Category: شوبز

اداکارہ مومنہ اقبال نے پاکستان مسلم لیگ (ن) کے رکن پنجاب اسمبلی ثاقب چدھڑ کے خلاف ہراسانی کی شکایت پر قومی سائبر کرائم انویسٹی گیشن ایجنسی کو باضابطہ طور پر ڈیجیٹل شواہد فراہم کر دیے ہیں۔ سوشل میڈیا پر اداکارہ کی عوامی اپیل کے بعد ایجنسی نے انکوائری کا باقاعدہ آغاز کر دیا ہے۔

اداکارہ کے وکیل کی این سی سی آئی اے کو پیش کردہ تفصیلات کے مطابق یہ تنازع ایک دیرینہ ذاتی معاملے سے جڑا ہے۔ مبینہ طور پر ایم پی اے ثاقب چدھڑ نے 2022 میں اداکارہ کو اپنی تیسری بیوی بننے کے لیے شادی کا باضابطہ پیغام بھیجا۔ رکن اسمبلی کی ازدواجی حیثیت معلوم ہونے پر اداکارہ نے رابطہ ختم کردیا،تاہم مبینہ طور پر ہراسانی کا سلسلہ تب شروع ہوا جب اداکارہ کی کسی اور سے منگنی کا اعلان ہوا،اداکارہ کے وکیل کی جانب سے چیٹ ہسٹری، ڈیجیٹل ریکارڈ اور مبینہ طور پر دھمکی آمیز پیغامات تفتیشی حکام کے حوالے کیے گئے ہیں،مومنہ اقبال نے کئی گھنٹوں تک اپنا بیان تفتیشی حکام کو ریکارڈ کروایا جبکہ ایم پی اے ثاقب چدھڑ بھی این سی سی آئی اے میں پیش ہوئے،این سی سی آئی اے کی تفتیشی ٹیم شواہد کا جائزہ لے رہی ہے۔ دھمکیوں اور سائبر ہراسانی کے الزامات ثابت ہونے پر معاملہ فوجداری کارروائی کے لیے پولیس کو بھیج دیا جائے گا۔

واضح رہے کہ اداکارہ مومنہ اقبال نے سوشل میڈیا پر بیانات میں کہا تھا انہیں اور ان کے اہل خانہ کو حکمران جماعت کے ایک رکن اسمبلی کی جانب سے طویل عرصے سے آن لائن ہراسانی اور جان سے مارنے کی دھمکیوں کا سامنا ہے،بیان میں کہا گیا کہ ملزم کے سیاسی اثر و رسوخ کی وجہ سے ایف آئی اے، پنجاب پولیس اور این سی سی آئی اے نے ان کی درخواستوں پر توجہ نہیں دی، تاہم سوشل میڈیا پر پوسٹس وائرل ہونے کے بعد ان کی شکایات پر کارروائی کا آغاز ہوا ہے۔

پاکستانی شوبز انڈسٹری کی معروف اداکارہ مومنہ اقبال کی شادی کی تاریخ سامنے آ گئی ہے

گزشتہ کچھ دنوں سے سوشل میڈیا پر مومنہ اقبال کی شادی کی خبریں گردش کر رہی تھیں اور اب اداکارہ کی بہن رمشا اقبال نے ان خبروں کی تصدیق کر دی ہے،شادی سے قبل اداکارہ مومنہ اقبال اس وقت اپنی زندگی کے ایک مشکل وقت کا سامنا کر رہی ہیں اور حال ہی میں انہوں نے انکشاف کیا ہے کہ ایک بااثر سیاسی شخصیت کی جانب سے اُنہیں اور ان کی فیملی کو جان سے مارنے کی دھمکیاں دی جا رہی ہیں،مومنہ اقبال نے اس حوالے سے ایک انسٹا اسٹوری بھی شیئر کی تھی جس کے بعد محکمۂ پولیس نے فوری کارروائی کی اور اب امید ہے کہ یہ معاملہ جلد حل ہو جائے گا۔

مومنہ اقبال کے کیس کی پیروی ان کی بہن رمشا اقبال کر رہی ہیں جو کہ پیشے سے وکیل ہیں،حال ہی میں رمشا اقبال نے کیس میں ہونے والی پیشرفت کے حوالے سے میڈیا سے بات کرتے ہوئے اداکارہ کی شادی کے بارے میں بھی بتایا اور کہا کہ کیس میں کارروائی کے دوران جواب مثبت تھا، حمایت کرنے پر میڈیا کا شکریہ، ہم نے تمام ثبوت فراہم کر دیے ہیں، ایم پی اے کو بھی بلایا گیا ہے، ہم اس معاملے کو میڈیا پر زیادہ اجاگر نہیں کرنا چاہتے، ہم نے مشکلات کا سامنا کیا لیکن حمایت بھی حاصل ہوئی اور حکومت کی طرف سے سیکیورٹی بھی ملی،مومنہ اقبال کے سسرال والوں کو بھی سیکیورٹی فراہم کی گئی، کیونکہ اُنہیں بھی دھمکیاں دی گئی ہیں، مومنہ کی شادی محمد حمزہ حبیبی سے ہو رہی ہے اور نکاح یکم جون کو ہو گا، یہ شادی خاندان کی رضا مندی سے طے ہوئی ہے اور مومنہ کے ہونے والے شوہر ہمارے رشتے دار نہیں ہیں،مومنہ اقبال کا کیس میں لڑوں گی، میں نے بیرونِ ملک سے وکالت کی ڈگری مکمل کی ہے اور مجھے پاکستان میں قانون کا تجربہ بھی ہے۔

‎بھارتی اداکارہ اور سیاستدان کنگنا رناوت نے بھارت میں جہیز کے مطالبات اور شادی شدہ خواتین پر بڑھتے تشدد کے واقعات پر تشویش کا اظہار کرتے ہوئے خواتین کو شادی سے پہلے مالی اور پیشہ ورانہ طور پر خودمختار بننے کا مشورہ دیا ہے۔
‎کنگنا رناوت نے انسٹاگرام اسٹوری میں لکھا کہ روزانہ ایسی افسوسناک خبریں سامنے آتی ہیں جن میں نوجوان اور تعلیم یافتہ خواتین شادی کے بعد ظلم، ہراسانی اور ذہنی دباؤ کا شکار ہو رہی ہیں۔ انہوں نے کہا کہ کئی لڑکیاں اپنے والدین سے مدد کی اپیل کرتی ہیں لیکن معاشرے میں اکثر شادی شدہ بیٹیوں کو واپس قبول نہیں کیا جاتا، جس کے باعث وہ شدید مشکلات کا سامنا کرتی ہیں۔
‎اداکارہ نے نوجوان خواتین کو مخاطب کرتے ہوئے کہا کہ سوشل میڈیا، فیشن، میک اپ اور ویڈنگ انڈسٹری کبھی یہ نہیں بتاتی کہ زندگی میں سب سے اہم چیز عورت کی اپنی شناخت اور کیرئیر ہے۔ انہوں نے کہا کہ خواتین کو پہلے خودمختار بننا چاہیے اور اس کے بعد ہی شادی کے فیصلے پر غور کرنا چاہیے۔
‎کنگنا رناوت نے مزید کہا کہ خواتین کو اپنی زندگی کی ہیرو خود بننا ہوگا کیونکہ مشکل وقت میں کوئی دوسرا انہیں بچانے نہیں آئے گا۔ ان کے مطابق عورت کی اصل پہچان اس کے کام، قابلیت اور شخصیت سے ہونی چاہیے نہ کہ صرف اس کی شادی سے۔
‎اداکارہ کا یہ بیان ایک ایسے وقت میں سامنے آیا ہے جب بھارت میں جہیز کے تنازعات اور شادی شدہ خواتین پر تشدد کے واقعات مسلسل خبروں کا حصہ بن رہے ہیں۔ حال ہی میں نوئیڈا سے تعلق رکھنے والی 33 سالہ اداکارہ تویشا شرما بھوپال میں اپنے شوہر کے گھر مردہ پائی گئی تھیں۔ پولیس نے تویشا شرما کے شوہر اور ساس کے خلاف جہیز کے لیے ہراسانی اور خودکشی پر اکسانے کا مقدمہ درج کر لیا ہے۔

پنجاب کے رکنِ صوبائی اسمبلی ثاقب چدھڑ اور اداکارہ مومنہ اقبال کے درمیان مبینہ ہراسانی اور دھمکیوں کا معاملہ مزید سنگین صورت اختیار کر گیا ہے، جہاں نیشنل سائبر کرائم انویسٹی گیشن ایجنسی (این سی سی آئی اے) نے اداکارہ کی درخواست پر فریقین کو آج طلب کر لیا ہے۔ دوسری جانب متعلقہ ایم پی اے کی جانب سے بھی اپنے آبائی ضلع میں نامعلوم افراد کے خلاف دھمکیوں کا مقدمہ درج کروایا گیا ہے۔

میڈیا رپورٹس کے مطابق اداکارہ مومنہ اقبال نے اپنی درخواست میں الزام عائد کیا تھا کہ انہیں ایک بااثر سیاسی شخصیت کی جانب سے طویل عرصے سے آن لائن ہراسانی، سائبر بُلنگ، ذہنی دباؤ اور جان سے مارنے کی دھمکیوں کا سامنا ہے۔ اداکارہ نے سوشل میڈیا پلیٹ فارم انسٹاگرام پر جاری اپنے تفصیلی بیان میں کہا تھا کہ انہوں نے اس معاملے پر متعدد بار این سی سی آئی اے، ایف آئی اے اور پنجاب پولیس سے رجوع کیا، تاہم مبینہ سیاسی اثر و رسوخ کے باعث کارروائی نہ ہو سکی۔مومنہ اقبال کا کہنا تھا کہ انصاف فراہم کرنے کے بجائے انہیں حوصلہ شکنی کا سامنا کرنا پڑا جبکہ ان کے اہلخانہ کو بھی سنگین خطرات لاحق ہیں۔ انہوں نے وزیر اعلیٰ پنجاب مریم نواز سمیت متعلقہ حکام سے مطالبہ کیا کہ معاملے کی شفاف اور غیرجانبدارانہ تحقیقات کی جائیں اور ان کے خاندان کو فوری تحفظ فراہم کیا جائے۔

اداکارہ نے اپنی سوشل میڈیا پوسٹس میں اعلیٰ حکام، اہم سرکاری دفاتر، نیوز چینلز اور مختلف میڈیا پلیٹ فارمز کو بھی ٹیگ کیا۔ بعد ازاں ایک اور انسٹاگرام اسٹوری میں مومنہ اقبال نے این سی سی آئی اے کی جانب سے کارروائی شروع کیے جانے پر مریم نواز کا شکریہ ادا کرتے ہوئے کہا کہ ان کا باضابطہ بیان ریکارڈ ہونے سے قبل کسی پر الزام عائد نہ کیا جائے اور نہ ہی کسی کا نام لیا جائے۔

اداکارہ نے مزید دعویٰ کیا کہ انہیں دیگر خواتین کے بھی پیغامات موصول ہو رہے ہیں جنہوں نے اسی ایم پی اے کی جانب سے مبینہ ہراسانی کا الزام لگایا ہے۔ دوسری طرف مذکورہ ایم پی اے کی جانب سے بھی اپنے کزن کی مدعیت میں نامعلوم افراد کے خلاف دھمکیوں کا مقدمہ درج کروا دیا گیا ہے، جس کے بعد معاملہ مزید پیچیدہ ہوگیا ہے۔

‎پاکستان شوبز انڈسٹری کی معروف اداکارہ مومنہ اقبال نے دعویٰ کیا ہے کہ انہیں ایک بااثر شخصیت کی جانب سے مسلسل ہراساں کیا جا رہا ہے اور جان سے مارنے کی دھمکیاں دی جا رہی ہیں۔
‎اداکارہ نے فوٹو اور ویڈیو شیئرنگ ایپ انسٹاگرام پر ایک تفصیلی پوسٹ شیئر کرتے ہوئے اعلیٰ حکام سے فوری کارروائی اور تحفظ فراہم کرنے کا مطالبہ کیا۔
‎مومنہ اقبال کے مطابق انہیں کافی عرصے سے آن لائن ہراسانی، سائبر بُلنگ، ذہنی اذیت اور دھمکیوں کا سامنا ہے۔
‎انہوں نے دعویٰ کیا کہ این سی سی آئی اے، ایف آئی اے اور پنجاب پولیس کو متعدد بار شکایات درج کروانے کے باوجود مطلوبہ شخص کے سیاسی اثر و رسوخ کے باعث مؤثر کارروائی نہیں کی گئی۔
‎اداکارہ نے اپنی انسٹاگرام اسٹوری میں لکھا کہ قانونی مدد فراہم کرنے کے بجائے انہیں حوصلہ شکنی کا سامنا کرنا پڑا جبکہ ان کے خاندان کو بھی شدید خطرات لاحق ہیں۔
‎مومنہ اقبال نے متعلقہ اداروں سے اپیل کی کہ معاملے کی غیر جانبدارانہ تحقیقات کی جائیں اور ان کے اہل خانہ کو سیکیورٹی فراہم کی جائے۔
‎انہوں نے کہا کہ انہیں امید ہے کہ اعلیٰ حکام اختیارات کے ناجائز استعمال اور انصاف میں رکاوٹ ڈالنے والے افراد کے خلاف قانون کے مطابق کارروائی کریں گے۔
‎اداکارہ نے اپنی پوسٹ میں مختلف سرکاری اداروں، نیوز چینلز اور میڈیا پورٹلز کو بھی ٹیگ کیا۔
‎سوشل میڈیا پر صارفین کی بڑی تعداد اداکارہ کے حق میں سامنے آ گئی ہے اور سیاسی شخصیات و حکام سے فوری ایکشن لینے کا مطالبہ کر رہی ہے۔