خیبرپختونخوا کے ضلع کرم میں واقع پارہ چنار ائیرپورٹ کو طویل عرصے بعد دوبارہ فعال کر دیا گیا ہے، جس سے علاقے میں فضائی رابطوں کی بحالی کی راہ ہموار ہو گئی ہے۔
ذرائع کے مطابق پاک فوج، فرنٹیئر ورکس آرگنائزیشن (ایف ڈبلیو او) اور پاکستان ائیرپورٹس اتھارٹی کی مشترکہ کاوشوں سے ائیرپورٹ کو قابلِ استعمال بنایا گیا۔ پاک آرمی ایوی ایشن نے 26 اپریل کو ائیرپورٹ پر آپریشنل لینڈنگ اور ٹیک آف کے کامیاب ٹرائلز انجام دیے۔ذرائع کا کہنا ہے کہ ان ٹرائلز کا مقصد رن وے کی فعالیت اور ائیرپورٹ کی مجموعی آپریشنل تیاریوں کا جائزہ لینا تھا۔ اس دوران پاک آرمی ایوی ایشن کی جانب سے مجموعی طور پر 6 کامیاب لینڈنگ اور ٹیک آف کیے گئے۔ابتدائی جائزے کے مطابق ائیرپورٹ کے رن ویز کو پیشہ ورانہ معیار اور اعلیٰ حفاظتی اصولوں کے مطابق قرار دیا گیا ہے، جس کے بعد توقع ظاہر کی جا رہی ہے کہ جلد ہی یہاں باقاعدہ پروازوں کا آغاز بھی ممکن ہو سکے گا۔
مقامی افراد کے لیے یہ پیش رفت نہایت اہم قرار دی جا رہی ہے، کیونکہ ائیرپورٹ کی بحالی سے نہ صرف آمدورفت میں آسانی ہوگی بلکہ علاقے کی معاشی و سماجی سرگرمیوں میں بھی بہتری آئے گی۔