پاکستان ٹی وی انڈسٹری کی نامور اداکارہ سارہ خان کا کہنا ہے کہ اللہ تعالیٰ ہر لڑکی کو اُن کے شوہر فلک شبیر جیسا شوہر دے۔
باغی ٹی وی : سوشل میڈیا انسٹاگرام پر سارہ خان کی ایک ویڈیو وائرل ہو رہی ہے جس میں فلک شبیر سے متعلق بات کر رہی ہیں سارہ خان نے اپنے شوہر اور گلوکار فلک شبیر کو بہترین شوہر قرار دیتے ہوئے کہا ہے کہ وہ چاہتی ہیں کہ دنیا کی ہر عورت کو فلک شبیر جسا شوہر ملے۔
ویڈیو میں دیکھا جا سکتا ہے کہ سارہ خان سے اُن کے شوہر سے متعلق سوال کیا گیا جس کا جواب دیتے ہوئے سارہ خان نے فلک شبیر کی تعریفوں کے پُل باندھ دیئے ہیں۔
سارہ خان نے فلک شبیر سے متعلق بات کرتے ہوئے کہا ہے کہ شادی کے بعد میں ہوتی ہوں اور میرے شوہر ہوتے ہیں ، وہ مجھے بہت آزادی دیتے ہیں تاکہ میں اپنے شوق پورے کر سکیں، فلک شبیر بہت حوصلہ بھی بڑھاتے ہیں اور مجھے سپورٹ کرتے ہیں-
سارہ خان نے کہا ہے کہ فلک شبیر چاہتے ہیں کہ میں آگے بڑھوں اور کام کروں اسی لیےمجھے کام کرنا مزید اچھا لگتا ہے اور اپنے کام سے خوشی بھی ملتی ہے، میں تو چاہتی ہوں کہ دنیا کی ہر عورت کو اللہ تعالیٰ فلک شبیر جیسا شوہر دے، ایسا شوہر جو چاہے کہ آپ آگے بڑھیں آپ کو آگے بڑھنے دے جیسا کہ میرے شوہر مجھے سپورٹ کرتے ہیں-
میکسکو:معروف اداکارہ سلمیٰ ہائیک نے انکشاف کیا ہے کہ جب آپ خود کو بھلا کر اپنے کردار سے متعلق سوچتے ہوئے کام کرتے ہیں تو ہر کردار آسان ہو جاتا ہے مگر وہ اپنے والد اور بھائی سے متعلق سوچتی رہتی ہیں۔
باغی ٹی وی :میڈیا رپورٹس کے مطابق 54 سالہ اداکارہ سلمیٰ ہائیک نے اپنے پوڈ کاسٹ انٹرویو کے دوران انکشاف کیا ہے کہ 1993 میں وہ اپنی فلم ’ ڈیسپراڈو‘ میں ایک رومانوی سین عکس بند کراوتے ہوئے رو پڑی تھیں۔
سلمیٰ ہائیک نے بتایا کہ وہ اس بات سے لاعلم تھیں کہ اُنہیں اپنی اس فلم کے دوران اپنے ساتھی اداکار انتونیو بنڈیرس کے ساتھ ایک انتہائی رومانوی سین بھی عکس بند کروانا پڑے گا۔
انہوں نے بتایا کہ جب وہ رومانوی سین عکس بند کروانے کے لیے تیار ہوئیں تو سسکیوں سے رونے لگ گئی تھیں وہ بہت ڈر گئی تھیں اور وہ خود بھی نہیں جانتی تھیں کہ وہ رو پڑیں گی-
اداکارہ کے مطابق یہ دیکھ کر انتونیو بنڈیرس سمیت سیٹ پر موجود ہر شخص خوفزدہ ہو گیا تھا اور فلم کے ہیرو انتونیو بنڈیرس بہت شرمندگی محسوس کر رہے تھے اور سیٹ پر موجود سب ہی افراد اُنہیں ہنسانے کے لیے کوششیں کر رہے تھے اور نارمل محسوس کروانے کے لیے اُنہیں لطیفے سنائے جا رہے تھے۔
انہوں نے بتایا کہ اُنہوں نے دو سیکنڈ کے لیے چہرے سے تولیہ ہٹایا اور دوبارہ منہ چھپا کر رونے لگ گئی تھیں مگر اُنہوں نے وہ سین عکس بند کروایا اور جتنا اچھا کر سکتی تھیں اُنہوں نے وہ سین کیا-
سلمٰی ہائیک کا کہنا تھا کہ اُنہیں انتونیو کی بہت فکر ہو رہی تھی وہ اُن کے بارے میں سوچ رہی تھیں کیوںکہ وہ بہت شریف اور اچھے انسان ہیں اور ہم آج بھی بہت قریبی دوست ہیں۔
اداکارہ کا کہنا تھا کہ وہ بھی اپنے رونے پر بہت شرمندہ ہو رہی تھیں اور سوچ رہی تھی کہ انہوں نے ایک شریف انسان کو اُس کی ہی نظر میں قصور وار ٹھہرا دیا ہے اور وہ اس وجہ سے پریشان ہو گیا ہے ۔
اپنی اس پرانی یاد سے متعلق بتاتے ہوئے سلمیٰ ہائیک کا کہنا تھا کہ جب آپ خود کو بھلا کر اپنے کردار سے متعلق سوچتے ہوئے کام کرتے ہیں تو ہر کردار آسان ہو جاتا ہے مگر وہ اپنے والد اور بھائی سے متعلق سوچتی رہتی ہیں۔
سلمیٰ ہائیک نے کہا کہ وہ سوچتی رہتی ہیں کہ اُن کا کام اُن کے والد اور بھائی بھی دیکھیں گے کیا اُن کے ایسے سین دیکھ کر اُن کے والد اور بھائی کو جذباتی ٹھیس پہنچنے والی ہے۔
اداکارہ نے یہ بھی کہا کہ مردوں کے ساتھ ایسا نہیں ہوتا ہے، مردوں کے والد دیکھ کر کہتے ہیں، واہ، ’یہ میرا بیٹا ہے۔‘
چند روز قبل پاکستانی لڑکی دنانیر مبین نے چند سیکنڈ کی ایک مختصر ویڈیو سوشل میڈیا پر شیئر کی تھی جس میں وہ منفرد اسٹائل میں اردو بولتے ہوئے کہہ رہی تھیں ’یہ ہماری کار ہے، یہ ہم ہیں اور یہ ہماری پارٹی ہورہی ہے۔‘
باغی ٹی وی :دنانیر مبین کا یہ انداز لوگوں کو اتنا زیادہ پسند آیا کہ عام لوگوں اور فنکاروں نے اس ویڈیو کو ری کری ایٹ کرکے سینکڑوں مزاحیہ ویڈیوز بناکر سوشل میڈیا پر شیئر کیں۔ صرف پاکستان میں ہی نہیں بلکہ بھارت میں بھی دنانیر مبین کی ویڈیو بہت زیادہ وائرل ہورہی ہے بھارتی اداکار بھی ’پاکستانی پارٹی‘ کے رنگ میں رنگ گئے ہیں جن میں رندیپ ہودا بھی شامل ہو گئے ہیں-
بھارتی اداکار رندیپ ہوڈا نے ’پارٹی ہورہی ہے‘ پر مزاحیہ ویڈیو بناکر سوشل میڈیا پر شیئر کی ہے۔
رندیپ ہوڈا نے یہ ویڈیو اپنی آنے والی ویب سیریز ’انسپیکٹر اویناش‘کے سیٹ پر بنائی ہے ۔ ویڈیو میں اداکار رندیپ ہوڈا کہہ رہے ہیں ’’یہ میں ہوں، یہ ہمارے لوگ ہیں شوٹ پہ اور یہاں پارٹی ہورہی ہے۔‘‘ رندیپ ہوڈا کی یہ ویڈیو شیئر ہوتے ہی وائرل ہوگئی ہے لوگوں کی جانب سے خوب پسند کی جا رہی ہے-
واضح رہے کہ اس سے قبل معروف بھارتی یوٹیوبر یشراج مکھاٹے نے ان کی ویڈیو پر ایک گانا بھی تیار کیا جسے خوب پسند کیا جا رہا ہے۔
جبکہ اسٹیٹ بینک آف انڈیا نے پاکستانی ’پارٹی گرل‘ سے متاثر ہوکر سوشل میڈیا پر صارفین کے لیے مہم لانچ کردی ہے بھارتی اسٹیٹ بینک آف انڈیا کے ٹوئٹر اکاؤنٹ پر بھارتی صارفین کے لیے آفرز سے متعلق ایک تصویر شئیر کی گئی جس میں کہا گیا کہ ’یہ ہمارا ایپ ہے، یہ آفرز ہے اور یہ ہماری پارٹی ہورہی ہے۔
علاوہ ازیں بھارتی ریاست اتر پردیش کی پولیس نے آفیشل ٹوئٹر اکاؤنٹ پر ایک پوسٹ شیئر کی جس میں لکھا تھا کہ یہ ہم ہیں یہ ہماری کار ہے اور اگر لیٹ نائٹ پارٹی ہو رہی ہے اور آپ ڈسٹرب ہو رہے ہیں تو 112 پر کال کریں ۔
اس پوسٹ میں اتر پردیش کی پولیس نے ہیش ٹیگ ‘پارٹی ہو رہی ہے’ بھی استعمال کیا تھا-
خود کوامن کا سفیر کہنے اور دنیا بھر میں امن کا پیغام پھیلانے والی بھارتی اداکارہ پریانکا چوپڑا نے پاک بھارت معاملے پر ایک بار پھر یوٹرن لیا ہے-
باغی ٹی وی : میڈیا رپورٹس کے مطابق اپنے دوغلے رویئے کی وجہ سے مشہور بھارتی اداکارہ پریانکا چوپڑا نے اپنی کتاب ’ان فنشڈ‘ میں پاکستان اور بھارت کے درمیان تعلقات میں کشیدگی پر بات کی ہے اور امید ظاہر کی ہے کہ دونوں ممالک کے درمیان معاملات میں بہتری آئے گی۔
بی بی سی ایشین نیٹ ورک کے نامہ نگار ہارون رشید نے حال ہی میں پریانکا چوپڑا کا انٹرویو لیا اور اس انٹر ویو کے آنے والے پوڈ کاسٹ کا ایک ٹیزر بھی اپنے انسٹاگرام اکاؤنٹ پر جاری کیا۔
بی بی سی ایشین نیٹ ورک کے نامہ نگار کے اس ٹیزر پر ردعمل دیتے ہوئے ایک سوشل میڈیا صارف نے ہارون رشید سے سوال کیا، کیا آپ نے پریانکاچوپڑا سے بالا کوٹ واقعے سے متعلق سوال پوچھا؟
اس سوال کے جواب میں ہارون رشید نے جواب دیا پریانکا نے اپنی کتاب میں پاکستان اور بھارت کے درمیان ہم آہنگی پر بات کی ہے اور امید ظاہر کی ہے کہ دونوں ممالک کے درمیان معاملات میں بہتری آئے گی۔
پریانکا نے اپنی کتاب میں بتایا کہ کس طرح پاکستانی برٹش ایئرویز کے ایک ایجنٹ نے ان کے والدین کو فلائیٹ پر سیٹ دی جب انہیں اس کی سخت ضرورت تھی امید ہے دونوں ممالک ہمیشہ اس طرح گرم جوشی کا مظاہرہ کرسکتے ہیں۔
ہارون رشید نے مزید لکھا کہ اگر آپ اس بارے میں مزید جاننا چاہتے ہیں کہ میں نے پریانکا کی خاموشی کے بارے میں سوال پوچھا ہے یا نہیں تو آپ کو پورا انٹرویو دیکھنا پڑے گا جو اگلے ہفتے آئے گا۔
جبکہ کچھ صارفین نے پریانکا کی کشمیر اور بھارتی کسانوں کے احتجاج پر خاموشی پر سوال اٹھایا ہارون رشید نے کہا کہ آپ دیکھیں پریانکا نے اس بارے ٹوئٹ کی ہے-
ایک صارف نے لکھا کہ پریانکا کے لئے اپنی چیریٹی کا کام زیادہ ضروری ہے ٹھیک ہے جی لیکن اس وات اس کا جنون کہاں گیا جب کشمیری اور بھارتی کسان مدد کے لئے پُکار رہے ہیں-
اس سے قبل ہارون راشدکی جانب سے سوشل میڈیا پلیٹ فارم انسٹاگرام پر پریانکا چوپڑا کے لیے انٹرویو کی جھلکیاں بھی شیئر کی گئیں۔
انٹرویو میں پریانکا نے جنوبی ایشیائی باشندوں کے لیے ہالی وڈ میں مواقعوں کی کمی اور اپنی زندگی میں انسان دوست کاموں کی اہمیت سے متعلق گفتگو کی ہے۔
واضح رہے کہ خود کوامن کا سفیر کہنے والی بالی وڈ اداکارہ پریانکا چوپڑا نے دو سال قبل 26 فروری 2019 کو بھارت کی جانب سے پاکستانی حدود بالاکوٹ میں جھوٹے سرجیکل اسٹرائیک کے دعوے کو نا صرف سراہا تھا بلکہ بڑھ چڑھ کرجنگ کی حمایت بھی کی تھی۔ جس پر لاس اینجلس میں ہونے والے ایک بیوٹی ایونٹ میں عائشہ ملک نامی پاکستانی خاتون نے پریانکا چوپڑا کو امن کی سفیر ہونے کے باوجود پاکستان کے خلاف جوہری جنگ کی حوصلہ افزائی کرنے پر ’منافق‘ قرار دیا تھا۔
Priyanka Chopra tweeted during a time when we were this 👌🏽 close to sending nukes to one another. Instead of advocating for peace she tweeted in support of the Indian army pic.twitter.com/LhbMkOW59v
خاتون نے پریانکا چوپڑا کو سب کے سامنے آئینہ دکھاتے ہوئے کہا تھا ایسا بہت ہی کم ہوا ہے کہ آپ نے امن اور انسانیت کی بات کی ہو۔ کیونکہ ایک پڑوسی پاکستانی ہونے کے ناطے میں جانتی ہوں کہ آپ ایک ’منافق‘ ہیں۔
خاتون نے کہا تھا کہ آپ نے ٹوئٹ کی اور اس میں اپنی آرمی کا ہیش ٹیگ بھی استعمال کیا۔
تاہم پریانکا چوپڑا نے جب تقریب میں اپنی بے عزتی ہوتے دیکھی تو اور کچھ تو کر نہیں سکیں خاتون کو خاموش کروادیاتھا اور تقریب انتظامیہ نے خاتون کے ہاتھ سے زبردستی مائیک چھین لیا تھا۔
بالی وڈ کی معروف گلوکارہ اکاسا سنگھ کا کہنا ہےکہ اقرباپروری کامیابی کی ضمانت نہیں ہر بار رشتے داریاں کام نہیں آتیں اس کے لیے محنت کرنا پڑتی ہے۔
باغی ٹی وی : بھارتی میڈیا رپورٹس کے مطابق بالی وڈ کو متعدد سپرہٹ گانے دینے والی گلوکارہ نے ایک انٹرویو کے دوران کہا کہ لوگ کہتے ہیں کہ مجھے ‘ناگن’ گانے کی بدولت جلد شہرت مل گئی پر حقیقت میں ایسا نہیں اس سے قبل میری بہت زیادہ محنت ہے اور میں سمجھتی ہوں کہ جدوجہد کے دوران وہ سیکھتی رہی ہیں جس کا انہیں فائدہ ہوا ہے۔
بالی وڈ میں اقربا پروری کے سوال پر اکاسا کا کہنا تھا کہ یہ کسی کے کیرئیر کی کامیابی کی ضمانت نہیں ہے،ہر بار رشتے داریاں کام نہیں آتیں البتہ اکثر لوگوں کو مواقع حاصل کرنے لیے سخت محنت کرنا پڑتی ہے اور بعض کو مواقع آسانی سے مل جاتے ہیں-
خیال رہے کہ اس سے قبل اقربا پروری کے باعث فلمی کیرئیر میں مشکلات کا سامنا کرنے کا اقرار کرتے ہوئےکہا کہ اس بارے میں انہوں نے اپنی کتاب میں بھی لکھا ہے۔
اداکارہ کامزید کہنا تھا کہ یہ بات ٹھیک ہے کہ ہر ایک اپنے خاندان کا خیال کرنا چاہتا ہے ،ہم سب اپنے دوستوں اور رشتے داروں کی دیکھ بھال کرنا چاہتے ہیں اور ان کے لیے مواقع پیدا کرنا چاہتے ہیں، میں بھی یہ کرنا چاہتی ہوں اپنے دوستوں اور خاندان والوں کو سپورٹ کرنے کا مطلب یہ نہیں ہے کہ آپ دوسروں کو مکمل طور پر نظرانداز کردیں-
اداکارہ نے کہا کہ میرا خیال ہے کہ جن لوگوں کے پاس میز موجود ہے تو کیا یہ بہتر نہیں ہوگا کہ اگر ہم اس میز کو صرف اپنے لوگوں کی اجارہ داری کی جگہ بنانے کے بجائے میز ہی میں توسیع کی کوشش کریں تاکہ دوسرے بھی وہاں بیٹھ سکیں۔
خیال رہے کہ بالی وڈ میں اقربا پروری کے حوالے سے گذشتہ چند سالوں سے بحث جاری ہے تاہم اس میں اس وقت اضافہ ہوا جب اداکار سوشانت سنگھ نے مبینہ طور پر بالی وڈ میں نظر انداز کیے جانے اور کام نہ ملنے پر خودکشی کرلی تھی جس پر اداکارہ کنگنا رناوت نے اس کا ذمہ دار بالی وڈ میں اقربا پروری کو قرار دیا تھا۔
پاکستان شوبز انڈسٹری کی نامور اداکارہ اشنا شاہ نے خواتین اور خاص طور پر نوجوان لڑکیوں کو مشورہ دیا ہے کہ وہ رومانس سے دور رہیں تو بہتر ہے ’بوائے فرینڈ‘ یا کسی دوست سمیت خاندان کے کسی بھی فرد کو اتنی اہمیت نہ دیں اور سر پر اتنا نہ چڑھائیں کہ وہ ان کی زندگی خراب کردے۔
باغی ٹی وی : میرا سیٹھی کے ساتھ بات کرتے ہوئے اشنا شاہ نے ذاتی زندگی اور رومانوی مسائل پر کھل کر بات کی اشنا شاہ نے میرا سیٹھی کو دیئے گئے انٹرویو کے حوالے سے اپنی انسٹاگرام پوسٹ میں بتایا کہ ان کا مذکورہ انٹرویو اکتوبر 2020 میں ریکارڈ کیا گیا تھا، جسے چند ماہ بعد اب نشر کیا جا رہا ہے جس وجہ سے بعض باتیں غیر اہم بھی لگیں گی۔
انٹرویو کے دوران اشنا شاہ نے اپنی ذاتی زندگی کے حوالے سے بات کرتے ہوئے بتایا کہ ان کا بچپن کینیڈا میں گزارا ان کے والدین کے درمیان طلاق ہوگئی تھی اور وہ والد کے ساتھ کینیڈا منتقل ہوگئی تھیں تاہم 7 سال قبل انہوں نے پاکستانی شوبز انڈسٹری میں اپنا کیریئر شروع کیا۔
اداکارہ نے بتایا کہ ان کی والدہ ’سید‘ تھیں جس وجہ سے انہوں نے اپنے نام کے آخر میں ’شاہ‘ لگایا اور انہیں کئی لوگ اپنے نام سے ’شاہ‘ کا لفظ ہٹانے کی دھمکیاں بھی دیتے رہے ہیں۔
می ٹو سے متعلق پوچھے گئے ساول کے جواب میں اشنا شاہ نے بتایا کہ وہ خواتین کو ہراساں کرنے کی مہم ’می ٹو‘ پر اس لیے بات نہیں کرتیں کہ مذکورہ معاملے پر بہت سارے لوگ بات کر رہے ہیں تاہم انہوں نے دیگر سماجی مسائل پر کھل کر بات کرنے کے ٹھان رکھی ہے اور وہ ان پر بات کرتی رہتی ہیں۔
می ٹو سے متعلق دلیل نہ دینے سے متعلق بات کرنے کی انہوں نے دلیل دی کہ ’می ٹو‘ مہم پر بات کرنے کےکچھ نقصانات بھی ہیں کیوںکہ اگر اس مہم پر بات کرتے ہوئے کوئی کسی پر خواتین کو جنسی طور پر ہراساں کرنے کا الزام لگائے تو مذکورہ الزام کو ثابت کرنے کے شواہد نہیں ہوتے جس وجہ سے الزام لگانے والی کی عزت بھی خراب ہوسکتی ہے۔
اداکارہ نے کہا تھا کہ انہیں یقین ہے کہ ملک کی تمام خواتین نے زندگی میں کم از کم ایک بار کسی نہ کسی طرح کی ہراسانی کا سامنا کیا ہوگا اس لیے ’می ٹو‘ مہم پر بات کرنے والی بھی زیادہ تر خواتین ہی ہیں۔
ایک سوال کے جواب میں انہوں نے اعتراف کیا کہ وہ ’فیمنسٹ‘ ہیں اور ساتھ ہی کہا کہ اب تو بہت سارے مرد بھی خود کو ’فیمنسٹ‘ کہتے ہیں۔
شادی سے متعلق پوچھے گئے سوال پر اشنا شاہ نے بتایا کہ وہ ایسے شخص کو شریک حیات بنانا پسند کریں گی جو وفادار، پر خلوص، ایماندار اور سچا ہو۔
ایک اور سوال کے جواب میں اداکارہ نے اعتراف کیا کہ ماضی میں متعدد بار ان کا دل ٹوٹا اور ایسے واقعات سے ہی انہوں نے سبق سیکھا اور انہیں بہتر شخص کی سمجھ آئی۔
انہوں نے بتایا کہ 4 سال قبل ایک شخص کے خراب رویے کی وجہ سے وہ کافی زیادہ افسردہ تھیں اور انہوں نے شوٹنگ کے دوران ہی رونا شروع کردیا تو ہدایت کار نے انہیں کہا کہ زندگی میں کسی بھی شخص کو سر پر اتنا سوار نہ کرو کہ وہ آپ کی زندگی خراب کرے‘۔
اشنا شاہ نے اپنے دل ٹوٹنے کے واقعات کو یاد کرتے ہوئے نوجوان لڑکیوں کو بھی مشورہ دیا کہ وہ رومانس سے دور رہیں تو بہتر ہے ’بوائے فرینڈ‘ یا کسی دوست سمیت خاندان کے کسی بھی فرد کو اتنی اہمیت نہ دیں اور سر پر اتنا نہ چڑھائیں کہ وہ ان کی زندگی خراب کردے۔
انہوں نے نوجوان لڑکیوں کو مخاطب ہوتے ہوئے کہا کہ اگر رومانوی جذبات سے دور رہیں تو وہ ان کی زندگی سکون سے گزرے گی اور وہ جلدی سے آگے بڑھتی جائیں گی-
پی ایس ایل 6 کے آفیشل ترانہ میں گلوکارہ نصیبو لعل، آئمہ بیگ، ریپر طلحہ انجم اور طلحہ یونس نے اپنی آواز کا جادو جگایا ہے جس کو سوشل میڈیا صارفین نے شدید تنقید کا نشانہ بنایا جس کے بعد کچھ فنکاروں نے ترانے کو تنقید کا نشانہ بنانے والوں کو جواب دیا جن میں گلوکارہ میشا شفیع بھی شامل ہیں-
باغی ٹی وی : پاکستان کی نامور گلوکارہ میشا شفیع نے انسٹاگرام اسٹوری پر گانے کی ویڈیو کے مناظر شیئر کرتے ہوئے گلوکارہ نے لکھا کہ گانا صرف ایک موسیقی کی فتح نہیں بلکہ قدیم ادب کی زیادہ تقلید ، نوآبادیاتی احساس کمتری اور ایسے دھاندلی کے نظام جس میں کچھ لوگوں کی بار بار حمایت کی جائے اس کی فتح ہے۔
گلوکارہ کی جانب سے شیئر کی گئی انسٹاگرام اسٹوری میں مزید لکھا گیا کہ یہ شرم کی بات ہے کہ ہم ان کے خلاف تنقید کرکے نصیبو لعل جیسے لیجنڈری ٹیلنٹ کی صلاحیتوں کا انکار کرتے ہیں۔
پاکستان فلم انڈسٹری کی معروف اداکارہ ریما خان پہلی پاکستانی فنکارہ ہیں جنہوں نے گزشتہ ماہ 19 جنوری کو کورونا ویکسین لگوائی تھی تاہم اب انہوں نے امریکا میں کورونا ویکسین کی دوسری ڈوز لگوالی۔
باغی ٹی وی : امریکا میں کورونا ویکسین کی دوسری ڈوز لینے کی وڈیو اداکارہ ریما خان نے اپنے تصدیق شدہ انسٹاگرام اکاؤنٹ پر پوسٹ کی۔
ڈوز لینے کے بعد ریما خان نے لوگوں کو حوصلہ دیتے ہوئے ہیش ٹیگ استعمال کرتے ہوئے کہا کہ کورونا ویکسین لگوائیں،محفوظ رہیں اور اپنی اور دوسروں کی زندگیاں بچائیں۔
اس سے قبل اداکارہ ریما خان نے 19 جنوری کو کورونا وائرس ویکسین کی پہلی ڈوز لگوائی تھی ریما خان 90 کی دہائی سے 200 سے زائد فلموں میں اداکاری کے جوہر دکھا چکی ہیں اور اب وہ فلمی دنیا سے دور ہیں لیکن سوشل میڈیا پر فعال نظر آتی ہیں ریماخان 2011 میں رشتہ ازدواج میں منسلک ہوئیں اور تب سے امریکہ میں مقیم ہیں-
بھارتی اداکارہ کنگنا رناوت کا کہنا تھا کہ کہ ہالی ووڈ اداکار ٹام کروز سے زیادہ باصلاحیت ہیں کنگنا کے اس بیان پر بھارتی صارفین نے ان پر شدید تنقید کی اور طنز و تضحیک کا نشانہ بنایا گیا تھا-
باغی ٹی وی : تاہم اب بھارتی اداکارہ کنگنا رناوت نے ہالی ووڈ کے نامور ہیرو ٹام کروز سے متعلق اپنے بیان پر یوٹرن لے لیا کنگنا رناوت نے ہالی ووڈ کے کئی فلموں میں اپنی بہترین اداکاری کی وجہ سے عالمی شہرت یافتہ ٹام کروز سے بہتر اسٹنٹ پرفارمر قرار دیدیا تھا۔
تاہم اب کنگنا کا کہنا ہے کہ انھوں نے تو خود کا ٹام کروز سے کبھی موازنہ ہی نہیں کیا تھا۔
I never claimed, Nick Powell one of the biggest stunt directors in the world did …. sending a hug and some burnol … 🥰
پاکستان شوبز انڈسٹری کی نامور اور صف اول کی اداکارہ ماہرہ خان کا کہنا ہے کہ ماضی میں ہمایوں سعید کو دل پھینک سمجھتی تھی لیکن جب شوٹنگ کے دوران ہمایوں سعید سے ملی اور غلط فہمی دور ہوئی تو ہم دونوں کی بہت اچھی دوستی ہوگئی۔
باغی ٹی وی : اداکارہ ماہرہ خان اور ہمایوں سعید نے حال ہی میں اداکار و میزبان واسع چوہدری کے شو میں شرکت کی جہاں پر انٹرویو کے دوران ماہرہ خان نے کہا کہ جب میں ہمایوں سعید کے ساتھ پہلا ڈرامہ ’نیت‘ کررہی تھی تو میں نے ہمایوں کو صاف صاف کہہ دیا تھا کہ میں صرف کام سے کام رکھتی ہوں اور اس کے علاوہ نہ تو میری کسی چیز میں دلچسپی ہے اور نہ ہی میرا تعلق ہے۔
ماہرہ خان نے کہا کہ میں ڈرامہ ’نیت ‘ کی شوٹنگ کے بعد ہمایوں کے ساتھ برگر کھانے گئی تو میں نے ہمایوں سے کہا کہ میں نے سنا ہے کہ آپ لڑکیوں کے معاملے میں کافی دل پھینک آدمی ہیں-
ماہرہ نے مزید کہا کہ میری بات پر ہمایوں بہت ہنسے اور کہا کہ میں کبھی لڑکیوں کے پیچھے نہیں بھاگا بلکہ لڑکیاں ہمیشہ میرے پیچھے آئی ہیں۔
اداکارہ ماہرہ خان نے کہا کہ جب ڈرامہ سیریل ’نیت‘ کی شوٹنگ کے دوران ہمایوں سعید سے ملی اور غلط فہمی دور ہوئی تو ہم دونوں کی بہت اچھی دوستی ہوگئی۔
واضح رہے کہ اسی انٹرویو میں واسع چوہدری ماہرہ سے سوال کیا کہ حسن شہریار کے ساتھ آن لائن سیشن شو ہی آپ نے سالم کریم سے رشتے سے متعلق بات کی اور آپ نے حسن شہریار کے شو میں ہی یہ بات کرنے کا انتخاب کیوں کیا۔
میزبان کے سوال پر ماہرہ خان نے جواب دیتے ہوئے کہا کہ سچ کہیں تو میں نے حسن کے شو میں یہ بات کرنے کا فیصلہ نہیں کیا تھا حتٰی کہ میں نے کسی بھی شو میں اپنی ذاتی زندگی پر بات کرنا نہیں چاہتی۔ انہیں میں نے کہا بھی تھا کہ میں اس موضوع پر بات نہیں کروں گی۔
ماہرہ خان نے یہ بھی کہا تھا کہ میرے متعلق حسن شہریار کو کافی باتوں کا علم ہے اور انہیں وہ بات بھی پتا تھی اسی لیے جب بات سے بات نکلی تو اُن کی زبان سے نام بھی پھسل گیا اور سب کچھ بتا دیا۔ لیکن میں نے اُن کی بات کی تردید نہیں کی اس لیے کہ میں اُن لوگوں میں سے نہیں ہوں جو سچ کو تسلیم کرنے سے انکار کر دیتے ہیں۔
