Category: شوبز

سرمد سلطان کھوسٹ کی فلم ‘کملی’ کا گزشتہ شب لاہور میں پریمئیر کیا گیا،پریمئیر میں فلم کی کاسٹ،صبا قمر، ثانیہ سعید، عمیر رانا،حمزہ خواجہ کے علاوہ ثمینہ احمد، انجمن، گوری، عفت عمر، سبیکا امام، راشد محمود، مسرت مصباح، خاور ریاض، افتخار،عرفان کھوسٹ ٹھاکر،عائشہ عمر، نمرہ بُچہ، مایا علی، اسما عباس ، سیمی راحیل،فصیح باری خان، ساجی گل، کاشف نثار ودیگر نے شرکت کی،سوا دو گھنٹے کی یہ فلم سب نے دیکھی اور سینما ہال سے باہر نکلتے ہی تعریفوں کے ہل باندھ دئیے، فلم میں صبا قمراور ثانیہ سعید کی اداکاری کو سراہا گیا بلکہ فلم ختم ہوئی تو شائقین نے تالیاں بجا کر کملی کی ٹیم کو داد دی۔ فلم کے تمام گیت نہایت ہی خوبصورت ہیں لیکن عاطف اسلم اور ریشماں کے گیتوں نے تو جیسے میلہ ہی لوٹ لیا۔

ایک عرصے کے بعد بڑی سکرین پہ ریشماں کی آواز سن کر بہت اچھا لگا. پرئیمیر میں صبا قمر کی والدہ اور بہن بھی موجود تھیں۔ فلم دیکھ کر نکلنے والے زیادہ تر شائقین کا یہی کہنا تھا کہ ایسی فلمیں پاکستان میں نہ ہونہ ہونے کے برابر بنتی ہیں۔ فلم کو بیک وقت دو ہالز میں چلایا گیا۔ یاد رہے کہ کملی تین جون کو سینما گھروں کی زینت بن رہی ہے اور سرمد کھوسٹ کی فلم ”جوائے لینڈ” کو حال ہی میں کانز فلم فیسیٹیول میں جیوری ایوراڈ ملا ہے یہ ایوارڈ سرمد کے ساتھ ساتھ پوری شوبز انڈسٹری بلکہ پاکستانیوں کے لئے فخر کی بات ہے۔ سرمد کھوسٹ کا اس حوالے سے کہنا تھا کہ جوائے لینڈ کی کامیابی ہم سب کی کامیابی ہے.

ریاض الرحمان ساغر نہ صرف شاعر تھے بلکہ کالم نگار، سکرپٹ رائٹر اور فلمی گیت نگار بھی تھے انہوں نے کالمز بھی لکھے،وہ پہلے کالم نویس تھے جنہوں نے نظم یا گیت کی شکل میں کالم لکھے۔ 1996ء میں ان کا پہلا کالم’’ عرض کیا ہے‘‘ کے عنوان سے شائع ہوا۔ اس کالم میں سماجی، سیاسی اور ثقافتی مسائل کو اجاگر کیا گیا تھا۔ انہوں نے جس شعبے میں بھی قسمت آزمائی انہیں بے پناہ کامیابی حاصل ہوئی۔ان کے لکھے ہوئے گیت نامور گلوکاروں نے گائے،ان کے گیتوں کو انکی لازوال شاعری کی وجہ سے آج بھی یاد کیا جاتا ہے .ریاض الرحمان ساگر نے جو گیت لکھے اس حوالے سے ایک کتاب ”میں نے گیت لکھے ” کے نام سے شائع ہوئی۔ ریاض الرحمان ساغر نے فلم ”عشق خدا” کے لیے اپنا آخری گیت لکھا تھا. انہوں نے شباب کیرانوی کے ساتھ بہت کام کیا۔ ریاض الرحمان ساغر طویل عرصے تک اردو اخبار ’نوائے وقت‘ کے پہلے شوبز رپورٹر اور پھر شوبز ایڈیٹر بھی رہے۔ وہ پاکستان فلم سنسر بورڈ کے رکن بھی رہے تھے۔وہ اپنے آپ کو قتیل شفائی کا شاگرد کہتے تھے۔امجد اسلام امجد نے اپنے ایک انٹرویو میں کہا تھا کہ ریاض الرحمان ساغر کا شمار ستر کی دہائی کے بعد کے ایسے معروف فلمی شاعروں میں ہوتا ہے جنہوں نے فلمی صنعت کے زوال کے باوجود اچھی شاعری کی تخلیق جاری رکھی۔
وہ کینسر کے مرض کا شکار ہو کر یکم جون 2013 کو دنیائے فانی سے رخصت ہو گئے۔ریاض الرحمن ساغر کی گراں قدرخدمات پرانہیں نیشنل فلم ایوارڈ، پی ٹی وی ایوارڈ، کلچرل گریجوایٹ ایوارڈ، نگار ایوارڈ اور بولان ایوارڈ سے نوازا گیا۔

چھوٹی سکرین کی خوبصورت اداکارہ سحرخان خود کی شکل ایک ایسی اداکارہ سے ملاتی ہیں جن کو عوامی سطح پر بہت زیادہ پذیرائی حاصل ہے اور وہ اداکارہ ہیں سجل علی، سحر خان کہتی ہیں کہ ان کی شکل سجل علی سے بہت زیادہ ملتی ہے اور یہی وجہ ہے کہ وہ شوبز انڈسٹری میں بھی آئیں. سجل کہتی ہیں کہ میرے ارد گرد کے لوگ بھی مجھے ایسا کہتے تھے جس کے بعد مجھے بھی لگا کہ میری شکل شاید ان سے ملتی ہے. سحر خان نے تو خود ہی بول دیا کہ ان کی شکل سجل علی سے ملتی ہے لیکن بہت ساری ایسی اداکارائیں ہیں‌ جن کی شکل دوسری ہیروئینز کے ساتھ ملائی جاتی ہیں جیسے رمشا خان کی شکل بھارتی اداکارہ انوشکا شرما سے ملائی جاتی ہے جبکہ نوشین شاہ کی شکل کرینہ کپور کے ساتھ ملائی جاتی ہے.اسی طرح یشما گل سری دیوی کی طرح لُک دیتی ہیں اور آئزہ خان کو ریما خان کی کاپی کہا جا تا ہے. شروع شروع میں سجل علی کو بھی کرینہ کپور سے ملایا جاتا تھا.

واضح رہے کہ سحر خان کو ماہ پارہ کے کردار کی وجہ سے شہرت ملی، یہ کردار سحر نے جیو ٹی وی کے ڈرامہ سیریل رنگ محل کے لئے ادا کیا تھا ، سحر اس کردار کے حوالے کہتی ہیں کہ عموما یہ ہوتا ہے کہ لڑکیاں ڈراموں میں رو دھو رہی ہوتی ہیں کوئی بھی سیچوایشن آتی ہے تو وہ کمپرومائز کر جاتی ہیں لیکن میرے ماہ پارہ کے کردار کی یہ خوبی تھی کہ زندگی میں کچھ بھی ہوجائے موو آن کرنا چاہیے اور ماہ پارہ کا کردار موو آن کرتا ہے.

بھارتی گلوکار کرشنا کمار ناتھ المعروف کے کےکے انتقال ہر بھارتی فلم انڈسٹری کے ستارے افسردہ ہیں ہر کسی نے کے کے کی موت پر شدید رنج کا اظہار کیا ہے۔خصوصی طور پر اکشے کمار ،رنویر سنگھ، پریتی زنٹا ،پریتم ، وشال ڈاڈلانی ، ارمان ملک و دیگر نے کے کے کے اتنقال کو میوزک انڈسٹری کے بڑا نقصان قرار دیا ہے ۔ کے کے، کے پرستار بھارت کے ساتھ ساتھ پاکستان میں بھی بڑی تعداد میں موجود ہیں۔ کے کے یقینا ایک بڑے گلوکار تھے میوزک کے شعبے میں ان کی خدمات کو ہمیشہ یاد رکھا جائے ۔ ان کا ایک گیت جو کہ اداکار رتیک روشن پر فلمایا گیا اسکے بول تھے زندگی دو پل کی انتظار کب تک ہم کریں گے بھلا اس گانے کو ان کے پرستار سوشل میڈیا پر شئیر کر رہے ہیں۔ان کے مشہور گانوں میں’دل عبادت، توہی میری شب ہے، سن ذرا، تڑپ تڑپ کے اس دل سے آہ نکلتی رہی، دس بہانے کرکے لے گئے دل‘ سمیت متعدد گانے شامل ہیں۔

کے کے نے بالی وڈ میں ایک سے بڑھ کر ایک گیت گائے انپوں نے جو بھی گیت گایا اسے عوامی سطح پر بے حد پذیرائی ملی۔ کے کے آتے ہی فلم انڈسٹری پر بطور گلوکار چھا گئے ان کے ہٹ گانے ہر دوسرے بڑے ہیرو پر پکچرائز ہوئے۔ یاد رہے کہ کے کے گزشتہ روزکلکتہ میں شو کی غرض سے گئے تھے شو میں پرفارم کر رہے تھے لوگ ان کی پرفارمنس پر جھوم رہے تھے کہ پرفارمنس کے دوران اچانک ہی کے کے گر گئے جیسے ہی وہ گرے ان کو ہسپتال لے کر جایا گیا ہسپتال جب لیکر گئے وہاں ان کے چیک اپس ہوئے تو ڈاکٹروں نے انہیں مردہ قرار دیدیا.

ہم ٹی وی کا سپرہٹ ڈرامہ سیریل دوبارہ کی آخری قسط آج رات آٹھ بجے نشر ہو گی۔ شائقین نے یہ ڈرامہ اس کی منفرد اور الگ کہانی کی وجہ سے کافی سراہاہے. ڈرامے کی کاسٹ میں حدیقہ کیانی، نعمان اعجاز، اسامہ خان، ذویا ناصر، شبیرجان، سکینہ سموں، جاوید شیخ ،بلال عباس ماہین صدیقی و دیگر مرکزی کرداروں میں نظر آرہے ہیں۔ اس ڈرامے کی کہانی ایک ایسے ایشو کو ڈسکس کرتی ہے جس پر بات کرنا معیوب سمجھا جاتا ہے اور کہانی ہمیں یہ سوچنے پر مجبور کردیتی ہے کہ آخر کیوں عورت اپنی زندگی کے فیصلے نہیں کر سکتی اور اگر اسکا شوہر مر جائے یا اسکو چھوڑ کر چلا جائے تو کیوں وہ اپنی زندگی کو نئے سرے سے شروع نہیں کر سکتی؟.

حدیقہ کیانی نے مہرو کے کردار کو بہت ہی خوبصورتی سے نبھایا ہے اس طرح کی بہت ساری مہرو ہیں جو ہماری سوسائٹی کی رسموں کو توڑ کر اپنی ندگی اپنی شرائط پر جیتی ہیں لیکن زیادہ تر تو اسی دبائو میں رہتی ہیں کہ لوگ کیا کہیں گے رشتہ دار کیا کہیں گے۔ سوسائٹی کے ایسے ایشوز پر ڈرامے بننے چاہیں جو دیکھنے والوں کو سوچنے پر مجبور کریں کہ ہم آخر ایسا کیوں کرتے ہیں یا ویسا کیوں کرتے ہیں ۔ بلال عباس نے حدیقہ کیانی کے مقابلے میں جس طرح سے کردار ادا کیا ہے وہ یقینا قابل تحیسن ہے ۔ کہانی کو بے حد خوبصورت انداز میں لکھا گیا ہے جس میں کسی جگہ جھول نہیں ہے اور ڈائریکشن بھی کمال ہے۔ کہانی کے تمام کرداروں نے اپنے کام کے ساتھ انصاف کیا ہے۔

مشال خان اور دانیال افضل بہت جلد ایک ساتھ نظر آنے والے ہیں ڈرامہ سیریل کالج گیٹ کے لئے انہیں کاسٹ کر لیا گیا ہے۔ ڈرامے کو فہیم برنی ڈائریکٹ کررہے ہیں۔فہیم اس سے قبل ٹیڑھا آنگن اور تم سے کہنا تھا جیسے پراجیکٹ بنا چکے ہیں۔ صبا حمید اور عثمان پیرزادہ بھی اس ڈرامے کی کاسٹ کا حصہ ہوں گے۔رپورٹس کے مطابق ڈرامہ ترکی اور پاکستان میں شوٹ ہو گا۔ فہیم برنی کا ہر پراجیکٹ لوگوں میں کافی پذیرائی حاصل کرتا ہے۔ دیکھنا یہ ہے کہ اداکار افضل خان اور مشال خان کی جوڑی سکرین پر اپنا کتنا سحر قائم کرتی ہے اور دیکھنے والے انہیں کتنا سراہتے ہیںں ان کی آن سکرین کیمسٹری کیسی ہو گی یہ تو ڈرامہ دیکھنے کے بعد ہی پتہ چل سکتا ہے۔

صبا حمید جو آج کل ڈرامہ سیریل میرے ہمسفر میں ایک ایسی ساس کا کردار ادا کررہی ہیں جو اپنی بہو کو پسند نہیں کرتیں اور ان کی کوشش ہے کہ ان کا بیٹا اپنی بیوی کو چھوڑ دے صبا اس کردار کو نہایت ہی خوبصورتی کے ساتھ نبھا رہی ہیں۔ جہاں ڈرامے کی کہانی بہت پسند کی جا رہی ہے وہیں اس کردار کی بھی بہت تعریف ہو رہی ہے۔مشال خان نے مثبت کرداروں کے ساتھ نیگیٹیو شیڈ کے کردار بھی ادا کئے ہیں ہر کردار میں ان کی اداکاری حقیقت سے قریب تر معلوم ہوتی ہے.

امین اقبال کی ڈائریکشن میں بننے والی فلم رہبرا جو کہ رواں ماہ چوبیس جون کو ریلیز ہو رہی ہے اس کا ٹائٹل سانگ گزشتہ دنوں لاہور میں ایک تقریب کے بعد ریلیز کیا گیا۔ گانے کے بول ہیں رہبرا، گانا جب وائرل ہوا اور سب نے دیکھا تو شور مچ گیا کہ اس گانے کی پکچرائزیشن تو بالی وڈ کی فلم فنا جس میں عامر خان اور کاجول نے مرکزی کردار ادا کئے تھے ، کے گیت میرے ہاتھ میں تیرا ہاتھ ہو جو ان دونوں اداکاروں پر فلمایا گیا گیا تھا اس کی کاپی ہے۔ فلم رہبرا کے ٹائٹل سانگ رہبرا گانے میں دیکھا جا سکتا ہے کہ رہبرا کو فلمانے کا انداز تیرے ہاتھ میں میرا ہاتھ ہو سے کس قدر متاثر ہے ۔ چربہ کرنے کا یہ موقع پہلا نہیں ہے کبھی لالی وڈ بالی وڈر کی فلموں اور گانوں کا چربہ کرتا ہے اور کبھی بالی وڈ لالی وڈ کی فلموں اور گانوں کا چربہ کرتا ہے. یاد رہے کہ فلم ریلیز کے لئے تیار ہے اور آج کل اس فلم کی ٹیم بھرپورموشن کر رہی ہے اور اسی غرض سے وہ مختلف شہروں میں جا رہے ہیں ۔ فلم کے بارے میں دعوی کیا جا رہا ہے کہ اس کو دیکھنے کے لئے کوئی بھی خالی دل اور دماغ سے نہیں جائیگا اور یہ فلم کافی دن تک بہت کچھ یاد دلاتی رہے گی۔ شائقین عائشہ عمر اور احسن خان کی جوڑی دیکھنے کے لئے پرجوش ہیں۔

ڈرامہ سیریل چوراہا کے بعد اداکارہ سحر خان اب آغا علی اور اظفر رحمان کے ساتھ دکھائی دیں گی۔ تینوں کی یہ جوڑی دیکھنے کے لئے شائقین بے تاب ہیں ۔ڈرامہ زخم جیو ٹی وی پر نشر کیا جائیگا۔ سیونتھ سکائی کے اس پراجیکٹ کو سید رامیش رضوی ڈائریکٹ کررہے ہیں. واضح رہے کہ سحر خان نے ابھی تک سائیڈ رولز ہی کئے ہیروئین کے کردار میں کم کم ہی نظر آئی ہیں لیکن انہوں نے ابھی تک جو بھی کردار ادا کئے ہیں وہ یقینا کسی بھی کہانی کو آگے لیکر چلنے والے ہی تھے۔ اسی طرح سے اظفررحمان وہ اداکار ہیں جن کی اداکاری کے بہت سارے دیوانے موجود ہیں

ان کا ہر کردار پہلے سے مختلف ہوتا ہے لیکن انہیں ہمیشہ سنجیدہ کرداروں میں ہی دیکھا گیا ہے کامیڈی کرداروں میں کم دیکھا گیا ہے روایت کو برقرار رکھتے ہوئے اظفر رحمان اس ڈرامے میں بھی سنجیدہ کردار ادا کرتے ہی نظر آئیں گے۔ آغا علی اپنی اہلیہ حنا کے ساتھ ایک پروگرام ہوسٹ کررہے تھے لیکن ڈراموں میں کم ہی نظر آرہے تھے ان کے پرستاروں کے لئے یقینا یہ خوشخبری ہے کہ ان کا ڈرامہ جلد آن ائیر جائیگا۔ ان تینوں کی جوڑی کیا رنگ لاتی ہے یہ تو ڈرامہ آن ائیر ہونے کے بعد ہی پتہ چلے گا ۔

اداکارہ اشنا شاہ جو ایک عرصہ سے ٹی وی پر کم کم دکھائی دے رہی ہیں انہوں نے حال ہی میں صبا قمر کی فنی صلاحیتوں کی تعرف کھل کر کی اور جس طرح سے انہوں نے صبا کی تعریف کی یہ انداز سب کو بھاہ گیا۔ اشنا شاہ نے سوشل میڈیا پر ایک پوسٹ لگا کر اپنی ساتھی اداکاری کی فلم کملی کے حوالے سے تعریف کی . انہوں نے کہا کہ میں فلم کے پریمئیر پر تو نہیں پہنچ سکی لیکن میں نے سنا ہے کہ آپ نے اس میں خود کو بھلا کر کام کیا ہے میں بے صبری سے اس فلم کی ریلیز کا انتظار کررہی ہوں اس پر صبا قمر نے ان کو شکریہ ادا کیا ۔اشنا کی طرف سے صبا قمر کی اس انداز میں تعریف

کو لوگوں کی طرف سے بہت زیادہ سراہا جا رہا ہے اشنا کی اس پوسٹ کے نیچے لوگوں کے کمنٹس پڑھے جا سکتے ہیں۔ عمرما ہیروئینز ایک دوسرے کی تعریف کرنے میں زرا ہچکچاہٹ سے کام لیتی ہیں لیکن ہماری بہت ساری ایسی اداکارائیں ہیں جو ایک دوسرے کی ہمت بندھاتی ہیں جیسے سپر سٹار مہوش حیات فلم کملی کے پریمئیر پر پہنچیں اور صبا قمر کی فلم دیکھی اور باقاعدہ ان کے کام کی تعریف کی . یاد رہے کہ فلم کملی ایک دن کے بعد سینما گھروں کی زینت بن رہی ہے شائیقن سرمد سلطان کھوسٹ کی ڈائریکشن میں بنی اس فلم کا بے چینی سے انتظار کررہے ہیں۔