Category: کھیل

کراچی :کرکٹ کے بعد اب ہاکی کا سپرلیگ ٹورنا منٹ ،پاکستان کھیل کے میدان میں بھی ترقی کرنے لگا،اطلاعات کےمطابق سیکرٹری پي ايچ ايف ، آصف باجوہ نے پاکستان ہاکی فیڈریشن اس سال سپر ہاکی لیگ کرانے کا اعلان کرديا جبکہ اس سال ہاکی ٹیم کو نئے پواہنٹس سسٹم کے تحت چاليس سے زائد انٹرنیشنل میچزز بھي کھلائے جاہيں گے۔

نيشنل ہاکي اسٹيڈيم ميں چيف سليکٹر منظور جونئير کے ہمراہ پریس کانفرنس کرتے ہوئے آصف باجوہ کا کہنا تھا کہ موجودہ سال ہاکی کی بہتری کا سال ہے، رینکنگ سسٹم بدل گیا، پوائنٹس میچزز کی بنیاد پر ملتے ہیں کوشش ہے اس سال چالیس سے زائد میچزز کھیلیں ۔ انہوں نے کہا کہ اس سال ہاکی ٹیم سترہ نمبر پر نہیں بلکہ اوپر آئے گی۔

پاکستان ہاکی فیڈریشن اپنی سرگرمیاں بڑھا رہی یے۔ ڈومیسٹک لیول پر جونیئر اور سینئرز ہاکی ٹورنامنٹس کرانے کا پلان کیا گیا ہے۔ پاکستان ہاکی لیگ بھی اس سال ہر صورت ہوگی۔ پاکستان ہاکی فیڈریشن بہت جلد مکمل پلان اور شیڈول سے آگاہ کرے گی۔ ہم نے ہاکی ایونٹس کروائے اور آنے والے دنوں میں ویمن کے بھی ہاکی ایونٹس کروانے جارہےہیں۔ پاکستان ہاکی فیڈریشن کے پاس وسائل نہیں ہیں۔ پاکستان ہاکی فیڈریشن نیک نیتی سے کام کررہی ہے۔

لاہور:پاکستان میں کرکٹ کی بہتری کے لئے سکول اور کلب کی سطح پر زیادہ مقابلے ہونے چاہئیں۔ جتنا زیادہ نچلے درجے پراس کھیل کوفروغ ملے گا اس قدر نئے ستارے ابھرکرسامنے آئیں‌گے ، سٹار بلے باز کاکہناہے کارکردگی کی بنیاد پر قومی ٹیممیں واپس آؤں گا۔

باغی ٹی وی کےمطابق ان خیالات کا اظہار پاکستان کرکٹ ٹیم کے سابق وکٹ کیپراور سٹاربلے باز عمر اکمل نے لاہورمیں ایک میچ میں شاندار کامیابی کے بعد کیا ،قائد اعظم ٹرافی فائنل میں شاندار ڈبل سنچری سکور کرکے سینٹرل پنجاب کو کامیابی دلانے والے عمر اکمل لاہور پہنچتے ہی کلب کرکٹ کھیلنے کے لئے میدان میں پہنچ گئے ۔

باغی ٹی وی کے مطابق سٹار بلے باز نے لاہور چیلنج کپ میں مغل پورہ سپورٹس کلب کے خلاف میچ میں اپنی کلب کی ٹیم کی قیادت کی ان کا کہنا تھا کہ کرکٹ کی بہتری کے لئے سکول اور کلب کرکٹ پر زیادہ توجہ دینے کي ضرورت ہے

عمر اکمل نے پی ایس ایل کے تمام میچز کے پاکستان میں انعقاد پر خوشی کا اظہار کرتے ہوئے وزیر اعظم عمران خان اور پی سی بی حکام کو مبارک باد دی اور کہا کہ ملک میں بین الاقوامی کرکٹ کی بحالی بہت بڑی کامیابی ہے ۔

عمر اکمل نے اپنی بہترین کارکردگی کا کریڈٹ سینٹرل پنجاب کے ہیڈ کوچ اعجاز جونئیر کو دیتے ہوئے کہا کہ کوشش ہے کارکردگی کی بنیاد پر جلد ٹیم میں واپس آؤں۔

لاہور: جونئیرايشياء کپ ہاکی ٹورنامنٹ کے ليئے55کھلاڑیوں کا اعلان کرديا گيا۔اطلاعات کےمطابق ايشاء کپ ہاکی ٹورنامنٹ چار سے چودہ جون تک بنگلہ ديش ميں کھيلا جاے گا ٹورنامنٹ کی تياری کی کے ليے دو ہفتے کا ٹریننگ کمپ 12 جنوری سے نيشنل ہاکی اسٹيڈيم لاہورميں شروع ہوگا ۔

پي ايچ ايف نے ايشياء کپ کے ليے جونئير ہاکی ٹيم کے کھلاڑيوں اور منجمينٹ کا اعلان بھی کرديا ہے دانش کليم کو ہيڈ کوچ محمد عمران ،مدثر علی خان اور رانا ظہیر کو معاون کوچ مقرر کيا گيا ہے جبکہ عابد امين فزيکل ٹرئينر ہوں گے۔

تربيتی کيمپ ميں طلب کيے جانے والے کھلاڑيوں ميں چھ گول کیپرز وقار یونس۔ واپڈا عبد اللہ اشتیاق ، عبدالرحمن، علی رضا ،احمد ،شیخ عبد اللہ ،بارہ فل بیکس ميں ایم یاسر، وقاص بٹ، زوہیب سرور ، سلیمان بٹ، ارباز ، بلال رضا ، سميع اللہ خان ، سفیان ، ریحان بٹ ، حارث نصیر ،عثمان بشیر۔ ، محمدعثمان ، بارہ ہاف بیکس ميں دانش شاہ۔ مہران احمد ، مہران رسول ،عثمان ، عقیل احمد شامل کیے گئے ہیں

ذرائع کے مطابق دیگر کھلاڑیوں میں عبدالباسط ، معين شکیل، رضوان علی ،غضنفر علی ، عطا اللہ ، آصف حنیف ، عمربلال اور پچيس فارورڈز ميں رومان خان ، رانا واحید ، حماد انجم ، وہاب ، علی حمزہ، حنان شاہد۔ عامر سہیل، بشارت علی، ارشد لیاقت ، افراز ، وقار علی ، شعیب خان ،محسن ، شہباز ،رانا وليد،احسان الٰہی،زین اعجاز ، علی عزیز ،حسن سلام ،حماد ایاز ،ارباز ایاز ،عدیل لطیف ،بلاول ،مرتضیٰ یعقوب اور فہد شامل ہيں۔

لاہور:دادو سے تعلق رکھنے والے اسپنر عامرعلی آئی سی سی انڈر 19کرکٹ ورلڈکپ 2020 میں پاکستان کی نمائندگی کریں گے۔آئندہ سال 17 جنوری سے جنوبی افریقہ میں شروع ہونے والے ایونٹ میں سب سے زیادہ وکٹیں حاصل کرنے کا عزم رکھنے والےنوجوان کرکٹر کے کیرئیر کا سفر آسان نہیں تھا۔ سہولیات کے فقدان کے باوجود گرین شرٹ زیب تن کرنے کا خواب اس کٹھن سفر میں17سالہ کرکٹر کے لیے مشعل راہ بنا رہا۔

2015 میں پی سی بی پیپسی انڈر16دو روزہ کرکٹ ٹورنامنٹ سے اپنے کرکٹ کیرئیر کا آغازکرنے والے اسپنر عامر علی نے پہلے ہی ایونٹ میں 3 میچوں میں 19وکٹیں حاصل کرکے حریف کھلاڑیوں پر اپنی دھاک بٹھادی۔ دادو کے ایک مزدود کے بیٹے عامر علی نے برادرز کرکٹ کلب سے اپنے شوق کا آغاز کیا۔شہر میں گراؤنڈز کی کمی کے باعث عامر علی کو شوق کی تکمیل کے لیے گردونواح میں جا کرکرکٹ کھیلنا پڑتی تھی۔

گھریلو حالات کے باعث اہلِ خانہ عامر علی کو بھائی کے ساتھ درزی کا کام سیکھنے کے لیے گھر سے بھیجتے تو وہ دوستوں کے ہمراہ کرکٹ کھیلنے کے لیے میدان کا رخ کرلیتے تھے۔ نوجوان اسپنر عامر علی کاکہنا ہےکہ نامساعد حالات کے باعث والد مزدوری اور بھائی درزی کا کام کرتے ہیں مگر والد نے جلد ہی ان کی کھیل سے لگن کو بھانپتے ہوئے انہیں مکمل توجہ کرکٹ پر دینی کی ہدایت کردی تھی۔

عامر علی نے پی سی بی پیپسی انڈر 16دو روزہ کرکٹ ٹورنامنٹ2016 کے 4میچوں میں 19 وکٹیں حاصل کیں۔ 17سالہ اسپنر نےرواں سال قومی انڈر 19 تین روزہ کرکٹ ٹورنامنٹ کے 4 میچوں میں 12.86کی اوسط سے 28 وکٹیں حاصل کیں۔ وہ ایونٹ میں سب سے زیادہ وکٹیں حاصل کرنے والے باؤلرز میں تیسرے نمبر پر تھے۔

حالیہ سیزن میں قومی انڈر 19 ایک روزہ کرکٹ ٹورنامنٹ کے 4میچوں میں 7وکٹیں حاصل کرنے والے عامر علی اس سے قبل دورہ جنوبی افریقہ میں قومی انڈر 19 کرکٹ ٹیم کی جانب سے سب سے زیادہ وکٹیں حاصل کرنے والے باؤلر قرار پائے تھے۔ انہوں نے سیریز میں شامل 7میچوں میں 13وکٹیں حاصل کی تھیں۔ اے سی سی انڈر 19 ایشیا کپ 2019میں عامر علی نے3میچوں میں 4وکٹیں حاصل کیں۔

سترہ سالہ اسپنر عامر علی کا کہنا ہے کہ ان کا تعلق ایک ایسے علاقے سے ہےجہاں کھیل کی سہولیات محدود ہیں تاہم انہوں نے حالات سے ہار ماننے کی بجائے ہمیشہ مشکلات سے لڑنا سیکھا ہے۔ انہوں نےکہا کہ قومی انڈر 19 کرکٹ ٹیم کا حصہ بننا ان کے لیے اعزاز کی بات ہے مگر ان کی خواہش دادو کا پہلاکرکٹر بن کر پاکستان کرکٹ ٹیم کی نمائندگی کرنا ہے۔

عامر علی نے کہا کہ ان کے آئیڈیل کرکٹر سری لنکا کے سابق اسپنر رنگنا ہیراتھ ہیں اور انہوں نے اسپن باؤلنگ کا یہ ہنر بین الاقوامی میچوں مین ان کی ویڈیوز دیکھ کر سیکھا ہے۔ انہوں نے کہاکہ آئی سی سی انڈر 19 ورلڈکپ، قومی کرکٹ ٹیم میں جگہ بنانے کی ایک سیڑھی ہے اور وہ اس ایونٹ میں بہترین کارکردگی کا مظاہرہ کرنے کے لیے تیار ہیں۔نوجوان اسپنر نے کہا کہ وہ اپنی کارکردگی سے قومی انڈر 19کرکٹ ٹیم کی جیت میں کلیدی کردار ادا کرنے کی ہر ممکن کوشش کریں گے۔

اسکواڈ(یکم ستمبر 2000 یا اس کے بعد پیدا ہونے والے کھلاڑیوں کا انتخاب کیا جاسکتا تھا):

اوپنرز: عبدالواحد بنگلزئی (کوئٹہ)، حیدر علی (راولپنڈی) اور محمد شہزاد (ملتان)۔

مڈل آرڈرز: محمد حارث (پشاور)،محمد حریرہ (سیالکوٹ) اور محمد عرفان خان (لاہور)۔

وکٹ کیپر: روحیل نذیر(کپتان)۔

آلراؤنڈرز: عباس آفریدی( پشاور)، فہد منیر (لاہور)، قاسم اکرم (لاہور)۔

اسپنرز: عامر علی (لاڑکانہ) اور آرش علی خان (کراچی)۔

فاسٹ باؤلرز: عامر خان (پشاور)، محمد وسیم جونیئر (شمالی وزیرستان) اور طاہر حسین (ملتان)۔

ٹیم منیجمنٹ:

اعجاز احمد ( ہیڈ کوچ کم منیجر)، راؤ افتخار انجم (باؤلنگ کوچ)، عبدالمجید(اسسٹنٹ کوچ)، حافظ نعیم الرسول (فزیو تھراپسٹ)، صبور احمد (ٹرینر) ، عثمان ہاشمی( اینالسٹ) ،عماد حمید (میڈیا منیجر) اورکرنل (ر)عثمان رفعت انصاری( سیکورٹی منیجر) ۔

شیڈول:

19جنوری 2020: پاکستان بمقابلہ اسکاٹ لینڈ
22جنوری 2020: پاکستان بمقابلہ زمباوے
24جنوری 2020: پاکستان بمقابلہ بنگلہ دیش
9فروری 2020: فائنل

شائقین کرکٹ کے لیے خوشخبری، پی ایس ایل کی کمنٹری اب ریڈیو پاکستان پر بھی ہوگی میسر

باغی ٹی وی :کرکٹ اور ریڈیو کا پرانا تعلق پھر بحال ہونے جا رہا، شائقین کرکٹ پاکستان سپر لیگ (پی ایس ایل) کے تمام میچز کی کمنٹری ریڈیو پاکستان پر براہ راست سن سکیں گے۔

سپر کرکٹ میلے کے سنسنی خیز لمحات سے شائقین کو با خبر رکھنے کے لیے ریڈیو پاکستان، ایف ایم ون او ون اور اسلام آباد یونائیٹڈ کے درمیان تمام میچز کی براہ راست کمنٹری کے حوالے سے مفاہمتی یاداشت پر دستخط پر ہو گئے۔
ڈائریکٹر جنرل ( ڈی جی) ریڈیو پاکستان ثمینہ وقار نے اس حوالے سے تقریب سے خطاب کرتے کہا کہ کرکٹ اور ریڈیو کا ساتھ پرانا ہے، کرکٹ کی واپسی ریڈیو کمنٹری کی واپسی ہے۔

انہوں نے کہا کہ اس بار پارٹنر شپ اسلام آباد یونائیٹد سے ہوئی ہے، اگلی دفعہ کسی اور ٹیم کے ساتھ ہو گی، ہم پاکستان کے میچز کی کمنٹری کریں گے۔سابق اسپنر سعید اجمل نے پی ایس ایل میچز کی تقسیم کو ایشو نہ بنانے کا مشورہ دیتے ہوئے کہا کہ میچز کسی بھی شہر میں ہوں وہ ہے تو پاکستان۔

انہوں نے کہا کہ میچز کہیں بھی ہوں اس پر مسئلہ نہیں ہونا چاہیے۔ لوگ کراچی اور لاہور کی بحث سے نکلیں، سارے شہر ہی اپنے ہیں۔
سعید اجمل کا کہنا تھا کہ پاکستان میں اسپنرز کی کمی ہے، ٹیم میں دو سے تین نوجوان کھلاڑی موجود ہیں، جنہیں گروم کرنے میں کوشاں ہوں

حارث رؤف آسٹریلیا میں اپنا لوہا منوا رہا

باغی ٹی وی : قومی سکواڈکا حصہ نہ بننے والے حارث رؤف کی جانب سے آسٹریلیا میں جاری بگ بیش ٹی ٹوئنٹی لیگ میں شاندار کارکردگی کا سلسلہ جاری ہے۔

راولپنڈی سے تعلق رکھنے والے نوجوان تیز گیند باز نے میلبرن اسٹارز کی نمائندگی کرتے ہوئے سڈنی تھنڈرز کے خلاف تین وکٹیں حاصل کیں۔اس طرح وہ اب تک ٹورنامنٹ میں 10 وکٹوں کے ساتھ سب سے زیادہ وکٹیں حاصل کرنے والے گیند باز بن گئے ہیں۔دوسری جانب سماجی رابطے کی ویب سائٹ ٹوئٹر پر حارث رؤف کی کارکردگی کو سراہا جا رہا ہے۔

کرکٹ کی معروف ویب سائٹ کرک انفو نے قومی ٹیم کے کوچ و چیف سیلکٹر مصباح الحق کو مخاطب کرتے ہوئے حارث کی جانب توجہ دلائی ہے۔آسٹریلیا میں ان کی بہترین کارکردگی پر ان ایک فالوور نے خوب تبصرہ کیا

Haris Rauf was only a tapeball cricketer and nowhere part of any PCB level. His appearance in LQ open trials was by chance which took him to #BBL09 now

Pakistan is rich in talent. All that talent needs is a pathway. Reason why PCB has to build strong grassroot cricket structure!

— Arfa Feroz Zake (@ArfaSays_) January 2, 2020

لاہور:پاکستان سپرلیگ 2020 کا شیڈول جاری،کون کس سے ٹکرائے گا یہ بھی بتادیا،اطلاعات کےمطابق پاکستان سپر لیگ 2020 کا شیڈول جاری کردیا گیا، کراچی کنگز اپنا پہلا میچ 21 فروری کو پشاور زلمی کے ساتھ کھیلے گی۔

باغی ٹی وی کے مطابق پاکستان سپر لیگ کے پانچویں سیزن کا شیڈول جاری کردیا گیا، تمام میچز پاکستان میں کھیلے جائیں گے۔

پی ایس ایل 2020 کا آغاز 20 فروری سے ہوگا، 4 مقامات پر 34 میچز کھیلے جائیں گے، ایونٹ کے 14 میچز لاہور، 9 کراچی، 8 راولپنڈی اور 3 ملتان میں ہوں گے۔

دونوں ایلی منیٹر میچز بھی لاہور کے قذافی اسٹیڈیم میں کھیلے جائیں گے جبکہ پی ایس ایل 5 کا فائنل بھی 22 مارچ کو قذافی اسٹیڈیم لاہور میں ہوگا۔ ٹکٹوں کی فروخت 20 جنوری سے شروع ہوگی،پاکستان کرکٹ بورڈ کی طرف سے جاری کردی شیڈول کےمطابق ایونٹ کا افتتاحی میچ کراچی میں کوئٹہ گلیڈی ایٹرز اور اسلام آباد یونائیٹڈ کے درمیان کھیلا جائے گا۔

پاکستان سپر لیگ کے میچزجوکراچی میں کھیلے جائیں گے ان کا بھی شیڈول بتا دیا گیا ہے،کراچی کنگز اپنا پہلا میچ 21 فروری کو پشاور زلمی کے ساتھ کراچی نیشنل اسٹیڈیم میں کھیلے گی۔ کراچی کنگز کے 2 میچز لاہور، 2 راولپنڈی اور ایک ملتان میں ہوگا، اپنے ہوم گراؤنڈ پر کراچی کنگز 4 میچز کھیلے گی۔

کراچی کنگز اپنا دوسرا میچ 23 فروری کو کوئٹہ گلیڈی ایٹرز سے کراچی میں کھیلے گی، تیسرا میچ 28 فروری کو ملتان سلطانز سے ملتان میں ہوگا، جبکہ چوتھا میچ یکم مارچ کو اسلام آباد یونائیٹڈ کے ساتھ راولپنڈی میں ہوگا۔

کراچی کنگز کا پانچواں میچ پشاور زلمی سے 2 مارچ کو راولپنڈی میں جبکہ اگلا میچ 6 مارچ کو ملتان سلطانز سے لاہور میں ہوگا۔اسی حوالے سے بات کرتے ہوئے پاکستان کرکٹ بورڈ کے چیئرمین احسان مانی کا کہنا ہے کہ پورا پی ایس ایل پاکستان میں ہونا پی سی بی کی کامیابی ہے، پانچویں ایڈیشن میں 36 غیر ملکی کھلاڑی شرکت کریں گے۔

انہوں نے کہا کہ یہ لیگ پاکستان کی ہے اور اس کے تمام میچز ہوم گراؤنڈز پر ہی کھیلے جانے چاہیئے۔ گزشتہ ایڈیشن کے اختتام پر پاکستانی عوام سے وعدہ کیا تھا کہ پی ایس ایل 2020 کے تمام میچز پاکستان میں ہوں گے اور آج وہ وعدہ وفا ہو رہا ہے۔

نئی دہلی :11 سالہ بھارتی طالبہ نے تیراندازی میں ورلڈ ریکارڈ قائم کردیا،بھارتی ذرائع ابلاغ کے مطابق حیدرآباد کی ایک 11 سالہ طالبہ نے تیر اندازی میں ایسا کارنامہ سرانجام دیا ہےکہ اس سے پہلے اس عمر آج تک کوئی نہ دے سکا

باغی ٹی وی کے مطابق کلاس ششم کی طالبہ نے اپنی ہم عصر دیگرطالبات سے ایک مقابلہ کیا جس میں دس میٹر دور سے 15 منٹ اور15 سیکنڈز میں 76 تیرنشانے پرلگانے کا فیصلہ کیا .آنجیانی نامی طالبہ نے 8 منٹس میں 136تیزنشانے پرلگا کر ورلڈریکارڈ قائم کیا تو ساتھیوں اورسکول کے دوسرے عملے کویقین نہیں آرہا تھا

11 سالہ طالبہ آنجیانی نے انڈر14 65 اضلاع کے سکولوں کے کھلاڑیوں کوہراکرسب کوحیران کردیا . یہ بھی معلوم ہوا ہےکہ ، اس بچی کوتھائی لینڈ میں شروع ہونے والے ایشیائی کھیلوں میں‌بھی بھیجا جائے گا،بھارتی سپورٹس حکام کا کہنا ہےکہ انہیں‌امید ہےکہ یہ بچی یہ عالمی اعزازات جیت کروطن واپس پہنچے گی

قائداعظم ٹرافی کی کارکردگی رپورٹ آگئی

باغی ٹی وی رپورٹ : ڈومیسٹک سیزن 20-2019 کے آغاز سے قبل پاکستان کرکٹ بورڈ نےڈومیسٹک اسٹرکچر کو ازسر نو ترتیب دیا۔ 14 ستمبر سے شروع ہونے والے نئے ڈومیسٹک اسٹرکچر کا آغاز پریمیئر کرکٹ ٹورنامنٹ قائداعظم ٹرافی سے ہوا۔

ٹورنامنٹ میں چھ کرکٹ ایسوسی ایشنز کی ٹیموں نے شرکت کی، جس سے کھیل کے معیار میں واضح بہتری دیکھی گئی۔

قائداعظم ٹرافی میں نوٹاس قانون کو پہلی بار متعارف کروایا گیاجہاں ہوم اینڈ اوے کی بنیاد پر کھیلے گئے ایونٹ میں تمام ٹیموں کوقانون کے استعمال کے لیے برابر مواقع فراہم کئے گئے۔

رواں سیزن قائداعظم ٹرافی میں کوکابورا کا گیند استعمال کیا گیا اور اس کی بڑی وجہ بین الاقوامی کرکٹ میں اپنے تمام میچز کوکا بورا کے گیند کا استعمال ہے۔

اس گیند سے وکٹ حاصل کرنے کے لیے باؤلرز کو زیادہ محنت درکار ہوتی ہے۔ سیم زیادہ ابھری ہونے کی وجہ سے فاسٹ باؤلرزکوکوکابورا کے گیند سے اضافی مدد نہیں ملتی اور اسپنرز کا میچ میں کردار اہم ہوجاتا ہے۔

اعداد و شمار کے مطابق سیزن 13-2012 کے بعد پہلی مرتبہ ہوا ہے کہ پاکستان کے ڈومیسٹک سیزن میں سب سے زیادہ وکٹیں کسی اسپنر نے حاصل کی ہیں۔ اس سال ناردرن کے اسپنر نعمان علی 10 میچوں میں 54 وکٹیں حاصل کرکے ایونٹ کے بہترین باؤلر قرار پائے۔

رواں سال قائداعظم ٹرافی میں بلے بازوں کو زیادہ دیر وکٹ پر ٹھہرتے دیکھا گیا جس کی وجہ سے ایونٹ میں پہلی اننگز کا اوسط اسکور 422 رہا جو گذشتہ سال263 تھا۔

بیٹنگ :

رواں سال ٹیموں کی تعداد کم ہونے کے باعث کل میچز کی تعداد بھی کم رہی ۔ گذشتہ سال 69 میچوں پر مشتمل ایونٹ میں رواں سال کل 31 میچز کھیلے گئے مگر قائداعظم ٹرافی 20-2019 میں ڈبل سنچریوں کی تعداد گذشتہ سال سے دوگنا زیادہ رہی۔

گذشتہ سال ایونٹ میں 4 اور رواں سال 8 ڈبل سنچریاں بنیں، جس میں سنٹرل پنجاب، ناردرن اور سندھ کے 2،2 جبکہ سدرن پنجاب اور بلوچستان کی ٹیم میں شامل ایک، ایک کھلاڑی نے ڈبل سنچری اسکور کی۔

رواں سال ایونٹ میں 77 سنچریاں اسکور ہوئیں جس کی تعداد گذشتہ سال 72 تھی۔ حالیہ ایونٹ میں سنٹرل پنجاب کے بلے بازوں نے 18 سنچریاں اسکور کیں۔

ایونٹ میں شامل چار بلے بازوں نے سب سے زیادہ ، 4،4 مرتبہ سنچریاں اسکور کیں۔ ان کھلاڑیوں میں بلوچستان کے عمران بٹ، سدرن پنجاب کے سمیع اسلم، خیبرپختونخوا کے اشفاق احمد اور سندھ کے فواد عالم شامل ہیں۔

ایونٹ کے دوران ایک اننگز میں سب سے زیادہ انفرادی اسکور سندھ کے عابد علی کے نام رہا۔ انہوں نے بلوچستان کے خلاف 249 رنز کی ناقابل شکست اننگز کھیلی۔

اظہر علی، بابر ا عظم، سلمان بٹ، کامران اکمل ، عمر اکمل اور احمد شہزاد پر مشتمل مضبوط بیٹنگ لائن اپ کی موجودگی میں ایونٹ کی ایک اننگز میں سب سے زیادہ اسکور سنٹرل پنجاب نے بنایا۔ ٹورنامنٹ کے فائنل میں سنٹرل پنجاب نے ناردرن کے خلاف پہلی اننگز میں 8 وکٹوں کے نقصان پر 675 رنز بناکر اننگز ڈکلیئر کردی۔

ایونٹ کا سب سے کم اسکور بھی سنٹرل پنجاب نے ہی اسکور کیا۔ ایونٹ کے واحد میچ میں شکست کھانے والی سنٹرل پنجاب کی ٹیم نویں راؤنڈ میں خیبرپختونخوا کے خلاف 113 رنز بناکر آؤٹ ہوئی۔

سب سے زیادہ اسکور:

ایونٹ کے 9 میچوں میں 62.27کی اوسط سے 934 رنز بنانے والے بلوچستان کے عمران بٹ ایونٹ کے بہترین بیٹسمین قرار پائے۔ 24سالہ بیٹسمین نے ایونٹ میں چار سنچریاں، تین نصف سنچریاں اور ایک ڈبل سنچری اسکور کی۔

سنٹرل پنجاب کے کامران اکمل اور سلمان بٹ ایونٹ میں سب سے زیادہ رنز بنانے والے بلے بازوں کی فہرست میں بالترتیب دوسرسے اور تیسرے نمبر پر موجود رہے۔ کامران اکمل نے ایونٹ کے 11 میچوں میں906 اور سلمان بٹ نے 10 میچوں میں 901 رنز بنائے۔دونوں کھلاڑیوں نے ٹورنامنٹ میں 3،3 سنچریاں اور 3،3 نصف سنچریاں بنائیں۔بائیں ہاتھ کے بلے باز سلمان بٹ نے ایونٹ میں ایک ڈبل سنچری بھی اسکور کی۔

ٹورنامنٹ کے ٹاپ 10 بہترین کھلاڑیوں میں سب سے بہتر اوسط رکھنے والے بلے باز سمیع اسلم کا فہرست میں چوتھا نمبر ہے۔انہوں نے 78.44کی اوسط سے 864 رنز بنائے۔سدرن پنجاب کے اوپنر نے قائداعظم ٹرافی کے پہلے راؤنڈ میں سنٹرل پنجاب کے خلاف ڈبل سنچری اسکور کی تھی۔

سب سے زیادہ رنز بنانے والے بلے بازوں کی فہرست میں ناردرن کے فیضان ریاض کا پانچواں نمبر ہے۔ ٹورنامنٹ کے وسط میں سیکنڈ الیون سے فرسٹ الیون میں پروموٹ ہونے والے بیٹسمین نے ایونٹ میں 857 رنز بنائے۔

اسپنرزکی بالادستی:

باؤلنگ کے شعبے میں بھی ایونٹ کی فاتح سنٹرل پنجاب کا پلڑا بھاری رہا۔ ایونٹ میں 26مرتبہ کسی باؤلر نے پانچ وکٹیں حاصل کرنے کا کارنامہ انجام دیاجس میں سنٹرل پنجاب کے اسکواڈ میں شامل کھلاڑیوں کے نام سات مرتبہ سامنے آئے۔ بلال آصف اور اعزاز چیمہ نے 2،2 مرتبہ پانچ وکٹیں حاصل کیں۔

ایونٹ کے بہترین باؤلر کا ایوارڈ حاصل کرنے والے اسپنر نعمان علی نے ایونٹ میں 5 مرتبہ یہ کارنامہ انجام دیا۔ 54وکٹیں حاصل کرنے والے نعمان علی کی ایونٹ میں بہترین باؤلنگ 71 رنز کے عوض 8 کھلاڑیوں کو پویلین کی راہ دکھانا تھا۔

ٹورنامنٹ میں سب سے زیادہ وکٹیں حاصل کرنے والوں کی فہرست میں نعمان علی سمیت 5 ابتدائی باؤلرز کا تعلق بھی اسپن ڈیپارٹمنٹ سے ہی ہے۔ فہرست میں دوسرا نام سنٹرل پنجاب کے بلال آصف اور تیسرا ظفر گوہر کا ہے۔ بلال آصف نے ایونٹ میں 43 اور ٹورنامنٹ کے بہترین کھلاڑی کا ایوارڈ حاصل کرنے والے ظفر گوہر نے 38 وکٹیں حاصل کیں۔

بلوچستان کے محمد اصغر 27 اور خیبرپختونخوا کے ساجد خان 25 وکٹیں حاصل کرکے اس فہرست میں بالترتیب چوتھے اور پانچویں نمبر پر موجود رہے۔

ٹورنامنٹ کے دوران ایک میچ میں سب سے بہترین باؤلنگ سنٹرل پنجاب کے ظفر گوہر نے کی۔ انہوں نےناردرن کے خلاف 133 رنز دے کر 11 وکٹیں حاصل کیں۔

بہترین وکٹ کیپر ز:

قائداعظم ٹرافی 20-2019 میں سنٹرل پنجاب کی فتح میں کلیدی کردار ادا کرنے والے وکٹ کیپر کامران اکمل نے ایونٹ کے دوران وکٹوں کے پیچھے 41 شکار کیے۔ انہوں نے 11 میچوں میں 38 کیچز تھامنے کے ساتھ ساتھ 3 کھلاڑیوں کو اسٹمپ آؤٹ کرکے بہترین وکٹ کیپر کا ایوارڈ حاصل کیا۔

اس فہرست میں دوسرا نام کامران اکمل کے بھائی عدنان اکمل کا ہے۔ سدرن پنجاب سے تعلق رکھنے والے عدنان اکمل نے ٹورنامنٹ کے دوران وکٹوں کے پیچھے 33 شکار کیے۔سندھ کے سرفرازا احمد وکٹوں کے پیچھے 26 شکار کرکے تیسرے بہترین وکٹ کیپر رہے۔

بلوچستان کے عمران بٹ نے بطور فیلڈر سب سے زیادہ کیچز تھامے۔ ٹورنامنٹ کے دوران ان کےکیچز کی کل تعداد 16 رہی۔

ٹیموں کی کارکردگی :

سنٹرل پنجاب: 4 فتوحات، ایک شکست اور 6 ڈراز
ناردرن: 3 فتوحات، 3 شکستیں اور 5ڈراز
خیبرپختونخوا: 2 فتوحات، 1شکست اور 7ڈراز
سدرن پنجاب: 1فتح، کوئی شکست نہیں اور 9ڈراز
سندھ: کوئی فتح نہیں، 2 شکستیں اور 8ڈراز
بلوچستان: کوئی فتح نہیں، 3 شکستیں اور 7ڈراز

سب سے زیادہ اسکور:

سنٹرل پنجاب: فائنل میں ناردرن کے خلاف 8 وکٹوں کے نقصان پر 675 رنز پر اننگز ڈکلیئر کرنا
سندھ: بلوچستان کے خلاف 515 رنز کا مجموعہ
بلوچستان:خیبرپختونخوا کے خلاف8 وکٹوں کے نقصان پر 553 رنز پر اننگز ڈکلیئر کرنا
سدرن پنجاب :سندھ کے خلاف 546 رنز کا مجموعہ
ناردرن: سدرن پنجاب کے خلاف 6 وکٹوں کے نقصان پر550پر اننگز ڈکلیئر کرنا
خیبرپختونخوا: ناردرن کے خلاف9و کٹوں کے نقصان پر 526 پر اننگز ڈکلیئر کرنا

لاہور: نسیم شاہ کا نام قومی انڈر 19 کرکٹ ٹیم سے واپس محمد وسیم کو شامل کردیا گیا ،باغی ٹی وی کےمطابق پاکستان کرکٹ بورڈ نے آئی سی سی انڈر 19 کرکٹ ورلڈ کپ کے لیے اعلان کردہ قومی انڈر 19 اسکواڈ سے فاسٹ باؤلر نسیم شاہ کا نام واپس لے لیا ہے۔ ایونٹ 17 جنوری سے 9 فروری تک جنوبی افریقہ میں جاری رہے گا۔

سلیم جعفر کی سربراہی میں کام کرنے والی قومی جونیئر سلیکشن کمیٹی نے نسیم شاہ کے متبادل کے طور پر محمد وسیم جونیئر کو اسکواڈ میں شامل کرلیا ہے۔ محمد وسیم جونیئر کا تعلق خیبرپختونخوا سے ہے۔

اس سے قبل محمد وسیم جونیئر اے سی سی انڈر 19 ایشیا کپ اور دورہ جنوبی افریقہ میں پاکستان انڈر 19 کرکٹ ٹیم کی نمائندگی کرچکے ہیں۔ نوجوان فاسٹ باؤلر نے دونوں ایونٹس میں 3،3 وکٹیں حاصل کی تھیں۔ دورہ سری لنکا پر محمد وسیم جونیئر نے 7 کھلاڑیوں کو پویلین کی راہ دکھائی تھی۔

محمد وسیم ایک روزہ قومی انڈر 19 کرکٹ ٹورنامنٹ کا ایک میچ کھیل چکے ہیں، جس میں انہوں نے 3 وکٹیں حاصل کیں جبکہ تین روزہ ٹورنامنٹ کے تین میچوں میں شرکت کرنے والے فاسٹ باؤلر نے ایونٹ میں سات کھلاڑیوں کو آؤٹ کیا۔

چیف ایگزیکٹو پی سی بی وسیم خان کا کہنا ہےکہ آئی سی سی انڈر 19 کرکٹ ورلڈکپ نوجوان کھلاڑیوں کے لیے اعلیٰ کارکردگی کا مظاہرہ کرنے اور بین الاقوامی کرکٹ میں جگہ بنانے کا ایک شاندار موقع ہے۔ فاسٹ باؤلر نسیم شاہ اس کی بہترین مثال ہیں۔

وسیم خان نے کہا کہ پاکستان کرکٹ بورڈ نے مثبت حکمت عملی کو اپناتے ہوئے نسیم شاہ کا نام ایونٹ کے لیے اعلان کردہ اسکواڈ سے واپس لے کر ایک نئے کھلاڑی کو صلاحیتیں دیکھانے کا موقع دیا ہے۔ انہوں نے کہا کہ قومی جونیئر سلیکشن کمیٹی کی جانب سے آئی سی سی انڈر 19 کرکٹ ورلڈکپ کے لیے بہترین کھلاڑیوں پرمشتمل اسکواڈ کا اعلان کیا گیا تھا لہٰذا اس تبدیلی سے ایونٹ میں پاکستان کی کارکردگی متاثر نہیں ہوگی۔

چیف ایگزیکٹو پی سی بی کا کہنا ہے کہ نسیم شاہ اب قومی کرکٹ ٹیم کا حصہ ہیں اور باؤلنگ کوچ وقار یونس کی زیرنگرانی اپنی باؤلنگ میں مزید بہتری کے لیے کام جاری رکھیں گے۔ انہوں نے واضح کیا کہ نسیم شاہ بنگلہ دیش کے خلاف سیریز کے لیے قومی ٹیم کو دستیاب ہوں گے۔

قومی انڈر 19 کرکٹ ٹیم اس سے قبل 2004 بنگلہ دیش اور 2006 سری لنکا میں منعقدآئی سی سی انڈر 19 ورلڈکپ کی فاتح رہ چکی ہے۔ پاکستان ایونٹ کے 3 ایڈیشنز میں رنرزاپ بھی رہ چکا ہے۔

24 روز تک جاری رہنے والے ایونٹ میں 16 ممالک کی ٹیمیں شرکت کریں گی۔آئندہ سال17 جنوری سے شروع ہونے والے ایونٹ کا فائنل بینونی کے جے پی مارک اوول میں کھیلا جائے گا۔ ایونٹ کے فاتح کا فیصلہ9 فروری کو ہوگا۔

ایونٹ میں پاکستان کا پہلا میچ 19جنوری کوسکاٹ لینڈ کے خلاف پوچیف اسٹروم میں کھیلاجائے گا۔

قومی انڈر 19 کرکٹ ٹیم ایونٹ میں ا پنا دوسرا میچ22 جنوری کو زمباوے کے خلاف پوچیف اسٹروم میں کھیلے گی۔

گروپ مرحلے میں پاکستان کا آخری میچ بنگلہ دیش کے خلاف ہوگا۔ دونوں ٹیمیں 24 جنوری کو پوچیف اسٹروم میں مدمقابل آئیں گی۔

آئی سی سی انڈر 19 کرکٹ ورلڈکپ 2020 کے لیے قومی انڈر 19 کرکٹ ٹیم کا تربیتی کیمپ یکم سے نو جنوری 2020 تک نیشنل کرکٹ اکیڈمی لاہور میں جاری رہے گا۔ قومی انڈر 19 اسکواڈ 10 جنوری کوجنوبی افریقہ کے لیے روانہ ہوگا۔لاہورمیں آئندہ چند روز کے لیے میڈیا کوریج کی تفصیلات مندرجہ ذیل ہیں:

یکم جنوری بروزبدھ:

• دوپہراڑھائی بجے: ہیڈ کوچ قومی انڈر 19 کرکٹ ٹیم اعجاز احمد نیشنل کرکٹ اکیڈمی لاہور میں میڈیا سے گفتگو کریں گے

3جنوری بروزجمعہ:

• دوپہراڑھائی بجے: قومی انڈر 19 کرکٹ ٹیم کے بیٹسمین حیدر علی نیشنل کرکٹ اکیڈمی لاہور میں میڈیا سے گفتگو کریں گے

6جنوری بروزپیر:

• دوپہراڑھائی بجے: قومی انڈر 19 کرکٹ ٹیم کےاسپنرآرش علی خان نیشنل کرکٹ اکیڈمی لاہور میں میڈیا سے گفتگو کریں گے

7جنوری بروزمنگل:

• دوپہراڑھائی بجے: قومی انڈر 19 کرکٹ ٹیم کےآلراؤنڈرمحمد عباس آفریدی نیشنل کرکٹ اکیڈمی لاہور میں میڈیا سے گفتگو کریں گے

8جنوری بروزبدھ:

• دوپہراڑھائی بجے: قومی انڈر 19 کرکٹ ٹیم کےبیٹسمین محمد عرفان خان نیشنل کرکٹ اکیڈمی لاہور میں میڈیا سے گفتگو کریں گے

9جنوری بروزجمعرات:

• دوپہراڑھائی بجے: قومی انڈر 19 کرکٹ ٹیم کےکپتان ر وحیل نذیر نیشنل کرکٹ اکیڈمی لاہور میں میڈیا سے گفتگو کریں گے

10جنوری بروز جمعہ:

• قومی انڈر 19 کرکٹ ٹیم کی جنوبی افریقہ روانگی