Category: شوبز

کرینہ کپور خان کا شمار بالی وڈ کی حسین اداکارائوں میں ہوتا ہے وہ اپنی خوبصورت تصویروں سے سب کو دنگ کرنے میں کبھی ناکام نہیں ہوتیں۔ اداکارہ کو حال ہی میں عامر خان کے ساتھ لال سنگھ چڈھا میں دیکھا گیا تھا۔ اگرچہ اس فلم نے باکس آفس پر اچھا بزنس نہیں کیا لیکن ان کی اداکاری کو سراہا گیا۔ کرینہ کپور کو بیبو بھی کہا جاتا ہے بیبو نے حال ہی میں ایک انٹرویو دیا ہے اس میں انہوں نے کہا ہے کہ ان کے دونوں بیٹے تیمور علی خان اور جہانگیر علی خان بہت شرارتی ہیں۔ تیمور علی خان کے بارے میں بات کرتے ہوئے، بیبو نے طنز کیا کہ وہ اپنی عمر سے بہت آگے ہیں اور سمجھتے ہیں کہ ان کے والدین ہر وقت مصروف رہتے ہیں ان کو وقت نہیں دے پاتے انہوں نے کہا کہ میں چاہتی ہوں کہ میرے بچے یہ

سمجھیں کہ ان کے والدین انہی کی بہتر طرز زندگی کے لئے کام کررہے ہیں اس لئے ہو سکتا ہے وہ ہر وقت ان کو وقت نہ دے سکیں.کرینہ کپور نے کہا کہ میں تب سے کام پر جا رہی ہوں جب میرا بیٹا تیمور سات مہینوں کا تھا. کرینہ کپور خان نے مزید کہا کہ وہ اپنے دونوں بیٹوں کی بہترین تربیت کرنا چاہتی ہیں. انہوں نے یہ بھی انکشاف کیا کہ تیمور اپنے والد سیف علی خان کے قریب ہیں .باپ بیٹے کی جوڑی ایک ساتھ فلمیں بھی دیکھتی ہے اور تیمور اپنے باپ جیسا بننا چاہتا ہے۔

پاکستان کی نئی نسل کی نمائندہ گلوکارہ آئمہ بیگ کو بہت پسند کیا جاتا ہے ان کی خوبصورت آواز میں گائے ہوئے گانے پاکستان کی نامور ہیروئنز پر پکچرائز ہو چکے ہیں. آئمہ بیگ نے کم عمری میں گلوکاری کا آغاز کیا. انہیں متعدد ایوارڈز سے بھی نوازا جا چکا ہے. آئمہ بیگ نہ صرف بہترین گلوکارہ ہیں بلکہ خوبصورت شکل و صورت بھی رکھتی ہیں اور خوبصورت ڈانس بھی کرلیتی ہیں. ان کی سوشل میڈیا پر ایک وڈیو وائرل ہو رہی ہے جس میں وہ ڈانس کرتی دکھائی دے رہی ہیں . یہ وڈیو ان کے نئے گانے کی ہے جس کے لئے وہ ریہرسل کررہی ہیں. گانا ابھی منظر عام پر نہیں آیا آئمہ خود اس وڈیو میں نظر آئیں گی اسلئے وہ ڈانس کی ریہرسل بھی کررہی ہیں. ان کے مداح نہ صرف ان کے گانے کی ریلیز کا

انتظارکررہے ہیں بلکہ ان کی اس گانے کی وڈیو ریلیز کے بھی منتظر ہیں. یاد رہے کہ آئمہ بیگ کو متعدد مرتبہ اداکاری کی آفر ہو چکی ہیں لیکن ان کی اولین ترجیح میوزک ہےاس لئے انہوں نے اداکاری کی آفرز کو رد کر دیا.آئمہ بیگ کے بارے میں یہ بھی اطلاعات ہیں کہ ان کی شہباز شگری کے ساتھ منگنی کا رشتہ اختتام پذیر ہو چکا ہے تاہم دونوں کی طرف سے ابھی اس حوالے سے کوئی تردید یا تصدیق نہیں کی گئی.

پاکستان میں سیلاب نے جو تباہی مچائی ہے اس نے ہر کسی کا دل دہلا دیا ہے. پاکستانی اپنے بہن بھائیوں کے اس مشکل وقت میں جہاں ان کے ساتھ کھڑے ہیں وہیں پاکستان کے دوست ممالک بھی ساتھ کھڑے ہیں. اداکار و پرڈیوسر ہمایوں سعید نے ایک وڈیو پیغام کے زریعے اپنے مداحوں سے اپیل کی ہے کہ وہ سیلاب زدگان کی زیادہ سے زیادہ مدد کریں. ہمایوں سعید نے مزید یہ بھی کہاکہ سیلاب نے پاکستان میں بڑے پیمانے پر تباہی مچائی ہے سینکڑوں جانیں موت کے منہ میں چلی گئی ہیں ، 33 ملین سے زیادہ لوگ متاثر ہوئے ہیں. اس سخت وقت میں جہاں پاکستانی اپنے بہن بھائیوں کی مدد کررہے ہیں وہیں ہمارا ہمسایہ ملک یو اے ای بھی پاکستان کی مدد کررہا ہے اس نے بڑے پیمانے پر فوڈ ،میڈیسن اور شیلٹرز پاکستان میں بھجوائے

ہیں. ہمایوں سعید نے کہا کہ میں دنیا کے باقی ممالک سے بھی یہی توقع کرتا ہوں کہ وہ اس کڑے وقت میں پاکستان کی مدد کریں گے. انہوں نے اس وڈیو پیغام میں یہ بھی کہا کہ جو کوئی بھی سیلاب زدگان کی مدد کررہا ہے وہ بہت اچھا کررہا ہے لیکن ان سب کو چاہیے کہ وہ اپنے اردگرد کے لوگوں‌کو بھی متحرک کریں کہ وہ سیلاب زدگان کو نہ بھولیں ان کی مدد کریں. لوگ بے یارومددگار ہیں زمینی راستے کٹ چکے ہیں کئی علاقے ایسے ہیں جہاں جانا اور ضرورت کی چیزیں پہنچانا کسی امتحان سے کم نہیں‌ ہے.

فلم ضرار جس کا پہلا ٹریلر آج سے چار برس پہلے ریلیز کیا گیاتھا لیکن ریلیز ہونے میں چار سال لگ گئے. شائقین جو کہ اس فلم کی ریلیز کے لئے کافی پرجوش تھے ان کے لئے خوشخبری ہے کہ انکا انتظار ختم ہونے کو ہے کیونکہ فلم کی ریلیز کی فائنل ڈیٹ 29 ستمبر طے کر لی گئی ہے. ایکشن، تھرلر اس فلم کی کاسٹ میں شان شاہد، کرن ملک، ندیم بیگ،رشید ناز،شفقت چیمہ اور نئیر اعجاز سمیت دیگر فنکاروں کے نام قابل زکر ہیں۔ فلم کی نمائش ڈسٹری بیوشن کلب کے اشتراک سے ملک بھر کے سینماؤں میں کی جارہی ہے۔ شان شاہد نے خود اس فلم کو لکھا ہے اور ڈائریکٹ بھی کیا ہے، شان کا کہنا ہے کہ فلم شائقین کو پسند آئیگی. ڈسٹری بیوشن کلب کے ایگزیکٹو ڈائریکٹر شیخ عابد کہتے ہیں‌کہ ”ضرار“ ایک منفرد موضوع کی حامل

ہے جس میں شان نے بطور رائٹر، اداکار اور ڈائریکٹر اپنی صلاحیتوں کا جادو جگایا ہے اور اپنے سالہا سال کے تجربے کو استعمال کرتے ہوئے ایک معیاری فلم تیار ہے جو شائقین کو معیاری تفریح فراہم کرکے سینما انڈسٹری کی ترویج کے عمل کو مزید تیز کرے گی. یاد رہے کہ شان شاہد کی ڈائریکشن میں بننے والی اس فلم کو لیکر شان شاہد کافی پرجوش ہیں ان کا کہنا ہے کہ انہوں نے اس فلم کو منفرد انداز سے لکھا اور بنایا شائقین نے ایسی فلم یقینا پہلے کبھی پاکستانی سینما میں نہیں دیکھی ہوگی

لال سنگھ چڈھا جس سے عامر خان کو بے انتہا امیدیں وابستہ تھیں ہندوستان میں یہ فلم 11 اگست کو سینما گھروں کی زینت بنی، ساتھ ہی دنیا کے مختلف ممالک میں بھی ریلیز ہوئی. ہندوستان میں تو یہ فلم بائیکاٹ کے ٹرینڈ کی نذر ہوئی گئی لیکن دنیا کے دیگر ملکوں میں اس فلم نے اچھا بزنس کیا. فلم بنیادی طور پر ہالی وڈ کی فلم فارسٹ گمپ کا ری میک ہے. جنہوں نے فلم دیکھی ہے ان کا ماننا ہےکہ فلم اس معیار کی نہیں تھی جس کی توقع کی جا رہی تھی. کہا جاتا ہے کہ فلم پر سب سے زیادہ بائیکاٹ ٹرینڈ اثر انداز ہوا ہندوستانی سینما گھروں کے بعد اب لال سنگھ چڈھا نیٹ فلیکس پر بھی دستیاب ہو گی. نیٹ‌فلیکس پر چونکہ آج کل فلمیں دیکھنے کا خاصا رواج ہے اس لئے اب اس فلم کو اس پلیٹ‌فارم پر ریلیز کرنے

کا پلان بنایا گیا ہے. فلم آرگنائزر کا خیال ہے کہ انڈین باکس آفس پر ناکامی کے بعد فلم کو جلد از جلد اسٹریمنگ سروس پر ریلیز کردینا چاہئے تاکہ مزید خسارے سے بچا جاسکے۔عامر خان اس فلم کے فلاپ ہونے پر کافی رنجیدہ ہیں اور ان کو خاصا نقصان بھی ہوا ہے. عامر خان نے فلم دیکھنے کےلئے ٹام ہینکس تک کو دعوت دی تھی اور پرموشنز بھی جم کر کیں تھیں لیکن فلم ہندوستان میں اچھا بزنس نہ کر سکی. تاہم اب اسے نیٹ فلیکس پر ریلیز کیا جا رہا ہے.

بالی ووڈ اداکارہ عالیہ بھٹ جن کی جمعہ کے روز فلم برہمسٹرا ریلیز ہو رہی ہے ان کے حوالے سے ایک خبر یہ ہے کہ ان کے انسٹاگرام پرفالورز کی تعداد 70 ملین ہو گئی ہے اور اس دوڑ میں انہوں نے دیپیکا پاڈوکون اور کترینہ کیف کو پیچھے چھوڑ‌دیا ہے. یوں عالیہ بھٹ بھارتی اداکارہ پریانکا چوپڑا کے بعد دوسری سب سے زیادہ فالو کی جانے والی بالی وڈ اداکارہ بن گئی ہیں، پریانکا چوپڑہ کے انسٹاگرام پر 82 ملین کے قریب فالورز ہیں . دیپیکا پڈوکون 68.8 جبکہ کترینہ 66.7 فالورز ہیں. مجموعی طور پر دیکھیں تو یہ سال عالیہ بھٹ کے کافی لکی ثابت ہوا ہے اس سال ان کی فلم گنگوبائی کاٹھیواڑی ریلیز ہوئی جس نے کامیابی کے ریکارڈز قائم کئے اور ساتھ ہی ساتھ انہوں نے یہ ثابت کیا کہ وہ باصلاحیت اداکارہ ہیں اور

مشکل سے مشکل کردار بھی باآسانی کر سکتی ہیں. اس فلم کے بعد عالیہ بھٹ کا شمار بالی وڈ کی ان اداکارائوں میں ہونے لگا ہے جنہوں نے ہندی سینما کے لئے شاندار کام کیا. اسی سال عالیہ بھٹ کی فلم ڈارلنگز بھی ریلیز ہوئی اس فلم میں نہ صرف انہوں نے کام کیا بلکہ اس کو پرڈیوس بھی کیا اور یہ فلم بھی کامیاب رہی. اسی سال عالیہ بھٹ نے اپنی زندگی کا ایک نیا سفر بھی شروع کیا انکی شادی رنبیر کپور کے ساتھ ہوئی. یاد رہے کہ ان کی فلم براہمسٹرا بھی بائیکاٹ کے ٹرینڈ کی زد میں ہے دیکھنا یہ ہے کہ بائیکاٹ کا یہ ٹرینڈ فلم کے بزنس پر کتنا اثر انداز ہوتا ہے.

بالی وڈ اداکارہ عالیہ بھٹ کا شمار بھارتی سنیما کی سب سے زیادہ پسند کی جانے والی اداکاراؤں میں ہوتا ہے جو فلمی بزنس میں ایک دہائی مکمل کرنے والی ہیں۔ انہوں نے کرن جوہر کی ہدایت کاری میں بننے والی اسٹوڈنٹ آف دی ایئر سے ڈیبیو کیا جس میں عالیہ سدھارتھ ملہوترا اور ورون دھون کے ساتھ اداکاری کرتی دکھائی دیں.اس کے بعد انہوں نے آہستہ آہستہ وہ 2 اسٹیٹس، ہائی وے، اڑتا پنجاب، ڈیئر زندگی، رازی، گلی بوائے گنگو بائی کاٹھیواڑی میں اپنی صلاحیتوں کا لوہا منوایا.عالیہ اب صرف اداکارہ نہیں ہیں بلکہ پرڈیوسر بھی ہیں ان کی بطور پرڈیوسر فلم ڈارلنگز حال ہی میں ریلیز ہوئی ہے. عالیہ ایسی اداکارہ ہیں جنہوں نے اپنے کیرئر میں زیادہ تر کامیابی کا مزہ ہی چکھا ہے. عالیہ نے حال ہی میں ایک

انٹرویو دیا ہے اور بتایا ہے کہ جب ان کی پہلی ناکام ہوئی تو انہوں نے کیا کیا. عالیہ نے کہا کہ ان کی فلم ”شاندار” جب ناکامی سے دوچار ہوئی تو مجھے ایک جھٹکا لگا اور مجھے یقین ہی نہیں آرہا تھا کہ میری فلم ناکام ہو گئی ہے. فلم کی ناکامی کا سن کر میرا دل ٹوٹا ہوا تھا اس دوران میرے والد واحد وہ شخص تھے جن کے ساتھ میں نے اپنی تکلیف شئیر کی اور اس فلم کی ناکامی کا دکھ منانے کےلئے والد کے ساتھ چھٹیوں پر چلی گئی اس دوران کوئی کام نہ کیا . یہ میرے کیرئیر کی پہلی فلم تھی جو ناکام ہوئی تھی لیکن اس کے بعد میں نے خود کو سمجھایا کہ کام کروں گی تو کبھی کامیابی ملے گی اور کبھی نہیں.

اداکار سے فلمساز بنے راکیش روشن نے بالی ووڈ کی حالیہ فلموں کی باکس آفس پر ناکامی کی وجہ پر بات کی ہے انہوں نے فلم سازوں کی طرف سے موضوعات کے انتخاب پر سوال اٹھانے کے علاوہ، اس بات پر بھی افسوس کا اظہار کیا کہ گانوں اور میوزک میں ہم کس طرح‌سے پیچھے رہ گئے ہیں. اگرچہ پورا بالی وڈ یہ سمجھتا ہے کہ بائیکاٹ کے کلچر نے بالی وڈ کو بہت نقصان پہنچایا ہے لیکن راکیش روشن زرا اس سے مختلف خیال رکھتے ہیں ان کا کہنا ہے کہ ” اگر فلم اچھی بنی ہو تو یقینا وہ چلے گی”. راکیش روشن نے اپنے ایک حالیہ انٹرویو میں کہا ہےکہ اس وقت جو فلمیں بن رہی ہیں ان کی کہانیوں میں لوگوں‌کو دلچسپی نہیں ہے. ایسی فلمیں نہیں بن رہیں جنہیں لوگ پسند کریں اور دیوانہ وار جا کر سینما گھروں میں

دیکھیں. راکیش روشن نے اس بات پر زور دیتے ہوئے کہا کہ ماضی میں کس طرح سے گانوں نے فلموں‌ کی کامیابی میں اہم کردار ادا کیا. یاد رہے کہ راکیش روشن نے اپنے بیٹے ہرتیک روشن کو اپنی ہی ڈائریکٹ کردہ فلم کہو نہ پیار سے ہے لائچ کیا یہ فلم بہت بڑی ہٹ ثابت ہوئی اور ہرتیک روشن راتوں رات سٹار بن گئے. راکیش روشن نے کرش جیسی فلمیں بھی بنائیں. راکیش روشن بالی وڈ کے ایک کامیاب فلمساز مانے جاتے ہیں.