Author: Aqsa Younas Rana


ایران کے شہروں اصفہان اور شیراز پر امریکی اور اسرائیلی حملوں کے نتیجے میں کم از کم 15 افراد شہید ہو گئے ہیں۔
رپورٹس کے مطابق حملوں کے دوران میزائلوں اور بموں کے ذریعے مختلف مقامات کو نشانہ بنایا گیا جس سے متعدد عمارتوں کو نقصان پہنچا۔
‎اطلاعات کے مطابق ان حملوں کے نتیجے میں ایران کے خلائی تحقیقاتی مرکز کو بھی نقصان پہنچنے کی خبریں سامنے آئی ہیں۔
دوسری جانب رپورٹس میں بتایا گیا ہے کہ 28 فروری سے ایران پر ہونے والے حملوں میں شہید ہونے والوں کی مجموعی تعداد 1400 سے تجاوز کر چکی ہے۔
حکام کے مطابق متاثرہ علاقوں میں امدادی کارروائیاں جاری ہیں جبکہ نقصانات کا مزید جائزہ لیا جا رہا ہے۔


برطانوی وزیراعظم سر کیئر اسٹارمر نے کہا ہے کہ برطانیہ ایران کے خلاف جاری جنگ کا حصہ نہیں بنے گا، تاہم خطے میں سمندری آمدورفت بحال کرنے اور آبنائے ہرمز کو کھولنے کے لیے اتحادی ممالک کے ساتھ مل کر کام کیا جا رہا ہے۔
پریس کانفرنس سے خطاب کرتے ہوئے انہوں نے کہا کہ آبنائے ہرمز کو دوبارہ کھولنا آسان کام نہیں لیکن عالمی تجارت اور توانائی کی ترسیل کے لیے اس کا جلد بحال ہونا ضروری ہے۔ ان کے مطابق اس مقصد کے لیے اتحادی ممالک کے ساتھ مشاورت اور اقدامات جاری ہیں۔
‎کیئر اسٹارمر نے کہا کہ اس معاملے کے حل کے لیے ایک قابلِ عمل اور مستند منصوبے کی ضرورت ہے تاہم اس حوالے سے ابھی کوئی حتمی فیصلہ نہیں کیا گیا۔ انہوں نے واضح کیا کہ آبنائے ہرمز کو کھولنے کا معاملہ نیٹو کا مشن نہیں بنایا جائے گا۔
‎برطانوی وزیراعظم نے کہا کہ مشرق وسطیٰ میں جاری جنگ جلد ختم ہونی چاہیے کیونکہ اس کے باعث پیٹرولیم مصنوعات کی قیمتوں میں اضافہ ہو رہا ہے اور عالمی معیشت متاثر ہو رہی ہے۔
‎انہوں نے بتایا کہ اب تک تقریباً 92 ہزار برطانوی شہری مشرق وسطیٰ سے واپس آ چکے ہیں جبکہ حکومت صورتحال پر مسلسل نظر رکھے ہوئے ہے۔ ان کا کہنا تھا کہ جنگ کے خاتمے کے بعد ایران کے ساتھ کسی نہ کسی معاہدے کے لیے مذاکرات کرنا ہوں گے۔


امریکا اور اسرائیل کے حملوں کے نتیجے میں ایران کے دارالحکومت تہران میں 500 سے زائد افراد شہید اور ہزاروں زخمی ہونے کی اطلاعات سامنے آئی ہیں۔
ایرانی ایمرجنسی میڈیکل سروسز کے مطابق صرف تہران میں اب تک 503 افراد ہلاک ہو چکے ہیں جبکہ 28 فروری سے جاری حملوں کے دوران تقریباً 5 ہزار 700 افراد زخمی ہوئے ہیں۔
رپورٹس کے مطابق ایران، امریکا اور اسرائیل کے درمیان جاری جنگ کا آج 17 واں روز ہے۔ مختلف علاقوں میں ہونے والے حملوں کے باعث ایران میں شہادتوں کی مجموعی تعداد 1,444 تک پہنچ گئی ہے جبکہ 18 ہزار 551 سے زائد افراد زخمی ہوئے ہیں۔
اسی دوران لبنان میں بھی کشیدگی کے باعث شہادتوں کی تعداد 850 تک پہنچ گئی ہے جن میں 100 سے زائد بچے شامل ہیں۔
‎ادھر اسرائیلی فوج نے دعویٰ کیا ہے کہ تہران کے مہر آباد ہوائی اڈے پر فضائی حملے کے دوران ایک طیارہ تباہ کر دیا گیا جبکہ شہر کے مختلف علاقوں میں دھواں اٹھتے دیکھا گیا۔
‎رپورٹس کے مطابق صوبہ مرکزی کے بعض علاقوں میں ہونے والے حملوں میں مزید جانی نقصان بھی ہوا جبکہ خمین میں ایک اسکول کو نشانہ بنائے جانے سے عمارت اور قریبی گھروں کو نقصان پہنچا ہے۔


امریکا اور اسرائیل کی ایران کے ساتھ جاری جنگ تیسرے ہفتے میں داخل ہو چکی ہے اور خطے میں بڑھتی فوجی کشیدگی کے باعث فضائی اور بحری راستوں میں رکاوٹیں پیدا ہو گئی ہیں۔ اس صورتحال میں سعودی عرب سفر اور لاجسٹکس کے لیے ایک اہم عبوری مرکز کے طور پر سامنے آیا ہے۔
رپورٹس کے مطابق جنگ کے آغاز کے بعد خلیجی عرب ریاستوں کو تقریباً دو ہزار سے زائد میزائل اور ڈرون حملوں کا سامنا کرنا پڑا جن کا ہدف امریکی سفارت خانے، فوجی اڈے، تیل کی اہم تنصیبات، بندرگاہیں، ہوائی اڈے، ہوٹلز اور رہائشی و دفتری عمارتیں تھیں۔
‎اس صورتحال کے پیش نظر سعودی عرب نے کئی خلیجی ایئر لائنز کو اپنے ایئرپورٹس اور فضائی حدود استعمال کرنے کی اجازت دے دی ہے جس کے باعث وہ متنازع علاقوں سے بچتے ہوئے اپنی پروازیں جاری رکھ سکیں۔
‎عراق ایئر ویز کو بھی شمالی سعودی عرب کے ارار ہوائی اڈے کے ذریعے پروازیں چلانے کی اجازت دی گئی جس پر عراقی حکومت نے سعودی عرب کا شکریہ ادا کیا۔
‎حالیہ دنوں میں سعودی ایئرپورٹس پر فضائی ٹریفک میں نمایاں اضافہ دیکھا گیا ہے کیونکہ متعدد ایئر لائنز نے خطرناک فضائی راستوں سے بچنے کے لیے اپنی پروازوں کا رخ سعودی عرب کی جانب موڑ دیا ہے۔ اتوار کے روز گلف ایئر نے بھی اعلان کیا کہ وہ کنگ فہد انٹرنیشنل ایئرپورٹ کے ذریعے اپنے آپریشنز میں اضافہ کر رہی ہے۔


ایران کے پاسدارانِ انقلاب نے اعلان کیا ہے کہ آپریشن وعدہ صادق 4 کی 55ویں لہر کے تحت اسرائیل اور خطے میں موجود امریکی فوجی اڈوں کو نشانہ بنایا گیا ہے۔
بیان کے مطابق کارروائی کے دوران مقبوضہ علاقوں کے مرکز تل ابیب اور بن گوریون کے علاقوں میں اہم اہداف پر حملے کیے گئے۔ ان اہداف میں فضائی و عسکری سازوسامان تیار کرنے والی کمپنی اسرائیل ائیرو اسپیس انڈسٹریز اور فضائی ایندھن فراہمی کے مراکز بھی شامل تھے۔
‎پاسدارانِ انقلاب کا کہنا ہے کہ حملوں میں ہائپرسونک میزائل فتاح، عماد اور قدر کے علاوہ حملہ آور ڈرونز بھی استعمال کیے گئے۔
‎بیان میں مزید کہا گیا کہ خطے میں موجود امریکی فوجی مراکز کو درمیانی فاصلے تک مار کرنے والے سالڈ فیول میزائل فتاح، ذوالفقار اور دزفول کے ساتھ ساتھ اسمارٹ ڈرونز کے ذریعے نشانہ بنایا گیا۔
‎ایرانی حکام کے مطابق یہ کارروائیاں جاری فوجی کشیدگی کے تناظر میں کی گئیں اور مزید تفصیلات بعد میں جاری کی جائیں گی۔