Author: ممتاز حیدر

لبنان کے جنوبی علاقے میں تعینات اقوامِ متحدہ کے امن مشن (یونیفل) کے ایک ٹھکانے پر میزائل حملے کے نتیجے میں گھانا کے دو فوجی شدید زخمی ہو گئے۔

یہ واقعہ ایسے وقت پیش آیا ہے جب خطے میں اسرائیل اور حزب اللہ کے درمیان کشیدگی مسلسل بڑھ رہی ہے۔گھانا کی مسلح افواج نے سماجی رابطے کی ویب سائٹ ایکس پر جاری بیان میں بتایا کہ جنوبی لبنان میں ان کے ہیڈکوارٹر کو جمعہ کی شام دس منٹ سے بھی کم وقت میں دو میزائل حملوں کا نشانہ بنایا گیا۔ بیان کے مطابق حملے میں دو فوجی شدید زخمی ہوئے جبکہ ایک اور اہلکار شدید ذہنی دباؤ اور صدمے کا شکار ہو گیا۔گھانا کی فوج کے مطابق حملے میں افسروں کے میس کی عمارت بھی مکمل طور پر تباہ ہو کر جل گئی۔ زخمی اہلکاروں کو فوری طور پر طبی امداد فراہم کی جا رہی ہے۔بیان میں واضح طور پر یہ نہیں بتایا گیا کہ میزائل حملہ کس جانب سے کیا گیا، تاہم کہا گیا کہ یہ واقعہ اسرائیلی فوج اور حزب اللہ کے درمیان جاری جھڑپوں کے نتیجے میں پیش آیا۔گھانا کی مسلح افواج نے اس واقعے پر نیویارک میں واقع اقوامِ متحدہ کے ہیڈکوارٹر میں باضابطہ احتجاج بھی درج کرا دیا ہے۔اقوامِ متحدہ کا امن مشن یونیفل گزشتہ تقریباً 45 برس سے جنوبی لبنان میں تعینات ہے، جس میں دنیا کے 50 سے زائد ممالک کے فوجی شامل ہیں۔

یاد رہے کہ 2024 میں اسرائیل کے لبنان پر حملے کے دوران اسرائیلی حکام نے حزب اللہ پر الزام عائد کیا تھا کہ وہ یونیفل کے ٹھکانوں کے قریب سرگرمیاں انجام دے رہی ہے۔ اس دوران اسرائیلی فوج پر امن فوجیوں پر فائرنگ اور یونیفل کی تنصیبات میں داخل ہونے کے الزامات بھی سامنے آئے تھے۔

دوسری جانب اقوامِ متحدہ کے سیکریٹری جنرل نے مشرقِ وسطیٰ میں بڑھتی ہوئی کشیدگی پر تشویش کا اظہار کرتے ہوئے فوری سفارتی مذاکرات کا مطالبہ کیا ہے۔ انہوں نے خبردار کیا کہ خطے میں جاری غیر قانونی حملوں کے باعث شہریوں کو شدید نقصان پہنچ رہا ہے اور یہ صورتحال عالمی معیشت کے لیے بھی بڑا خطرہ بن سکتی ہے۔اقوامِ متحدہ کے سربراہ کا کہنا تھا کہ اگر جنگ طول پکڑتی ہے تو دنیا بھر میں مہنگائی میں اضافہ اور معاشی ترقی کی رفتار سست ہونے کا خدشہ ہے، جبکہ سب سے زیادہ متاثر غریب اور کمزور طبقات ہوں گے۔ انہوں نے زور دیا کہ لڑائی فوری طور پر بند کر کے سنجیدہ سفارتی مذاکرات کا آغاز کیا جائے، ورنہ صورتحال کسی کے کنٹرول سے باہر جا سکتی ہے۔

مشرقِ وسطیٰ میں جاری کشیدگی نے ایک بار پھر شدت اختیار کرلی ہے جہاں ایران، اسرائیل اور امریکا کے درمیان بڑھتی ہوئی محاذ آرائی کے باعث خطے کی صورتحال نہایت سنگین ہوتی جا رہی ہے۔

مختلف ذرائع سے موصول ہونے والی اطلاعات کے مطابق میزائل حملوں، فضائی کارروائیوں کے باعث کئی ممالک براہ راست اس تنازع کے اثرات سے متاثر ہو رہے ہیں۔امریکی خبر رساں ویب سائٹ ے مطابق امریکی وزیر خارجہ مارکو روبیو نے عرب ممالک کے وزرائے خارجہ کو آگاہ کیا ہے کہ امریکا کا مقصد ایران میں حکومت کی تبدیلی نہیں بلکہ خطے میں کشیدگی کو محدود رکھنا ہے۔ اس بیان کو سفارتی سطح پر ایک اہم اشارہ قرار دیا جا رہا ہے کیونکہ حالیہ دنوں میں ایران اور امریکا کے درمیان کشیدگی مسلسل بڑھ رہی ہے۔

دوسری جانب اسرائیلی اخبار کے مطابق جنوبی لبنان میں جھڑپوں کے دوران حزب اللہ کی جانب سے فائرنگ کے نتیجے میں اسرائیلی فوج کی گیواتی بریگیڈ کے متعدد اہلکار شدید زخمی ہو گئے جنہیں فوری طور پر طبی امداد کے لیے منتقل کیا گیا۔اسی دوران اسرائیلی فضائیہ نے لبنان کے دارالحکومت بیروت کے جنوبی مضافاتی علاقوں پر ایک اور فضائی حملہ کیا ہے۔ بیروت کے جنوبی علاقے حزب اللہ کے مضبوط گڑھ سمجھے جاتے ہیں اور ماضی میں بھی اسرائیل یہاں متعدد فضائی کارروائیاں کر چکا ہے۔

اطلاعات کے مطابق ایران کی جانب سے میزائل حملوں کی ایک نئی لہر بھی شروع ہو چکی ہے۔ اس بار اسرائیل میں حملوں سے قبل صرف چار منٹ کی پیشگی وارننگ دی گئی جبکہ اس سے پہلے عموماً سات سے آٹھ منٹ کا وقت ملتا تھا۔ تل ابیب میں خطرے کے سائرن بجنے کی اطلاعات بھی موصول ہوئی ہیں تاہم فوری طور پر کسی بڑے نقصان کی تصدیق نہیں ہو سکی۔ایران کے مرکزی فضائی دفاعی ہیڈکوارٹر خاتم الانبیاء کے ترجمان نے دعویٰ کیا ہے کہ دشمن کے ریڈار نظام تباہ ہونے کے بعد ایرانی مسلح افواج کو کارروائیوں میں زیادہ آزادی حاصل ہو گئی ہے اور حملوں کی کامیابی کی شرح میں اضافہ ہوا ہے۔

سعودی عرب میں امریکی اڈے کو نشانہ بنانے کا دعویٰ
رپورٹس کے مطابق ایک ایرانی بیلسٹک میزائل پرنس سلطان ایئربیس (سعودی عرب) پر جا گرا جس کے نتیجے میں وہاں موجود امریکی فوجیوں کے زخمی ہونے کی اطلاعات ہیں۔ سیٹلائٹ تصاویر میں اس اڈے پر امریکی فضائیہ کے متعدد ری فیولنگ طیاروں کی موجودگی بھی دیکھی گئی ہے۔مزید برآں سیٹلائٹ اور ڈرون تصاویر میں ایئر بیس کے قریب ایک ریڈار سائٹ سے دھواں اٹھتے ہوئے بھی دیکھا گیا ہے۔

متحدہ عرب امارات میں امریکی دفاعی اڈے پر حملہ
امریکی صحافی ریان گِرم کی جانب سے حاصل کی گئی تصاویر میں متحدہ عرب امارات میں قائم امریکی THAAD میزائل دفاعی نظام کے ایک اڈے پر ایرانی حملوں کے بعد کے مناظر دکھائے گئے ہیں۔ تاہم اس حملے کے نقصانات کے بارے میں مکمل تفصیلات ابھی سامنے نہیں آئی ہیں۔

ایران کی وزارتِ انٹیلیجنس نے ایک بیان میں کہا ہے کہ اس نے ایسے علیحدگی پسند گروپ کے خلاف کارروائی کی ہے جسے ایرانی حکام کے مطابق امریکا اور اسرائیل کی حمایت حاصل تھی۔ حکام کے مطابق یہ گروپ کئی ماہ سے ایران کے مغربی علاقوں میں بدامنی پھیلانے کی منصوبہ بندی کر رہا تھا۔

ذرائع کے مطابق اسرائیل اور متحدہ عرب امارات میں جنگ سے متعلق ویڈیوز اور تصاویر جاری کرنے پر سخت پابندیاں عائد کی جا رہی ہیں اور ایسی معلومات پھیلانے والوں کو قید کی سزاؤں کی دھمکیاں دی جا رہی ہیں۔ اس وجہ سے جنگ سے متعلق زیادہ تر ویڈیوز لبنان اور ایران سے سامنے آ رہی ہیں۔

جنگی صورتحال کے باعث عالمی معیشت بھی متاثر ہو رہی ہے۔ امریکی اسٹاک مارکیٹ میں تقریباً 2 فیصد کمی دیکھی گئی جبکہ تیل کی قیمتیں تیزی سے بڑھ رہی ہیں۔ برینٹ کروڈ آئل کی قیمت 93 ڈالر فی بیرل تک پہنچ گئی ہے جو 2023 کے بعد بلند ترین سطح قرار دی جا رہی ہے۔

سیکیورٹی تجزیہ کاروں کے مطابق موجودہ جنگ اور جون میں ہونے والی 12 روزہ جنگ کے درمیان ایک بڑا فرق یہ بتایا جا رہا ہے کہ ایران کے اندر اسرائیلی خفیہ ایجنسی موساد کے نیٹ ورک کی سرگرمیاں اس بار نہایت محدود نظر آ رہی ہیں۔ بعض رپورٹس کے مطابق گزشتہ مہینوں میں موساد کے متعدد خفیہ سیلز کو نقصان پہنچا ہے۔

مشرقِ وسطیٰ میں جاری کشیدگی کے دوران ایران نے دعویٰ کیا ہے کہ اس کے فضائی دفاعی نظام نے ملک کے مختلف علاقوں میں امریکی اور اسرائیلی ڈرونز کو مار گرایا ہے،

ایرانی حکام کے مطابق صوبہ لورستان میں ایک امریکی MQ-9 ڈرون کو تباہ کیا گیا، جبکہ دارالحکومت تہران کے نواحی علاقے میں ایک اسرائیلی ہرمس ڈرون کو بھی مار گرایا گیا۔ ایرانی حکام نے ان دعوؤں کے ساتھ تباہ کیے گئے ڈرونز کی تصاویر بھی جاری کی ہیں۔ایرانی فوجی ذرائع کا کہنا ہے کہ گزشتہ ہفتے امریکا اور اسرائیل کی جانب سے شروع ہونے والی کارروائیوں کے بعد سے اب تک ایرانی فضائی دفاع نے 75 سے زائد ڈرونز مار گرانے کا دعویٰ کیا ہے۔ حکام کے مطابق ملک بھر میں تعینات فضائی دفاعی نظام امریکی اور اسرائیلی طیاروں اور بغیر پائلٹ طیاروں کو نشانہ بنا رہا ہے۔ایران نے خبردار کیا ہے کہ اس کی جوابی فوجی کارروائیاں آئندہ دنوں میں مزید تیز اور وسیع ہوں گی۔ ایرانی قیادت کے مطابق اگر حملے جاری رہے تو خطے میں کشیدگی مزید بڑھ سکتی ہے۔

دوسری جانب ایرانی میڈیا کا کہنا ہے کہ جنوبی شہر شیراز میں امریکا اور اسرائیل کے حملوں کے نتیجے میں کم از کم 20 افراد شہید ہوگئے۔ رپورٹس کے مطابق حملہ ایک رہائشی علاقے پر کیا گیا جس کے باعث شہری املاک کو بھی شدید نقصان پہنچا۔ادھر اسرائیلی فوج نے دعویٰ کیا ہے کہ اس نے رات بھر جاری کارروائیوں کے دوران ایران کے 6 بیلسٹک میزائل لانچرز کو تباہ کر دیا، جبکہ حالیہ حملوں میں ایران کے 3 جدید فضائی دفاعی نظام بھی نشانہ بنائے گئے۔تجزیہ کاروں کے مطابق ایران، امریکا اور اسرائیل کے درمیان بڑھتی ہوئی عسکری جھڑپیں پورے مشرقِ وسطیٰ میں بڑے تصادم کا خطرہ پیدا کر رہی ہیں، جس کے اثرات عالمی سلامتی اور معیشت پر بھی پڑ سکتے ہیں۔

مشرقِ وسطیٰ میں جاری کشیدگی کے دوران متحدہ عرب امارات نے جنوبی کوریا سے جدید فضائی دفاعی نظام Cheongung-II surface-to-air missile system کی جلد از جلد فراہمی کی درخواست کر دی ہے۔

حکام کے مطابق یہ درخواست ایسے وقت میں سامنے آئی ہے جب ایران کی جانب سے خطے میں مختلف اہداف پر میزائل اور ڈرون حملے کیے جا رہے ہیں۔میڈیا رپورٹس کے مطابق یو اے ای نے جنوبی کوریا سے کہا ہے کہ معاہدے کے تحت فراہم کیے جانے والے Cheongung-II میزائل بیٹریوں کی ترسیل کے شیڈول کو تیز کیا جائے تاکہ ملک کو ممکنہ حملوں سے بہتر طور پر محفوظ بنایا جا سکے۔ یہ نظام پہلے ہی یو اے ای کے جامع فضائی دفاعی نیٹ ورک میں شامل کیا جا چکا ہے۔ جنوبی کوریا کے ذرائع ابلاغ اور دفاعی حکام کے مطابق یو اے ای میں نصب Cheongung-II نظام نے حالیہ حملوں کے دوران تقریباً 96 فیصد کامیابی کے ساتھ میزائلوں کو روکنے میں کامیابی حاصل کی۔ جنوبی کوریا کی قومی اسمبلی کی دفاعی کمیٹی کے رکن Yu Yong-weon نے اس کارکردگی کو نظام کی بڑی کامیابی قرار دیتے ہوئے کہا کہ اس سے مشرقِ وسطیٰ اور عالمی دفاعی منڈی میں اس سسٹم کی مانگ مزید بڑھ سکتی ہے۔

امریکہ اور اسرائیل کی جانب سے ایران پر حملوں کے بعد ایرانی قیادت نے جوابی کارروائیاں شروع کیں۔ ابتدائی حملوں میں ایران کے سپریم لیڈر آیت اللہ خامنہ ای کی ہلاکت کی خبر سامنے آئی، جس کے بعد ایران نے مشرقِ وسطیٰ میں امریکی اڈوں اور دیگر مقامات پر میزائل اور ڈرون حملے کی،ان حملوں میں بعض شہری تنصیبات، بشمول ہوائی اڈوں اور ہوٹلوں کو بھی نقصان پہنچنے کی اطلاعات ہیں،یو اے ای نے 2022 میں تقریباً 3.5 ارب ڈالر کے معاہدے کے تحت جنوبی کوریا کی دفاعی کمپنیوں سے Cheongung-II نظام کی 10 بیٹریاں خریدنے کا معاہدہ کیا تھا، جن میں سے اب تک دو بیٹریاں نصب کی جا چکی ہیں،بعد ازاں سعودی عرب اور عراق نے بھی اس دفاعی نظام کی خریداری کے لیے بالترتیب 3.2 ارب ڈالر اور 2.8 ارب ڈالر کے معاہدے کیے۔

جنوبی کوریا کے حکام کا کہنا ہے کہ موجودہ دفاعی معاہدوں اور پیداوار کے شیڈول کے باعث بیٹریوں کی ترسیل کو تیز کرنا آسان نہیں۔ تاہم یو اے ای نے متبادل طور پر یہ تجویز بھی دی ہے کہ اگر مکمل بیٹریاں فوری فراہم نہیں کی جا سکتیں تو کم از کم انٹرسیپٹر میزائل پہلے فراہم کیے جائیں تاکہ دفاعی صلاحیت کو فوری طور پر مضبوط کیا جا سکے۔

Cheongung-II ایک درمیانی فاصلے کا زمین سے فضا میں مار کرنے والا میزائل نظام ہے جو بیلسٹک میزائلوں اور جنگی طیاروں کو نشانہ بنانے کی صلاحیت رکھتا ہے۔ ایک بیٹری میں چار لانچر، جدید ریڈار اور فائر کنٹرول سینٹر شامل ہوتا ہے۔اس کا انٹرسیپٹر میزائل تقریباً 400 کلوگرام وزن رکھتا ہے اور Hit-to-Kill ٹیکنالوجی کے ذریعے ہدف کو براہِ راست ٹکر مار کر تباہ کرتا ہے۔ یہ نظام 15 کلومیٹر سے زیادہ بلندی اور تقریباً 20 کلومیٹر فاصلے تک بیلسٹک میزائلوں کو روکنے کی صلاحیت رکھتا ہے جبکہ طیاروں کے خلاف اس کی رینج 50 کلومیٹر تک ہے۔دفاعی صنعت سے وابستہ ماہرین کا کہنا ہے کہ اگر ایران اور اس کے مخالف ممالک کے درمیان کشیدگی برقرار رہی تو فضائی دفاعی نظاموں کی عالمی طلب میں نمایاں اضافہ ہو سکتا ہے۔ ماہرین کے مطابق اس صورتحال میں Cheongung-II کی کامیاب کارکردگی اسے عالمی دفاعی منڈی میں ایک مضبوط امیدوار بنا سکتی ہے۔

قطر کے وزیر توانائی سعد بن شریده الکعبی نے خبردار کیا ہے کہ مشرقِ وسطیٰ میں بڑھتی ہوئی جنگی کشیدگی کے باعث عالمی منڈی میں خام تیل کی قیمت 150 ڈالر فی بیرل تک پہنچ سکتی ہے، جس سے عالمی معیشت کو شدید دھچکا لگنے کا خدشہ ہے۔

قطر کے وزیرِ توانائی نے ایک بیان میں کہا کہ خطے میں جاری تنازع، خاص طور پر ایران، امریکا اور اسرائیل کے درمیان بڑھتی ہوئی کشیدگی نہ صرف علاقائی امن کے لیے خطرہ ہے بلکہ اس کے اثرات عالمی توانائی منڈیوں پر بھی مرتب ہو سکتے ہیں۔انہوں نے کہا کہ اگر موجودہ صورتحال مزید بگڑتی ہے تو آنے والے چند ہفتوں میں خام تیل کی قیمت میں غیر معمولی اضافہ دیکھنے میں آ سکتا ہے اور یہ قیمت 150 ڈالر فی بیرل تک پہنچ سکتی ہے، جو عالمی معیشت کے لیے ایک بڑا دھچکا ثابت ہوگا۔

قطری وزیرِ توانائی کے مطابق مشرقِ وسطیٰ دنیا میں توانائی کی فراہمی کا ایک اہم مرکز ہے اور اگر جنگ کے باعث خلیجی ممالک سے تیل اور گیس کی برآمدات متاثر ہوتی ہیں تو عالمی سپلائی چین شدید دباؤ کا شکار ہو سکتی ہے۔ انہوں نے خبردار کیا کہ ایسی صورتحال میں دنیا بھر میں ایندھن کی قیمتوں میں اضافہ، مہنگائی میں تیزی اور اقتصادی عدم استحکام پیدا ہونے کا خدشہ ہے، ماہرین کے مطابق اگر کشیدگی برقرار رہی یا جنگ میں شدت آئی تو عالمی مالیاتی منڈیاں، تجارتی سرگرمیاں اور ترقی پذیر معیشتیں سب سے زیادہ متاثر ہو سکتی ہیں