Author: Aqsa Younas Rana

‎سعودی عرب میں ذوالحجہ 1447 ہجری کا چاند نظر آگیا ہے، جس کے بعد مملکت میں عیدالاضحیٰ 27 مئی بروز بدھ منانے کا باضابطہ اعلان کر دیا گیا ہے۔
‎عرب میڈیا کے مطابق سعودی سپریم کورٹ نے چاند نظر آنے کی تصدیق کرتے ہوئے کہا ہے کہ یکم ذوالحجہ 18 مئی کو ہوگی جبکہ وقوف عرفہ 26 مئی کو ادا کیا جائے گا۔
‎سعودی عرب کے ساتھ ساتھ انڈونیشیا میں بھی ذوالحجہ کا چاند نظر آنے کی تصدیق کر دی گئی ہے۔ انڈونیشیا کی وزارت مذہبی امور نے اعلان کیا کہ ملک میں بھی عیدالاضحیٰ 27 مئی کو منائی جائے گی۔
‎اس سے قبل تیونس اور ترکیہ بھی ذوالحجہ کے چاند کا اعلان کرنے والے ممالک میں شامل ہو چکے ہیں۔
‎تیونس پہلا ملک بنا جہاں ذوالقعدہ کی 29 تاریخ کو چاند نظر آنے کی باضابطہ تصدیق کی گئی، جس کے بعد پیر 18 مئی کو یکم ذوالحجہ قرار دیا گیا۔
‎دوسری جانب ترکیہ نے بھی فلکیاتی حساب کتاب کی بنیاد پر اسلامی کیلنڈر کے مطابق 18 مئی کو یکم ذوالحجہ اور 27 مئی کو عیدالاضحیٰ منانے کا اعلان کیا ہے۔
‎ترکیہ میں روایتی رویت ہلال کے بجائے سائنسی اور فلکیاتی کیلنڈر کو بنیاد بنا کر اسلامی مہینوں کی تاریخوں کا تعین کیا جاتا ہے۔
‎دنیا بھر کے مسلمان اب عیدالاضحیٰ اور حج کی تیاریوں میں مصروف ہیں، جبکہ لاکھوں عازمین حج سعودی عرب پہنچ چکے ہیں۔

‎ایران کی مسلح افواج کے ترجمان بریگیڈیئر جنرل ابوالفضل شکارچی نے امریکا کی جانب سے مسلسل دی جانے والی دھمکیوں پر سخت ردعمل دیتے ہوئے خبردار کیا ہے کہ کسی بھی نئی جارحیت کا جواب پہلے سے زیادہ شدید اور تباہ کن حملوں کی صورت میں دیا جائے گا۔
‎صحافیوں سے گفتگو کرتے ہوئے بریگیڈیئر جنرل ابوالفضل شکارچی نے کہا کہ امریکا ایران کے خلاف جنگ میں اپنے مقاصد حاصل کرنے میں ناکام رہا ہے اور اگر وہ اپنی سبکی مٹانے کیلئے دوبارہ کوئی حماقت کرتا ہے تو اسے سنگین نتائج بھگتنا ہوں گے۔
‎انہوں نے کہا کہ اگر امریکی صدر کی دھمکیاں عملی شکل اختیار کرتی ہیں اور ایران کے خلاف کوئی نئی فوجی کارروائی کی جاتی ہے تو امریکا کے مفادات اور اس کی فوج کو غیر متوقع اور سخت ردعمل کا سامنا کرنا پڑے گا۔
‎ایرانی فوجی ترجمان کے مطابق ایران اپنی خودمختاری، سلامتی اور قومی مفادات کے دفاع کیلئے مکمل طور پر تیار ہے اور کسی بھی دباؤ یا دھمکی کے سامنے جھکنے والا نہیں۔
‎انہوں نے کہا کہ حالیہ کشیدگی کے دوران ایرانی عوام اور مسلح افواج نے اتحاد اور مزاحمت کا مظاہرہ کیا، جس سے دشمن اپنے مقاصد میں ناکام رہا۔
‎سیاسی تجزیہ کاروں کے مطابق ایران اور امریکا کے درمیان بڑھتی لفظی جنگ خطے میں کشیدگی کو مزید خطرناک سطح تک لے جا سکتی ہے، جبکہ عالمی برادری مسلسل سفارتی حل پر زور دے رہی ہے۔
‎ماہرین کا کہنا ہے کہ مشرق وسطیٰ میں جاری تناؤ عالمی توانائی منڈی، بحری تجارت اور خطے کے امن و استحکام پر براہِ راست اثر ڈال رہا ہے۔

ایرانی میڈیا نے دعویٰ کیا ہے کہ امریکا نے جنگ کے خاتمے اور مذاکراتی عمل کو آگے بڑھانے کیلئے ایران کی تجاویز کے جواب میں کوئی ٹھوس رعایت پیش نہیں کی، جس کے باعث مذاکراتی عمل ایک بار پھر تعطل کا شکار ہو سکتا ہے۔
‎فارس نیوز ایجنسی کے مطابق واشنگٹن نے ایران کو پانچ نکات پر مشتمل ایک فہرست دی ہے، جس میں مطالبہ کیا گیا ہے کہ ایران صرف ایک جوہری تنصیب کو فعال رکھے اور اپنے افزودہ یورینیم کا ذخیرہ امریکا کے حوالے کرے۔
‎ایرانی خبر ایجنسی مہر نیوز کے مطابق امریکا بغیر کسی عملی رعایت کے وہی اہداف حاصل کرنا چاہتا ہے جو وہ جنگ کے دوران حاصل نہیں کر سکا۔
‎رپورٹ میں کہا گیا ہے کہ امریکا نے ایران سے تقریباً 400 کلوگرام افزودہ یورینیم امریکا منتقل کرنے کا مطالبہ کیا ہے، جبکہ جنگی نقصانات کے ازالے اور ایران کے منجمد اثاثے بحال کرنے سے بھی انکار کیا گیا ہے۔
‎فارس نیوز کے مطابق امریکی تجاویز میں ایران کی صرف ایک جوہری تنصیب فعال رکھنے، منجمد اثاثوں کا صرف محدود حصہ بھی جاری نہ کرنے اور جنگ بندی کو مذاکرات سے مشروط کرنے جیسے نکات شامل ہیں۔
‎ایرانی میڈیا کا کہنا ہے کہ اگر ایران ان شرائط کو تسلیم بھی کر لے تب بھی امریکا اور اسرائیل کی جانب سے ممکنہ جارحیت کا خطرہ برقرار رہے گا۔
‎دوسری جانب ایرانی حکام نے مذاکرات کیلئے اپنی پانچ بنیادی شرائط واضح کر رکھی ہیں، جن میں تمام محاذوں پر جنگ کا مکمل خاتمہ، ایران مخالف پابندیوں کا خاتمہ، منجمد اثاثوں کی بحالی، جنگی نقصانات کا ازالہ اور آبنائے ہرمز پر ایران کے حق کا اعتراف شامل ہے۔
‎سیاسی تجزیہ کاروں کے مطابق ایران اور امریکا کے درمیان اعتماد کا فقدان مذاکرات کی سب سے بڑی رکاوٹ بن چکا ہے، جبکہ دونوں فریق اپنی اپنی شرائط پر سخت مؤقف اپنائے ہوئے ہیں۔

‎امریکا نے دہشتگردی کے خلاف جاری جنگ میں پاکستان کو ایک اہم اور کلیدی شراکت دار قرار دیتے ہوئے انسدادِ دہشتگردی میں اس کے کردار کو سراہا ہے۔
‎امریکی سینیٹ کی کمیٹی کو بریفنگ دیتے ہوئے امریکی سینٹرل کمانڈ (CENTCOM) کے سربراہ ایڈمرل بریڈ کوپر نے کہا کہ افغانستان اب بھی دہشتگرد سرگرمیوں اور سکیورٹی خطرات کے باعث واشنگٹن کی توجہ کا مرکز بنا ہوا ہے۔
‎انہوں نے کہا کہ افغانستان امریکی نگرانی کی فہرست میں بدستور پہلے نمبر پر موجود ہے، جبکہ وسطی ایشیائی ممالک بھی افغانستان سے پیدا ہونے والے دہشتگردی کے خطرات پر مسلسل نظر رکھے ہوئے ہیں۔
‎ایڈمرل بریڈ کوپر نے پاکستان کے کردار کو سراہتے ہوئے کہا کہ پاکستان انسدادِ دہشتگردی میں امریکا کا قابلِ اعتماد شراکت دار ثابت ہوا ہے۔
‎انہوں نے کہا کہ پاکستان خطے میں داعش خراسان کے خلاف کارروائیوں میں کلیدی حیثیت رکھتا ہے اور دونوں ممالک کے درمیان فوجی تعاون کے نتیجے میں دہشتگردوں کے خلاف مؤثر اور ٹھوس نتائج حاصل ہوئے ہیں۔
‎سینٹرل کمانڈ کے سربراہ کے مطابق پاکستان اور امریکا کی مشترکہ کوششوں نے خطے میں دہشتگرد تنظیموں کے خلاف کامیاب کارروائیوں کو ممکن بنایا۔
‎انہوں نے کہا کہ یہ کامیابیاں پاکستان اور امریکا کے درمیان دوستی، اعتماد اور مشترکہ عزم کا واضح ثبوت ہیں۔
‎دفاعی اور سفارتی ماہرین کے مطابق امریکی حکام کا یہ بیان ایسے وقت سامنے آیا ہے جب خطے میں سکیورٹی صورتحال ایک بار پھر عالمی توجہ کا مرکز بنی ہوئی ہے۔
‎تجزیہ کاروں کا کہنا ہے کہ پاکستان کی جغرافیائی اہمیت اور دہشتگردی کے خلاف اس کی کارروائیاں خطے میں استحکام کیلئے اہم سمجھی جاتی ہیں، جبکہ امریکا بھی افغانستان اور خطے کی صورتحال کے باعث پاکستان کے ساتھ تعاون جاری رکھنا چاہتا ہے۔

ایران کی اسٹاک مارکیٹ تقریباً 80 دن بند رہنے کے بعد منگل 19 مئی سے دوبارہ ٹریڈنگ شروع کرنے جا رہی ہے، جبکہ سرمایہ کاروں اور معاشی ماہرین کی نظریں اس بات پر مرکوز ہیں کہ مارکیٹ کھلنے کے بعد صورتحال کس رخ پر جاتی ہے۔
‎ایران کی سرکاری خبر رساں ایجنسی اِرنا کے مطابق امریکا اور اسرائیل کے ساتھ کشیدگی اور جنگی حالات کے دوران اسٹاک مارکیٹ کو عارضی طور پر بند کر دیا گیا تھا تاکہ سرمایہ کاروں کے اثاثوں کو تحفظ فراہم کیا جا سکے۔
‎سیکیورٹیز اینڈ ایکسچینج آرگنائزیشن کے ڈپٹی سپروائزر حمید یاری نے کہا کہ مارکیٹ کی معطلی کا مقصد خوف و ہراس کے تحت ہونے والی ٹریڈنگ کو روکنا اور قیمتوں کے زیادہ شفاف تعین کیلئے حالات پیدا کرنا تھا۔
‎انہوں نے کہا کہ تمام ضروری منظوریوں اور رابطہ کاری کا عمل مکمل کر لیا گیا ہے، جس کے بعد حصص، سرمایہ کاری فنڈز اور ڈیریویٹوز کی ٹریڈنگ دوبارہ بحال کی جا رہی ہے۔
‎حمید یاری کے مطابق مارکیٹ کھلنے کے بعد سرمایہ جاتی منڈی کے تمام شعبے دوبارہ مکمل طور پر فعال ہو جائیں گے۔
‎رپورٹس کے مطابق ایران نے یکم مارچ کو اسٹاک مارکیٹ معطل کی تھی، جبکہ بعد میں 7 مارچ کو اس بندش کو غیر معینہ مدت تک بڑھا دیا گیا تھا۔
‎معاشی ماہرین کا کہنا ہے کہ مارکیٹ کی بحالی کے بعد لاکھوں ریٹیل سرمایہ کار دوبارہ سرگرم ہو جائیں گے، تاہم یہ خدشہ موجود ہے کہ کئی سرمایہ کار ایک ساتھ اپنے حصص فروخت کرنے کی کوشش کر سکتے ہیں، جس سے مارکیٹ شدید دباؤ کا شکار ہو سکتی ہے۔
‎اطلاعات کے مطابق ایرانی حکام ممکنہ بحران سے بچنے کیلئے مختلف حفاظتی اقدامات پر کام کر رہے ہیں، جن میں مخصوص شیئرز پر قیمتوں کی سخت حدود مقرر کرنا اور مارکیٹ میکرز کے ذریعے لیکویڈیٹی فراہم کرنا شامل ہے۔
‎تجزیہ کاروں کے مطابق اگر فروخت کا دباؤ بہت زیادہ ہوا تو حکومتی اقدامات کے باوجود مارکیٹ میں شدید گراوٹ دیکھی جا سکتی ہے۔
‎سیاسی اور معاشی مبصرین کا کہنا ہے کہ ایران کی اسٹاک مارکیٹ کی بحالی صرف اقتصادی سرگرمی نہیں بلکہ عالمی سرمایہ کاروں کیلئے ایک اہم اشارہ بھی سمجھی جا رہی ہے کہ تہران کشیدگی کے باوجود معاشی استحکام بحال کرنے کی کوشش کر رہا ہے۔