Author: ممتاز حیدر

ایران میں پارلیمنٹ اور قومی سلامتی کونسل کی سطح پر ایک اہم تجویز پر غور کیا جا رہا ہے جس کے تحت آبنائے ہرمز پر “خودمختار کنٹرول” حاصل کرنے کی بات سامنے آئی ہے۔

ایرانی سرکاری میڈیا کے مطابق، مہر نیوز ایجنسی نے انکشاف کیا ہے کہ ملک کی سکیورٹی اور خارجہ پالیسی کمیشن کے ایک رکن نے اس تجویز کی تصدیق کی ہے، تاہم اس حوالے سے حتمی فیصلہ کرنے کا اختیار ابھی واضح نہیں ہے کہ کون سا ادارہ کرے گا۔ذرائع کے مطابق تہران پہلے بھی یہ مؤقف اختیار کرتا رہا ہے کہ اس اہم آبی گزرگاہ پر مکمل کنٹرول کسی بھی ممکنہ جنگ بندی یا معاہدے کی ایک شرط ہو سکتی ہے۔

آبنائے ہرمز عالمی توانائی کی ترسیل کے لیے انتہائی اہم سمجھی جاتی ہے، جہاں سے روزانہ دنیا کے تقریباً پانچویں حصے کے تیل اور مائع قدرتی گیس (LNG) کی ترسیل ہوتی ہے۔ ماہرین کے مطابق اگر اس راستے میں کسی بھی قسم کی رکاوٹ پیدا ہوتی ہے تو اس کے عالمی معیشت پر فوری اور سنگین اثرات مرتب ہو سکتے ہیں۔رپورٹس میں یہ بھی کہا گیا ہے کہ ایران کی اندرونی سیاسی صورتحال میں تبدیلی آئی ہے۔ ابتدائی مرحلے میں امریکی و اسرائیلی حملوں کے بعد ملک کی اعلیٰ قیادت میں بڑی تبدیلیاں دیکھنے میں آئی ہیں، اور اب سخت گیر عناصر، خصوصاً اسلامی انقلابی گارڈز ے بعض حلقے زیادہ بااثر سمجھے جا رہے ہیں۔دوسری جانب نسبتاً معتدل سیاسی شخصیات، جن میں پارلیمنٹ کے اسپیکر محمد قالیباف کا نام بھی لیا جا رہا ہے، مبینہ طور پر امریکہ کے ساتھ مذاکرات کی حمایت کر رہے ہیں۔

امریکی صدر ڈونلڈ ٹرمپ نے بھی اپنے بیانات میں ایران کی موجودہ سیاسی تقسیم کا ذکر کرتے ہوئے کہا ہے کہ اس صورتحال میں تہران کو ایک متحدہ مؤقف پیش کرنے کے لیے وقت دیا گیا ہے، جبکہ جنگ بندی میں توسیع کے ذریعے کشیدگی کم کرنے کی کوششیں جاری ہیں۔آبنائے ہرمز کا معاملہ ایران اور امریکہ کے درمیان جاری کشیدگی اور ممکنہ مذاکرات میں ایک مرکزی نکتہ بنتا جا رہا ہے، جس پر عالمی سطح پر بھی گہری نظر رکھی جا رہی ہے۔

ایران کے ساتھ جاری مذاکرات میں پیش رفت نہ ہونے کے باعث امریکی صدر ڈونلڈ ٹرمپ کے متوقع دورۂ چین پر سوالات اٹھنے لگے ہیں، جس سے عالمی سفارتی حلقوں میں غیر یقینی کی فضا پیدا ہوگئی ہے۔

رپورٹس کے مطابق اگرچہ ایران کے ساتھ جنگ بندی برقرار ہے، تاہم فریقین کے درمیان اعتماد کی کمی اور مذاکراتی عمل میں مسلسل تاخیر نے صورتحال کو پیچیدہ بنا دیا ہے۔ اس تعطل کے باعث امریکا کی خارجہ پالیسی پر بھی دباؤ میں اضافہ دیکھا جا رہا ہے۔ذرائع کے مطابق صدر ٹرمپ کا مارچ میں طے شدہ دورۂ چین اب مئی تک مؤخر کر دیا گیا ہے۔ اس دورے کے دوران ان کی چینی صدر شی جن پنگ سے اہم ملاقات متوقع ہے، جس میں تجارتی امور، علاقائی سلامتی اور مشرقِ وسطیٰ کی صورتحال زیرِ بحث آنے کا امکان ہے۔

چینی ماہرین کا کہنا ہے کہ ایران سے جاری تنازع طویل ہونے کی صورت میں صدر ٹرمپ پر سیاسی دباؤ میں اضافہ ہوگا جبکہ چین کی سفارتی پوزیشن مزید مضبوط ہو سکتی ہے۔ ان کے مطابق تاخیر سے امریکی قیادت کی عالمی سطح پر ساکھ بھی متاثر ہونے کا خدشہ ہے۔

دوسری جانب آبنائے ہرمز میں کشیدگی اور ممکنہ بندش کے اثرات عالمی منڈیوں تک پہنچنے لگے ہیں۔ امریکا میں توانائی کی قیمتوں میں اضافہ ریکارڈ کیا گیا ہے جس کے باعث مہنگائی کی شرح میں بھی اضافہ ہو رہا ہے۔ ماہرین کا کہنا ہے کہ یہ صورتحال نومبر کے انتخابات سے قبل ٹرمپ انتظامیہ کے لیے ایک بڑا سیاسی چیلنج بن سکتی ہے۔مبصرین کے مطابق موجودہ حالات میں امریکا، ایران اور چین کے درمیان تعلقات ایک نازک مرحلے میں داخل ہو چکے ہیں، جہاں ہر فیصلہ عالمی سیاست پر گہرے اثرات مرتب کر سکتا ہے۔

تہران: ایران نے آبنائے ہرمز میں دو بحری جہازوں کو تحویل میں لینے کی ویڈیو جاری کردی ہے

ایرانی بحریہ کے مطابق جہازوں کو اس وقت قبضے میں لیا گیا جب وہ آبنائے ہرمز کے حفاظتی انتظامات کے لیے خطرہ بن رہے تھے۔ حکام کا کہنا ہے کہ دونوں جہازوں کو کارروائی کے بعد ایرانی ساحل کی جانب منتقل کردیا گیا ہے، جہاں مزید تحقیقات جاری ہیں۔

دوسری جانب امریکی محکمہ دفاع (پینٹاگون) نے کانگریس کو بریفنگ دیتے ہوئے آگاہ کیا ہے کہ آبنائے ہرمز میں ایران کی جانب سے بچھائی گئی ممکنہ بارودی سرنگوں کو صاف کرنے میں کم از کم چھ ماہ کا وقت درکار ہوسکتا ہے۔امریکی اخبار واشنگٹن پوسٹ کے مطابق اس نوعیت کی کسی بھی بڑی کارروائی کا آغاز ممکنہ طور پر امریکا اور ایران کے درمیان جاری کشیدگی یا ممکنہ جنگ کے خاتمے تک مؤخر کیا جا سکتا ہے۔ رپورٹ میں خبردار کیا گیا ہے کہ اس صورتحال کے باعث عالمی تجارت اور تیل کی ترسیل پر منفی اثرات رواں سال کے اختتام یا اس کے بعد تک جاری رہ سکتے ہیں۔