Category: کھیل

قومی سلیکشن کمیٹی کی کاکول فزیکل ٹریننگ کیمپ میں شریک کرکٹرز سے اسلام آباد کے مقامی ہوٹل میں ملاقات ہوئی ہے، ملاقات میں کیمپ کے29 میں سے28 کھلاڑیوں نے شرکت کی۔ ملاقات میں سلیکشن کمیٹی نے کھلاڑیوں کو سلیکشن پالیسی کے سلسلے میں اعتماد میں لیا۔ کھلاڑیوں کو روٹیشن پالیسی اور نئے کھلاڑیوں کو مواقع دینے کے بارے میں اعتماد میں لیا گیا۔ ملاقات میں سلیکٹرز وہاب ریاض۔ محمد یوسف۔ عبدالرزاق ۔ اسد شفیق اور بلال افضل کے علاوہ حسن چیمہ اور عثمان واہلہ شریک تھے۔نیوزی لینڈ کے خلاف ٹی ٹوئنٹی سیریز کے لیے پاکستان کرکٹ ٹیم کا اعلان منگل کے روز لاہور میں ہوگا۔ نیوزی لینڈ کی ٹیم پانچ میچوں کی ٹی ٹوئنٹی سیریز کے لیے 14 اپریل کو پاکستان پہنچے گی۔پاکستان کرکٹ ٹیم بھی اسی شب اسلام آباد میں یکجا ہوجائے گی۔نیوزی لینڈ کے خلاف سیریز کے بعد ٹیم انگلینڈ اور آئرلینڈ کا دورہ کرے گی۔
پاکستان ٹیم اس سال امریکہ اور ویسٹ انڈیز میں ہونے والے آئی سی سی ٹی ٹوئنٹی ورلڈ کپ میں بھی حصہ لے گی۔

پاکستان کرکٹ ٹیم کے کپتان بابر اعظم نے عزم کا اظہار کرتے ہوئے کہا ہے کہ انشاءاللّٰہ ٹی ٹوئنٹی ورلڈکپ جیتیں گے۔ پاکستان کے وائٹ بال کے کپتان بابر اعظم نے کہا کہ لوگوں کو ان کے اسٹرائیک ریٹ سے کافی مسائل ہیں اور وہ ان کے مسائل کو نہیں سمجھتے کیونکہ وہ ایک مختلف کھلاڑی ہے جو حالات کے مطابق کھیلتا ہے۔ بابر اعظم ٹی ٹوئنٹی کرکٹ کے تقریباً تمام ریکارڈز میں اپنے نام ہونے کے باوجود اکثر میچ کی صورتحال کے مطابق نہ کھیلنے پر تنقید کا نشانہ بنتے ہیں اور ان پر اپنے اسٹرائیک ریٹ کو کم کرنے کا الزام لگایا جاتا ہے۔
لاہور میں صحافیوں سے گفتگو کرتے ہوئے پاکستان کرکٹ ٹیم کے کپتان بابراعظم نے کہا کہ کپتانی ذمہ داری ہے، سب کو ساتھ لے کر چلتا ہوں، انشاءاللّٰہ ٹی ٹوئنٹی ورلڈکپ جیتیں گے۔بابر اعظم نے کہا کہ بیٹنگ اور کپتانی کو الگ رکھتا ہوں، محنت اور لگن کامیابی کی بنیاد ہے، میرے رن آؤٹ ہونے پر والد بہت ناراض ہوتے ہیں، انہیں رن آؤٹ ناپسند ہے۔قومی ٹیم کے کپتان نے کہا کہ بھارت اور خصوصاً حیدرآباد میں جو استقبال ملا وہ حیران کن اور یادگار رہا، بھارت میں شیروانی دیکھنے کی خبر درست نہیں۔انکا کہنا تھا کہ ورلڈکپ میں افغانستان کے خلاف میچ ہارنے پر دکھ ہوا، اس دن سو نہیں سکا تھا۔بابراعظم نے یہ بھی کہا کہ کین ولیم سن کی کور ڈرائیو پسند ہے، پیٹ کمنز سب سے مشکل بولر ہیں، پاکستان کے بعد دوسری پسندیدہ ٹیم نیوزی لینڈ ہے۔قومی ٹی ٹوئنٹی ٹیم کے کپتان کا کہنا تھا کہ کیریئر کی ابتداء میں منصور رانا، اعجاز احمد اور علی ضیاء نے بہت مدد کی۔

قومی ٹیم کے 18 رکنی اسکواڈ میں عثمان خان، عماد وسیم اور محمد عامر بھی شامل ہوں گے، جبکہ عرفان نیازی کو بھی نیوزی لینڈ کے خلاف موقع دیا جانے کا امکان ہے۔پی سی بی سلیکشن کمیٹی نے نیوزی لینڈ کے خلاف پاکستانی ٹی ٹونٹی اسکواڈ کے حوالے سے مشاورت مکمل کرلی ہے، جس کے بعد اسکواڈ میں شامل ناموں کا اعلان قومی سلیکٹرز کی جانب سے منگل کو پریس کانفرنس میں کئے جانے کا امکان ہے۔اس کے علاوہ بابراعظم، صائم ایوب، رضوان، شاداب خان، افتخار احمد، اعظم خان، شاہین شاہ آفریدی، نسیم شاہ، زمان خان بھی اسکوڈ کا حصہ ہوں گے۔ابرار احمد اور اسامہ میر میں سے ایک کے اسکواڈ میں شامل ہونے کا امکان ہے، جبکہ حارث روف انجری کے باعث اسکواڈ کا حصہ نہیں ہوں گے۔ذرائع کا کہنا ہے کہ آغا سلمان، صاحبزادہ فرحان، فخر زمان، وسیم جونئیر، عباس آفریدی کی بھی شمولیت کا امکان ہے۔نیوزی لینڈ کے خلاف ٹیم مینجمنٹ کا اعلان بھی ایک دو روز میں متوقع ہے، ٹیم مینجمنٹ کے غیر ملکی ہیڈ کوچز کا اعلان 15 اپریل کے بعد کیا جائے گا۔ذرائع کے مطابق نیوزی لینڈ سیریز میں لوکل کوچز خدمات سرانجام دیں گے۔پاکستان ٹی ٹونٹی اسکواڈ کے کھلاڑی 14 اپریل کو اسلام آباد میں رپورٹ کریں گے، نیوزی لینڈ کی ٹیم 14 اپریل کی صبح اسلام آباد پہنچے گی، پاکستان اور نیوزی لینڈ کے درمیان پہلا ٹی ٹوئنٹی میچ 18 اپریل کو پنڈی کرکٹ اسٹیڈیم میں کھیلا جائے گا۔

پاکستان اور نیوزی لینڈ کے درمیان پانچ ٹی ٹوئنٹی انٹرنیشنل میچز کیلئے ٹکٹوں کی فروخت 6 اپریل سے شروع ہوگی۔ ٹکٹیں لاہور، اسلام آباد، راولپنڈی، گوجرانوالہ، سیالکوٹ، ملتان، پشاور اور کراچی میں مختلف ٹی سی ایس ایکسپریس سینٹرز پر دستیاب ہوں گی۔اس کے علاوہ پہلے سے بک شدہ آن لائن ٹکٹیں بھی انہی مراکز سے حاصل کی جا سکتی ہیں۔واضح رہے کہ اسٹیڈیم میں داخلے کی اجازت صرف درست فزیکل ٹکٹ کے ساتھ دی جائے گی جبکہ ای ٹکٹ اور ٹکٹ کی فوٹو کاپی قبول نہیں کی جائے گی۔ایک صارف کو ہر میچ کےلیے ایک شناختی کارڈ پر 10 ٹکٹ تک خریدنے کی اجازت ہے۔ شائقین صبح 9 بجے سے شام 5 بجے تک ایکسپریس سینٹرز سے ٹکٹ خود حاصل یا خرید سکتے ہیں۔

عثمان خان کو ای سی بی ایونٹس میں پانچ سال تک شرکت سے روک دیا گیا۔ بلے باز عثمان خان پر ایمریٹس کرکٹ بورڈ سے واجب الادا اپنی ذمہ داریوں کی خلاف ورزی کرتے ہوئے پایا گیا ہے۔ عثمان نے متحدہ عرب امارات کی ٹیم کے لیے کھیلنے کے اپنے فیصلے کے بارے میں ای سی بی کے سامنے غلط بیانی کی اور ای سی بی کی جانب سے انہیں فراہم کیے گئے مواقع کا استعمال کرتے پایا گیا ،
عثمان نے اس سال کے شروع میں ECB کی منظور شدہ انٹرنیشنل لیگ T20 سیزن 2 میں متحدہ عرب امارات کی کیٹیگری میں بطور مقامی کھلاڑی حصہ لیا تھا۔ ECB نے عثمان کے ساتھ ایک سال کی مدت کے لیے ECB روزگار کا معاہدہ بھی کیا۔ یہ اسے سیکیورٹی فراہم کرنے اور اس کی اہلیت کے معیار کو پورا کرنے کی اجازت دینے کے لیے کیا گیا تھا جس سے وہ بین الاقوامی کرکٹ میں متحدہ عرب امارات کی نمائندگی کر سکیں گے۔عثمان نے ای سی بی پر واجب الادا اپنی ذمہ داریوں کی خلاف ورزی کی ہے اور اس وجہ سے اسے ای سی بی سے منظور شدہ ٹورنامنٹس/لیگوں کے ساتھ ساتھ متحدہ عرب امارات میں کونسلز/اکیڈمیوں کے زیراہتمام پانچ سال کی مدت کے لیے منعقد ہونے والے مقامی ایونٹس میں شرکت کی اجازت نہیں ہوگی۔

شاہین شاہ آفریدی نے انسٹاگرام پر ایک ویڈیو اسٹوری شیئر کی ویڈیو میں لکھا ہے کہ مجھے کبھی ایسی پوزیشن میں مت لانا جہاں مجھے یہ دکھانا پڑے کہ میں کتنا ظالم اور بے رحم ہو سکتا ہوں! میرے صبر کا امتحان نہ لیں شاہین شاہ آفریدی کی پوسٹ میں یہ بھی لکھا تھا کہ شاید میں سب سے مہربان اور پیارا شخص ہوں جس سے آپ کبھی ملے ہوں لیکن ایک بار جب میں اپنی حد تک پہنچ جاتا ہوں تو آپ مجھے وہ کام کرتے دیکھیں گے جو کسی نے سوچا بھی نہیں ہوگا۔یاد رہے کہ گزشتہ سال بھارت میں 50 اوورز ورلڈکپ میں قومی ٹیم کی ناقص کارکردگی کے بعد بابراعظم تینوں فارمیٹ کی قیادت چھوڑنے کا اعلان کیا تھا۔
بعدازاں بورڈ نے شان مسعود کو ٹیسٹ کپتان جبکہ شاہین کو ٹی20 فارمیٹ کی ذمہ داری سونپ دی تھی جبکہ ون ڈے کیلئے کپتان کے نام کا اعلان نہیں کیا گیا تھا۔دوسری جانب بابراعظم کی دوبارہ واپسی نے ٹی20 ورلڈکپ سے قبل ٹیم میں گروپنگ کی خبروں کو ہوا دی ہے۔ جس کے بعد معنی خیز پیغام پر مبنی ویڈیو پیغام نے ٹیم میں یکجہتی پر سوالیہ نشان لگا دیا ہے۔