے طور پر قبول کر لیا ہے اور اب وہ ان کے لیے مؤنث الفاظ اور ضمیر استعمال کرتے ہیں، جس سے انہیں جذباتی طور پر بہت حوصلہ ملا۔

انہوں نے مزید انکشاف کیا کہ ان کا جنس کی تبدیلی کا سفر 2023 میں ہارمون تھیراپی سے شروع ہوا تھا۔ جسمانی اور نفسیاتی تبدیلیوں کے مختلف مراحل سے گزرنے کے بعد تقریباً چار ماہ قبل انہوں نے تھائی لینڈ میں جنس کی تبدیلی کا آپریشن کروایا۔انایا بنگر کی یہ گفتگو سوشل میڈیا پر بھی توجہ کا مرکز بنی ہوئی ہے، جہاں صارفین کی جانب سے ان کے فیصلے، خاندانی حمایت اور نئی زندگی کے سفر پر مختلف آراء کا اظہار کیا جا رہا ہے۔

پاکستان شوبز انڈسٹری کی معروف اداکارہ مومنہ اقبال اپنے شوہر حمزہ حبیب کے ساتھ کروائے گئے رومانوی فوٹو شوٹ کے باعث سوشل میڈیا پر تنقید کی زد میں آ گئی ہیں۔

اداکارہ کا نکاح رواں سال جون میں حمزہ حبیب کے ساتھ ہوا تھا، جس کی مختلف تقریبات کی تصاویر اور ویڈیوز سوشل میڈیا پر خوب وائرل ہوئی تھیں۔ مومنہ اقبال کی رخصتی تاحال نہیں ہوئی، جبکہ میڈیا رپورٹس کے مطابق ان کی رخصتی نومبر یا دسمبر میں متوقع ہے۔نکاح کے بعد سے مومنہ اقبال اپنے شوہر کے ساتھ مختلف ملاقاتوں اور یادگار لمحات کی تصاویر و ویڈیوز سوشل میڈیا پر اپنے مداحوں کے ساتھ شیئر کرتی رہی ہیں۔

حال ہی میں اداکارہ نے سمندر کنارے اپنے شوہر کے ہمراہ ایک رومانوی فوٹو شوٹ کروایا، جس کی تصاویر سوشل میڈیا پر تیزی سے وائرل ہو رہی ہیں۔ تصاویر میں دونوں کو خوشگوار موڈ میں ایک دوسرے کے ساتھ وقت گزارتے اور کیمرے کے سامنے دلکش انداز میں پوز دیتے دیکھا جا سکتا ہے۔تاہم ان تصاویر کے سامنے آنے کے بعد سوشل میڈیا پر ملا جلا ردعمل دیکھنے میں آیا۔ بعض صارفین نے اس جوڑی کو خوبصورت قرار دیتے ہوئے نیک تمناؤں کا اظہار کیا، جبکہ متعدد صارفین نے تصاویر کو تنقید کا نشانہ بنایا۔تنقید کرنے والے صارفین کا مؤقف ہے کہ ذاتی زندگی کے نجی اور خوشگوار لمحات کو سوشل میڈیا پر اس انداز میں شیئر کرنے کے بجائے انہیں نجی رکھا جانا چاہیے، جبکہ کچھ افراد نے اسے غیر ضروری تشہیر اور دکھاوے سے تعبیر کیا۔

‎ممبئی میں ایک سرکاری تقریب کے دوران بالی وڈ کے سپر اسٹار سلمان خان کی حالیہ عوامی پیشی نے مداحوں میں ان کی صحت کے حوالے سے تشویش پیدا کر دی۔ اداکار نے ممبئی میں سَلم ری ہیبیلی ٹیشن اتھارٹی (SRA) کی جانب سے منعقدہ تقریب میں شرکت کی، جہاں انہوں نے ادارے کے نئے ڈیٹا کلیکشن اینڈ ویریفکیشن سپورٹ سینٹر (آئی ٹی سرور روم) کا افتتاح کیا۔
‎تقریب کی ویڈیوز اور تصاویر سوشل میڈیا پر سامنے آنے کے بعد مداحوں کی توجہ سلمان خان کی جسمانی حالت پر مرکوز ہو گئی۔ کئی صارفین نے تبصرہ کیا کہ 60 سالہ اداکار پہلے کے مقابلے میں کمزور اور تھکے ہوئے دکھائی دے رہے تھے، جس کے باعث ان کی صحت کے بارے میں مختلف قیاس آرائیاں شروع ہو گئیں۔
‎سوشل میڈیا پلیٹ فارمز پر مداحوں نے سلمان خان کے لیے نیک خواہشات کا اظہار کرتے ہوئے دعا کی کہ وہ مکمل طور پر صحت مند رہیں۔ بعض صارفین نے لکھا کہ اداکار کی مصروفیات اور مسلسل کام کی وجہ سے ان پر تھکن کے آثار نمایاں ہو سکتے ہیں، جبکہ کچھ نے ان کی تازہ تصاویر دیکھ کر تشویش کا اظہار کیا۔
‎تاحال سلمان خان یا ان کی ٹیم کی جانب سے ان کی صحت سے متعلق کوئی باضابطہ بیان جاری نہیں کیا گیا۔ اس لیے سوشل میڈیا پر گردش کرنے والی قیاس آرائیوں کی سرکاری طور پر تصدیق نہیں ہو سکی۔
‎سلمان خان گزشتہ کئی دہائیوں سے بھارتی فلم انڈسٹری کے کامیاب ترین اداکاروں میں شمار ہوتے ہیں اور ان کی ہر عوامی سرگرمی مداحوں کی بھرپور توجہ حاصل کرتی ہے۔ یہی وجہ ہے کہ ان کی حالیہ تصاویر بھی سوشل میڈیا پر تیزی سے وائرل ہوئیں اور ان کی صحت سے متعلق بحث چھڑ گئی۔
‎مداحوں کی بڑی تعداد نے امید ظاہر کی ہے کہ اگر اداکار کو کسی قسم کی طبی مشکل درپیش ہے تو وہ جلد صحت یاب ہوں گے اور ایک بار پھر بھرپور توانائی کے ساتھ اپنے فلمی منصوبوں میں نظر آئیں گے۔ تاہم جب تک سلمان خان یا ان کے نمائندے کی جانب سے کوئی باضابطہ وضاحت سامنے نہیں آتی، ان کی صحت سے متعلق تمام دعوے محض قیاس آرائی ہی تصور کیے جائیں گے۔