Category: کھیل

میکسیکو سٹی (اے پی پی) قابوس اوپن ٹینس میں اعصام الحق کا مینز ڈبلز میں سفر سیمی فائنل میں تمام ہوگیا.

سٹار پاکستانی کھلاڑی اعصام الحق قریشی کا قابوس اوپن ٹینس ٹورنامنٹ مینز ڈبلز ایونٹ میں سفر سیمی فائنل میں تمام ہو گیا۔ میکسیکو میں جاری ایونٹ میں کھیلے گئے مینز ڈبلز سیمی فائنل میں رومین آرنیوڈو اور ہوگو نائس پر مشتمل مناکو کی جوڑی نے اعصام الحق اور ان کے میکسیکن جوڑی دار سنتیاگو گونزالیز کو سخت مقابلے کے بعد 3-6، 7-5 اور 10-5 سے شکست دے کر ایونٹ سے باہر کر دیا۔

دوسری جانب اعصام الحق کے مداح ان کی شکست پر کافی افسردہ نظر آتے ہیں. ان کے مداحوں کی خواہش تھی کی اعصام الحق نہ صرف فائنل کھیلتے بلکہ ٹائٹل بھی جیت کر لاتے، تاہم اب بھی ان کے مداح پر امید ہیں کہ مستقبل میں جب بھی کوئی بڑا مقابلہ ہوگا تو اعصام الحق ضرور جیتیں گے.

لاہور: پاکستان کرکٹ بورڈ کی کرکٹ کمیٹی کے اجلاس کی اندرونی کہانی سامنےآگئی۔ ورلڈ کپ کرکٹ ٹورنامنٹ ميں ٹيم کي کارکردگي ، انڈيا کے ہاتھوں شکست اورقومی جونئيرٹيموں کی کارکردگی کا جائزہ ليا گیا۔

کرکٹ کميٹی کا اجلاس قذافي سٹيڈيم ميں پی سی بی کے ايم ڈی وسيم خان کی سربراہی ميں شروع ہوا ۔ اجلاس ميں سابق کپتان وسيم اکرم نے کينڈا سے ويڈيو لنک پر حصہ ليا جبکہ ارکان مصباح الحق، عروج ممتاز، ذاکر خان، مدثر نذر اور ہارون رشید اجلاس میں شریک ہوئے ۔ اجلاس ميں ورلڈ کپ کے سيمی فائنل سے کيوں باہر ہوئے اور انڈيا سے شکست پر قومی ٹيم کے چيف سليکٹر انضمام الحق کپتان سرفراز احمد اور کوچ مکی آرتھر نے کرکٹ کميٹی کو آگاہ کيا۔ کپتان اور کوچ کا موقف تھا کہ ٹيم کی کارکردگی ورلڈ کپ ميں بہتر رہی ہے. سرفراز احمد کا کہنا تھا کہ ٹيم نے آخری چار ميچوں ميں بہترين کھيل پيش کرتے ہوئے کم بيک کيا بدقسمتی سے سيمی فائنل ميں نا پہنچ سکے ۔ چيف سليکٹر کا کہنا تھا کہ انہوں نے نيک نيتی سے دستياب کھلاڑيوں سے ٹيم کا انتخاب کيا جبکہ ان کے تين سالہ دور ميں کئی نئے اور باصلاحيت مستقبل کے کھلاڑی قومی ٹيم ميں شامل کيے۔ اجلاس میں مستقبل کی سلیکشن پالیسی ، سلیکشن کمیٹی ، کوچنگ سٹاف کی تعیناتی کے حوالے سے اہم فیصلے کئے گے۔

کيمٹی اپنی سفارشات پی سی بی کے چيرمين احسان مانی کو پيش کرے گی ۔ جو کرکٹ بورڈ کے پيٹرن وزيراعظم عمران خان کو اس حوالے سے آگاہ کريں گے اور ان کی ہدايت کی روشنی ميں فیصلے کيے جائيں گے۔

لاہور: سری لنکن کرکٹ بورڈ ٹیسٹ سیریز پاکستان میں کھیلنے کے حوالے سے اپنا سیکیورٹی وفد 6 اگست کو پاکستان بھیجے گا.

میڈیا رپورٹس کے مطابق سری لنکن سیکیورٹی وفد پاکستان میں سیکیورٹی انتظامات کا جائزہ لینے 6 اگست کو پہنچے گا. سیکیورٹی وفد لاہور اور کراچی کا دورہ کرے گا. پاکستان کرکٹ بورڈ اور سری لنکا کے درمیان 2 ٹیسٹ میچز کی سیریز ستمبر اور اکتوبر میں شیڈول ہے جس کی میزبانی پاکستان کو کرنی ہے. اس حوالے سے پاکستان کرکٹ بورڈ کی خواہش ہے کہ یہ سیریز پاکستان میں ہو جس کا ایک میچ قزافی اسٹیڈیم لاہور جبکہ دوسرا میچ نیشنل اسٹیڈیم کراچی میں کھیلا جائے، لیکن ذرائع کا اس حوالے سے کہنا ہے کہ سری لنکن کرکٹ بورڈ سیریز پاکستان میں کھیلنے کیلئے ہچکچاہٹ کا شکار ہے. تاہم اب سیکیورٹی کا جائزہ لینے کیلئے سری لنکن کرکٹ بورڈ نے اپنا سیکیورٹی وفد پاکستان بھیجنے کا فیصلہ کیا ہے جو 6 اگست کو پاکستان پہنچے گا.
واضح رہے کہ سری لنکن ٹیم اس سے قبل 2 سال پہلے ایک ٹی 20 میچ کھیلنے لاہور پہنچی تھی اور اب بھی شائقین پرامید ہیں کہ سری لنکن ٹیم پاکستان کا دورہ لازمی کرے گی.

مونٹریال (اے پی پی) مونٹریال اوپن ٹینس ٹورنامنٹ 5 اگست سے کینیڈا میں شروع ہوگا، رافیل نڈال منز سنگلز ٹائٹل کا دفاع کرینگے.

تفصیلات کے مطابق مونٹریال اوپن ٹینس ٹورنامنٹ کا 139 واں ایڈیشن 5 اگست سے کینیڈا میں شروع ہوگا۔ ٹورنامنٹ انتظامیہ کے مطابق ٹورنامنٹ کے کامیاب انعقاد کےلئے تیاریاں عروج پر ہیں۔ ٹورنامنٹ میں دنیائے ٹینس کے نامور کھلاڑی ٹائٹل کے حصول کے لئے پنجہ آزمائی کرینگے۔ یہ مردوں کا 139 واں جبکہ خواتین کا 128 واں ایونٹ ہوگا۔ ٹورنامنٹ میں مینز سنگلز، ویمنز سنگلز، مینز ڈبلز اور ویمنز ڈبلز مقابلے ہونگے۔ مردوں کے سنگلز مقابلوں میں سپین کے بین الاقوامی شہرت یافتہ ٹینس سٹار رافیل نڈال اپنے اعزاز کا دفاع کرینگے اور وہ سربین عالمی نمبر ایک کھلاڑی نوویک جوکووچ کی عدم شمولیت کے باعث ٹورنامنٹ کے ٹاپ سیڈڈ کھلاڑی کی حیثیت سے شرکت کرینگے۔ ویمنز سنگلز مقابلوں میں رومانیہ کی سیمونا ہالپ اعزاز کا دفاع کرینگے۔ ٹورنامنٹ ہارڈ کورٹ پر کھیلا جائے گا۔ مرد کھلاڑیوں کے میچز مونٹریال جبکہ خواتین کھلاڑیوں کے میچز ٹورنٹو میں کھیلے جائینگے ۔ ٹورنامنٹ 7 روز جاری رہنے کے بعد 11 اگست کو اختتام پذیر ہوگا۔

اسلام آباد (اے پی پی) دوسری پاکستان نیشنل ریٹڈ شطرنج چیمپیئن شپ اتوار سے شروع ہو گی.

تفصیلات کے مطابق پاکستان چیس فیڈریشن کے تعاون اور پنجاب چیس ایسوسی ایشن کے زیراہتمام سے دوسری پاکستان نیشنل ریٹڈ شطرنج چیمپئن شپ اتوار کو پی ایس بی کوچنگ سنٹر، لاہور میں ہو گی۔ چیمپئن شپ کے چیف آرگنائزر محمد شفیق نے بتایا کہ چیمپئن شپ ایونٹ کی تمام انتظامات مکمل کر لئے گئے اور چیمپئن شپ ملک بھر سے کھلاڑی حصہ لے سکتے ہیں اور پانچ سو روپے انٹری فیس مقرر کی گئی ہے۔ چیمپئن شپ کے اختتام پر چیمپئن شپ میں کامیابی حاصل کرنے والے 10 کھلاڑیوں میں کیش ایوارڈ بطور انعامات تقسیم کئے جائیں گے۔ اس حوالے سے شطرنج کے شوقین لوگ بہت خوش ہیں.

برازیلیہ (اے پی پی) فٹ بال کی عالمی تنظیم فیفا کے زیر اہتمام انڈر۔17 فٹ بال ورلڈ کپ کا 18 واں ایڈیشن رواں سال اکتوبر میں برازیل میں شروع ہوگا۔

تفصیلات کے مطابق فیفا انڈر۔17 فٹ بال ورلڈ کپ ٹورنامنٹ کے کامیاب انعقاد کے لئے تیاریاں شروع ہو چکی ہیں۔ میگا ایونٹ میں مختلف ممالک کی 24 ٹیمیں ٹائٹل کے حصول کے لئے پنجہ آزمائی کرینگی۔ میگا ایونٹ میں میزبان برازیل، کینیڈا، نیوزی لینڈ، انگولا، نائیجیریا، ہنگری، ایکواڈور، آسٹریلیا، ساﺅتھ کوریا، ہیٹی، فرانس، چلی، امریکا، سینیگال، جاپان، ہالینڈ، سپین، ارجنٹائن، تاجکستان، کیمرون، سولومن جزائر، پیراگوئے اور میکسیکو شامل ہیں۔ انگلینڈ کی ٹیم انڈر۔17 فٹ بال ورلڈ کپ ٹورنامنٹ میں اپنے اعزاز کا دفاع کریگی۔ میگا ایونٹ میں شرکت کرنے والی 24 ٹیموں کو 6 مختلف گروپوں میں تقسیم کیا گیا ہے۔

مونٹریال (اے پی پی) شاہد آفریدی کی تباہ کن باؤلنگ کی بدولت برامپٹن والوز نے کینیڈا گلوبل ٹی ٹونٹی کرکٹ لیگ کے دسویں میچ میں وائنی پیگ ہاکس کو 7 وکٹوں سے ہرا دیا۔ شاہد آفریدی نے حریف ٹیم کے 2 خطرناک کھلاڑیوں کو پویلین کی راہ دکھائی.

برامپٹن والوز کی جانب سے کپتان کولن منرو نے ناقابل شکست 53 اور بابر حیات نے ناقابل شکست 37 رنز بناکر جبکہ شاہد خان آفریدی نے 2 کھلاڑیوں کو آوٹ کرکے اپنی ٹیم کی فتح میں اہم کردار ادا کیا۔ کولن منرو کو شاندار بلے بازی پر میچ کا بہترین کھلاڑی قرار دیا گیا۔ کینیڈا گلوبل ٹی ٹونٹی لیگ کے دسویں میچ میں برامپٹن والوز کے کپتان کولن منرو نے ٹاس جیت کر پہلے فیلڈنگ کا فیصلہ کیا۔ وائنی پیگ ہاکس کی ٹیم پہلے کھیلتے ہوئے 18.5 اوورز میں 116 رنز بناکر آﺅٹ ہوگئی اور اس نے برامپٹن والوز کو میچ میں کامیابی کے لئے 117 رنز کا ہدف دیا۔ برامپٹن والوز کے باﺅلرز کی عمدہ باﺅلنگ کی بدولت وائنی پیگ ہاکس کے 8 کھلاڑی دوہرا ہندسہ بھی عبور نہ کرسکے۔ شائمین انور 31 اور کلیم ثناءنے ناقابل شکست 27 رنز بنائے۔ برامپٹن والوزکی طرف سے عمدہ باﺅلنگ کا مظاہرہ کرتے ہوئے شاہد آفریدی، روہن، سودی اور ظہور خان نے دو دو کھلاڑیوں کو آﺅٹ کیا۔ جواب میں کپتان کولن منرو اور بابر حیات کی شاندار بیٹنگ کی بدولت برامپٹن والوزکی ٹیم نے مطلوبہ ہدف 14.3 اوورز میں 3 وکٹوں کے نقصان پر حاصل کرکے وائنی پیگ ہاکس کو میچ میں 7 وکٹوں سے ہرا دیا۔ وائنی پیگ ہاکس کے محمد عرفان نے دو کھلاڑیوں کو آﺅٹ کیا۔کپتان کولن منرو نے ناقابل شکست 53 اور بابر حیات نے ناقابل شکست 37 رنز بناکر اپنی ٹیم کی فتح میں اہم کردار ادا کیا۔ کولن منرو کو عمدہ کارکردگی پر میچ کا بہترین کھلاڑی قرار دیا گیا۔