Author: Aqsa Younas Rana


آذربائیجان کے وزیرِ خارجہ جیہون بائراموف نے ایرانی وزیرِ خارجہ عباس عراقچی سے ٹیلی فونک گفتگو کی۔ دونوں وزرائے خارجہ نے اس دوران دوطرفہ تعلقات اور خطے سے متعلق اہم امور پر تبادلہ خیال کیا۔
جیہون بائراموف نے کہا کہ آذربائیجان کا مؤقف اصولی اور غیر متزلزل ہے، اور وہ ہمیشہ ایسے اقدامات یا بیانات کی مخالفت کرتا ہے جو ایران یا خطے میں عدم استحکام کا باعث بن سکتے ہیں۔


امریکی صدر ڈونلڈ ٹرمپ نے جمعرات کو کہا ہے کہ انہیں امید ہے ایران کے خلاف فوجی کارروائی سے بچا جا سکتا ہے، تاہم تہران نے کسی بھی ممکنہ حملے کے جواب میں امریکی فوجی اڈوں اور طیارہ بردار بحری جہازوں کو نشانہ بنانے کی دھمکی دی ہے۔
امریکی صدر نے صحافیوں سے گفتگو کرتے ہوئے بتایا کہ ایران کے ساتھ بات چیت جاری ہے اور وہ فوجی آپشن استعمال کرنے سے گریز چاہتے ہیں، حالانکہ اس سے قبل وہ یہ خبردار بھی کر چکے ہیں کہ تہران کے لیے وقت تیزی سے ختم ہو رہا ہے۔ امریکا نے اسی تناظر میں خطے میں ایک بڑا بحری بیڑا بھی روانہ کیا ہے۔
‎جب ٹرمپ سے پوچھا گیا کہ کیا وہ ایران کے ساتھ براہ راست مذاکرات کریں گے تو ان کا کہنا تھا کہ وہ اس حوالے سے بات کر چکے ہیں اور مزید منصوبہ بندی بھی جاری ہے۔ انہوں نے کہا کہ ایک امریکی گروپ ایران کے قریب جا رہا ہے، مگر امید ہے کہ اسے عملی طور پر استعمال کرنے کی نوبت نہیں آئے گی۔
‎دوسری جانب واشنگٹن کے لہجے میں سختی آئی ہے جبکہ ایران نے بھی واضح کیا ہے کہ کسی بھی امریکی کارروائی کا جواب محدود نہیں ہوگا۔ اقوام متحدہ کے سیکریٹری جنرل انتونیو گوتیرش نے فریقین پر زور دیا ہے کہ ایٹمی مذاکرات کے ذریعے بحران کو حل کیا جائے تاکہ خطے میں تباہ کن نتائج سے بچا جا سکے۔
‎ایران کے ایک سینئر فوجی ترجمان بریگیڈیئر جنرل محمد اکرمی نیا نے سرکاری ٹیلی ویژن پر کہا کہ امریکی طیارہ بردار بحری جہاز کمزور ہیں اور خلیجی خطے میں موجود امریکی فوجی اڈے ایران کے درمیانے فاصلے تک مار کرنے والے میزائلوں کی زد میں ہیں۔ انہوں نے خبردار کیا کہ اگر امریکا نے کوئی غلط قدم اٹھایا تو اس کا فوری اور فیصلہ کن جواب دیا جائے گا۔


بھارتی شہر کولکتہ کے علاقے آنند پور میں 26 جنوری کی صبح لگنے والی آتشزدگی میں اب تک 21 افراد ہلاک ہو چکے ہیں جبکہ 28 افراد لاپتہ ہیں۔ آگ دو گوداموں میں پھیلی، جہاں کئی مزدور کام کر رہے تھے۔
مقامی فائر ڈیپارٹمنٹ کے مطابق رات 3 بجے کے قریب ایک گودام میں آگ پھیلی جو جلد ہی پڑوس کے گودام تک پہنچ گئی۔ فائر فائٹرز نے 36 گھنٹے سے زائد عرصے میں آگ پر قابو پایا، اس دوران دونوں عمارتیں منہدم ہو گئیں۔ شدید دھواں، حرارت اور ملبے کی وجہ سے ریسکیو آپریشن مشکل ثابت ہوا۔
‎ابتدائی تحقیقات کے مطابق گوداموں میں حفاظتی اقدامات ناکافی تھے اور خارجی دروازے بند رکھے گئے تھے، جس سے ہلاکتیں بڑھیں۔ ایک گودام کے مالک کو غفلت کے الزام میں گرفتار کر لیا گیا جبکہ دوسرے گودام کی انتظامیہ نے ہلاک ہونے والوں کے ورثا کو 10، 10 لاکھ بھارتی روپے معاوضہ اور بچوں کی تعلیم کے اخراجات ادا کرنے کا وعدہ کیا ہے۔
‎ہلاک شدگان کی شناخت کے لیے ڈی این اے ٹیسٹنگ جاری ہے اور لاپتہ افراد کی تلاش بھی جاری ہے۔


عالمی ادارہ صحت (ڈبلیو ایچ او) نے جمعے کو کہا ہے کہ جان لیوا نیپاہ وائرس کے انڈیا سے باہر پھیلنے کا خطرہ کم ہے۔ ادارے نے واضح کیا کہ انڈیا میں دو کیسز رپورٹ ہونے کے بعد ابھی کسی بھی ملک کے سفر یا تجارت پر پابندی کی ضرورت نہیں ہے۔
انڈیا میں انفیکشن کی تصدیق کے بعد ہانگ کانگ، ملائیشیا، سنگاپور، تھائی لینڈ اور ویت نام نے ایئرپورٹ پر سکریننگ سخت کر دی ہے تاکہ وائرس کے پھیلاؤ کو روکا جا سکے۔
‎ڈبلیو ایچ او نے ای میل میں کہا کہ اس دو کیسز کے باوجود انفیکشن کے مزید پھیلنے کا خطرہ کم ہے اور انڈیا کے پاس وبا کو روکنے کی مکمل صلاحیت موجود ہے۔ ادارے کے مطابق ابھی تک وائرس کے انسان سے انسان میں منتقل ہونے کے کسی ثبوت کا پتہ نہیں چلا۔
‎تاہم ڈبلیو ایچ او نے یہ بھی کہا کہ نیپاہ وائرس کے مزید لوگوں کو متاثر کرنے کے امکان کو مکمل طور پر رد نہیں کیا جا سکتا، کیونکہ یہ وائرس انڈیا اور بنگلہ دیش کے کچھ علاقوں میں چمگادڑوں میں پایا جاتا ہے۔


یورپی یونین نے ایران کی پاسدارانِ انقلاب فوج کو دہشت گرد تنظیم قرار دے دیا ہے، جس پر تہران کی جانب سے شدید ردعمل متوقع ہے۔
جمعرات کو یورپی یونین کے خارجہ امور کی سربراہ کاجا کالاس نے کہا کہ یونین کے 27 رکن ممالک کے وزرائے خارجہ نے اس اقدام کی تائید کی ہے۔ پاسدارانِ انقلاب کو دہشت گرد قرار دینے کی بنیادی وجہ ایران میں پرتشدد مظاہروں کے دوران مظاہرین پر اس کی جانب سے کیے گئے سخت کریک ڈاؤن کو بتایا گیا ہے۔
‎کاجا کالاس کے مطابق، اب پاسدارانِ انقلاب القاعدہ، حماس اور داعش جیسی دہشت گرد تنظیموں کے صف میں شمار ہوں گے۔ ان کا کہنا تھا کہ جو بھی دہشت پھیلانے والے اقدامات کرے، اس کے ساتھ دہشت گردوں جیسا سخت سلوک ہونا چاہیے۔