Baaghi TV

Tag: تازہ ترین

  • مضبوط فوج کی موجودگی میں کوئی پاکستان کو نقصان نہیں پہنچاسکتا، وزیراعلیٰ بلوچستان

    مضبوط فوج کی موجودگی میں کوئی پاکستان کو نقصان نہیں پہنچاسکتا، وزیراعلیٰ بلوچستان

    وزیراعلیٰ بلوچستان میر سرفراز بگٹی نے کہا ہے کہ مضبوط فوج کی موجودگی میں کوئی پاکستان کو نقصان نہیں پہنچاسکتا، پاک فوج ہر قسم کے اندرونی اور بیرونی خطرات سے نمٹنے کیلئے تیار ہے،ہمارے بزرگوں نے پاکستان سے الحاق کا جو فیصلہ کیا اس پر ہمیں فخر ہے۔

    کوئٹہ میں تقریب سے خطاب میں انہوں نے کہا کہ مضبوط فوج کی موجودگی میں کوئی پاکستان کو نقصان نہیں پہنچاسکتا، پاکستان نے بھارت کے خلاف اپنی صلاحیتوں کا بھرپور لوہا منوایا،پاک فوج ہر قسم کے اندرونی اور بیرونی خطرات سے نمٹنے کیلئے تیار ہے، فیلڈ مارشل کی قیادت میں ہم نے بھارت کو عبرت ناک شکست دی،ہمارے بزرگوں نے جو پاکستان سے الحاق کا فیصلہ کیا اس پر ہمیں فخر ہے۔

    گورنر بلوچستان جعفر مندوخیل نے کہا کہ پاک فوج نے ثابت کیا کہ دلیری میں کوئی اس کا مقابلہ نہیں کرسکتا، پاکستان کی شاندار فتح کو دنیا نے سراہا، بلاشبہ افواج اور قوم نے اپنے اعتماد و اتحاد سے نئی تاریخ رقم کی۔

  • پنجاب کے مختلف علاقوں میں گرمی کی لہر ، الرٹ جاری

    پنجاب کے مختلف علاقوں میں گرمی کی لہر ، الرٹ جاری

    پنجاب ڈیزاسٹر مینجمنٹ اتھارٹی نے صوبے کے مختلف اضلاع میں 11 مئی تک گرمی کی شدید لہر کے پیش نظر الرٹ جاری کردیا۔

    محکمہ موسمیات کے مطابق پنجاب بھر میں خشک موسم کے باعث گرمی کی شدت میں مسلسل اضافہ ہو رہا ہے اور آئندہ 24 گھنٹوں کے دوران موسم گرم اور خشک رہنے کا امکان ہے،لاہور میں کم سے کم درجہ حرارت 27 ڈگری سینٹی گریڈ جبکہ زیادہ سے زیادہ 40 ڈگری سینٹی گریڈ تک پہنچ سکتا ہے شدید گرمی کے باعث گھروں اور دفاتر میں ٹھنڈک پہنچانے والے آلات کا استعمال بڑھ گیا ہے جبکہ شہری بھی ممکنہ گرمی کی لہر کے خدشے کے پیش نظر احتیاطی تدا بیر اختیار کررہے ہیں۔

    صوبائی ڈیزاسٹر مینجمنٹ اتھارٹی نے اتوار کو ایک باضابطہ موسمی انتباہ بھی جاری کیا، جس میں خبردار کیا گیا کہ 10 مئی کی شام سے 12 مئی کی رات تک وقفے وقفے سے صوبے کے بالائی علاقوں میں گرد آلود ہوائیں، آندھی اور بارش متوقع ہے،حکام نے شہریوں کو غیر ضروری طور پر دھوپ میں نکلنے سے گریز، زیادہ پانی پینے اور احتیاطی تدابیر اختیار کرنے کی ہدایت کی ہے۔

    محکمہ موسمیات نے اس سے قبل رواں ہفتے 6 سے 12 مئی تک ملک کے مختلف حصوں میں مسلسل گرمی کی شدید لہر کی پیش گوئی کرتے ہوئے ہفتہ وار موسمی رپورٹ جاری کی تھی پیشگوئی کے مطابق پاکستان کے بیشتر میدانی علاقے اس دوران گرم اور خشک موسم کی لپیٹ میں رہیں گے۔

    محکمہ موسمیات کا کہنا ہے کہ وسطی اور جنوبی علاقوں میں دن کے درجہ حرارت معمول سے 2 سے 6 ڈگری سینٹی گریڈ زیادہ رہنے کا امکان ہے جنوبی پنجا ب، سندھ اور بلوچستان کے بعض علاقوں کو شدید گرمی سے سب سے زیادہ متاثرہ خطے قرار دیا گیا ہے، جہاں دن کے اوقات میں سخت گرمی برقرار رہے گی،گرمی کی موجودہ شدید صورتحال آئندہ دنوں میں بھی برقرار رہنے کا امکان ہے اور فوری ریلیف کی توقع نہیں۔

    محکمہ موسمیات کے مطابق ایک تازہ مغربی سلسلہ 10 مئی کو ملک کے شمال مغربی علاقوں میں داخل ہونے کا امکان ہے، جو 12 مئی تک برقرار رہ سکتا ہے انتباہ کے مطابق مری، گلیات، راولپنڈی، اٹک، چکوال، جہلم، خوشاب، جوہرآباد، سرگودھا، میانوالی، فیصل آباد، ساہیوال، جھنگ، لاہور، شیخوپورہ، اوکاڑہ، گوجرانوالہ، سیالکوٹ اور نارووال میں گرد آلود ہواؤں، آندھی اور بارش کا امکان ہے، جبکہ جنوبی پنجاب میں شدید گرم موسم برقرار رہنے کی توقع ہے۔

  • دبئی میں کھولا جانے والا دنیا کا پہلا اے آئی اسمارٹ بس اسٹیشن

    دبئی میں کھولا جانے والا دنیا کا پہلا اے آئی اسمارٹ بس اسٹیشن

    دبئی میں دنیا کے پہلے مکمل طور پر مصنوعی ذہانت سے چلنے والے اسمارٹ بس اسٹیشن کا افتتاح کردیا گیا-

    دبئی کی روڈز اینڈ ٹرانسپورٹ اتھارٹی (آر ٹی اے) کی جانب سے ’مال آف دی ایمریٹس‘ کے مقام پر قائم کیا گیا یہ جدید اسٹیشن جدید ڈیجیٹل سہولیات، ماحول دوست ٹیکنالوجی اور 24 گھنٹے فعال اسمارٹ سروسز سے لیس ہے،یہ اسمارٹ بس اسٹیشن براہِ راست مال آف دی ایمریٹس میٹرو اسٹیشن سے منسلک ہے اور دبئی کے رہائشی، تجارتی اور سیاحتی علاقوں کو ملانے والی 11 بس روٹس کو سہولت فراہم کرے گا۔

    حکام کے مطابق منصوبے کا مقصد عوامی ٹرانسپورٹ کو زیادہ تیز، محفوظ اور آسان بنانا ہے تاکہ شہری نجی گاڑیوں کے بجائے پبلک ٹرانسپورٹ استعمال کرنے کو ترجیح دیں،اسٹیشن میں جدید اے آئی کیمروں کے ذریعے ہجوم کی نگرانی، بسوں میں مسافروں کی تعداد کا حقیقی وقت میں اندازہ، ڈیجیٹل معلوماتی اسکرینیں اور اسمارٹ کیوسک نصب کیے گئے ہیں، مسافر ان اسکرینوں پر بس اور میٹرو کی آمد کے اوقات، ٹیکسیوں کی دستیابی، اسٹیشن کا نقشہ اور قریبی مقامات کی معلومات حاصل کرسکتے ہیں۔

    آر ٹی اے کے مطابق اسمارٹ کیوسک میں موجود ورچوئل اسسٹنٹ سفر کی منصوبہ بندی، سوالات کے جواب اور ’لاسٹ اینڈ فاؤنڈ‘ خدمات بھی فراہم کرتا ہے۔ مسافر ڈیجیٹل طریقے سے ٹکٹ خریدنے اور ’نول کارڈ‘ ری چارج کرنے کی سہولت بھی استعمال کرسکتے ہیں اسٹیشن میں نصب سولر پینلز بجلی پیدا کرتے ہیں جبکہ ہوا کے معیار پر نظر رکھنے کے لیے اسمارٹ سینسر بھی نصب کیے گئے ہیں یہ منصوبہ دبئی کو دنیا کے جدید ترین اور ماحول دوست شہروں میں شامل کرنے کے وژن کا حصہ ہے۔

  • ‘معرکۂ حق’ کا ایک سال ،عسکری و سول قیادت کا قوم کے نام خصوصی پیغام

    ‘معرکۂ حق’ کا ایک سال ،عسکری و سول قیادت کا قوم کے نام خصوصی پیغام

    وزیراعظم پاکستان میاں محمد شہباز شریف نے ‘معرکۂ حق’ کا ایک سال مکمل ہونے کے موقع پر قوم کے نام اپنے خصوصی پیغام جاری کیا ہے-

    وزیراعظم نے کہا کہ پاکستان نے آزمائش کی گھڑی میں جرات، حکمتِ عملی اور قومی یکجہتی کا مظاہرہ کرتے ہوئے دشمن کو عبرتناک شکست دی بری، بحری، فضائی اور سائبر محاذوں پر مسلح افواج کے مربوط ردِعمل نے پاکستان کو ناقابلِ تسخیر قوت کے طور پر منوایا،یہ دن اللہ تعالیٰ کے حضور سجدۂ شکر بجا لانے، شہداء کو خراجِ عقیدت پیش کرنے اور قومی عزم و استقامت کی تجدید کا دن ہے۔

    اپنے پیغام میں فیلڈ مارشل سید عاصم منیر، ایئر چیف ظہیر احمد بابر اور نیول چیف نوید اشرف کی قیادت کو خراجِ تحسین پیش کرتے ہوئے وزیراعظم نے کہا کہ قوم اپنی بہادر افواج کے افسران اور جوانوں کی قربانیوں کو کبھی فراموش نہیں کرے گی پاکستان ایک امن پسند مگر باوقار اور غیرت مند قوم ہے، جسے کسی جارحیت کے ذریعے جھکایا نہیں جاسکتا،پاکستان کے خلاف کسی بھی جارحیت کا فوری، مؤثر اور ہمہ جہت جواب دیا جائے گا اور ملک اپنی سرحدوں کے دفاع کے لیے مکمل طور پر چوکس ہے۔

    شہباز شریف نے دہشت گردی کے خلاف جنگ جاری رکھنے کے عزم کا اعادہ کرتے ہوئے کہا کہ ‘فتنہ الخوارج’ اور ‘فتنہ الہندوستان’ کے مکمل خاتمے تک کارروائیاں جاری رہیں گی انہوں نے مسئلہ کشمیر کو برصغیر کی تقسیم کا نامکمل ایجنڈا قرار دیتے ہوئے کہا کہ جنوبی ایشیا میں پائیدار امن اقوامِ متحدہ کی قراردادوں اور کشمیری عوام کی خواہشات کے مطابق مسئلہ کشمیر کے حل سے مشروط ہے پاکستان عالمی امن، استحکام اور علاقائی سلامتی کے لیے اپنی ذمہ دارانہ کوششیں جاری رکھے گا۔

    صدر مملکت نے معرکہ حق کی سالگرہ پر قوم اور مسلح افواج کو خراجِ تحسین پیش کیا

    صدر مملکت آصف علی زرداری نے معرکہ حق کی پہلی سالگرہ کے موقع پر اپنے پیغام قوم اور مسلح افواج کو خراجِ تحسین پیش کیا اور کہا کہ اس کامیابی میں فیلڈ مارشل سید عاصم منیر کی قیادت، حکمت عملی اور جرات مندانہ فیصلوں کا بنیادی کردار رہا۔

    انہوں نے پاک فضائیہ کے سربراہ ایئر چیف مارشل ظہیر احمد بابر سدھو اور پاک فضائیہ کے اہلکاروں کی پیشہ ورانہ مہارت اور اعلیٰ صلاحیتوں کو سراہا، جبکہ پاک بحریہ کے سربراہ ایڈمرل نوید اشرف اور بحری افواج کی مکمل آپریشنل تیاری کو بھی قومی سلامتی کے لیے قابلِ فخر قرار دیا۔

    صدر زرداری نے کہا کہ پاکستان ایک ذمہ دار اور امن پسند ملک ہے جس نے دشمن کی جارحیت کا مؤثر اور متوازن جواب دے کر اپنی دفاعی صلاحیت دنیا کے سامنے واضح کی، بھارت کے غیرقانونی زیرِ قبضہ جموں و کشمیر کا مسئلہ اقوام متحدہ کی قراردادوں کے مطابق حل ہونا چاہیے، اور پاکستان کشمیری عوام کی اخلاقی، سیاسی اور سفارتی حمایت جاری رکھے گا۔

    صدر مملکت نے مزید کہاکہ بھارت کی جانب سے سندھ طاس معاہدے کو معطل کرنے کی کوشش آبی جارحیت کے مترادف ہے، کیونکہ پانی کروڑوں پاکستانیوں کی زندگی سے جڑا ہوا مسئلہ ہے،انہوں نے افغانستان پر زور دیا کہ وہ اپنی سرزمین کو پاکستان یا خطے کے کسی بھی ملک کے خلاف دہشت گردی کے لیے استعمال نہ ہونے دے، جبکہ بیرونی حمایت یافتہ دہشت گردی کا خاتمہ خطے کے امن کے لیے ناگزیر ہے-

    انہوں نے کہا کہ وزیراعظم شہباز شریف اور فیلڈ مارشل سید عاصم منیر کی کوششوں سے پاکستان خطے میں توازن اور استحکام کی ایک مضبوط علامت کے طور پر سامنے آیا ہے، جبکہ ایران اور امریکا کے تنازع کے پرامن حل کے لیے پاکستان کی سفارتی کوششوں کو عالمی سطح پر سراہا گیا۔صدر مملکت نے اس عزم کا اعادہ کیا کہ پاکستانی قوم اور مسلح افواج ہر چیلنج کا مقابلہ کرنے اور ملک کے دفاع کے لیے مکمل طور پر تیار ہیں۔

    معرکہ حق کی کامیابی کا ایک سال مکمل ہونے پر مسلح افواج پاکستان نے کہا ہے کہ معرکہ حق میں کامیابی مسلح افواج کی تیاری، لگن اور پیشہ ورانہ مہارت کا ثبوت ہے، جس نے مسلح افواج پر عوام کے اعتماد کو فیصلہ کن طور پر مضبوط کیا۔

    پاک فوج کے شعبہ تعلقات عامہ (آئی ایس پی آر) کے مطابق معرکہ حق کی کامیابی کا ایک سال مکمل ہونے پر چیف آف آرمی اسٹاف فیلڈ مارشل عاصم منیر، پاک بحریہ کے سربراہ ایڈمرل نوید اشرف اور پاک فضائیہ کے سربراہ ایئر چیف مارشل ظہیر احمد بابر سدھو نے پوری قوم کو مبارکباد پیش کی ہے۔

    افواج پاکستان نے کہاکہ قوم کی غیر متزلزل حمایت کے ساتھ مسلح افواج پاکستان کی سلامتی، استحکام اور علاقائی سالمیت کو یقینی بناتے ہوئے تمام اندرونی اور بیرونی چیلنجوں کا مقابلہ کرنے کے لیے مستعد اور پوری طرح تیار ہیں،قومی یکجہتی، احترام اور تشکر کے ساتھ منایا جانے والا یہ اہم دن پیشہ ورانہ مہارت، ہمت اور اتحاد کے پائیدار جذبے کا ثبوت ہے۔

    بیان میں کہا گیا ہے کہ مسلح افواجِ ہمیشہ پاکستانی عوام کے شانہ بشانہ کھڑی ہیں اور قوم سے لازوال رشتے کو جذبہ خدمت کے ساتھ فخر سے نبھا رہی ہیں معرکہ حق قوم کی تاریخ میں ایک اہم سنگ میل بن گیا ہے، جو قومی عزم، عسکری مہارت اور حکمت عملی کی پختگی کی عکاسی کرتا ہے معرکہ حق کی کامیابی نے نہ صرف قومی اعتماد کو مضبوط کیا بلکہ پاکستان کو ایک ذمہ دار اور مستحکم علاقائی قوت کے طور پر بھی اُجاگر کیا، جو مؤثر دفاعی صلاحیتوں کا حامل ہے۔

    بیان میں کہا گیا ہے کہ معرکہ حق کے دوران پاکستان کے پُرعزم اور مؤثر ردِعمل نے دشمن کی سازشوں، فالس فلیگ کے جھوٹے بیانیے اور گمراہ کن پرو پیگنڈے کو بے نقاب کیا، جس کے نتیجے میں دشمن کو عالمی سطح پر رسوائی اٹھانا پڑی پراکسی دہشتگردی سمیت روایتی اور ہائبرڈ چیلنجز کا سامنا کرنے کے باوجود مسلح افواج نے زمینی، فضائی، بحری، سائبر اور معلوماتی ڈومینز میں اعلیٰ آپریشنل صلاحیت کا مظاہرہ کیا معرکہ حق کے بعد پاکستان نے اپنی دفاعی صلاحیتوں میں مزید اضافہ کرتے مکمل اسپیکٹرم ڈیٹرنس کو تقویت دی ہے۔

    مسلح افواج نے کہاکہ معرکہ حق کی کامیابی کا پہلا سال اس امر کی توثیق کرتا ہے کہ پاکستان خطے میں امن و استحکام کے فروغ اور اپنی خودمختاری کے تحفظ کے لیے پرعزم اور ثابت قدم ہے پاکستان اس بات پر یقین رکھتا ہے کہ جنوبی ایشیا میں پائیدار امن صرف بامعنی مذاکرات، باہمی احترام اور بین الاقوامی قانون اور انصاف کے اصولوں کی پاسداری کے ذریعے ہی حاصل کیا جا سکتا ہے۔

    انسپکٹر جنرل پولیس اسلام آباد علی ناصر رضوی نے کہا ہے کہ بنیان مرصوص صرف ایک آپریشن نہیں بلکہ ایک نظریہ اور طرزِ زندگی ہے-

    معرکہ حق آپریشن بنیان مرصوص کی پہلی سالگرہ کی تقریب سے خطاب کرتے ہوئے انہوں نے کہاکہ بنیان مرصوص صرف ایک آپریشن نہیں بلکہ ایک نظریہ اور طرزِ زندگی ہے، جبکہ پاکستانی قوم سیسہ پلائی ہوئی دیوار کی مانند متحد ہے اگر دشمن نے میلی آنکھ سے دیکھا تو پوری قوم مزید مضبوط ہو کر سامنے آئے گی، معرکہ حق میں افواجِ پاکستان نے اپنی صلاحیتوں کا لوہا منوایا، اور دشمن کا غرور خاک میں ملا دیا گیا ہے، جس کے بعد پاکستان ایک ناقابلِ تسخیر قوت بن چکا ہے۔

    انہوں نے پاک فوج، فضائیہ اور دیگر سیکیورٹی اداروں کو بنیان مرصوص کی عملی تصویر قرار دیتے ہوئے کہاکہ فیلڈ مارشل کی قیادت میں افواجِ پاکستان نے تاریخ ساز کامیابی حاصل کی،اس دوران قوم نے مثالی اتحاد کا مظاہرہ کیا، اور عوام میں ایسا جذبہ دیکھنے میں آیا کہ لوگ بارڈر پر جانے کے لیے بھی تیار تھے۔ ان کے مطابق معرکۂ حق کی کامیابی ہمیشہ ایک تاریخی دن کے طور پر یاد رکھی جائے گی۔

    انہوں نے کہا کہ پاکستان آج عالمِ اسلام میں ایک مرکزی قوت کے طور پر ابھر رہا ہے، جبکہ ہر پاکستانی جوان، ہر بیٹی، ہر طالبعلم اور ہر پولیس اہلکار بنیان مرصوص کا حصہ ہےپاکستان کے خلاف سازش کرنے والوں کو اپنی اوقات میں رہنا چاہیےاسلام آباد پولیس کی 11 ہزار فورس اور 44 لاکھ شہری افواجِ پاکستان کے شانہ بشانہ کھڑے ہیں، ہم متحد ہیں، مکمل طور پر تیار ہیں اور اپنے وطن پاکستان پر فخر کرتے ہیں۔

  • ٹرمپ کا روس اور یوکرین کے درمیان 3 روزہ جنگ بندی کا اعلان،قیدیوں کا تبادلہ

    ٹرمپ کا روس اور یوکرین کے درمیان 3 روزہ جنگ بندی کا اعلان،قیدیوں کا تبادلہ

    امریکی صدر ڈونلڈ ٹرمپ نے روس اور یوکرین کے درمیان 3 روزہ جنگ بندی کا اعلان کیا ہے-

    صدر ٹرمپ نے اپنے سوشل میڈیا پلیٹ فارم ’ٹروتھ سوشل‘ پر جاری بیان میں کہا کہ روس میں یوم فتح کی تقریبات منائی جا رہی ہیں جبکہ یوکرین نے بھی دوسری جنگ عظیم میں اہم کردار ادا کیا تھا اسی مناسبت سے یہ جنگ بندی عمل میں لائی جا رہی ہے اس جنگ بندی کے دوران ہر قسم کی عسکری کارروائیاں معطل رہیں گی جبکہ دونوں ممالک ایک، ایک ہزار قیدیوں کا تبادلہ بھی کریں گے،9، 10 اور 11 مئی کو دونوں ممالک کے درمیان عارضی سیز فائر نافذ رہے گا۔

    ٹرمپ نے کہا کہ یہ درخواست انہوں نے براہ راست کی تھی جس پر روسی صدر ولادیمیر پیوٹن اور یوکرینی صدر وولودیمیر زیلنسکی نے اتفاق کیا،امید ہے کہیہ پیشرفت ایک طویل، خونریز اور سخت جنگ کے خاتمے کی شروعات ثابت ہوگی اس بڑے تنازع کے مستقل خاتمے کے لیے مذاکرات جاری ہیں اور فریقین ہر گزرتے دن کے ساتھ کسی حل کے قریب پہنچ رہے ہیں،وس یوکرین جنگ دوسری جنگ عظیم کے بعد دنیا کا سب سے بڑا تنازع بن چکی ہے تاہم اب امن کی جانب پیشرفت ممکن دکھائی دے رہی ہے۔

  • آبنائے ہرمز میں جہازوں کے کنٹرول اور فیس وصولی ،ایران نے بحری اتھارٹی قائم کردی

    آبنائے ہرمز میں جہازوں کے کنٹرول اور فیس وصولی ،ایران نے بحری اتھارٹی قائم کردی

    ایران نے آبنائے ہرمز میں باقاعدہ ایک بحری اتھارٹی قائم کردی۔

    عالمی خبر رساں ادارے کے مطابق ایران کی قائم کردی بحری اتھارٹی آبنائے ہرمز سے تجارتی جہازوں کو گزرنے کی اجازت دینے اور ان سے ٹرانزٹ فیس وصول کرنے کی مجاز ہوگی ’لائیڈز لسٹ‘ کے مطابق ’خلیج فارس اسٹریٹ اتھارٹی‘ نے حالیہ دنوں میں ایک نیا طریقہ کار متعارف کرایا ہے جس کے تحت جہازوں کو روانگی سے قبل ٹرانزٹ اجازت نامہ حاصل کرنا اور فیس ادا کرنا ہو گی آبنائے ہرمز سے گزرنے والے تجارتی جہازوں کو ایک فارم فراہم کیا جا رہا ہے جس میں ملکیت، انشورنس، عملے کی تفصیلات اور مجوزہ راستے سے متعلق مکمل معلومات مانگی گئی ہیں۔

    واضح رہے کہ ایران کے سرکاری چینل نے بھی رواں ہفتے دعویٰ کیا تھا کہ ایران نے ’آبنائے ہرمز سے گزرنے کے خواہشمند جہازوں کو ای میل کے ذریعے قواعد و ضوابط بھیج دیے ہیں،یران نے اس اہم ترین آبی گزرگاہ کو 28 فروری سے بند کر رکھا ہے ،حالات اس وقت اور کشیدہ ہوگئے جب 8 اپریل کو جنگ بندی کے اعلان کے بعد امریکا نے ایران کی بندرگاہوں کی بحری ناکہ بندی کردی جو تاحال جاری ہے اور اس وجہ سے جنگ بندی مذاکرات تعطل کا شکار ہیں۔

  • آئی ایم ایف نے پاکستان کیلئے 1.2 ارب ڈالر قسط کی منظوری دے دی

    آئی ایم ایف نے پاکستان کیلئے 1.2 ارب ڈالر قسط کی منظوری دے دی

    بین الاقوامی مالیاتی فنڈ (آئی ایم ایف) نے قرض پروگرام کے تحت پاکستان کے لیے اگلی قسط کی منظوری دے دی ہے، جس کی مالیت 1.2 ارب ڈالر سے زائد بتائی گئی ہے-

    وزیرخزانہ محمد اورنگزیب نے کہا ہےکہ عالمی مالیاتی فنڈ (آئی ایم ایف) نے پاکستان کے لیے 1.2ارب ڈالر قسط کی منظوری دے دی آئی ایم ایف نے پاکستان کے لیے قسط کی منظوری واشنگٹن میں ہونے والے ایگزیکٹو بورڈ کے اجلاس میں دی آئی ایم ایف نے ایک ارب ڈالر ای ایف ایف پروگرام کے تحت جاری کرنے کی منظوری دی جبکہ موسمی تبدیلی کے اثرات سے نمٹنے کے لیے 20 کروڑ ڈالر جاری کرنے کی منظوری دی گئی۔

    واشنگٹن میں بین الاقوامی مالیاتی فنڈ کے ایگزیکٹو بورڈ کا اہم اجلاس منعقد ہوا، جس میں پاکستان کے قرض پروگرام کا تفصیلی جائزہ لیا گیا۔ اجلاس کے بعد پاکستان کے لیے 1.2 ارب ڈالر سے زائد کی اگلی قسط کی منظوری دے دی گئی پاکستان کو مجموعی طور پر 7 ارب ڈالر کے ایکسٹینڈڈ فنڈ فسیلٹی اور ریزیلینس اینڈ سسٹین ایبلٹی فیسلٹی پروگرامز کے تحت رقوم فراہم کی جائیں گی۔

    وزارتِ خزانہ کے حکام کا کہنا ہے کہ تیسری جائزہ رپورٹ کامیابی سے مکمل ہونے کے بعد پاکستان کو ایک ارب ڈالر ملنے کا قوی امکان تھا جائزہ مشن نے پاکستان کی معیشت کا جائزہ لینےکے بعد قرض جاری کرنے کی سفارش کی تھی، ذرائع کے مطابق موجودہ پروگرام کے تحت پاکستان کو مجموعی طور پر 3.3 ارب ڈالر جاری ہو چکے ہیں، پاکستان نے ستمبر 2024 میں 37 ماہ کے لیے ای ایف ایف پروگرام لیا تھا۔

    مزید بتایا گیا ہے کہ ریزیلینس اینڈ سسٹین ایبلٹی فیسلٹی کے دوسرے جائزے کے بعد پاکستان کو 210 ملین ڈالر اضافی رقم بھی فراہم کی جائے گی پاکستان اور آئی ایم ایف کے درمیان 27 مارچ کو اسٹاف لیول معاہدہ طے پایا تھا، جس کے بعد پاکستان نے پروگرام کی بیشتر شرائط پر عمل درآمد مکمل کر لیا ہے۔

    حکام کا کہنا ہے کہ ایگزیکٹو بورڈ نے اسٹاف لیول معاہدے کی روشنی میں قرض کی منظوری دی ہے، جبکہ پاکستان کی جانب سے تمام پیشگی اقدامات مکمل کیے جا چکے تھے پاکستان نے اسٹاف لیول معاہدہ کامیابی سے مکمل کیا ہے اور تمام مطلوبہ شرائط پر عمل درآمد کیا گیا ہے، جس کے بعد قرض کی منظوری کی راہ ہموار ہوئی۔

  • پیٹرولیم مصنوعات کی قیمتوں میں اضافہ کردیا گیا

    پیٹرولیم مصنوعات کی قیمتوں میں اضافہ کردیا گیا

    حکومت نے پیٹرولیم مصنوعات کی قیمتوں میں اضافہ کردیا۔

    پٹرولیم ڈویژن کے مطابق ڈیزل کی قیمت میں 15روپے فی لیٹر کا اضافہ کیا گیا جس کے بعد ڈیزل کی نئی قیمت 414 روپے58 پیسے فی لیٹر مقرر ہوگئی پیٹرول کی قیمت میں 14روپے 92 پیسےفی لیٹر کا اضافہ کیا گیا جس کے بعد پیٹرول کی نئی قیمت 414 روپے 78 پیسے فی لیٹر ہوگئی پیٹرول اور ڈیزل کی نئی قیمتیں ایک ہفتہ کے لیے مقرر کی گئی ہیں، نئی قیمتوں کا اطلاق رات 12بجے سے ہوگا۔

    ایران، اسرائیل اور امریکا کے درمیان جنگ کے آغاز کے بعد عالمی منڈی میں تیل کی قیمتوں میں شدید اتار چڑھاؤ دیکھا گیا، جس کے اثرات پاکستان میں بھی سامنے آئے جہاں پیٹرولیم مصنوعات کی قیمتوں میں متعدد بار نمایاں اضافہ اور کمی ریکارڈ کی گئی۔

    پیٹرولیم مصنوعات کی قیمتوں میں پہلا بڑا اضافہ 6 مارچ 2026 کو کیا گیا، جب حکومت نے عالمی تیل قیمتوں میں اضافے کے باعث پیٹرول اور ڈیزل کی قیمتوں میں تقریباً 55 روپے فی لیٹر اضافہ کیا اس اضافے کے بعد پیٹرول کی قیمت بڑھ کر تقریباً 321 روپے فی لیٹر تک پہنچ گئی، جو حالیہ برسوں کی بلند ترین سطح تھی اسی طرح ڈیزل کی فی لیٹر قیمت میں بھی 55 روپے کا اضافہ کیا گیا، جس کے بعد نئی قیمت 335 روپے ہوگئی تھی۔

    اس کے بعد دوسری بار 3 اپریل کو پیٹرول کی قیمت میں 137 روپے 23 پیسے فی لیٹر اضافہ کیا گیا، جس کے بعد نئی قیمت 458 روپے 40 پیسے فی لیٹر ہو گئی تھی جب کہ ڈیزل کی قیمت 184 روپے بڑھا کر 520 روپے 35 پیسے فی لیٹر مقرر کر دی گئی تھی،بعد ازاں عوامی ردعمل اور عالمی قیمتوں میں جزوی کمی کے تناظر میں حکومت نے ایک بڑا ریلیف دیتے ہوئے پیٹرول کی قیمت میں تقریباً 80 روپے فی لیٹر کمی کا اعلان کیا، جس کے بعد قیمت کم ہو کر تقریباً 378 روپے فی لیٹر پر آ گئی تھی۔

    10 اپریل کو وزیراعظم نے ایک بار پھر پیٹرول کی قیمت میں صرف 10 اور جب کہ ڈیزل کی قیمت میں 135 روپے فی لیٹر کمی کی منظوری دی تھی۔ اس کمی کے بعد پیٹرول کی فی لیٹر قیمت 366 روپے جب کہ ڈیزل کی فی لیٹر قیمت 385 روپے ہوگئی تھی۔

    وزیراعظم شہباز شریف نے 17 اپریل کو ڈیزل کی قیمت میں 32 روپے 12 پیسے فی لیٹر کمی کی منظوری دی تھی، جس کے بعد اس کی نئی قیمت 385 روپے 54 پیسے سے کم ہو کر 353 روپے 43 پیسے ہو گئی تھی جب کہ پیٹرول کی قیمت برقرار رکھنے کا فیصلہ کیا گیا تھا۔

    18 اپریل کو لائٹ ڈیزل کی قیمت میں 70 روپے 04 پیسے فی لیٹر کمی کی گئی، جس کے بعد نئی قیمت 369 روپے 72 پیسے سے کم ہو کر 299 روپے 32 پیسے فی لیٹر ہوگئی تھی اسی طرح جیٹ فیول کی قیمت بھی 23 روپے 59 پیسے فی لیٹر کمی کی گئی، جس کے بعد اس کی نئی قیمت 494 روپے 71 پیسے سے کم ہو کر 471 روپے 01 پیسہ فی لیٹر مقرر کی گئی۔

    24 اپریل کو حکومت نے ایک بار پھر پیٹرولیم مصنوعات کی قیمتوں میں بڑا اضافہ کرتے ہوئے پیٹرول اور ڈیزل کی قیمت 26 روپے 77 پیسے فی لیٹر تک بڑھادی تھی اس کے بعد 30 اپریل کو بھی حکومت نے پیٹرولیم مصنوعات کی قیمتوں میں اضافہ کیا تھا، پیٹرول کی فی لیٹر قیمت میں 6 روپے 51 پیسے کا اضافہ کیا گیا تھا، جس کے بعد پیٹرول کی نئی قیمت 399 روپے 86 پیسے فی لیٹر مقرر ہوگئی تھی اسی طرح ہائی اسپیڈ ڈیزل کی قیمت میں 19 روپے 39 پیسے کا اضافہ کیا گیا تھا، جس کے بعد ہائی اسپیڈ ڈیزل کی نئی قیمت 399 روپے 58 پیسے فی لیٹر ہوگئی تھی۔

  • 2026 کرہ ارض کا دوسرا گرم ترین سال بن سکتا ہے،ماہرین

    2026 کرہ ارض کا دوسرا گرم ترین سال بن سکتا ہے،ماہرین

    ماہرینِ موسمیات نے خبردار کیا ہے کہ نئے اعداد و شمار کے مطابق 2026 میں آنے والا ’ایل نینو‘ نہ صرف قریب ہے، بلکہ یہ تاریخ کا ایک انتہائی شدید یا ’سپر ایونٹ‘ بن سکتا ہے۔

    بحرِ الکاہل میں درجہ حرارت کی تیزی سے بدلتی صورتحال نے سائنسدانوں کے لیے خطرے کی گھنٹی بجا دی ہے، کیونکہ سمندر کی گہرائی میں توانائی تیزی سے جمع ہو رہی ہے جس سے سطح کے نیچے کا درجہ حرارت غیر معمولی حد تک بڑھ چکا ہے،تازہ ترین پیشگوئی کے مطابق جولائی تک اس موسمیاتی رجحان کے ابھرنے کے امکانات 61 فیصد ہیں، جبکہ 25 فیصد خدشہ اس بات کا ہے کہ یہ ’سپر ایل نینو‘ کی صورت اختیار کرلے گا، جو گزشتہ 140 سالوں میں طاقتور ترین واقعہ ثابت ہوسکتا ہے۔

    ورلڈ میٹرولوجیکل آرگنائزیشن کے مطابق موسمیاتی ماڈلز اس بات پر متفق ہیں کہ ایل نینو کا آغاز ہونے والا ہے جو وقت کے ساتھ مزید شدت اختیار کرے گا ماہرین اس صورتحال پر خاصے پریشان ہیں، کیونکہ اس وقت سمندر کی سطح کا درجہ حرارت پہلے ہی ریکارڈ حد تک بلند ہے اور مغربی بحرِ الکاہل میں اٹھنے والے غیر معمولی ’ٹرپل سائیکلونز‘ گرم پانی کو انتہائی تیز رفتاری سے مشرق کی جانب دھکیل رہے ہیں۔

    رپورٹ میں متنبہ کیا گیا ہے کہ اگر مغربی ہواؤں کا یہ سلسلہ یونہی جاری رہا، تو عالمی درجہ حرارت ایک ایسی سطح پر پہنچ سکتا ہے جس کا پہلے کبھی مشاہدہ نہیں کیا گیا،خدشہ ظاہر کیا جا رہا ہے کہ ایل نینو کے باعث 2026 کرہ ارض کا دوسرا گرم ترین سال بن سکتا ہے، جو ممکنہ طور پر 2027 میں گرمی کے تمام سابقہ ریکارڈ پاش پاش کر دے گا۔

  • راولپنڈی میں 1200 روپے کے تنازع پر دو افراد قتل

    راولپنڈی میں 1200 روپے کے تنازع پر دو افراد قتل

    راولپنڈی میں 1200 روپے کے تنازع پر دو افراد کو قتل کردیا گیا۔

    پولیس کے مطابق راولپنڈی کے تھانہ دھمیال کے علاقے پیر مہر علی شاہ ٹاؤن میں لڑائی جھگڑے کے دوران 25 سالہ سراج شدید زخمی ہوا جو اسپتال منتقلی دوران راستے میں دم توڑ گیا اور جب پولیس موقع پر پہنچی تو پتا چلا لڑائی جھگڑے میں ایک اور شخص بھی قتل ہوا ہے شہری زین اور دیگر کا 1200 رو پے کے معاملے پر دکان دار سے جھگڑا ہوا اور جھگڑے میں فائرنگ کرکے دکان دار کو قتل کیا گیا، جس پر دوسرے فریق نے زین کو ڈنڈوں کے وار کرکے قتل کردیا۔

    سی پی او سید خالد محمود ہمدانی نے تھانہ دھمیال کے علاقے میں دو شہریوں کے قتل کے واقعے کا نوٹس لیا اور واقعے کی رپورٹ طلب کرتے ہوئے ملوث ملزمان کی فوری گرفتاری کا حکم دیا۔

    پولیس نے بتایا کہ ابتدائی اطلاعات کے مطابق واقعہ دونوں فریقین کے درمیان معمولی تلخ کلامی پر پیش آیا تاہم واقعےکی تمام زاویوں سے تحقیقات جاری ہیں اور ابتدائی تحقیقات میں معلوم ہوا کہ دونوں فریقین کا ایک ایک فرد جاں بحق ہوا ہے تاہم فرانزک ٹیمیں موقع پر موجود ہیں اور شواہد اکٹھے کیے گئے ہیں۔

    آئی جی پنجاب عبدالکریم نے بھی تھانہ دھمیال کے علاقے پیر مہر علی شاہ ٹاون میں لین دین کے تنازع پر فائرنگ سے 2 افراد کے قتل کے واقعے کا نوٹس لیا اور رپورٹ طلب کرلی آئی جی پنجاب نے سی پی او راولپنڈی کو فائرنگ میں ملوث ملزمان کی فوری گرفتاری کا حکم دیا اور کہا کہ دہرے قتل کی وار دات میں ملوث ملزمان کی گرفتاری کے لیے تمام وسائل بروئے کار لائیں۔