Author: Aqsa Younas Rana


امریکا اور اسرائیل کی ایران کے ساتھ جاری جنگ تیسرے ہفتے میں داخل ہو چکی ہے اور خطے میں بڑھتی فوجی کشیدگی کے باعث فضائی اور بحری راستوں میں رکاوٹیں پیدا ہو گئی ہیں۔ اس صورتحال میں سعودی عرب سفر اور لاجسٹکس کے لیے ایک اہم عبوری مرکز کے طور پر سامنے آیا ہے۔
رپورٹس کے مطابق جنگ کے آغاز کے بعد خلیجی عرب ریاستوں کو تقریباً دو ہزار سے زائد میزائل اور ڈرون حملوں کا سامنا کرنا پڑا جن کا ہدف امریکی سفارت خانے، فوجی اڈے، تیل کی اہم تنصیبات، بندرگاہیں، ہوائی اڈے، ہوٹلز اور رہائشی و دفتری عمارتیں تھیں۔
‎اس صورتحال کے پیش نظر سعودی عرب نے کئی خلیجی ایئر لائنز کو اپنے ایئرپورٹس اور فضائی حدود استعمال کرنے کی اجازت دے دی ہے جس کے باعث وہ متنازع علاقوں سے بچتے ہوئے اپنی پروازیں جاری رکھ سکیں۔
‎عراق ایئر ویز کو بھی شمالی سعودی عرب کے ارار ہوائی اڈے کے ذریعے پروازیں چلانے کی اجازت دی گئی جس پر عراقی حکومت نے سعودی عرب کا شکریہ ادا کیا۔
‎حالیہ دنوں میں سعودی ایئرپورٹس پر فضائی ٹریفک میں نمایاں اضافہ دیکھا گیا ہے کیونکہ متعدد ایئر لائنز نے خطرناک فضائی راستوں سے بچنے کے لیے اپنی پروازوں کا رخ سعودی عرب کی جانب موڑ دیا ہے۔ اتوار کے روز گلف ایئر نے بھی اعلان کیا کہ وہ کنگ فہد انٹرنیشنل ایئرپورٹ کے ذریعے اپنے آپریشنز میں اضافہ کر رہی ہے۔


ایران کے پاسدارانِ انقلاب نے اعلان کیا ہے کہ آپریشن وعدہ صادق 4 کی 55ویں لہر کے تحت اسرائیل اور خطے میں موجود امریکی فوجی اڈوں کو نشانہ بنایا گیا ہے۔
بیان کے مطابق کارروائی کے دوران مقبوضہ علاقوں کے مرکز تل ابیب اور بن گوریون کے علاقوں میں اہم اہداف پر حملے کیے گئے۔ ان اہداف میں فضائی و عسکری سازوسامان تیار کرنے والی کمپنی اسرائیل ائیرو اسپیس انڈسٹریز اور فضائی ایندھن فراہمی کے مراکز بھی شامل تھے۔
‎پاسدارانِ انقلاب کا کہنا ہے کہ حملوں میں ہائپرسونک میزائل فتاح، عماد اور قدر کے علاوہ حملہ آور ڈرونز بھی استعمال کیے گئے۔
‎بیان میں مزید کہا گیا کہ خطے میں موجود امریکی فوجی مراکز کو درمیانی فاصلے تک مار کرنے والے سالڈ فیول میزائل فتاح، ذوالفقار اور دزفول کے ساتھ ساتھ اسمارٹ ڈرونز کے ذریعے نشانہ بنایا گیا۔
‎ایرانی حکام کے مطابق یہ کارروائیاں جاری فوجی کشیدگی کے تناظر میں کی گئیں اور مزید تفصیلات بعد میں جاری کی جائیں گی۔


عراق میں بغداد انٹرنیشنل ایئرپورٹ کے قریب واقع وکٹوریہ بیس پر ڈرونز اور راکٹوں سے حملہ کیے جانے کی اطلاعات سامنے آئی ہیں۔
رپورٹس کے مطابق عراقی مزاحمتی تنظیم نے رات گئے وکٹوریہ بیس کو نشانہ بنایا۔ حملے کے بعد بیس کے اندر آگ بھڑکنے کی اطلاعات بھی موصول ہوئی ہیں۔
‎روسی میڈیا کے مطابق اس حملے میں 10 امریکی فوجیوں کی ہلاکت کا دعویٰ کیا گیا ہے تاہم اس خبر کی آزاد ذرائع سے تاحال تصدیق نہیں ہو سکی۔
‎دوسری جانب بعض رپورٹس میں بتایا گیا ہے کہ ابتدائی طور پر کم از کم پانچ افراد کے زخمی ہونے کی اطلاعات سامنے آئی تھیں۔
‎واضح رہے کہ عراقی مزاحمتی تنظیم کی جانب سے گزشتہ روز بھی وکٹوریہ بیس پر ڈرون حملے کی ویڈیو جاری کی گئی تھی جس کے بعد خطے میں کشیدگی مزید بڑھ گئی ہے۔


کراچی میں شارٹ ٹرم کڈنیپنگ کی ایک اور واردات سامنے آئی ہے جس میں ای کامرس کے کاروبار سے وابستہ ایک شہری کو اغوا کر کے بھاری رقم لوٹ لی گئی۔
متاثرہ شہری عثمان اشرف کے مطابق مسلح افراد نے انہیں یرغمال بنا کر ہاتھ باندھ دیے اور گاڑی میں مختلف مقامات پر گھماتے رہے۔
‎انہوں نے بتایا کہ ملزمان نے انہیں دھمکاتے ہوئے ان کے بینک اکاؤنٹس تک رسائی حاصل کی اور وہاں سے تقریباً 4 ہزار 600 ڈالر اور 20 لاکھ روپے اپنے اکاؤنٹس میں منتقل کر لیے۔
‎واقعے کے بعد متاثرہ شہری نے حکام کو اطلاع دی جبکہ پولیس نے واقعے کی تحقیقات شروع کر دی ہیں۔
‎کراچی میں حالیہ دنوں میں شارٹ ٹرم کڈنیپنگ کے واقعات میں اضافہ دیکھا جا رہا ہے جس پر شہریوں میں تشویش پائی جا رہی ہے۔


متحدہ عرب امارات میں حکام نے سوشل میڈیا اور ڈیجیٹل پلیٹ فارمز پر گمراہ کن معلومات پھیلانے کے الزام میں 25 افراد کو گرفتار کر لیا ہے جن میں 17 بھارتی شہری بھی شامل ہیں۔
حکام کے مطابق ملزمان ڈیجیٹل پلیٹ فارمز پر جعلی معلومات اور مصنوعی مواد پھیلانے میں ملوث تھے اور وہ تین مختلف گروہوں کی صورت میں سرگرم تھے۔
‎تحقیقات کے مطابق ایک گروہ میزائل حملوں اور فضائی دفاع سے متعلق ویڈیوز کو غلط انداز میں پیش کر کے عوام میں خوف و ہراس پھیلاتا رہا۔ دوسرے گروہ نے مصنوعی ذہانت کی مدد سے تیار کی گئی جعلی ویڈیوز اور واقعات کو یو اے ای سے منسوب کیا۔
‎تیسرا گروہ مخالف ریاست کی قیادت اور فوجی کارروائیوں کی تعریف میں پروپیگنڈا مواد شیئر کرنے میں ملوث بتایا گیا ہے۔
‎حکام نے ملزمان کو قومی دفاعی اقدامات کو نقصان پہنچانے اور ریاست مخالف مواد پھیلانے کے الزامات کے تحت ٹرائل کے لیے بھیج دیا ہے جبکہ مزید تفتیش کے لیے انہیں حراست میں رکھا گیا ہے۔
‎اٹارنی جنرل کے مطابق گمراہ کن معلومات پھیلانا اور قومی سلامتی کو نقصان پہنچانا سنگین جرم ہے اور ریاست کے استحکام کو متاثر کرنے والوں کے خلاف سخت قانونی کارروائی کی جائے گی۔


اسرائیلی وزیراعظم بنیامین نیتن یاہو کی سوشل میڈیا پر جاری کی گئی ایک نئی ویڈیو پر سوالات اٹھنے لگے ہیں اور بعض ماہرین اس کا فرانزک جائزہ لے رہے ہیں۔
رپورٹس کے مطابق ویڈیو میں نیتن یاہو ایک کیفے میں کافی لیتے ہوئے نظر آتے ہیں اور عبرانی زبان میں گفتگو کرتے ہوئے اپنی ہلاکت سے متعلق گردش کرنے والی خبروں کو مسترد کرتے ہیں۔ انہوں نے طنزیہ انداز میں کہا کہ وہ “کافی پر مر گئے ہیں۔”
‎سوشل میڈیا پر پھیلنے والی افواہوں کے مطابق ایرانی حملوں کے بعد نیتن یاہو کی ہلاکت کی خبریں سامنے آئی تھیں جس کے بعد انہوں نے اپنے زندہ ہونے کا ثبوت دینے کے لیے یہ ویڈیو جاری کی۔
‎تاہم کچھ ماہرین کا کہنا ہے کہ ویڈیو میں موجود بعض مناظر غیر معمولی دکھائی دیتے ہیں۔ مثال کے طور پر کافی کا کپ مکمل بھرا ہوا نظر آتا ہے اور مائع کپ کے کناروں تک آنے کے باوجود باہر نہیں گرتا، جس کے باعث ویڈیو کے مصنوعی ذہانت کے ذریعے تیار ہونے کے خدشات بھی ظاہر کیے جا رہے ہیں۔
‎دوسری جانب اسرائیلی حکومت یا سرکاری ذرائع کی جانب سے ویڈیو کے اے آئی ہونے کے دعووں کی تصدیق نہیں کی گئی جبکہ اس معاملے پر مزید تحقیق جاری ہے۔


ایران نے خلیجی ممالک پر حملوں میں ملوث ہونے کے الزامات کو مسترد کرتے ہوئے کہا ہے کہ اس معاملے کی غیر جانبدار تحقیقات کرائی جائیں۔
ایران کے مشیر قومی سلامتی علی لاریجانی نے اپنے بیان میں کہا کہ ایران نے خلیجی ممالک پر کوئی حملہ نہیں کیا اور نہ ہی ایران کی پالیسی سول آبادی کو نشانہ بنانے کی ہے۔
‎انہوں نے کہا کہ ایران جنگ کے دوران شہری آبادی کو نقصان پہنچانے کے خلاف ہے اور اگر کسی واقعے میں ایران پر الزام عائد کیا جا رہا ہے تو اس کی مکمل تحقیقات ہونی چاہئیں۔
‎علی لاریجانی کا کہنا تھا کہ ایران کسی بھی آزاد اور شفاف تحقیقات کے لیے تیار ہے تاکہ حقائق سامنے آ سکیں۔
‎واضح رہے کہ حالیہ دنوں میں جنگ کے دوران دبئی اور قطر کے رہائشی علاقوں پر حملوں کی اطلاعات سامنے آئی ہیں جس کے بعد خطے میں کشیدگی مزید بڑھ گئی ہے۔


اطالوی فوج کے مطابق کویت میں قائم اٹلی کے فوجی اڈے کو ڈرون حملے کا نشانہ بنایا گیا تاہم اس واقعے میں کوئی جانی نقصان نہیں ہوا۔
فوجی حکام کا کہنا ہے کہ حملے کے بعد سیکیورٹی اقدامات فوری طور پر مزید سخت کر دیے گئے جبکہ واقعے کی تحقیقات شروع کر دی گئی ہیں۔
‎اطالوی فوج کے مطابق یہ فوجی اڈا مشترکہ طور پر امریکا کے زیر استعمال بھی ہے اور خطے میں مختلف فوجی سرگرمیوں کے لیے استعمال کیا جاتا ہے۔
‎حکام کا کہنا ہے کہ حملے کے نتیجے میں کسی جانی نقصان کی اطلاع نہیں ملی تاہم صورتحال پر مسلسل نظر رکھی جا رہی ہے۔