Tag: عمران خان

ڈاکٹرفردوس عاشق اعوان نے ن لیگ پر تنقید کرتے ہوئے کہا کہ ن لیگ ڈسکہ اور وزیرآباد کے ضمنی انتخابات میں کرپشن کا پیسہ لٹا رہی ہے- عطا تارڑ نے سستی شہرت کے لئے گرفتاری کا ڈرامہ رچایا، ن لیگ اوچھے سیاسی ہتھکنڈوں پر اتر آئی- وزیراعظم نے لاہور میں درخت لگانے کی مہم کا آغاز کر دیا۔ میڈیا تنظیمیں شہر کو سرسبز بنانے کی تحریک کی قیادت کریں گی-

ڈسکہ اور وزیرآباد کے ضمنی انتخابات کے حلقوں میں ن لیگ کرپشن کا پیسہ مال مفت کی طرح لٹا رہی ہے۔ سیاسی اداکار عطا اللہ تارڑ اور بدنام زمانہ لیگی لیڈر عابدرضا حلقے میں سیاسی افراتفری پھیلانے گئے تھے۔ عطا اللہ تارڑ نے گرفتار ہونے کا ڈرامہ کیا۔ جب گرفتاری ہی نہیں ہوئی تو رہائی کا سوال ہی پیدا نہیں ہوتا۔ عطا اللہ تارڑ سستی شہرت حاصل کرنے کے لئے گھٹیا سیاسی ہتھکنڈے اختیار کر رہے ہیں۔ ن لیگی امیدوار ڈسکہ اور وزیرآباد کے حلقوں سے سیاسی ڈرامے بازی کر کے ہمدردیاں سمیٹنے کی کوشش میں کامیاب نہیں ہو سکتے۔
    ان خیالات کا اظہار معاون خصوصی وزیراعلیٰ پنجاب برائے اطلاعات ڈاکٹر فردوس عاشق اعوان نے آج ڈی جی پی آر میں میڈیا سے گفتگو کرتے ہوئے کیا۔ انہوں نے کہا کہ عطا اللہ تارڑ شریف فیملی کے ذاتی ملازم کی حیثیت سے سینٹ میں پہنچنے کے لئے ہاتھ پاؤں مار رہے ہیں۔ لیکن ایک سیاسی گیدڑ حقائق مسخ کر کے ہیرو نہیں بن سکتا۔ انہوں نے کہا کہ پاکستان کی تاریخ میں پہلی مرتبہ ہوا ہے کہ عمران خان کی حکومت میں الیکشن کمیشن ضمنی انتخابات کے قوانین پر سختی سے عملدرآمد کروا رہا ہے۔سابق حکومتیں ایسے انتخابات کے موقع پر مخالفین کو آڑے ہاتھوں لے کر ان کا بازو مروڑتی تھیں اور اس مقصد کے لئے انتظامیہ کا ناجائز استعمال کیا جاتا تھا مگر عمران خان حکومت اس سسٹم کو بدل کر قانون کی بالادستی یقینی بنانا چاہتی ہے تاکہ اپنی قیادت کا انتخاب کرنے کا اختیار صرف عوام کے پاس ہو۔ انہوں نے کہا کہ ن لیگ حلقے میں سرعام ووٹوں کی خریدوفروخت کر کے الیکشن قوانین کو سبوتاژ کرنا چاہتی ہے۔ لیکن ہم ان کے اوچھے ہتھکنڈوں کا مقابلہ سیاسی میدان میں کرنا چاہتے ہیں۔

    ڈاکٹرفردوس عاشق اعوان نے وزیراعظم پاکستان عمران خان کے دورہ لاہور کے حوالے سے میڈیا کو بریف کرتے ہوئے بتایا کہ وزیراعظم کی ہدایت پر مہنگائی سے نمٹنے کے لئے حال ہی میں تحلیل کی گئی مارکیٹ کمیٹیوں کا متبادل نظام قائم کیا جا رہا ہے جس میں صارفین کو آڑھتی، مڈل مین اور دوکانداروں کی منافع خوری سے بچا کر اشیائے ضروریہ سستے داموں مہیا کی جائیں گی۔ انہوں نے بتایا کہ مارکیٹ کمیٹیوں کے متبادل کے طور پر قائم کئے گئے نظام کو پبلک پرائیویٹ پارٹنرشپ کے ماڈل پر چلایا جائے گا۔ معاون خصوصی نے بتایا کہ وزیراعظم کی ہدایت پر صوبائی وزیرخوراک کو گندم کی مناسب امدادی قیمت کے تعین کے لئے موثر فوڈ پالیسی بنانے کے لئے ترجیحات طے کرنے کا ٹاسک دیا گیا ہے۔ علاوہ ازیں پنجاب میں یونیورسل ہیلتھ انشورنس پروگرام کے تحت ہر فرد کو میڈیکل کور مہیا کرنے کے لئے موثر حکمت عملی بنانے کا فیصلہ کیا گیاہے اور وزیراعظم نے اس ضمن میں محکمہ خزانہ کو ہدایات جاری کر دی ہیں۔

انہوں نے کہا کہ لاہور جو کبھی باغات کا شہر کہلاتا تھا کا قدرتی حسن بحال کرنے اور سموگ جیسے ماحولیاتی مسائل کے حل کے لئے وزیراعظم عمران خان نے شہر میں زیادہ سے زیادہ پودے لگانے کا پیغام دیا ہے۔ وزیراعظم نے جیلانی پارک میں خود اپنے دست مبارک سے پودا لگا کر اس مہم کا آغاز کیا ہے۔ میں نے وزیراعظم کو یقین دلایا ہے کہ شہرکو سرسبز بنانے کے اس مشن میں میڈیا ہراول دستے کا کردارادا کرے گا اور میڈیا تنظیمیں وزیراعظم کے اس خواب کی تکمیل کے لئے جیلانی پارک سمیت پورے شہر میں درخت لگا کر اس صدقہ جاریہ میں اپنا حصہ ڈالیں گی۔  ایک سوال کے جواب نے ڈاکٹرفردوس عاشق اعوان نے کہا کہ کسان کو سبسڈی دینے کے لئے ٹارگٹڈپروگرام پر عملدرآمد کیا جائے گا اور مخصوص طبقے کو کھاد، بیج اور بجلی کے بلوں میں رعایت دی جائے گی۔  ایک اور سوال کے جواب میں انہوں نے کہا کہ سینٹ کے انتخابات کے معاملات میں ہم اپوزیشن کو اتنا سادہ نہیں سمجھتے۔ اپنا حق نہ کسی کو دیں گے اور نہ کسی کا چھینیں گے۔        

صمصام بخاری نے جنگلات کی اہمیت کے حوالے  جنگلی حیات اور جنگلات قدرت کی فطرت کے عکاس ہوتی ہیں جو کہ ماحول کوخوشگوار اور خوبصورت بناتے ہیں – درخت لگانا اور جانور پالنا ہمیں ثواب کمانے کے طور پرلینے چاہئیں – صمصام بخاری کی پنجاب اڑیال بارے ڈاکومنٹری کی نمائش کی تقریب میں بطور مہمان خصوصی شرکت- ڈاکومنٹری گیم وارڈن پنجاب بدر منیر کی خصوصی کاوش سے تیار کروائی گئی-

صوبائی وزیر جنگلی حیات و ماہی پروری سید صمصام علی بخاری نے انٹرنیشنل ویٹلینڈ ڈے پر سالٹ رینج میں پنجاب اڑیال بارے ڈاکومنٹری کی نمائش کی تقریب میں بطور مہمان خصوصی شرکت کی- یہ ڈاکومنٹری گیم وارڈن پنجاب بدر منیر کی خصوصی کاوش سے تیار کروائی گئی ہے- گیم وارڈن پنجاب بدر منیر جنگلی حیات کے تحفظ کے لئے اپنے ذاتی خرچ سے اپنی کاوشیں جاری رکھے ہوئے ہیں – تقریب میں جنگلی حیات کے تحفظ کے لئے کام کرنے والی تنظیموں سے وابستہ افراد نے کثیر تعداد میں شرکت کی-

    صوبائی وزیر جنگلی حیات و ماہی پروری سیدصمصام علی بخاری نے تقریب سے خطاب کرتے ہوئے کہا کہ جنگلی حیات اور جنگلات قدرت کی فطرت کے عکاس، ماحول کوخوشگوار اور خوبصورت بناتے ہیں – ان کی حفاظت ہمارا قومی فرض ہے تاکہ آنے والی نسلوں کے لئے قدرت کے ان انمول تحفوں کو بچا سکیں – سیدصمصام بخاری نے کہا کہ پاکستان تحریک انصاف کی موجودہ حکومت نے عمران خان کی قیادت میں ماحولیات کے تحفظ کے لئے خطیر فنڈز مختص کئے ہیں جن کے اثرات ابھی آنا شروع ہوگئے ہیں – انہوں نے کہا کہ درخت لگانا اور جانور پالنا ہمیں ثواب کمانے کے طور پرلینے چاہئیں – سیدصمصام بخاری نے مزیدکہا کہ اس سال اوکاڑہ اور ساہیوال یونیورسٹی میں جنگلی حیات کو نصاب میں شامل کیا جارہا ہے تاکہ جنگلی حیات کے تحفظ کے لئے عوام میں اس شعور کو اجاگر کیا جائے- انہوں نے کہا کہ وزارت جنگلی حیات عوام میں آگاہی پیدا کرنے کے لئے اپنے تمام وسائل بروئے کار لارہی ہے- انہوں نے کہا کہ ڈاکومنٹری کی تیاری بدرمنیر کی بہترین کاوش ہے-

وزیراعظم عمران خان کی زیر صدارت صوبہ پنجاب میں فروٹ اور سبزی منڈ یوں کی تعداد میں اضافے اور آٹے کی قیمت میں کمی لانے کے حوالے سے کیے جانے والے اقدامات کے جائزے کے لیے اجلاس کیا گیا-

اجلاس میں وزیر برائے اقتصادی امور مخدوم خسرو بختیار، مشیر وزیر اعظم شہزاد اکبر، وزیر اعلی پنجاب سردار عثمان بزدار، معاون خصوصی ملک امین اسلم، سینئر صوبائی وزیر برائے خوراک عبدالعلیم خان، صوبائی وزیر زراعت سردار حسین جہانیاں گردیزی، معاون خصوصی وزیر اعلی پنجاب ڈاکٹر فردوس عاشق اعوان اور سینئر افسران شریک تھے ۔

اجلاس میں پھل اور سبزی منڈیوں کی تعداد میں اضافے کی غرض سے موجودہ قوانین میں نظر ثانی و ترمیم، نجی شعبے کے اشتراک اور طریقہ کار کو مزید سہل بنانے کے حوالے سے لئے گئے فیصلوں پر عملدرآمد کے لئے ابتدائی پیش رفت اور مستقبل کے لائحہ عمل پر تفصیلی بریفنگ دی گئی- اجلاس کو وزیراعظم عمران خان کی خصوصی ہدایات کی روشنی میں اشیائے ضرور یہ کی عوام الناس کو مقرر کردہ نرخوں پر دستیابی، آٹے کی قیمت میں کمی لانے کے لئے گندم سے آٹے کی پیداوار بڑھانے کے ضمن میں فلور ملوں میں پسائی کے 80:20تناسب پر عملدرآمد، گندم کی خریداری، ترسیل اور سٹوریج میں انتظامی اخراجات میں کمی کے حوالے سے اصلاحات پر مجوزہ تجاویز پیش کی گئیں ۔

پھل اور سبزی منڈیوں کی تعداد میں اضافہ کے حوالے سے پنجاب ایگری کلچر مارکیٹنگ ریگولیشن ایکٹ میں ترامیم کے حوالے سے سفارشات، نجی شعبے کو منڈیوں کے قیام میں غیر ضروری انتظامی منظوریوں کے عمل کے خاتمے اور طریقہ کار کو مزید سہل بنانے اور موجودہ منڈیوں میں قیمتوں کے غیر ضروری اتار چڑھاؤ کو مانیٹر کرنے کے حوالے سے بھی وزیراعظم کو آگاہ کیا گیا۔ وزیراعظم کو پھل اور سبزی منڈیوں میں اضافے کے ایکشن پلان پر عملدرآمد حوالے سے نئے رجیم پر بھی آگاہ کیا گیا ۔ وزیراعظم کو آٹے کی قیمت میں کمی لانے کے حوالے سے گندم سے آٹے کی پیداوار بڑھانے کے ضمن میں فلور ملوں میں پسائی کے 80:20 تناسب پر عملدرآمد کے لئے سفارشات، گزشتہ چند ماہ سے فلور ملوں کی جانب سے کی جانے والی خلاف ورزیوں پر موثر کریک ڈاؤن پر بھی تفصیلی بریفنگ دی گئی۔

وزیراعظم نے متعلقہ اسسٹنٹ کمشنرز اور ڈپٹی کمشنرز کو اشیائے ضرور یہ کی قیمتوں میں استحکام کو یقینی بنانے کے حوالے سے کہا کہ افسران کی اولین ترجیح قیمتوں میں اتار چڑھاؤ کو مانیٹر کر کے غیر ضروری اضافے کے خاتمے کو یقینی بنانا ہونی چاہیے۔
انتظامیہ اس بات کو یقینی بنائے کہ اشیاء خورد نوش کی منڈی اور ریٹیل قیمت میں بے جا فرق نہ ہو تا کہ عوام کو کم سے کم قیمت پر اشیاء خورد نوش کی فراہمی یقینی بنائی جا سکے- موجودہ حکومت کی اولین ترجیح غریب اور پسے ہوئے عوام کی زندگی میں ہر ممکن آسانی فراہم کرنا ہے ۔

وزیر اعظم نے اس امر کو یقینی بنانے کی ہدایت کی کہ معاشی لحاظ سے سب سے کمزور طبقے کی امداد کے لئے خصوصی پلان ترتیب دیا جائے تا کہ حکومت کے وسائل کو بطورسبسڈی عوامی فلاح کے لئے موثر انداز میں استعمال کیا جا سکے- وزیر اعظم نے مزید ہدایت کی کہ صحت افزاء خوراک اور آٹے کے بارے میں عوامی شعور اجاگر کرنے پر توجہ دی جائے- گندم کی ترسیل اور آٹے کی قیمت کے نظام کو جامع حکمت عملی کے تحت مستحکم کرنے کی ضرورت ہے تا کہ مستقبل میں بھی عوام کو پریشانی کا سامنا نہ ہو ۔