Category: کھیل

لندن (اے پی پی) انگلش ٹی 20 لیگ کے کوارٹر فائنل مرحلے کا آغاز بدھ سے ہوگا.

تفصیلات کے مطابق انگلش ٹی 20 کرکٹ لیگ کے کوارٹر فائنل مرحلے کا آغاز بدھ سے ہوگا۔ ٹورنامنٹ کا پہلا کوارٹر فائنل بدھ کو کھیلا جائے گا۔ 5 ستمبر کو دوسرا کوارٹر فائنل، تیسرا کوارٹر فائنل 6 ستمبر کو جبکہ 7 ستمبر کو چوتھا اور آخری کوارٹر فائنل کھیلا جائے گا۔ ٹورنامنٹ کے دونوں سیمی فائنلز اور فائنل 21 ستمبر کو کھیلے جائیں گے۔

کولمبو: سری لنکا کے متعدد پلئیرز نے پاکستان کا دورہ کرنے سے انکار کردیا ہے.

تفصیلات کے مطابق دورہ پاکستان کے حوالے سے سری لنکا کرکٹ بورڈ اور پلیئرز میں اختلاف پیدا ہوتے دکھائی دے رہے ہیں، اگر یہ معاملہ خوش اسلوبی سے حل نہیں ہوا تو کچھ کھلاڑیوں کو مشکلات کا بھی سامنا کرنا پڑسکتا ہے۔ سری لنکن میڈیا کے مطابق بورڈ نے پلیئرز سے مشاورت کیے بغیر ہی دورے پر حامی بھری، متعدد سینئر کھلاڑی پاکستان نہ جانے کے بارے میں اپنا پیغام حکام تک پہنچا چکے ہیں۔ ان میں ایک روزہ ٹیم کے کپتان ڈیموتھ کرونا رتنے بھی شامل ہیں، اسی طرح ٹوئنٹی 20 کپتان لسیتھ مالنگا کا بھی ٹورنگ پارٹی کا حصہ ہونے کا امکان نہیں ہے۔

واضح رہے کہ سری لنکا کرکٹ بورڈ نے حال ہی میں 3 ہفتوں پر محیط ٹور پر رضامندی ظاہر کی ہے، اس دوران سری لنکا کراچی اور لاہور میں 6 انٹرنیشنل میچز کھیلیں گے۔ سیریز کے 3 ون ڈے میچز کراچی جبکہ 3 ٹی 20 میچز لاہور میں کھیلے جائیں گے.

دبئی (اے پی پی) آئی سی سی نے ٹیسٹ پلیئرز کی تازہ ترین رینکنگ جاری کردی، سٹیون سمتھ نے کوہلی سے ٹاپ پوزیشن چھین لی.

تفصیلات کے مطابق آسٹریلوی بلے باز سٹیون سمتھ نے انٹرنیشنل کرکٹ کونسل (آئی سی سی) کی تازہ ترین ٹیسٹ پلیئرز رینکنگ میں بلے بازوں میں ویرات کوہلی سے ٹاپ پوزیشن چھین لی، اجنکیا راہانے 4 درجے ترقی پا کر ٹاپ ٹین میں شامل ہو گئے، باﺅلرز میں جسپریت بمرا 4 درجے ترقی پا کر تیسرے نمبر پر آ گئے، جیسن ہولڈر کی 7 درجے ترقی کے ساتھ ٹاپ ٹین میں انٹری ہوئی ہے۔ آئی سی سی کی طرف سے جاری کردہ تازہ ترین ٹیسٹ پلیئرز رینکنگ کے تحت بلے بازو میں سمتھ نے ایک درجہ ترقی پا کر کوہلی کو ٹاپ پوزیشن سے محروم کر دیا، کین ولیمسن تیسرے، پوجارا چوتھے، ہنری نیکولز پانچویں نمبر پر موجود ہیں، بھارتی بلے باز راہانے 7 سیڑھیاں چڑھ کر ٹاپ ٹین میں داخل ہو گئے اور انہوں نے ساتویں پوزیشن سنبھال لی.

باﺅلرز میں پیٹ کمنز ٹاپ پوزیشن پر براجمان ہیں، بمرا 4 درجے ترقی پا کر ساتویں سے تیسرے نمبر پر آ گئے ہیں، جیسن ہولڈر نے 7 درجے ترقی پا کر ٹاپ ٹین میں انٹری کی اور انہوں نے جیمز اینڈرسن کے ساتھ چوتھی پوزیشن شیئر کرلی۔ جبکہ آل راﺅنڈرز میں ہولڈر کا ٹاپ پوزیشن پر قبضہ برقرار ہے۔

دبئی (اے پی پی) آئی سی سی نے ٹی 20 ورلڈ کپ کوالیفائر ٹورنامنٹ کے شیڈول کا اعلان کردیا، ایونٹ 18 اکتوبر سے 2 نومبر تک کھیلا جائے گا.

تفصیلات کے مطابق انٹرنیشنل کرکٹ کونسل نے ٹی ٹونٹی ورلڈ کپ کوالیفائر ٹورنامنٹ 2019ء کے شیڈول کا اعلان کردیا۔ ایونٹ 18 اکتوبر سے 2 نومبر تک متحدہ عرب امارات میں کھیلا جائے گا۔ 2 نومبر تک جاری رہنے والے ایونٹ میں 14 ٹیمیں آمنے سامنے ہوں گی جس میں میزبان یو اے ای، سکاٹ لینڈ، ہالینڈ، سنگاپور، کینیا، آئرلینڈ، ہانگ کانگ، اومان، برمودا، کینیڈا، جرسی، نمیبیا، نائیجیریا اور پاپوا نیوگنی شامل ہیں۔ سکاٹ لینڈ، ہالینڈ، پاپوا نیو گنی، نمیبیا، سنگاپور اور برمودا کو گروپ اے جبکہ یو اے ای، آئرلینڈ، اومان، ہانگ کانگ، کینیڈا، جرسی اور نائیجیریا کو گروپ بی میں رکھا گیا ہے۔ دونوں گروپس سے ٹاپ ٹیمیں سیمی فائنل تک رسائی حاصل کرنے کے ساتھ ساتھ براہ راست ورلڈ ٹی 20 کپ کیلئے بھی کوالیفائی کر لیں گی۔

یاد رہے کہ 2015 میں ہونے والے کوالیفائر ٹورنامنٹ میں سکاٹ لینڈ اور ہالینڈ کی ٹیمیں مشترکہ طور پر فاتح قرار پائی تھیں.

مظفر آباد (اے پی پی ) پاکستان کرکٹ بورڈ نے آزاد کشمیر کے شہر مظفر آباد میں ٹی 20 فیسٹیول میچ کروانے کا اعلان کردیا.

تفصیلات کے مطابق پی سی بی نے ڈومیسٹک سیزن 20-2019 کا آغازفیسٹیول میچ سے کرنے کا اعلان کیا ہے، فیسٹیول میچ 6ستمبر کو دفاع پاکستان کے روز مظفرآباد میں کھیلا جائے گا،میچ کے انعقاد کا مقصد خطے میں کھیل کو فروغ دینا ہے،ٹی ٹوئنٹی میچ کےلئے پی سی بی نے مظفر آباد کرکٹ اسٹیڈیم کا انتخاب کیا ہے، یہاں آئندہ ڈومیسٹک سیزن میں قائداعظم ٹرافی کے سیکنڈ الیون ٹورنامنٹ کا ایک میچ بھی کھیلا جانا ہے،پی سی بی چیئرمین الیون اور آزاد جموں و کشمیرپرائم منسٹر الیون کے درمیان ٹی ٹوئنٹی میچ 6 ستمبر کی صبح 10 بجے شروع ہوگا، میچ میں قومی کرکٹرز مقامی کھلاڑیوں کے ہمراہ میدان میں اتریں گے،قومی کھلاڑیوں میں سرفراز احمد، اظہر علی، امام الحق، بابراعظم، عابد علی، شان مسعود، اسد شفیق، بلال آصف، محمد رضوان، راحت علی اور عثمان شنواری کے نام شامل ہیں، سابق کپتان مصباح الحق بھی میچ میں ان ایکشن ہوں گے.

سرفراز احمد پی سی بی چیئرمین الیون کی قیادت کریں گے جبکہ ٹیم میں شامل مقامی کھلاڑیوں میں بابر خالق، فیضان سلیم، معین پرویز، ثقلین گیلانی، شاداب مجید اور عثمان معروف کے نام شامل ہیں، آزاد جموں و کشمیر پرائم منسٹر الیون کی قیادت اظہر علی کریں گے، ٹیم میں شامل مقامی کھلاڑیوں میں عاقب لیاقت، حسن رضا، نوید ملک اور راجہ فرحان شامل ہیں.

مانچسٹر (اے پی پی) اشیز سیریز کے چوتھے ٹیسٹ میچ کیلئے آسٹریلوی ٹیم نے سکواڈ کا اعلان کردیا، سٹیو سمتھ اور مچل سٹارک کی واپسی ہوئی ہے جبکہ عثمان خواجہ ٹیم سے آﺅٹ ہوگئے.

تفصیلات کے مطابق آسٹریلیا نے انگلینڈ کے خلاف ایشز سیریز کے چوتھے ٹیسٹ میچ کیلئے 12 رکنی سکواڈ کا اعلان کر دیا ہے، فٹنس مسائل سے نجات کے بعد سٹیو سمتھ کو دوبارہ سکواڈ میں شامل کرلیا گیا ہے، فاسٹ باﺅلر مچل سٹارک کی بھی ٹیم میں واپسی ہوئی ہے، سٹیو سمتھ کی جگہ تیسرے ٹیسٹ میں شامل کئے گئے ٹاپ آرڈر بلے باز عثمان خواجہ کو ناقص کارکردگی پر ڈراپ کر دیا گیا ہے جبکہ فاسٹ باﺅلر جیمز پیٹنسن کو ریسٹ دی گئی ہے، اعلان کردہ حتمی سکواڈ میں ٹم پائن (کپتان)، ڈیوڈ وارنر، مارکوس ہیرس، مارنس، سٹیو سمتھ، تراوس ہیڈ، میٹ ویڈ، کمنز، پیٹر سڈل، مچل سٹارک، نیتھن لائن اور ہیزلووڈ شامل ہیں۔

دوسری جانب انگلینڈ اور آسٹریلیا کے مابین چوتھا ٹیسٹ میچ بدھ سے مانچسٹر میں شروع ہوگا، دونوں ٹیموں کے درمیان سیریز 1-1 سے برابر ہے۔

کنگسٹن (اے پی پی) بھارت نے ویسٹ انڈیز کو دوسرے ٹیسٹ میچ میں 257 رنز سے ہراکر 2 میچوں کی سیریز 2-0 جیت لی.

تفصیلات کے مطابق بھارت نے دوسرے ٹیسٹ میچ میں ویسٹ انڈیز کو 257 رنز سے ہرادیا، ہنوما وہاڑی کو مین آف دی میچ قرار دیا گیا، ویسٹ انڈیز سے دونوں ٹیسٹ جیتنے کے بعد بھارت کو پوائنٹس ٹیبل 120 پوائنٹس کے ساتھ برتری حاصل ہے۔ کنگسٹن میں کھیلے گئے ٹیسٹ کے تیسرے روز ویسٹ انڈین ٹیم 468 رنز کے تعاقب میں 210 رنز بناکر آﺅٹ ہوگئی، ویسٹ انڈین بلے باز دوسری اننگز میں بھی بھارتی باﺅلرز کو جم کر نہ کھیل سکے اور وقفے وقفے سے آﺅٹ ہوتے رہے، شامربروکس 50 ، کپتان جیسن ہولڈر 39 ، جرمائن بلیکووڈ 38 اور ڈیرن براوو 23 رنز کے ساتھ نمایاں رہے.

جبکہ بھارت کی طرف سے محمد شامی اور روندرا جدیجا نے تین، تین جبکہ ایشانت شرما نے دو اور بمرا نے ایک وکٹ حاصل کی، ہنوما وہاڑی کو پہلی اننگز میں 111 اور دوسری میں 53 (ناٹ آﺅٹ) رنز کی اننگز کھیلنے پر مین آف دی میچ قرار دیا گیا۔ بھارت کی یہ ویسٹ انڈیز کے خلاف مسلسل دوسری کامیابی ہے.

لاہور: پاکستان کرکٹ بورڈ قومی ٹیم کے ہیڈکوچ اور باؤلنگ کوچ کے ناموں کا اعلان کل جاری کرے گا.

تفصیلات کے مطابق قومی ٹیم کے ہیڈکوچ اور باؤلنگ کوچ کے لیے مشاورت مکمل کرلی گئی ہے، اس حوالے سے پی سی بی کل کوچز کے ناموں کا اعلان کرے گا. پہلے مرحلے میں پریس ریلیز کے ذریعے نام جاری کیے جائیں گے اس کے بعد ہیڈکوچ پریس کانفرنس کرکے اپنے پلان سے میڈیا کو بریف کرنے کے ساتھ مختلف سوالات کے جوابات بھی دیں گے۔ دوسری جانب باغی ٹی وی نے 2 ستمبر کو خبر بریک کردی ہے کہ مصباح الحق پاکستان کرکٹ‌ ٹیم کے ہیڈ کوچ جبکہ وقار یونس باؤلنگ کوچ ہوں گے. باغی ٹی وی کے ذرائع سے خبر موصول ہوئی ہے کہ پاکستان کرکٹ بورڈ نے سابق کپتان مصباالحق کو ہیڈ کوچ جبکہ سابق فاسٹ باؤلر وقار یونس کو باؤلنگ کوچ بنانے کا فیصلہ کرلیا ہے.

یاد رہے کہ ہیڈ کوچ کیلئے مصباح الحق کے علاوہ ڈین جونز اور محسن حسن خان نے بھی اپلائی کیا لیکن ذرائع سے خبر یہ موصول ہوئی ہے کہ پی سی بی نے مصباالحق کو قومی ٹیم کا کوچ بنانے کا فیصلہ کیا ہے.