Category: شوبز

بالی ووڈ فلم ’’دھریندر‘‘ کے پروڈکشن ڈیزائنر سینی ایس جوہرے کے خلاف جنسی ہراسانی کیس میں نئی پیش رفت سامنے آئی ہے، جہاں داخلی تحقیقاتی کمیٹی نے انہیں الزامات میں قصوروار قرار دے دیا، جس کے بعد مختلف فلمی اور ویب پروجیکٹس سے ان کا نام ہٹایا جا رہا ہے۔

میڈیا رپورٹس کے مطابق نئی دہلی سے تعلق رکھنے والی متاثرہ خاتون نے الزام عائد کیا کہ سینی ایس جوہرے نے انہیں چندی گڑھ کے ایک ہوٹل میں ملاقات کے لیے بلایا، جہاں مبینہ طور پر انہیں جنسی ہراسانی، جسمانی تشدد اور زبردستی روک کر رکھنے کا سامنا کرنا پڑا۔خاتون نے اپنی شکایت میں یہ بھی دعویٰ کیا کہ ان کے مشروب میں نشہ آور شے ملائی گئی تھی، جس کے باعث ان کی طبیعت غیر ہوگئی۔متاثرہ خاتون نے 20 اپریل کو سیکٹر 17 پولیس اسٹیشن میں مقدمہ درج کروایا، جس کے بعد پولیس نے ابتدائی تحقیقات مکمل کرکے ایف آئی آر درج کی۔

رپورٹس کے مطابق خاتون نے پولیس کے ساتھ ساتھ فلم ساز ادیتیا دہر اور پروڈیوسر لوکیش دہر کی پروڈکشن کمپنی ’’بی 62 اسٹوڈیوز‘‘ میں بھی باضابطہ شکایت جمع کروائی تھی۔ذرائع کا کہنا ہے کہ کمپنی کی انسدادِ جنسی ہراسانی کمیٹی نے اکتوبر 2025 میں شکایت موصول ہونے کے بعد تحقیقات کا آغاز کیا، جو تقریباً 6 ماہ تک جاری رہیں۔ تحقیقات مارچ کے آخر یا اپریل 2026 میں مکمل ہوئیں، جن میں سینی ایس جوہرے کو دو الزامات میں قصوروار قرار دیا گیا۔کمیٹی نے اپنی تحقیقاتی رپورٹ شکایت کنندہ کو بھی فراہم کردی ہے۔

دوسری جانب چندی گڑھ پولیس نے ایف آئی آر درج ہونے کے بعد سینی ایس جوہرے کو گرفتار کیا تھا، تاہم بعد ازاں ضلعی عدالت نے انہیں ضمانت پر رہا کردیا۔معاملہ منظر عام پر آنے کے بعد فلمی صنعت میں بھی ردعمل سامنے آیا ہے۔ رپورٹس کے مطابق فلم ’’دھریندر‘‘ کے او ٹی ٹی ورژن سے سینی ایس جوہرے کا کریڈٹ ہٹا دیا گیا ہے، جبکہ یش راج فلمز نے بھی اپنی آنے والی ویب سیریز ’’اکا‘‘ سے ان کا نام نکالنے کا فیصلہ کیا ہے۔

ڈرامہ نگار خلیل الرحمان قمر نے حالیہ وائرل انمول عرف پنکی کیس پر سخت ردِعمل دیتے ہوئے معاشرے میں موجود دہرے معیار، اشرافیہ کے کردار اور سماجی منافقت پر کھل کر تنقید کی ہے۔

ایک نجی پروگرام میں گفتگو کرتے ہوئے خلیل الرحمان قمر نے طنزیہ انداز اپناتے ہوئے کہا کہ “جب انمول پنکی جیسے کام کیے جائیں گے تو رنگ بھی پنک ہی ہوں گے، ابھی کئی لوگوں کے رنگ پنک ہونے والے ہیں۔” ان کا کہنا تھا کہ اگر معاشرے کے طاقتور اور بااثر طبقات کی خفیہ سرگرمیوں اور برائیوں کو بے نقاب کر دیا جائے تو لوگ حیران رہ جائیں گے۔انہوں نے کہا کہ “اگر ہم ان بڑے لوگوں کی برائیوں کا چٹھہ کھول دیں تو خدا کی قسم ہمارے منہ سے چیخیں نکل جائیں گی۔” خلیل الرحمان قمر کے مطابق کئی معاملات ایسے ہوتے ہیں جو مکمل طور پر عوام کے سامنے نہیں آتے کیونکہ اکثر فیصلے بند کمروں میں ہی طے کر لیے جاتے ہیں۔

ڈرامہ نگار نے منشیات کے استعمال کے موضوع پر بھی گفتگو کی اور کہا کہ یہ ایک نہایت مہنگا نشہ ہے جس تک عام آدمی کی رسائی ممکن نہیں، اسی لیے ایسے معاملات میں اکثر بااثر اور صاحبِ حیثیت افراد کے نام سامنے آتے ہیں۔گفتگو کے دوران انہوں نے ماڈل ایان علی کا حوالہ دیتے ہوئے کہا کہ معاشرہ طاقتور شخصیات کے معاملات پر مختلف ردِعمل دیتا ہے، جبکہ عام افراد کے لیے الگ پیمانے اختیار کیے جاتے ہیں۔خلیل الرحمان قمر نے معاشرتی رویوں اور معاشی مشکلات پر طنز کرتے ہوئے کہا کہ “ہم دن بھر حب الوطنی کی باتیں کرتے ہیں اور رات کو دوست سے کہتے ہیں کہ پیٹرول بہت مہنگا ہو گیا ہے، ذرا ڈلوا دو۔”

سندھ کی معروف گلوکارہ صنم سندھو نے الزام عائد کیا ہے کہ شکارپور میں ایک شادی کی تقریب کے دوران اُن اور اُن کی ٹیم پر حملہ کیا گیا، جس کے بعد پولیس نے واقعے کی رپورٹ درج کرتے ہوئے ملوث افراد کے خلاف کارروائی کی یقین دہانی کرا دی ہے۔

صنم سندھو کے مطابق انہیں لکھ برادری کی جانب سے نیو فوجداری تھانے کی حدود میں واقع میرانی علاقے میں ایک شادی کی تقریب میں پرفارم کرنے کے لیے مدعو کیا گیا تھا۔گلوکارہ نے بتایا کہ تقریب کے دوران بعض افراد نشے کی حالت میں تھے اور انہوں نے بدتمیزی شروع کر دی۔ صنم سندھو کا کہنا تھا کہ میزبان بھی نشے میں غیر اخلاقی حرکات کرتا رہا۔انہوں نے الزام لگایا کہ تقریب کے دوران اُن پر حملہ کیا گیا جبکہ اُن کی پوری ٹیم، بشمول اُن کے چھوٹے بھائی، کو بھی شدید تشدد کا نشانہ بنایا گیا۔صنم سندھو کے مطابق اس واقعے کے باعث اُن کی ٹیم میں خوف و ہراس پھیل گیا اور تمام افراد شدید ذہنی دباؤ کا شکار ہوئے۔

گلوکارہ نے مزید دعویٰ کیا کہ انہیں اور اُن کی ٹیم کو کئی گھنٹوں تک یرغمال بنا کر رکھا گیا جبکہ اُن کا موسیقی کا سامان بھی چھین لیا گیا۔ انہوں نے یہ بھی کہا کہ پرفارمنس کے لیے طے شدہ معاوضہ بھی ادا نہیں کیا گیا۔صنم سندھو نے صوبائی وزیر ثقافت، آئی جی سندھ اور دیگر متعلقہ حکام سے واقعے کا نوٹس لینے کا مطالبہ کرتے ہوئے ذمہ دار افراد کے خلاف سخت کارروائی اور فنکاروں کو تقریبات میں تحفظ فراہم کرنے کی اپیل کی ہے۔دوسری جانب ایس ایس پی کلیم ملک نے بتایا کہ واقعے میں ملوث افراد کے خلاف رپورٹ درج کر لی گئی ہے اور شکایت میں نامزد افراد کے خلاف قانونی کارروائی عمل میں لائی جائے گی۔اس واقعے کے بعد سندھ میں نجی تقریبات میں پرفارم کرنے والے فنکاروں اور ثقافتی شخصیات کی سکیورٹی کے حوالے سے تشویش میں اضافہ ہوگیا ہے۔

پاکستانی اداکارہ مومنہ اقبال اور مسلم لیگ ن کے رکنِ اسمبلی ثاقب چدھڑ کے درمیان جاری تنازع میں ایک نئی پیش رفت سامنے آئی ہے، جس نے سوشل میڈیا پر مزید ہلچل مچا دی۔

رپورٹس کے مطابق مومنہ اقبال نے الزام عائد کیا تھا کہ ثاقب چدھڑ انہیں ہراساں کر رہے اور دھمکیاں دے رہے ہیں، دونوں ماضی میں ایک دوسرے کے قریب تھے اور شادی کا ارادہ بھی رکھتے تھے، تاہم اداکارہ نے یہ تعلق اُس وقت ختم کر دیا جب انہیں معلوم ہوا کہ ثاقب چدھڑ پہلے سے شادی شدہ ہیں،نجی ٹی وی کے مطابق اس معاملے میں ثاقب چدھڑ کی اہلیہ سمیرہ خان کا کردار بھی سامنے آیا ہے، مومنہ اقبال کی بہن رمشا اقبال کے مطابق سمیرہ خان ہی وہ شخصیت تھیں جنہوں نے مومنہ کو فون کر کے بتایا کہ ثاقب پہلے سے شادی شدہ ہیں، رپورٹس میں دعویٰ کیا گیا ہے کہ اس انکشاف کے بعد مومنہ اقبال نے فوری طور پر تعلق ختم کر دیا تھا، جبکہ بعد ازاں سمیرہ خان اور مومنہ کے درمیان متعدد ویڈیو کالز پر بات چیت بھی ہوئی، ابتداء میں مومنہ اقبال نے سمیرہ خان کے لیے ہمدردی کا اظہار کیا کیونکہ وہ خود کو بھی اسی صورتِ حال کا متاثرہ فریق سمجھتی تھیں، تاہم اب معاملات مزید کشیدہ ہو چکے ہیں،رپورٹس میں یہ بھی کہا گیا ہے کہ سمیرہ خان نے مبینہ طور پر مومنہ اقبال کے سسرال والوں سے بھی رابطہ کیا اور ان کی نئی زندگی متاثر کرنے کی کوشش کی۔

دوسری جانب سوشل میڈیا پر اس معاملے پر مختلف آراء سامنے آ رہی ہیں جبکہ تاحال ثاقب چدھڑ کی جانب سے ان تمام الزامات پر کوئی تفصیلی ردعمل سامنے نہیں آیا ہے،

پاکستانی ڈرامہ نگار خلیل الرحمٰن قمر نے اداکارہ مومنہ اقبال اور ثاقب چدھڑ سے متعلق جاری تنازع پر کھل کر اظہارِ خیال کرتے ہوئے معاشرتی اقدار اور نوجوان نسل کے رویّوں پر تشویش کا اظہار کیا ہے۔

حال ہی میں ایک پوڈکاسٹ گفتگو کے دوران خلیل الرحمٰن قمر نے معاشرے میں بڑھتے ہوئے “لِیو اِن ریلیشن شپ” کلچر پر شدید تنقید کرتے ہوئے کہا کہ اگر یہی طرزِ زندگی معمول بن گیا تو پھر پاکستان کے نام سے “اسلامی جمہوریہ” کا لفظ ہٹا دینا چاہیے۔ ان کا کہنا تھا کہ پاکستانی معاشرہ اسلامی اور خاندانی روایات پر قائم ہے، اس لیے نوجوان نسل کو غلط راستہ دکھانے کے بجائے شادی جیسے مضبوط اور باوقار رشتے کو فروغ دینا ضروری ہے، اس قسم کے تعلقات صرف جذباتی نوعیت کے نہیں ہوتے بلکہ اکثر ان میں مالی مفادات بھی شامل ہوتے ہیں۔ اگر واقعی دونوں افراد کے درمیان کوئی تعلق موجود تھا تو اسے عزت، وقار اور سمجھداری کے ساتھ ختم کیا جانا چاہیے تھا، جبکہ اگر معاملہ مالی لین دین کا تھا تو اسے نجی سطح پر حل کرنا زیادہ مناسب تھا۔

ڈرامہ نگار نے ثاقب چدھڑ پر تنقید کرتے ہوئے کہا کہ اس تنازع میں دونوں فریق برابر کے ذمے دار دکھائی دیتے ہیں اور ذاتی معاملات کو سوشل میڈیا اور عوامی سطح پر لانا غیر سنجیدہ اور بچگانہ رویہ ہے۔

خلیل الرحمٰن قمر نے اس موقع پر شوبز شخصیات کو بھی محتاط رہنے کا مشورہ دیتے ہوئے کہا کہ فنکار معاشرے کے لیے رول ماڈل سمجھے جاتے ہیں، اس لیے انہیں اپنے رویّوں اور نجی معاملات میں ذمہ داری کا مظاہرہ کرنا چاہیے۔

واضح رہے کہ مومنہ اقبال اور ثاقب چدھڑ سے متعلق مبینہ آڈیو اور ویڈیو کلپس سوشل میڈیا پر وائرل ہونے کے بعد یہ معاملہ شوبز انڈسٹری سمیت عوامی حلقوں میں بھی شدید بحث کا موضوع بن گیا تھا، جبکہ مختلف صارفین اس معاملے پر اپنی رائے کا اظہار کر رہے ہیں،مومنہ اقبال نے ہراسانی کا الزام عائد کیا ہے اورثاقب چدھڑ نے مومنہ اقبال کے شوہر کے خلاف درخواست دائر کر رکھی ہے

پاکستانی شوبز انڈسٹری کے اُبھرتے ہوئے اداکار ارسلان بٹ نے ساتھی اداکارہ مامیا شاہ جعفر کو ہراسانی کے الزامات عائد کرنے پر قانونی نوٹس بھجوا دیا۔

ارسلان بٹ نے فوٹو اور ویڈیو شیئرنگ پلیٹ فارم انسٹا گرام پر اپنے آفیشل اکاؤنٹ کے ذریعے قانونی نوٹس کا اسکرین شاٹ شیئر کرتے ہوئے مامیا شاہ جعفر کے الزامات کو جھوٹا اور ہتک آمیز قرار دیا،اداکار نے اپنی پوسٹ کے کیپشن میں لکھا کہ “جھوٹے پر اللّٰہ کی لعنت ہو” جبکہ مزید کہا کہ یہ قانونی نوٹس جھوٹے اور ہتکِ عزت پر مبنی ریمارکس کے خلاف بھیجا گیا ہے،ارسلان بٹ نے خبردار کیا کہ مقررہ مدت کے اندر معافی نہ مانگنے کی صورت میں قانونی کارروائی عمل میں لائی جائے گی۔

واضح رہے کہ چند روز قبل مامیا شاہ جعفر نے ایک پوڈکاسٹ انٹرویو میں ارسلان بٹ پر شوٹنگ کے دوران ہراساں کرنے کا الزام عائد کیا تھا۔ اداکارہ کے مطابق سیٹ پر صلح کی کوشش کے دوران ارسلان بٹ نے انہیں گلے لگانے کی کوشش کی اور انکار پر ناراضی کا اظہار بھی کیا،دوسری جانب ارسلان بٹ نے ان الزامات کو مسترد کرتے ہوئے قانونی راستہ اختیار کر لیا ہے، جبکہ سوشل میڈیا پر اس معاملے پر مختلف آراء کا اظہار کیا جا رہا ہے۔

‎پاکستان شوبز انڈسٹری کی معروف اداکارہ مومنہ اقبال نے حمزہ حبیب کے ساتھ نکاح کر لیا ہے، جس کی تصدیق خود حمزہ حبیب نے میڈیا سے گفتگو کرتے ہوئے کی۔
‎لاہور ہائیکورٹ میں پیشی کے موقع پر حمزہ حبیب نے کہا کہ وہ مومنہ اقبال کے صرف منگیتر نہیں بلکہ شوہر بن چکے ہیں کیونکہ ان کا نکاح دو روز قبل انجام پا چکا ہے۔
‎حمزہ حبیب نے گفتگو کے دوران کہا کہ “الحمدللہ مومنہ اقبال اب میری قانونی بیوی ہیں”۔
‎دوسری جانب لاہور ہائیکورٹ نے حمزہ حبیب کی حفاظتی ضمانت منظور کرتے ہوئے انہیں یکم جون تک متعلقہ عدالت سے رجوع کرنے کی ہدایت جاری کی ہے۔
‎رپورٹس کے مطابق جھنگ پولیس نے حمزہ حبیب کے خلاف ثاقب چڈھر نامی شخص کو جان سے مارنے کی دھمکیاں دینے کے الزام میں مقدمہ درج کر رکھا ہے۔
‎عدالت میں میڈیا سے گفتگو کرتے ہوئے حمزہ حبیب نے مقدمے کو جھوٹا اور بے بنیاد قرار دیتے ہوئے کہا کہ ان کے خلاف سیاسی بنیادوں پر کیس بنایا گیا ہے۔
‎انہوں نے کہا کہ ثاقب چڈھر نے مقدمہ درج کروانے سے پہلے ان سے رابطہ کرنے کی کوشش کی تھی۔
‎حمزہ حبیب نے مزید دعویٰ کیا کہ انہیں مومنہ اقبال سے علیحدگی اختیار کرنے کے بدلے مالی لالچ بھی دی گئی۔
‎انہوں نے کہا کہ “مجھے کہا گیا کہ مومنہ اقبال سے پیچھے ہٹ جاؤ، تمہیں بہت دولت دی جائے گی”۔
‎یاد رہے کہ مومنہ اقبال حالیہ دنوں ذاتی زندگی سے متعلق خبروں کے باعث سوشل میڈیا اور شوبز حلقوں میں توجہ کا مرکز بنی ہوئی ہیں۔