Author: Aqsa Younas Rana


نوبل انعام یافتہ پاکستانی ملالہ یوسفزئی کی تصویر آکسفورڈ یونیورسٹی کے لیڈی مارگریٹ ہال میں آویزاں کر دی گئی، یہ اعزاز بینظیر بھٹو کے بعد دیا جانے والا دوسرا اہم اعزاز ہے۔ اس موقع پر خصوصی تقریب کا اہتمام کیا گیا جس میں ملالہ نے خطاب کرتے ہوئے کہا کہ طالبان لڑکیوں اور خواتین کو ان کے بنیادی حقوق سے محروم کر رہے ہیں۔
ملالہ نے مزید کہا کہ لڑکیوں کی تعلیم روکنا اسلام کے پیغام کے خلاف ہے، اور بین الاقوامی برادری کو انسانی حقوق کی بنیاد پر طالبان پر دباؤ ڈالنا چاہیے۔
‎ملالہ یوسفزئی نے ایل ایم ایچ سے فلسفہ، سیاست اور معیشت میں تعلیم حاصل کی اور 2020 میں گریجویشن کی۔ وہ لڑکیوں کی تعلیم کے لیے عالمی سطح پر معروف کارکن ہیں اور 2014 میں نوبل امن انعام حاصل کرنے والی سب سے کم عمر شخصیت بنی تھیں۔
‎ملالہ کو 2024 میں ایل ایم ایچ کی آنرری فیلو بھی منتخب کیا گیا تھا اور وہ آکسفورڈ پاکستان پروگرام کے مشاورتی ادارے کی رکن بھی ہیں، جو آکسفورڈ اور پاکستان کے درمیان علمی روابط اور اسکالرشپ مواقع فراہم کرتا ہے۔
‎اس موقع پر پورٹریٹ پینٹر ازابیلا واٹلنگ نے کہا کہ ملالہ کا پورٹریٹ بنانا ایک بہت بڑا اعزاز تھا اور انہوں نے تصویر میں ملالہ کی طاقت اور وقار کو پیش کرنے کی کوشش کی۔ ملالہ نے کہا کہ یہ اعزاز دیگر لوگوں کے لیے دروازے کھولنے میں مددگار ثابت ہوگا اور یہ یاد دہانی ہے کہ وادی سوات کی ایک لڑکی یہاں اپنی جگہ رکھتی ہے، اور ہر لڑکی، چاہے وہ پاکستان، افغانستان یا کہیں بھی سے ہو، کی بھی یہاں اپنی جگہ ہے۔

‎امریکی خلائی ادارے ناسا نے تاریخ میں پہلی بار خلا بازوں کو اپنے ذاتی اسمارٹ فونز خلا میں لے جانے کی اجازت دے دی ہے۔ اس پالیسی میں تبدیلی کا اطلاق کریو 12 اور آرٹیمس 2 مشنز سے ہوگا۔
‎کریو 12 مشن فروری 2026 کے وسط میں انٹرنیشنل اسپیس اسٹیشن روانہ کیا جائے گا، جبکہ آرٹیمس 2 مشن مارچ 2026 میں چاند کے مدار کی جانب روانگی کے لیے شیڈول ہے۔ نئی پالیسی کے تحت خلا باز جدید آئی فون اور اینڈرائیڈ اسمارٹ فونز اپنے ساتھ لے جا سکیں گے۔
‎اس سے قبل ناسا خلا بازوں کو صرف ادارے کی جانب سے فراہم کردہ ڈی ایس ایل آر اور گو پرو کیمرے استعمال کرنے کی اجازت دیتا تھا، جن میں سے بیشتر پرانے ماڈلز تھے اور جن سے تصاویر یا ویڈیوز فوری طور پر شیئر کرنا ممکن نہیں تھا۔
‎ناسا کے منتظم جیراڈ آئزک مین کے مطابق اس فیصلے سے خلا باز زمین سے باہر اپنے تجربات زیادہ آسانی سے ریکارڈ کر سکیں گے اور تصاویر و ویڈیوز براہِ راست عوام کے ساتھ شیئر کر پائیں گے۔ انہوں نے ایکس (ٹوئٹر) پر جاری بیان میں کہا کہ یہ قدم خلا بازوں کو اپنے خاندانوں کے لیے خصوصی لمحات محفوظ کرنے کے ساتھ دنیا سے جڑنے کا موقع فراہم کرے گا۔
‎ناسا کا کہنا ہے کہ ذاتی اسمارٹ فونز کی اجازت مستقبل میں زمین کے مدار اور چاند پر ہونے والے سائنسی تجربات میں بھی معاون ثابت ہوگی۔ جیراڈ آئزک مین کے مطابق یہ فیصلہ روایتی سوچ سے ہٹ کر جدید ٹیکنالوجی کو خلائی مشنز کا حصہ بنانے کی جانب ایک اہم قدم ہے۔

‎مقبوضہ مغربی کنارے میں کنٹرول بڑھانے اور مزید غیر قانونی بستیوں کی راہ ہموار کرنے کے لیے اسرائیل کے حالیہ اقدامات پر یورپی یونین اور متعدد مسلم ممالک نے شدید ردعمل ظاہر کیا ہے۔
‎یورپی یونین کے ترجمان انوار الانونی نے صحافیوں کو بتایا کہ "مغربی کنارے میں اسرائیلی کنٹرول بڑھانے کے لیے سیکیورٹی کابینہ کے حالیہ فیصلے غیر قانونی اور غلط سمت میں ایک اور قدم ہیں۔”
‎اسی طرح سعودی عرب، اردن، متحدہ عرب امارات، قطر، انڈونیشیا، پاکستان، مصر اور ترکی نے بھی مقبوضہ علاقوں میں اسرائیل کی بستیوں کے قیام اور کنٹرول بڑھانے کی پالیسیوں کی سخت الفاظ میں مذمت کی۔
‎سعودی وزارت خارجہ نے بیان میں کہا کہ "یہ ممالک اسرائیل کے غیر قانونی فیصلوں اور مقبوضہ سرزمین پر خودمختاری نافذ کرنے کے اقدامات کی سخت ترین الفاظ میں مذمت کرتے ہیں۔”
‎بین الاقوامی قوانین کے تحت یہ اقدامات غیر قانونی قرار دیے جاتے ہیں اور عالمی سطح پر فلسطینی علاقوں کی قانونی حیثیت کے حوالے سے تشویش بڑھا رہے ہیں۔

‎ایران کے سپریم لیڈر آیت اللّٰہ علی خامنہ ای نے اقتدار سنبھالنے کے بعد پہلی بار 37 سالہ روایت توڑتے ہوئے 8 فروری کو ایئر فورس کمانڈروں کے ساتھ ہونے والی سالانہ ملاقات میں شرکت نہیں کی۔
‎اتوار کے روز ہونے والے اجلاس میں خامنہ ای کی غیر موجودگی میں مسلح افواج کے چیف آف اسٹاف عبدالرحیم موسوی نے ایئر فورس کمانڈروں سے ملاقات کی۔ یہ اجلاس ہر سال 8 فروری کو منایا جاتا ہے تاکہ 1979 میں فضائیہ کے افسران کی روح اللہ خمینی کے ساتھ وفاداری کی یاد تازہ کی جائے۔
‎سپریم لیڈر کی اس غیر معمولی غیر حاضری نے سوالات پیدا کر دیے ہیں، خاص طور پر ایسے وقت میں جب تہران اور واشنگٹن کے تعلقات کشیدہ ہیں اور امریکہ خطے میں اپنی فوجی موجودگی بڑھا رہا ہے۔