Tag: تازہ ترین

سعودی عرب کے ولی عہد اور وزیراعظم شہزادہ محمد بن سلمان کی زیر صدارت جدہ میں کابینہ کا اجلاس ہوا، جس میں علاقائی صورتحال، فلسطین سمیت اہم عالمی امور اور سعودی عرب کے مختلف ممالک کے ساتھ تعلقات کا جائزہ لیا گیا۔

سعودی سرکاری خبر رساں ادارے کے مطابق اجلاس کے آغاز پر شہزادہ محمد بن سلمان نے عمان کے سلطان ہیثم بن طارق، مصر کے صدر عبدالفتاح السیسی اور یونان کے وزیراعظم کیریاکوس مٹسوٹاکس کے ساتھ ہونے والی ملاقاتوں اور بات چیت کے بارے میں کابینہ کو آگاہ کیا، کابینہ نے سعودی عرب کے ابہا، خمیس مشیط، جازان اور نجران میں شہری اور اقتصادی تنصیبات پر حوثی ملیشیا کے حملوں کی مذمت کی، اجلاس میں بحیرہ احمر میں تجارتی بحری جہازو ں کو نشانہ بنانے اور بین الاقوامی بحری آمدورفت کو خطرے میں ڈالنے پر بھی تشویش کا اظہار کیا گیا۔

سعودی کابینہ نے واضح کیا کہ مملکت اپنی خودمختاری، شہریوں اور مقیم افراد کی سلامتی اور قومی اثاثوں کے تحفظ کے لیے اقدامات جاری رکھے گی حملوں میں زخمی ہونے والے افراد کو بہترین طبی سہولیات فراہم کرنے کی بھی ہدایت کی گئی، اجلاس میں فلسطین اور مقبوضہ علاقوں کی صورتحال پر بھی غور کیا گیا، سعو د ی کابینہ نے اسرائیلی حملوں اور خلاف ورزیوں کو روکنے کے لیے عرب ممالک کی مشترکہ کوششوں کی حمایت کا اعادہ کیا اور فلسطینی علاقوں میں توسیع پسندا نہ پالیسیوں، آبادکاری اور جبری بے دخلی کی مخالفت کی۔

کابینہ نے سعودی عرب اور جرمنی کے درمیان اسٹریٹجک مذاکرات کے قیام سے متعلق مفاہمتی یادداشت کا خیرمقدم کیا، اجلاس میں مختلف شعبوں میں سرمایہ کاری اور تعاون کے کئی دیگر معاہدوں کی بھی منظوری دی گئی،کابینہ نے ٹیکنالوجی اور مصنوعی ذہانت کے شعبے میں LEAP 2026 کے نتائج کو بھی سراہا، جس کے دوران تقریباً 15 ارب ڈالر کی سرمایہ کاری، معاہدوں اور اقدامات کا اعلان کیا گیا۔

اجلاس میں سعودی عرب اور اسپین کے درمیان سفارتی، خصوصی اور سروس پاسپورٹ رکھنے والوں کے لیے باہمی ویزا استثنیٰ کے معاہدے سمیت سوئٹزر لینڈ کے ساتھ سرمایہ کاری کے فروغ اور تحفظ کے معاہدے کی بھی منظوری دی گئی۔

سابق دہلی چیف سیکریٹری راکیش مہتا نے نوئیڈا میں اپنی رہائش گاہ پر خودکشی کرلی۔

بھارتی میڈیا کے مطابق 74 سالہ راکیش مہتا کی لاش 6 ستمبر کو نوئیڈا میں واقع ان کے گھر سے ملی، جبکہ ان کی آخری رسومات اتوار کو ادا کی گئیں، پولیس کو جائے وقوعہ سے ایک نوٹ بھی ملا ہے جس میں مبینہ طور پر انہوں نے اپنی صحت اور ذہنی مسائل کو اس انتہائی اقدام کی وجہ قرار دیا ہے۔

راکیش مہتا 1975 بیچ کے انڈین ایڈمنسٹریٹو سروس (آئی اے ایس) افسر تھے اور سابق دہلی وزیر اعلیٰ شیلا ڈکشٹ کے دور میں مختلف اہم عہدوں پر خدمات انجام دیتے رہے، وہ دہلی میونسپل کارپوریشن کے کمشنر بھی رہے۔

راکیش مہتا 2007 میں دہلی کے چیف سیکریٹری مقرر ہوئے اور 3 سال سے زائد عرصے تک اس عہدے پر فائز رہے ان کے دور میں دہلی میں ٹرانسپور ٹ، بجلی اور شہری بنیادی ڈھانچے کے کئی اہم منصوبے مکمل ہوئے، جبکہ 2010 میں دہلی میں ہونے والے دولتِ مشترکہ کھیلوں کا انعقاد بھی ان کے چیف سیکریٹری کے دور میں ہوا۔

مغربی کنارے میں اسرائیلی آبادی کاری کے مسئلے پر اسرائیل اور اس کے مغربی اتحادیوں کے درمیان سفارتی کشیدگی شدید تر ہو گئی ہے۔

برطانوی حکومت، فرانس اور کینیڈا کی جانب سے مغربی کنارے کی بستیوں سے آنے والی آبادکاروں کی اسرائیلی مصنوعات کی درآمد پر پابندی کے اعلان کے بعد اسرائیل نے سخت ردعمل دیتے ہوئے مشرقی یروشلم میں قائم برطانوی قونصلیٹ کو بند کرنے کا فیصلہ کر لیا ہے۔

اسرائیلی وزیر خارجہ گڈون سار نے اس فیصلے کا اعلان کرتے ہوئے برطانوی اقدام کو ”اخلاقی طور پر گمراہ کن اور اسرائیل کے اندرونی و انتخابی معاملات میں کھلی مداخلت“ قرار دیا ہے، اس کے علاوہ جیرمی کوربن سمیت متعدد برطانوی اہلکاروں اور شہریوں کے اسرائیل میں داخلے پر بھی پابندی عائد کی جا رہی ہے۔

یہ تنازع اس وقت مزید بڑھا جب برطانوی وزیراعظم اینڈی برنہم، فرانسیسی صدر ایمانوئل میکرون اور کینیڈین وزیراعظم مارک کارنی نے ایک مشترکہ بیان جا ری کرتے ہوئے دو ریاستی حل کی حفاظت کے لیے تجارتی اقدامات اٹھانے کا اعلان کیا۔

برطانیہ کے وزیر خارجہ ایڈ ملی بینڈ نے کہا کہ ہم اب فلسطینیوں کی تباہی اور حقوق کی خلاف ورزیوں پر خاموش تماشائی بنے نہیں رہ سکتے، لہذا ہمیں سیکیورٹی اور دو ریاستی حل کی بقا کے لیے اب عملی اقدامات کرنا ہوں گے، ایڈ ملی بینڈ نے اسرائیلی اقدامات کو فلسطینیوں کی نسل کشی سے بھی تعبیر کیا، جسے اسرائیلی و زیر خارجہ نے اشتعال انگیز جھوٹ قرار دیتے ہوئے مسترد کر دیا۔

دوسری جانب ڈنمارک، ناروے، اسپین اور سویڈن سمیت نو دیگر ممالک کے وزرائے خارجہ نے بھی ایک الگ بیان میں دو ریاستی حل کی حمایت کا اعادہ کیا ہے اس سفارتی جنگ کے دوران کینیڈا کی وزیر خارجہ انیتا آنند نے کہا کہ مغربی کنارے میں غیر قانونی بستیاں امن کے مقاصد کو شدید نقصان پہنچاتی ہیں، اسی لیے کینیڈا دو ریاستی حل کے موقف پر قائم ہے،تاہم اس معاملے پر امریکا نے اپنے مغربی اتحادیوں سے مختلف موقف اختیار کیا ہے۔

امریکی وزیر خارجہ مارکو روبیو نے ان پابندیوں پر تحفظات کا اظہار کرتے ہوئے کہا کہ اس نوعیت کی پابندیاں مغربی کنارے میں حالات کو مزید غیر مستحکم کر سکتی ہیں، اور واشنگٹن اسرائیلی بستیوں سے آنے والی مصنوعات کی درآمدات پر کوئی پابندی نہیں لگائے گا۔

امریکا نے خلیج عمان اور خارگ جزیرے کے قریب ایران کے پانچ تیل کے ٹینکرز پر حملہ کر کے انہیں تباہ کرنے کا دعویٰ کیا ہے. جس کے جواب میں ایران نے اردن میں قائم امریکی فوجی اڈے پر میزائلوں اور راکٹوں کی بارش کردی۔

سینٹکام کا کہنا ہےکہ اس کی فورسز نے ایرانی جہازوں پر حملہ ایک امریکی جنگی جہاز پر بیلسٹک میزائل داغنے کی کوششوں کے جواب میں کیا،اس کے جواب میں ایران نے اردن میں قائم امریکی فوجی اڈے اور خطے میں امریکی جہازوں کو نشانہ بنانے کا دعویٰ کیا ہے۔

پاسدارانِ انقلاب نے دعویٰ کیا ہے کہ اس نے اردن میں الازرق امریکی اڈے کو نشانہ بنایا ساتھ ہی امریکی بحریہ کے دو ڈسٹرائیرز کو بھی نشانہ بنایا اردن میں امریکا کے ایف 35 اور ایف 15 ہینگرز کو تباہ کردیا گیا ہے، امریکی عملے کو فوری اپنے جہاز چھوڑنے کی ہدایت کرتے ہوئے کہا ہے کہ امریکی حملوں کے جواب میں کویت اور بحرین میں امریکی آئل ٹینکرز کو نشانہ بنائیں گے، ساتھ ہی مشرقِ وسطیٰ میں امریکی مفادات کو بھی نشانہ بنایا جائے گا۔

امریکی سینٹرل کمانڈ نے ایک باضابطہ بیان میں بتایا ہے کہ پاسدارانِ انقلاب نے دو دنوں میں دو بار ہمارے جنگی جہاز کو نشانہ بنانے کی کوشش کی، تاہم جہاز ان حملوں سے محفوظ رہا اور کسی بھی امریکی اہلکار کو نقصان نہیں پہنچا، جواب میں ایرانی تیل بردار جہازوں کو نشانہ بنایا گیا، تاہم حملے سے قبل جہاز کے عملے کو بحفاظت نکلنے کی ہدایت کی گئی تھی۔

دوسری جانب ایران کے مسلح افواج کے چیف آف اسٹاف علی عبداللہی نے پہلے ہی خبردار کیا تھا کہ اگر ہمارے ٹینکرز کو نشانہ بنایا گیا تو ہم خطے میں امر یکی تنصیبات کو نشانہ بنائیں گے حملوں کے بعد ایرانی امورِ خارجہ نے اسے اقوامِ متحدہ کے منشور کی خلاف ورزی اور جنگی جرم قرار دیا ہے۔

اس کشیدگی کے حوالے سے امریکی وزیرِ خارجہ مارکو روبیو نے صحافیوں سے گفتگو کرتے ہوئے کہا کہ ایران امریکی بحری جہازوں کو نشانہ بنانے کی کوشش جاری رکھے ہوئے ہے، اور ہر بار جب وہ ایسا کریں گے تو انہیں اپنے ٹینکرز سے ہاتھ دھونا پڑے گا۔

دوسری جانب اردن کی افواج نے تصدیق کی ہے کہ ان کے دفاعی نظام نے بیس میں سے اٹھارہ ایرانی میزائلوں کو فضا میں ہی تباہ کر دیا اور کسی قسم کا جانی نقصان نہیں ہوا۔