Author: ممتاز حیدر

مدھیہ پردیش: عام طور پر طلاق کے مقدمات میں گھریلو تشدد، جہیز یا ازدواجی تنازعات جیسے الزامات سامنے آتے ہیں، مگر ایک حیران کن واقعے میں ایک خاتون نے اپنے شوہر کی ہی بہن کو اس کی دوسری بیوی قرار دے کر عدالت سے یکطرفہ طلاق حاصل کرلی۔

یہ معاملہ مدھیہ پردیش ہائی کورٹ کی گوالیار بینچ میں زیرِ سماعت ہے، جہاں شوہر نے فیملی کورٹ کے فیصلے کو چیلنج کرتے ہوئے مؤقف اختیار کیا ہے کہ طلاق دھوکہ دہی اور گمراہ کن شواہد کی بنیاد پر حاصل کی گئی۔عدالتی دستاویزات کے مطابق گوالیار کی رہائشی خاتون کی شادی 1998 میں ایک نجی مارکیٹنگ کمپنی سے وابستہ شخص سے ہوئی تھی۔ شوہر کے اکثر گھر سے باہر رہنے کے باعث دونوں کے درمیان اختلافات بڑھتے گئے، اور 2015 کے بعد خاتون نے علیحدہ رہائش اختیار کرلی۔خاتون کسی بھی صورت طلاق حاصل کرنا چاہتی تھی جبکہ شوہر اس پر آمادہ نہیں تھا۔ بالآخر 2021 میں خاتون نے فیملی کورٹ سے رجوع کرتے ہوئے دعویٰ کیا کہ اس کے شوہر نے دوسری شادی کرلی ہے۔

اپنے دعوے کے ثبوت کے طور پر خاتون نے ایک خاندانی گروپ تصویر پیش کی، جس میں شوہر ایک خاتون کے ساتھ کھڑا تھا۔ خاتون نے عدالت کو بتایا کہ تصویر میں موجود وہ خاتون شوہر کی دوسری بیوی ہے۔ عدالت نے اسی تصویر کو بنیاد بنا کر خاتون کے حق میں یکطرفہ فیصلہ سناتے ہوئے طلاق دے دی، جبکہ شوہر کو اپنا مؤقف پیش کرنے کا موقع بھی نہ مل سکا۔

واقعے کا انکشاف اس وقت ہوا جب شوہر کو رواں ماہ اپریل کے پہلے ہفتے میں طلاق کے فیصلے کا علم ہوا۔ عدالتی ریکارڈ چیک کرنے پر وہ حیران رہ گیا کہ جس خاتون کو اس کی دوسری بیوی ظاہر کیا گیا، وہ دراصل اس کی سگی بہن تھی۔سرکاری وکیل دھرمیندر شرما کے مطابق شوہر نے اب ہائی کورٹ سے رجوع کرتے ہوئے مؤقف اپنایا ہے کہ اس کی بیوی نے عدالت کو گمراہ کیا اور غلط بیانی کے ذریعے طلاق کا حکم حاصل کیا۔ہائی کورٹ میں کیس کی سماعت جاری ہے، جہاں شوہر نے درخواست کی ہے کہ یکطرفہ طلاق کے فیصلے کو کالعدم قرار دیا جائے کیونکہ یہ فیصلہ غلط اور گمراہ کن شواہد پر مبنی ہے۔

ایران نے جاری سفارتی کوششوں کے دوران مذاکرات کے لیے نئی تجاویز پیش کر دی ہیں، جو پاکستان کے ذریعے امریکا تک بھی پہنچا دی گئی ہیں۔ ذرائع کے مطابق یہ پیش رفت خطے میں کشیدگی کم کرنے کی کوششوں کا حصہ ہے۔

ایرانی حکام کا کہنا ہے کہ کسی بھی بڑے معاہدے سے قبل سب سے پہلے آبنائے ہرمز کو کھولنے اور بحری ناکہ بندی کے خاتمے پر اتفاق ہونا چاہیے۔ ایران کے مطابق اس کے بعد ہی جوہری پروگرام سے متعلق مذاکرات کو آگے بڑھایا جا سکتا ہے۔دوسری جانب وائٹ ہاؤس حکام کا کہنا ہے کہ امریکا کسی بھی ایسے معاہدے میں دلچسپی رکھتا ہے جو ایران کو جوہری ہتھیار حاصل کرنے سے واضح طور پر روکے۔ امریکی مؤقف کے مطابق سیکیورٹی خدشات کو اولین ترجیح دی جائے گی۔

امریکی میڈیا رپورٹس کے مطابق ایران کی نئی تجاویز پر غور کے لیے صدر ڈونلڈ ٹرمپ کی زیر صدارت ایک اہم اجلاس پیر کو متوقع ہے، جس میں آئندہ کی حکمت عملی اور مذاکرات کے اگلے مرحلے کا تعین کیا جائے گا۔تجزیہ کاروں کا کہنا ہے کہ اگر دونوں فریق ابتدائی شرائط پر کسی حد تک متفق ہو جاتے ہیں تو خطے میں کشیدگی میں کمی اور سفارتی پیش رفت کے امکانات روشن ہو سکتے ہیں۔

نئی دہلی: بھارت کے انتہائی اہم دفاعی منصوبے براہموس سپرسانک کروز میزائل کو سنگین داخلی بحران کا سامنا ہے، جس کے باعث اس کی پیداوار میں مبینہ طور پر 50 فیصد سے زائد کمی واقع ہو گئی ہے۔ اس صورتحال نے بھارتی بحریہ کی آپریشنل صلاحیت، جنگی تیاری اور خطے میں دفاعی توازن پر سوالات کھڑے کر دیے ہیں۔

ذرائع کے مطابق براہموس ایروسپیس میں بڑے پیمانے پر عملے کے تبادلوں نے مینوفیکچرنگ نظام کو شدید متاثر کیا ہے۔ اطلاعات ہیں کہ اس بحران کے باعث بحریہ کو میزائلوں کی فراہمی میں کئی سال کی تاخیر کا خدشہ پیدا ہو گیا ہے، جس سے فرنٹ لائن جنگی جہازوں کی کارکردگی متاثر ہو سکتی ہے۔براہموس میزائل بھارتی بحریہ کے لیے ایک کلیدی ہتھیار سمجھا جاتا ہے، جو بحیرہ ہند میں بڑھتی ہوئی چینی بحری سرگرمیوں کے مقابلے میں مرکزی کردار ادا کرتا ہے۔ ماہرین کے مطابق اس پروگرام میں کسی بھی قسم کی رکاوٹ نہ صرف دفاعی حکمت عملی بلکہ بھارت کی برآمدی پالیسی پر بھی اثر انداز ہو سکتی ہے۔

اندرونی رپورٹس کے مطابق کم از کم 56 تجربہ کار ملازمین جن میں انجینئرز، سسٹم ماہرین، سینئر ٹیکنیشنز اور منیجرز شامل ہیں کو اچانک مختلف مراکز میں منتقل کر دیا گیا۔ یہ تبادلے خاص طور پر حیدرآباد، لکھنؤ، ناگپور اور پلانی کے درمیان کیے گئے، جہاں ملازمین کو 13 اپریل 2026 تک نئی تعیناتیوں پر رپورٹ کرنے کی ہدایت دی گئی۔دفاعی امور سے وابستہ ایک سابق افسر نے ان تبادلوں کو "بلا جواز” قرار دیتے ہوئے خبردار کیا کہ حساس اور انتہائی درستگی کے حامل پروڈکشن یونٹس سے تجربہ کار عملے کی اچانک منتقلی ادارے کے لیے خودساختہ نقصان ثابت ہو سکتی ہے۔

مزید برآں، ذرائع کا کہنا ہے کہ اس اقدام کو بعض ملازمین کی جانب سے انتظامی اصلاحات کے بجائے دباؤ یا ہراسانی کے طور پر دیکھا جا رہا ہے، جس کے نتیجے میں ماہر انجینئرز اور ٹیکنیشنز کے استعفوں کا خدشہ بھی بڑھ گیا ہے۔ یہ صورتحال ایسے وقت میں سامنے آئی ہے جب بھارت میزائلوں کی پیداوار اور برآمدات بڑھانے کی کوشش کر رہا ہے۔

دفاعی تجزیہ کاروں کے مطابق اگر یہ بحران جلد حل نہ ہوا تو اس کے اثرات نئی دہلی سے لے کر بیجنگ تک اور پورے انڈو پیسیفک خطے میں محسوس کیے جا سکتے ہیں، جہاں عسکری توازن پہلے ہی حساس مرحلے میں داخل ہو چکا ہے۔