Category: کھیل

انٹرنیشنل کرکٹ کونسل (آئی سی سی) نے چیمپئنز ٹرافی 2025 کی انعامی رقم کا اعلان کردیا ہے، جس میں گزشتہ ایڈیشن کے مقابلے میں 53 فیصد اضافہ کیا گیا ہے۔

آئی سی سی کے مطابق اس مرتبہ چیمپئنز ٹرافی میں مجموعی طور پر 69 لاکھ ڈالرز کی انعامی رقم تقسیم کی جائے گی۔ فاتح ٹیم کو 22 لاکھ 40 ہزار ڈالرز ملیں گے، جبکہ رنر اپ ٹیم کو 11 لاکھ 20 ہزار ڈالرز کی رقم دی جائے گی۔اس کے علاوہ، سیمی فائنل میں شکست کھانے والی دونوں ٹیموں کو 5 لاکھ 60 ہزار ڈالرز دیے جائیں گے۔ گروپ مرحلے کے ہر میچ میں کامیاب ہونے والی ٹیموں کو 34 ہزار ڈالرز کا انعام ملے گا۔

پانچویں اور چھٹے نمبر پر آنے والی ٹیموں کو 3 لاکھ 50 ہزار ڈالرز ملیں گے، جب کہ ساتویں اور آٹھویں نمبر پر آنے والی ٹیموں کو 1 لاکھ 40 ہزار ڈالرز دیے جائیں گے۔ تمام ٹیموں کو شرکت کے لیے 1 لاکھ 25 ہزار ڈالرز کی رقم بھی دی جائے گی۔

یہ بھی یاد رہے کہ آئی سی سی چیمپئنز ٹرافی 19 فروری سے 9 مارچ تک پاکستان کی میزبانی میں کھیلی جائے گی، جو کہ 1996 کے بعد پاکستان میں ہونے والا پہلا آئی سی سی ایونٹ ہوگا۔ میچز کراچی، لاہور اور راولپنڈی میں کھیلے جائیں گے، جب کہ انڈیا کی ٹیم اپنے میچز دبئی میں کھیلے گی۔چیمپئنز ٹرافی میں آٹھ ٹیمیں دو گروپوں میں تقسیم کی گئی ہیں۔ ہر گروپ سے دو ٹاپ ٹیمیں سیمی فائنل کے لیے کوالیفائی کریں گی۔

کراچی: پاکستان کرکٹ بورڈ (پی سی بی) کے چیئرمین محسن نقوی سے وزیر کھیل سندھ سردار محمد بخش مہر کی ملاقات ہوئی۔ ملاقات میں دونوں رہنماؤں نے چیمپئنز ٹرافی کے حوالے سے تفصیل سے تبادلہ خیال کیا۔

ملاقات کے دوران چیئرمین پی سی بی محسن نقوی اور وزیر کھیل سندھ سردار محمد بخش مہر نے چیمپئنز ٹرافی کے کامیاب انعقاد کے حوالے سے اہم امور پر بات چیت کی۔ وزیر کھیل سندھ نے اس موقع پر یقین دہانی کرائی کہ سندھ حکومت چیمپئنز ٹرافی کے انعقاد میں پی سی بی کو مکمل تعاون فراہم کرے گی۔چیئرمین پی سی بی محسن نقوی نے اس بات پر زور دیا کہ سندھ حکومت کا تعاون چیمپئنز ٹرافی کے ایونٹ کے لیے انتہائی اہمیت رکھتا ہے۔ ان کا کہنا تھا کہ اس تعاون سے ایونٹ کے کامیاب انعقاد میں مزید سہولت حاصل ہو گی اور کرکٹ کی ترقی کے لیے مثبت اثرات مرتب ہوں گے۔

اس ملاقات کے دوران وزیر کھیل سندھ سردار محمد بخش مہر نے سندھ کے کھلاڑیوں کو قومی ٹیم میں نظر انداز کرنے پر شکوہ بھی کیا۔ انہوں نے کہا کہ سندھ کے باصلاحیت کھلاڑیوں کو میرٹ پر قومی ٹیم میں جگہ دینی چاہیے تاکہ ان کی صلاحیتوں کو مناسب پلیٹ فارم فراہم کیا جا سکے۔سردار محمد بخش مہر نے مزید کہا کہ سندھ کے کھلاڑیوں کو آگے آنے کے بھرپور مواقع دئیے جائیں گے اور ان کی مکمل حمایت کی جائے گی۔

کراچی: پاکستان کرکٹ ٹیم کے بیٹر بابر اعظم نے حالیہ ایک ون ڈے انٹرنیشنل میچ کے بعد اپنی پرفارمنس اور ذمہ داریوں پر گفتگو کی۔

بابر اعظم کا کہنا تھا کہ انہیں "کنگ” کہہ کر پکارنا بند کیا جائے کیونکہ وہ ابھی خود کو "کنگ” نہیں مانتے۔ بابر نے کہا، "میں ابھی کوئی کنگ نہیں ہوں، جب کرکٹ چھوڑوں گا تب دیکھیں گے کہ کیا حاصل کیا ہے۔”پاکستان اور جنوبی افریقہ کے درمیان کراچی میں ہونے والے میچ کے بعد بابر اعظم نے گفتگو کرتے ہوئے کہا کہ ہر بار جب بھی بیٹنگ کے لئے میدان میں جاتا ہوں، میری کوشش ہوتی ہے کہ اچھا اسکور بناؤں اور ٹیم کے لیے فائدہ مند ثابت ہوں۔بابر اعظم نے مزید کہا کہ بدقسمتی سے وہ اننگز کو ختم نہیں کر پا رہے ہیں، حالانکہ جب اننگز چلتی ہیں تو وہ خود کو گیم اور پچ کے مطابق ڈھالنے کی کوشش کرتے ہیں۔ انہوں نے یہ بھی کہا کہ اوپننگ کرنا ان کے لئے ایک نیا رول ہے، اور یہ ذمہ داری ٹیم کی ڈیمانڈ پر انہیں دی گئی ہے۔

بابر نے اپنی گفتگو میں ٹیم کے کھلاڑیوں، خاص طور پر رضوان اور سلمان کی تعریف کی، جنہوں نے اچھی پرفارمنس دی اور اس سے ٹیم میں اعتماد بڑھا۔ بابر کا کہنا تھا کہ ٹیم کی کامیاب کارکردگی کا اثر ان کے رویے پر بھی پڑتا ہے اور اس سے پوری ٹیم کا مورال بلند ہوتا ہے۔

بابر نے اپنی پرفارمنس پر بات کرتے ہوئے کہا کہ وہ کوشش کرتے ہیں کہ بہتر کھیل پیش کریں، مگر اس بات پر افسوس ظاہر کیا کہ وہ سیٹ ہونے کے بعد لمبی اننگز نہیں کھیل پا رہے ہیں۔ "جو کچھ میں نے ماضی میں کیا ہے، وہ اب صرف ماضی کی بات ہے۔ اگر میں پچھلی پرفارمنس میں پھنسا رہوں گا تو آگے کچھ نہیں کر پاؤں گا۔ ہر دن ایک نیا دن ہوتا ہے اور ہر دن کا نیا پلان ہوتا ہے۔” بابر اعظم نے اس بات کا عہد کیا کہ وہ اپنی پرفارمنس پر کام کرتے رہیں گے اور ٹیم کی کامیابی کے لئے اپنی بھرپور کوششیں جاری رکھیں گے۔