Author: باغی بلاگز

عالمی طاقتوں کی کشمکش اور باہمی رسہ کشی کے بیچ سب سے زیادہ دباؤ اور نقصان عام آدمی ہی برداشت کرتا ہے۔ طاقتور ملک اپنی معیشتیں،دفاعی حکمت عملی اور سیاسی اثر و رسوخ بڑھانے کے لیے ایک دوسرے سے مقابلے میں لگے رہتے ہیں۔ لیکن اس دوڑ میں عام شہریوں کی زندگیاں، ان کے وسائل اور ان کا مستقبل بری طرح متاثر ہوتا ہے۔ چاہے وہ مہنگائی ہو، بے روزگاری ہو، مہاجرین کا بحران ہو، یا جنگوں کے نتیجے میں تباہ حال زندگیاں، ہمیشہ قیمت وہی لوگ ادا کرتے ہیں جن کے پاس نہ طاقت ہوتی ہے، نہ وسائل۔ایک طرف بڑی ریاستیں اپنے مفادات کے لیے ترقی، سلامتی اور آزادی کے نعرے لگاتی ہیں مگر حقیقت میں ان ہی فیصلوں کے بوجھ تلے غریب اور کمزور طبقات کچلے جاتے ہیں۔ یوں کہا جا سکتا ہے کہ عالمی سیاست شطرنج کی بساط کی طرح ہے جس پر بڑے کھلاڑی اپنے مہرے آگے بڑھاتے ہیں۔ مگر وہ مہرے دراصل کروڑوں عام انسانوں کی زندگیاں ہیں جو طاقت کے کھیل میں قربانی کے طور پر استعمال ہوتے ہیں۔ دنیا کی سیاست آج بھی طاقت کے ایوانوں میں اسی طرح شور مچا رہی ہے جیسے صدیوں پہلے تھی۔ طاقتور ممالک اپنی معیشت، اسلحہ اور ٹیکنالوجی کے زور پر ایک دوسرے سے آگے نکلنے کی دوڑ میں لگے ہیں۔ ان کے اجلاس، ان کے بیانیے اور ان کے فیصلے دنیا کو ہلا کر رکھ دیتے ہیں۔ لیکن ان تمام شور و غوغا کے بیچ ایک سوال دب جاتا ہے۔ ان سب کا خمیازہ کون بھگتتا ہے؟

سچ پوچھیے تو وہی عام انسان جو اپنے چھوٹے سے گھر میں بچوں کے لیے روٹی کا انتظام کرنے کی فکر میں رہتا ہے۔ وہی کسان، وہی مزدور جو دن بھر پسینہ بہا کر شام کو تھکے ہارے گھر لوٹتا ہے۔ عالمی طاقتوں کے فیصلے جب مہنگائی، جنگ یا معاشی بحران میں ڈھلتے ہیں تو سب سے پہلے انہی کے چولہے بجھتے ہیں۔ طاقت کے یہ بڑے کھیل عام آدمی کی زندگی کو یوں کچل دیتے ہیں جیسے پہاڑ کسی ننھی کلی کو روند دے۔ بڑے بڑے ملک اپنے قومی مفاد کے نام پر معاہدے کرتے ہیں، جنگیں چھیڑتے ہیں، ایک دوسرے کو دھمکیاں دیتے ہیں مگر یہ سب کرتے وقت کوئی نہیں سوچتا کہ ان کے جھگڑوں کی زد میں آنے والے بے قصور انسانوں کا کیا ہوگا؟ کون ان کے بچوں کے آنسو پونچھے گا؟ کون ان کے خوابوں کو بچائے گا؟ دنیا کی تاریخ گواہ ہے جب بھی طاقتوروں نے اپنے مفاد کے لیے فیصلے کیے سب سے زیادہ خون عام انسان کا بہا۔ کبھی وہ مہاجرین بن کر سرحدوں پر ٹھوکر کھاتا ہے، کبھی وہ بیمار ہو کر دوائی کو ترستا ہے، کبھی وہ بے روزگار ہو کر بھوک سے لڑتا ہے،

آج کا عام آدمی طاقت کے اس کھیل کا سب سے کمزور مہرہ ہے۔ ملک جب چاہیں اسے آگ میں جھونک دیتے ہیں، جب چاہیں اسے قربانی کا بکرا بنا دیتے ہیں، وقت آگیا ہے کہ دنیا سوچے طاقت کے یہ کھیل کب تک؟ کب تک یہ عام انسان پسے گا؟ کب تک وہی بھاری قیمت ادا کرے گا جس نے نہ جنگ چھیڑی نہ معاہدہ کیا نہ فیصلہ؟ زمین پر سب سے قیمتی شے قیمت نہیں انسان کی زندگی ہے لیکن افسوس طاقت کے ایوان یہ سچ کب سمجھیں گے؟
بقول شاعر:
سلطنتیں لڑتی رہیں اپنی جیت کے لیے
مگر ہر بار عام انسان ہی مٹ گیا

8ستمبر کا دن پاکستان کی عسکری تاریخ میں ایک سنہری باب کی حیثیت رکھتا ہے۔ یہ دن ہمیں 1965ء کی جنگ میں پاک بحریہ کی جرات، حوصلے اور بے مثال پیشہ ورانہ مہارت کی یاد دلاتا ہے۔ جب پاک بحریہ نے دشمن کے دل میں ایسا خوف بٹھایا کہ وہ آج تک سمندر میں مکمل آزادی سے حرکت کرنے کی جرات نہیں کر سکا۔ دوارکا پر کیا گیا دلیرانہ حملہ ہو یا آبدوز ”غازی” کی خاموش مگر ہلاکت خیز موجودگی، ہر لمحہ اس قوم کے بیٹوں کی قربانی، مہارت اور بہادری کی ایک نئی داستان رقم کرتا ہے۔ یہی جذبہ، یہی ولولہ آج بھی پاک بحریہ کے ہر افسر اور جوان کے دل میں زندہ ہے۔ ایک ایسا عزم جو وقت کی کسوٹی پر مزید نکھر چکا ہے اور ایک ایسا وعدہ جو ہر چیلنج کے سامنے سینہ سپر ہے۔ آج پاکستان نیوی محض ایک عسکری قوت نہیں بلکہ جدید ٹیکنالوجی، خود مختاری اور پیشہ ورانہ برتری سے آراستہ ایک ایسی قابلِ فخر بحری طاقت بن چکی ہے جس کی گونج نہ صرف بحیرہ عرب کی وسعتوں میں بلکہ عالمی بحری افق پر بھی سنائی دیتی ہے۔

جب 1965ء میں جنگ کا آغاز ہوا تو پاک بحریہ ایک نوآموز قوت تھی مگر اس نے محدود وسائل کے باوجود دشمن کے دانت کھٹے کر دیے۔ آبدوز ”غازی” نے بھارتی نیوی کو بحر ہند میں بند کر دیا، حتیٰ کہ بھارت نے اپنا طیارہ بردار جہاز ”وکرانت” سات سو کلومیٹر دور چھپا دیا۔ 8 ستمبر کو دوارکا پر حملہ ایک ناقابلِ یقین مگر مکمل طور پر کامیاب آپریشن تھا جس نے دشمن کی بحریہ کو جھنجھوڑ کر رکھ دیا۔ آج بھی یہ آپریشن دنیا کی بہترین بحری کارروائیوں میں شمار کیا جاتا ہے یہ معرکہ نہ صرف پاک بحریہ کی مہارت بلکہ دشمن پر اس کے خوف کی بھی علامت بن چکا ہے۔اسی شاندار روایت کو زندہ رکھنے کے لیے پاک بحریہ نے ہر دور میں نہ صرف اپنی صلاحیتوں میں اضافہ کیا بلکہ سمندری دفاع کے نظریے کو وسعت دی۔ جدید جہازوں، آبدوزوں، میزائل سسٹمز، میری ٹائم نگرانی کے آلات اور فضائی صلاحیتوں سے لیس پاک بحریہ نہ صرف پاکستان کے ساحلوں کی محافظ ہے بلکہ بین الاقوامی سطح پر بھی ایک اہم میری ٹائم فورس کے طور پر تسلیم کی جا چکی ہے۔حال ہی میں ہونے والی پاک بھارت جنگ میں بھارتی جارحیت کیخلاف افواج پاکستان کا آپریشن ”بنیان مرصوص” بھی پاک بحریہ کی جنگی تیاریوں اور چابکدستی کا ایک اور شاہکار ہے۔ اس آپریشن کے دوران نہ صرف دشمن کی سمندری جارحیت کو بروقت ناکام بنایا گیا بلکہ اس کے عزائم کو اتنی کاری ضرب لگی کہ وہ کھل کر سامنے آنے کی ہمت ہی نہ کر سکا۔ پاک بحریہ کے جنگی جہازوں اور فضائی یونٹس نے بھارتی بحریہ کی خفیہ نقل و حرکت کو بروقت پہچانا اور اس کے خلاف دفاعی پوزیشن سنبھالی۔ دشمن ہماری مشقوں کی خفیہ نگرانی کرتا رہا، مگر پاک بحریہ کی الرٹنیس نے اس کی ہر چال کو ناکام بنا دیا۔ یہ آپریشن اس امر کی واضح دلیل ہے کہ پاک بحریہ ہر ممکن چیلنج سے نمٹنے کے لیے ہمہ وقت تیار ہے۔ چاہے وہ روایتی جنگ ہو، ہائبرڈ وار ہو یا میری ٹائم اسٹریٹیجک تھریٹس، پاکستان نیوی ہر محاذ پر اپنی موجودگی اور برتری منوا چکی ہے۔ بلکہ ہر سال بحری امن مشقوں کے ذریعے دنیا کو یہ پیغام دیا جا رہا ہے کہ اگر جنگ مسلط کی گئی تو دشمن کو بحری راستوں میں بھی کہیں پناہ نہیں ملے گی۔

پاکستان نیوی نہ صرف دشمن پر عسکری میدان میں بھاری ہے بلکہ انسنایت کے محاذ پر بھی سب سے آگے ہے۔ دشمن، جو ہر بین الاقوامی فورم پر پاکستان کے خلاف زہر اگلنے کا کوئی موقع نہیں چھوڑتا، وہ بھارت جو سرحدوں پر اشتعال انگیزی، آبی جارحیت، مقبوضہ کشمیر میں ظلم، اور جھوٹے پروپیگنڈے کے ذریعے پاکستان کو بدنام کرنے کی مذموم کوششوں میں مصروف رہتا ہے — اسی بھارت کے زخمی شہری کو جب سمندر کی بے رحم لہروں میں زندگی اور موت کی کشمکش کا سامنا تھا، تو مدد کے لیے جس ہاتھ نے اسے تھاما، وہ پاک بحریہ کا تھا۔ ایک ایسا لمحہ جہاں دشمنی نہیں، انسانیت جیت گئی۔ لائبیریا کے آئل ٹینکر سے موصول ہونے والی ہنگامی درخواست پر پاک بحریہ نے جس سرعت، مہارت اور خلوص کے ساتھ بھارتی عملے کے زخمی رکن کو ریسکیو کیا اور کراچی منتقل کر کے بروقت طبی امداد فراہم کی، وہ نہ صرف بحری پیشہ ورانہ اخلاقیات کا منہ بولتا ثبوت ہے یقینا یہ وہ برتری ہے جو صرف ہتھیاروں سے نہیں، بلکہ ظرف، جذبے اور کردار سے حاصل ہوتی ہے۔ بھارت کے بے بنیاد الزامات کے بعد پاکستان نیوی کے اس عمل کو دیکھ کر دنیا کہہ اٹھی کہ پاکستان نیوی نہ صرف سرحدوں کی محافظ ہے بلکہ دلوں کی فاتح بھی ہے۔اب پاکستان نیوی کی صلاحیتوں کا اعتراف دشمن بھی کر نے پر مجبور ہو چکا ہے۔حالیہ پاک بھارت جنگ میں بھارت کو جب عبرتناک شکست کا سامنا ہوا اور اپنے عوام کے سامنے بری، بحری اور فضائی ہر محاذ پر شرمندگی اٹھانا پڑی تو بھارتی نیول چیف نے پاکستان بحریہ کی ”حیرت انگیز ترقی“ کو تسلیم کرتے ہوئے اس کے جدید جنگی جہازوں، زیرِ تعمیر آبدوزوں اور تیز رفتار دفاعی منصوبوں پر تشویش کا اظہار کیا اور برملا اعتراف کیا کہ ہم اپنی پوری حکمت عملی ازسرنو ترتیب دے رہے ہیں۔ یہ گھبراہٹ اس بات کا ثبوت ہے کہ دشمن جان چکا ہے کہ وہ خود ”کتنے پانی میں ہے”۔یقیناً، پاک بحریہ ایک قابلِ فخر قومی قوت ہے جو نہ صرف بحیرہ عرب بلکہ دنیا کے دیگر بحری خطوں میں بھی پاکستان کے وقار اور سلامتی کی محافظ بنی ہوئی ہے۔

پاکستان نیوی کا کردار صرف جنگی محاذ تک محدود نہیں۔ میری ٹائم سیکیورٹی کے میدان میں بھی پاکستان بحریہ نے وہ خدمات انجام دی ہیں جنہیں عالمی سطح پر سراہا جا رہا ہے۔ چاہے وہ قزاقی کے خلاف مشن ہوں، اقوامِ متحدہ کے امن مشن ہوں یا خطے میں سمندری تجارت کی حفاظت، پاکستان نیوی نے ہمیشہ اپنی ذمہ داریاں نبھائیں۔ پاک بحریہ کی ”امن مشقیں ” دنیا کے مختلف اسٹریٹیجک سوچ رکھنے والے ممالک کو ایک پلیٹ فارم پر لاتی ہیں جوکہ دفاعی لحاظ سے ایک اہم پیش رفت ہے۔ پاک بحریہ کی موجودہ قیادت —چیف آف دی نیول اسٹاف ایڈمرل نوید اشرف کی سربراہی میں نہ صرف عسکری میدان میں اصلاحات لا رہی ہے بلکہ جدید ٹیکنالوجی، سائبر ڈیفنس، اور نیول انٹیلیجنس جیسے شعبوں کو بھی وسعت دی جا رہی ہے ایئر وار کالج کراچی کے دورے کے دوران نیول چیف نے جدید عسکری تربیت اور ٹیکنالوجی کو مستقبل کی جنگوں میں کامیابی کی بنیاد قرار دیا اور بتایا کہ سطح آب، زیرِ آب اور فضائی شعبوں میں بحریہ کی جنگی صلاحیتوں میں نمایاں اضافہ ہوا ہے، انہوں نے پاک فضائیہ کی پیش رفت کو بھی سراہا، جس نے خطے میں دفاعی توازن کو نئی جہت دی ہے۔ نیول چیف نے اس عزم کا اعادہ کیا ہے کہ پاکستان نیوی دشمن کے ہر حملے کو سیسہ پلائی دیوار کی طرح روکنے کی مکمل صلاحیت رکھتی ہے۔ ان کی قیادت میں ”امن مشقیں ” محض دفاعی تیاریاں نہیں بلکہ دنیا کو یہ پیغام ہیں کہ ہم ایک ذمہ دار اور پرامن ریاست ہیں، مگر اپنی سالمیت پر کبھی سمجھوتہ نہیں کریں گے کہ اگر کوئی جارحیت کا سوچے گا، تو اسے سمندر کی گہرائیوں میں دفن کر دیا جائے گا۔

آج دنیا تیزی سے بلیو اکانومی کی طرف بڑھ رہی ہے، اور پاکستان جیسے جغرافیائی لحاظ سے اہم ملک کے لیے سمندر میں استحکام اور تجارت کا تحفظ نہایت ضروری ہے۔ خوش آئند بات یہ ہے کہ پاک بحریہ نے نہ صرف عسکری بلکہ معاشی سیکیورٹی کے لیے بھی مربوط اقدامات کیے ہیں۔ قومی اسٹیک ہولڈرز کے ساتھ مل کر ٹیکنالوجی کے استعمال، بندرگاہی تحفظ، اور میری ٹائم ٹریڈ روٹس کی سیکیورٹی میں پاکستان نیوی کا کردار قابلِ تحسین ہے۔ اب لمبی مسافتوں کا سفر منٹوں میں طے ہو رہا ہے، اور پانیوں پر قومی سلامتی کے ساتھ ساتھ معاشی ترقی کی نئی داستان لکھی جا رہی ہے۔ پاکستان بحریہ کی کہانی صرف توپوں، جہازوں اور آبدوزوں کی نہیں، بلکہ یہ قربانی، ہمت، جذبے اور غیر متزلزل حب الوطنی کی کہانی ہے۔ یہ وہ فورس ہے جس نے دشمن کے غرور کو خاک میں ملایا، سمندر کی گہرائیوں میں مادرِ وطن کے دفاع کی ایسی دیوار کھڑی کی جسے عبور کرنا دشمن کے لیے ایک خواب ہی رہے گا۔ 8 ستمبر کا دن ہمیں یہ یاد دلاتا ہے کہ اگر آج ہم پرامن فضا میں سانس لے رہے ہیں تو اس کے پیچھے پاک بحریہ سمیت تمام مسلح افواج کی قربانیاں ہیں۔ پاکستان نیوی آج بھی اپنی شاندار روایات کے ساتھ جدید تقاضوں سے ہم آہنگ ہو کر ہر خطرے سے نمٹنے کے لیے تیار کھڑی ہے۔ دشمن جتنا بھی طاقتور ہو، جب جذبہ ایمانی، حب الوطنی اور پیشہ ورانہ مہارت سے لیس جوان سمندر کی حفاظت پر مامور ہوں تو سمندر بھی ان کے لیے سر نگوں ہو جاتا ہے۔

کوئی تو آگے بڑھ کر ظالموں کا ہاتھ روک دے،یہ پھول دنیا کا مستقبل ہیں ،اس طرح روندا نہ جائے
انسانیت کہاں گئی،غزہ اور یوکرین کسی کو نظر نہیں آرہا،بحران انسانی المیہ بن چکا ،اب تو بول پڑو
مریم نواز سیلاب متاثرین کی خدمت عبادت سمجھ کر رہی ہیں،پاکستان ایسے حکمرانوں کی ضرورت

تجزیہ، شہزاد قریشی
دنیا کے تمام سربراہانِ حکومت اور بین الاقوامی اداروں کے سربراہان سے اپیل ہے کہ وہ فوراً بلا تاخیر موثر اقدامات کریں تاکہ غزہ، یوکرین اور دنیا کے دیگر ممالک جہاں لاکھوں انسانوں کی جانیں اور روزگار چھین لیا گیا ،وہاں جنگیں بند کرائی جائیں، انسانی ہمدردی بین الاقوامی قانون اور اخلاقی ذمہ داری کی روشنی میں فوری فائر بندی انسانی رسائی اور متاثرین کی حفاظت پر توجہ دی جائے، موجودہ انسانی المیہ روکا جائے تو آنے والی نسلوں کے لئے امید کی کرن پیدا ہو سکتی ہے، جنگیں صرف موجودہ نسل نہیں ، معیشت، صحت عامہ اور بین الاقوامی تعلقات کو بھی نقصان پہنچاتی ہیں، اقوام متحدہ اور انسانی ہمدردی کے ادارے کردار ادا کریں تو وہ اس عالمی بحران کو کم کر سکتے ہیں، غزہ میں شہری ہلاکتیں اور وسیع پیمانے پر بے گھر ہونے کی شدت برقرار ہے،کسی بھی قوم یا دنیا کے طاقتوروں کے پاس سب کچھ ہو سکتا ہے لیکن اگر وہ بچوں کے آنسو نہ روک سکیں تو ان کی طاقت ادھوری اور بے مقصد ہے،یہ معصوم بچے دنیا کے ہر کونے میں دکھ اور ظلم سہہ رہے ہیں ان کے ننھے ہاتھوں میں خوشیاں دیں ان کی آنکھوں سے آنسو مٹا دیں ان کے دلوں میں خوف کے بجائے سکون اور مسکراہٹیں بھر دیں،عالمی طاقتوروں کی ذمہ داری ہے کہ معصوم روحوں کی حفاظت کریں، کوئی بھی جنگ، اختلاف، طاقت ان بچوں کے دکھ کے برابر نہیں ہو سکتی ان کی معصومیت آج کی دنیا کے طاقتوروں کی انسانیت کا امتحان ہے،خدا کے لئے ان پر رحم کریں آج کے یہ بچے کل کا چراغ ہیں، ان کے آنسو خوشیوں میں بدل دیں، ان کے خوف کو سکون میں بدل دیں، یہ بچے پوری دنیا کا کل ہیں اور یہی پوری دنیا کی امید ہیں،پنجاب میں سیلابی صورتحال اور مریم نواز شریف کے اقدامات ایسے ہیں کہ یہ اقدامات عوام کا اعتماد بڑھاتے ہیں بلکہ قیادت کے عملی اقدامات کو اجاگر کرتے ہیں، سیلاب جیسی قدرتی آفات کے دوران شفافیت ،تیز رفتار امداد اور طویل المدتی بحالی منصوبے ہی اصل کامیابی کا پیمانہ ہوتے ہیں۔،دیکھا جائے تو مریم نواز کی حکومت نے یقینًا بڑے پیمانے پر اقدامات کئے ہیں، مریم نواز شریف کا سیاسی مستقبل پاکستان میں کئی عوامل پر منحصر ہے، ان کی موجودہ مقبولیت پارٹی کی پالیسی قومی سیاسی حالات اور ان کے کردار کی شفافیت و قیادت کی صلاحیت اور چیلنج کا سامنا ہو سکتا ہے، اگر پنجاب میں عوامی خدمت، ترقیاتی منصوبوں اور سرکاری نظام کی بہتری جاری رہی تو وہ نہ صرف صوبے بلکہ قومی سطح پر اپنی شخصیت کو مزید مضبوط کر سکتی ہیں، اگر حالات یوں ہی رہے جیسے اب ہیں یعنی عوامی توقعات کا خیال رکھا جائے بنیادی مسائل حل کرنے کی کوشش جاری رہے تو مریم نواز شریف کے لیے امکان ہے کہ وہ آئندہ پاکستان کی سیاست میں مرکزی کردار ادا کر سکتی ہیں، اگر عوامی توقعات پر پورا نہ اتریں تو ان کے لئے مشکلات بھی پیدا ہو سکتی ہیں پھر ان کا سیاسی مستقبل سیاسی بحران کی صورت اختیار کر سکتا ہے کامیابی کے لئے محنت حکمت عملی اور سنجیدہ قیادت درکار ہے

وہ جو اڈیالہ جیل میں بیٹھا ہے، اسے خبر نہیں کہ باہر کی دنیا بدل چکی ہے۔ وہ خود ایک قصۂ پارینہ بن چکا ہے۔ اسے معلوم نہیں کہ پاکستان نے ترقی کے ایک نئے سفر کا آغاز کر دیا ہے۔
— مریم نواز، وزیراعلیٰ پنجاب

یہ بیان محض لفظوں کا کھیل نہیں، بلکہ حقیقت کی عکاسی ہے۔ عمران خان، جو کبھی پاکستان کی سیاست میں ایک مقبول اور اثرورسوخ رکھنے والا نام تھے، آج اپنی چرب زبانی، وعدہ خلافیوں اور سیاسی ناکامیوں کی وجہ سے ایک ختم شدہ سیاستدان کے طور پر نظر آتے ہیں۔ ان کی حکومت کے دوران بڑے بڑے منصوبے صرف وعدوں تک محدود رہے، معیشت بحران کا شکار رہی، اور عوامی توقعات کے برعکس اداروں کے ساتھ تعلقات مسلسل تناؤ کا شکار رہے۔ ہر بیان میں شعلہ انگیزی اور جذباتی نعرے تو تھے، مگر عملی میدان میں کچھ نہیں کیا گیا۔ عوامی توقعات کے بجائے محض سیاسی شو چلائے گئے، اور اس دوران حکومت کی بنیادی ذمہ داریاں پس پشت ڈال دی گئیں۔

عمران خان کی چرب زبانی اور عوامی بیانات اکثر حقیقت سے دور رہے۔ وہ عوام کے جذبات کو بھڑکانے میں ماہر تھے، مگر عملی منصوبے اور نتائج ہمیشہ کمزور ثابت ہوئے۔ ان کے دورِ حکومت میں بڑے اقتصادی منصوبے جیسے ٹیکس اصلاحات، سرمایہ کاری میں اضافہ، اور معاشی استحکام کے دعوے زیادہ تر جزوی کامیابی تک محدود رہے۔ تعلیم، صحت اور بنیادی ڈھانچے کے منصوبے بھی بروقت مکمل نہ ہو سکے۔ یہی وجہ ہے کہ نہ صرف ملکی بلکہ عالمی سطح پر بھی ان کی سیاست پر شک و شبہات نے جنم لیا۔ سعودی عرب اور دیگر اہم ممالک، جو پہلے ان کی سیاست میں دلچسپی رکھتے تھے، اب کسی تعاون کے لیے تیار نہیں۔ عالمی رہنما اور ادارے ان کی پالیسیوں پر تحفظات کا اظہار کر رہے ہیں، اور عمران خان کی چرب زبانی کے باوجود ان کی عالمی کشش کمزور پڑ گئی ہے۔

انٹرنیٹ اور سوشل میڈیا نے بھی عمران خان کے خلاف محاذ قائم کر دیا۔ ہر ٹویٹ، ہر بیان اور ہر پالیسی پر سوشل میڈیا پر بحث اور تنقید جاری رہی۔ بلاگز، نیوز ویب سائٹس اور ٹک ٹاک و یوٹیوب پر ان کے بیانات کا تجزیہ اور تنقید ہوتی رہی۔ اکثر لوگ ان کی چرب زبانی اور وعدہ خلافیوں کو نمایاں کرتے رہے۔ ان کے سوشل میڈیا پیغامات نے کبھی کبھار مثبت اثر پیدا کیا، مگر مجموعی طور پر عوامی تنقید اور مباحثے نے ان کی مقبولیت کو نقصان پہنچایا۔ میمز، طنز اور طنزیہ ویڈیوز نے ان کی عوامی شبیہ کو متاثر کیا، اور نوجوان طبقے میں ان کے خلاف ردعمل کو مزید بڑھایا۔

عمران خان کی سب سے بڑی سیاسی کمزوری ان کے مخالفین، خصوصاً خواتین کے خلاف بیانات ہیں۔ ان کے بعض بیانات نے عوامی رائے اور میڈیا میں شدید تنقید کو جنم دیا۔ خواتین کے خلاف مبینہ بیانات اور جارحانہ زبان نے انہیں عوامی سطح پر تنقید اور قانونی خطرات سے دوچار کیا۔ اس کے علاوہ دیگر سیاسی رہنماؤں اور مخالفین کے بارے میں ان کے جارحانہ بیانات نے نہ صرف سیاسی تنازعہ بڑھایا بلکہ ان کی عالمی ساکھ پر بھی سوالیہ نشان لگا دیا۔ یہ بیانات اب سوشل میڈیا اور خبروں میں مسلسل ان کے خلاف استعمال ہو رہے ہیں، جو ان کے سیاسی مستقبل کو مزید محدود کر رہے ہیں۔

ان کے قانونی مسائل نے بھی ان کی سیاسی کشش کو شدید متاثر کیا ہے۔ ان اور ان کی اہلیہ بشریٰ بی بی کے خلاف کرپشن، بدعنوانی اور دیگر الزامات کے مقدمات چل رہے ہیں، جنہوں نے ان کی ساکھ کو مزید دھچکا پہنچایا ہے۔ ہر قانونی کیس نے عمران خان کی حکومت اور ان کے سیاسی دعووں پر سوالیہ نشان لگا دیا، اور عوامی اعتماد میں کمی پیدا کی۔ عدالتوں میں سماعتیں، میڈیا میں رپورٹنگ، وکلاء کے بیانات اور عوامی ردعمل نے ایک ایسا ماحول پیدا کیا جس نے ان کی سیاسی پوزیشن کو کمزور کر دیا۔

حقیقت یہ ہے کہ عمران خان کا سیاسی عروج جنرل قمر باجوہ کی حمایت کے بغیر ممکن نہ تھا۔ ان کا سیاسی سفر دراصل "باجوا پراجیکٹ” تھا، جو اب ختم ہو چکا ہے۔ جب باجوہ نہیں رہے تو عمران خان بھی سیاسی میدان سے باہر ہو چکے ہیں۔ ان کی چرب زبانی، جذباتی بیانات اور وعدے اب نہ عوام کو متاثر کر رہے ہیں اور نہ عالمی سطح پر کسی کی توجہ حاصل کر پا رہے ہیں۔ ان کے سیاسی دعوے، جو کبھی بڑے عوامی جلسوں اور میڈیا میں چرچے کا مرکز بنتے تھے، اب محض ماضی کی ایک یاد بن گئے ہیں۔

پاکستان آج ترقی، استحکام اور مضبوط اداروں کی طرف گامزن ہے۔ عمران خان کی کہانی اب ایک ایسا باب ہے، جو شعلہ بیانی، چرب زبانی اور وعدوں کے سوا کچھ نہیں رہا۔ اب ملک کی ترقی، عوام کی بھلائی اور جمہوریت مضبوط کرنے کا وقت ہے۔ جذباتی نعرے اور کھوکھلے وعدے اب پاکستان کی ترقی کا راستہ نہیں روک سکتے۔

یہ حقیقت ہر پاکستانی کے لیے واضح ہے کہ اگر سیاسی بیانات اور نعرے عملی اقدامات اور نتائج سے ہم آہنگ نہ ہوں تو وہ محض عوامی جذبات کو بھڑکانے تک محدود رہ جاتے ہیں۔ عمران خان کا کیس اس کی سب سے بڑی مثال ہے۔ اب وہ ایک ختم شدہ سیاستدان کے طور پر عوام کی یادوں میں موجود ہیں، جبکہ پاکستان نے ایک نئے ترقیاتی اور استحکام کے سفر کا آغاز کر دیا ہے۔

اور حقیقت یہ ہے کہ عمران خان کی سیاست میں واپسی کے امکانات بھی محدود ہیں۔ قانونی مسائل، عوامی ردعمل اور سیاسی تنقید کے درمیان، ان کے لیے دوبارہ مؤثر کردار ادا کرنا مشکل دکھائی دیتا ہے۔ ان کے بیانات، عالمی سطح پر عدم دلچسپی، اور قانونی دباؤ انہیں ایک محدود اور ختم شدہ سیاسی شخصیت کے طور پر پیش کر رہے ہیں۔

اب وقت آ گیا ہے کہ پاکستان اپنی ترقی، عوام کی بھلائی اور جمہوریت کو مضبوط کرنے پر توجہ دے۔ جذباتی نعرے اور کھوکھلے وعدے اب ملک کے روشن مستقبل کے راستے میں رکاوٹ نہیں بن سکتے۔ عمران خان کی سیاست اب ماضی کی بات ہے، اور پاکستان ایک نئے، روشن اور مستحکم عہد کی طرف بڑھ رہا ہے، جہاں عملی اقدامات اور نتائج کی اہمیت جذباتی بیانات سے کہیں زیادہ ہے۔

پاکستان میں جب بھی قدرتی آفات آتی ہیں تو عوام کو سب سے زیادہ مسائل کا سامنا بنیادی سہولتوں کی کمی کے باعث کرنا پڑتا ہے۔ حکومتی ادارے اپنی استطاعت کے مطابق کام کرتے ہیں مگر اکثر متاثرین تک بروقت اور مکمل امداد نہیں پہنچ پاتی۔ ایسے میں سیاسی و سماجی جماعتوں کی کارکردگی نمایاں ہو کر سامنے آتی ہے۔ انہی جماعتوں میں مرکزی مسلم لیگ بھی ہے جس نے حالیہ تباہ کن سیلاب میں متاثرین کی جس طرح مدد کی، وہ اس کے خدمتِ خلق کے تسلسل کا عملی ثبوت ہے۔

سیلاب کے دوران مرکزی مسلم لیگ کے کارکن سب سے پہلے میدان عمل میں اُترے۔ متاثرہ علاقوں میں ریلیف کیمپ قائم کیے گئے جہاں روزانہ ہزاروں متاثرین کو کھانے پینے کی اشیاء، ادویات، کپڑے اور خیمے فراہم کیے گئے۔ کراچی سے کپڑوں اور خوراک کی بڑی کھیپ روانہ ہوئی، راولپنڈی سے سامان سوات، بونیر اور گلگت بلتستان پہنچایا گیا۔ کراچی کی ٹیمیں پہلے دن ہی متاثرہ خاندانوں کے درمیان پہنچ گئیں، جہاں نہ صرف صاف پانی کی فراہمی کے لیے پائپ لگائے گئے بلکہ ملبہ ہٹانے کے لیے مزدور اور آلات بھی فراہم کیے گئے۔ یہ سب کچھ بروقت اور منظم انداز میں کیا گیا تاکہ متاثرین کو فوری سہارا مل سکے۔

مرکزی مسلم لیگ کی میڈیکل ٹیمیں بھی متاثرہ علاقوں میں سرگرم رہیں۔ درجنوں دیہات میں علاج کی سہولت فراہم کی گئی، مفت ادویات تقسیم ہوئیں اور وبائی امراض کو روکنے کے لیے احتیاطی تدابیر اپنائی گئیں۔ ان سرگرمیوں نے ہزاروں خاندانوں کو سہارا دیا، خاص طور پر ایسے وقت میں جب حکومتی ادارے کمزور پڑ گئے تھے اور متاثرہ لوگ بے یار و مددگار تھے۔

یہ جماعت ماضی میں بھی مختلف آفات اور سانحات میں عوام کے شانہ بشانہ رہی ہے۔ زلزلے ہوں یا طوفانی بارشیں، مرکزی مسلم لیگ کے کارکنوں نے ہمیشہ میدانِ خدمت میں اپنی موجودگی کو یقینی بنایا۔ یتیم بچوں اور بیواؤں کی کفالت ہو یا قدرتی آفات کے متاثرین کی مدد، اس جماعت نے خدمتِ خلق کو اپنی سیاست کا لازمی حصہ بنایا ہے۔ یہی تسلسل حالیہ سیلاب میں بھی نظر آیا جس نے اسے عوام کے دلوں میں مزید جگہ دی۔

افسوس یہ ہے کہ قومی اور بین الاقوامی میڈیا نے مرکزی مسلم لیگ کے کردار پر وہ روشنی نہیں ڈالی جس کی یہ مستحق تھی۔ بڑی سیاسی جماعتیں زیادہ تر بیانات تک محدود رہیں مگر عملی میدان میں مرکزی مسلم لیگ کی سرگرمیاں عوام کے لیے حقیقی سہارا ثابت ہوئیں۔ شاید سیاسی پس منظر اور جماعت کے بارے میں کچھ تحفظات کے باعث میڈیا کی توجہ کم رہی، مگر زمینی حقیقت یہ ہے کہ متاثرین نے اس جماعت کو خالص خدمت کے جذبے کے ساتھ یاد کیا۔

پاکستان جیسے ملک میں جہاں آفات کے دوران سرکاری مشینری اکثر متاثرین تک بروقت نہیں پہنچ پاتی، وہاں رضاکارانہ نیٹ ورک اور خدمت پر یقین رکھنے والی جماعتیں خلا کو پُر کرتی ہیں۔ مرکزی مسلم لیگ کی سرگرمیوں نے یہ واضح پیغام دیا ہے کہ سیاست صرف نعروں کا نام نہیں بلکہ عوامی خدمت سے جڑی ہوئی عملی جدوجہد ہے۔آخر میں یہ کہنا بجا ہوگا کہ مرکزی مسلم لیگ نے ثابت کیا ہے کہ خدمتِ خلق ہی سیاست کی اصل پہچان ہے، اور یہی پہچان عوامی اعتماد اور مستقبل کی کامیابی کی سب سے بڑی ضمانت بن سکتی ہے۔