Author: ممتاز حیدر

امریکہ میں ہم جنس جوڑوں کی تعداد میں تاریخی اضافہ دیکھنے میں آیا ہے، جبکہ پہلی بار خواتین پر مشتمل ہم جنس جوڑے مردوں سے زیادہ ہو گئے ہیں۔

رپورٹ کے مطابق سن 2005 میں ہم جنس جوڑوں میں مردوں کا تناسب زیادہ تھا، جہاں 54 فیصد جوڑے مردوں پر مشتمل تھے جبکہ خواتین کا حصہ 45 فیصد تھا۔ اس وقت قانونی طور پر ہم جنس شادی صرف ایک ریاست میساچوسٹس میں تسلیم شدہ تھی۔تاہم دو دہائیوں میں صورتحال یکسر تبدیل ہو گئی۔ 2024 تک خواتین ہم جنس جوڑوں کا تناسب بڑھ کر 53 فیصد ہو گیا جبکہ مرد جوڑوں کا تناسب 46 فیصد رہ گیا۔ ماہرین کے مطابق اس تبدیلی میں سن 2015 میں ہم جنس شادی کو ملک بھر میں قانونی حیثیت ملنا ایک اہم سنگ میل ثابت ہوا۔

رپورٹ کے مطابق 2024 تک امریکہ میں ہم جنس جوڑوں کے گھرانوں کی تعداد تقریباً 1.4 ملین تک پہنچ گئی، جو کہ 2005 کے مقابلے میں دوگنا ہے۔ یہ تعداد ملک کے مجموعی گھرانوں کا تقریباً 1 فیصد بنتی ہے۔دلچسپ امر یہ ہے کہ یہ شرح اب بھی اس مجموعی آبادی سے کم ہے جو خود کو LGBTQ+ شناخت کرتی ہے، جس کا اندازہ تقریباً 9 فیصد لگایا گیا ہے، جبکہ تقریباً 5 فیصد امریکی خود کو بائی سیکسوئل قرار دیتے ہیں۔

اعداد و شمار میں ایک اہم پہلو معاشی عدم مساوات بھی سامنے آیا۔ خواتین ہم جنس جوڑوں کی اوسط سالانہ گھریلو آمدنی تقریباً 108,500 ڈالر رہی، جبکہ مرد جوڑوں کی آمدنی اس سے کہیں زیادہ یعنی 140,500 ڈالر رہی۔تاہم ملازمت کے حوالے سے دونوں اقسام کے جوڑوں میں تقریباً یکساں شرح دیکھی گئی، جہاں تقریباً 64 فیصد جوڑوں میں دونوں پارٹنرز ملازمت پیشہ تھے۔رپورٹ میں یہ بھی انکشاف ہوا کہ ہم جنس جوڑے تعلیمی اعتبار سے اپنے مخالف جنس ہم منصبوں سے آگے ہیں۔ تقریباً 32.5 فیصد ہم جنس غیر شادی شدہ جوڑوں میں دونوں افراد کم از کم بیچلر ڈگری رکھتے ہیں، جبکہ مخالف جنس جوڑوں میں یہ شرح 19.1 فیصد ہے۔مزید برآں، ہم جنس شادی شدہ جوڑوں میں نسلی تنوع بھی زیادہ پایا گیا، جہاں 31.3 فیصد جوڑے مختلف نسلی پس منظر رکھتے ہیں، جبکہ مخالف جنس جوڑوں میں یہ شرح 19.5 فیصد ہے۔

رپورٹ کے مطابق شادی شدہ ہم جنس جوڑے اوسطاً کم عمر ہیں (49 سال) جبکہ شادی شدہ مخالف جنس جوڑوں کی اوسط عمر 53.2 سال ہے۔ غیر شادی شدہ جوڑوں میں عمر کا فرق تقریباً برابر رہا۔اعداد و شمار کے مطابق واشنگٹن ڈی سی میں ہم جنس جوڑوں کے گھرانوں کی شرح سب سے زیادہ رہی، جس سے اس شہر کی بطور LGBTQ+ کمیونٹی کے مرکز کی شہرت مزید مستحکم ہو گئی۔یہ اعداد و شمارامریکن کمیونٹی سروے کے تحت 2005 سے 2024 تک جمع کیے گئے، تاہم 2020 میں کووڈ-19 وبا کے باعث ڈیٹا اکٹھا کرنے میں مشکلات پیش آئیں۔ماہرین کے مطابق یہ رجحانات نہ صرف سماجی قبولیت میں اضافے کی نشاندہی کرتے ہیں بلکہ امریکی معاشرے میں خاندانی ساخت میں ہونے والی بڑی تبدیلیوں کو بھی ظاہر کرتے ہیں۔

بھارت کے شہر ممبئی میں 26 سالہ نویِنا وانامالا اپنی زندگی کے سب سے اہم دن کی تیاری میں مصروف ہیں، مگر خوشیوں کے اس موقع پر پریشانیوں کا سایہ بھی نمایاں ہے۔ میک اپ آرٹسٹ جب ان کے چہرے پر باریک سفید نقطے بنا رہی ہے، اسی دوران ان کا فون مسلسل بج رہا ہے . کہیں پھول غائب ہیں، کہیں انتظامات ادھورے ہیں۔

یہ ذمہ داریاں عام طور پر دلہن کے والد سنبھالتے ہیں، مگر نویِنا کے والد کا چھ ماہ قبل انتقال ہو چکا ہے، جس کے بعد وہ خود ہی اپنی شادی کے تمام فیصلے لینے پر مجبور ہیں ، وہ بھی ایسی شادی جس کے اخراجات ان کی استطاعت سے کہیں زیادہ ہیں۔نویِنا، جو ایک سوشل میڈیا مارکیٹنگ ایگزیکٹو ہیں، ماہانہ تقریباً 145 ڈالر کماتی ہیں۔ ان کی شادی کا ابتدائی بجٹ 3,200 ڈالر تھا، مگر دیکھتے ہی دیکھتے یہ دوگنا ہو گیا۔ مجبوراً انہوں نے بینک سے قرض لیا، جبکہ ان کے منگیتر، سائی کرن دوسا، پہلے سے موجود ہاؤس لون کے باوجود مزید قرض لینے پر مجبور ہو گئے۔نویِنا کہتی ہیں "اتنا قرض لینا مناسب نہیں تھا، مگر ہمارے پاس کوئی اور راستہ نہیں تھا۔ ہمیں یہ شادی کرنی ہی تھی۔”

بھارت میں شادیاں ایک وسیع سماجی روایت ہیں۔ ماہرین کے مطابق ملک میں شادیوں کی صنعت تقریباً 130 ارب ڈالر کی ہے۔ یہاں شادیوں میں کئی دنوں تک تقریبات جاری رہتی ہیں اور اکثر دلہن کے خاندان پر اخراجات کی بھاری ذمہ داری عائد ہوتی ہے۔سماجی دباؤ اس حد تک بڑھ چکا ہے کہ دلہن کے خاندان کو شاندار تقریب منعقد کرنی ہوتی ہے،سونے کے زیورات، نقد رقم اور گھریلو سامان دینا عام بات ہے،جہیز قانونی طور پر ممنوع ہونے کے باوجود اب بھی رائج ہے،یہ مسئلہ صرف غریب طبقے تک محدود نہیں۔ ایک طرف غریب خاندان بیٹی کی شادی کے لیے قرض لیتے ہیں، تو دوسری جانب امیر طبقے میں شاہانہ شادیوں کا رجحان بڑھتا جا رہا ہے۔

نئی دہلی میں کاویری مہتا کی شادی اس کی مثال ہے، جہاں سینکڑوں مہمان شریک ہوئے،مہنگی سجاوٹ، بین الاقوامی مہمان اور شاندار کھانے کا اہتمام کیا گیا،تقریب کے لیے تقریباً 150 افراد پر مشتمل ٹیم نے کام کیا،ویڈنگ پلانر وکرم جیت شرما کے مطابق "بعض کلائنٹس شادی پر 5 لاکھ سے 30 لاکھ ڈالر تک خرچ کرتے ہیں۔”کاویری مہتا کا کہنا ہے کہ وہ سادہ شادی چاہتی تھیں، مگر سماجی روایات کے باعث مہمانوں کی فہرست کم کرنا ممکن نہیں تھا۔”لوگوں کو بلانا ضروری ہوتا ہے کیونکہ انہوں نے ہمیں اپنی شادی میں بلایا ہوتا ہے۔”یہی وہ سماجی دباؤ ہے جو خاندانوں کو اپنی استطاعت سے بڑھ کر خرچ کرنے پر مجبور کرتا ہے۔بھارت کے شمالی علاقوں میں کم آمدنی والے خاندانوں کے لیے شادی ایک بڑا مالی بحران بن چکی ہے۔ 19 سالہ انامیکا اپادھیائے کی مثال سامنے آتی ہے، جو ایک اجتماعی شادی میں شریک ہوئیں کیونکہ ان کی والدہ اکیلے شادی کے اخراجات برداشت نہیں کر سکتی تھیں۔

اگرچہ بھارت میں جہیز لینا دینا غیر قانونی ہے، مگر اس کے باوجود یہ روایت مضبوطی سے قائم ہے۔ سرکاری اعداد و شمار کے مطابق ہر سال 6,000 سے زائد خواتین جہیز سے متعلق تنازعات میں جان سے ہاتھ دھو بیٹھتی ہیں۔ماہر قانون کنال مدن کہتے ہیں "یہ مطالبات معمولی نہیں ہوتے، بلکہ بھاری رقم، جائیداد اور سونا مانگا جاتا ہے، جو اکثر خواتین فراہم نہیں کر سکتیں۔”31 سالہ پریانکا ڈابلا کے مطابق، ان کے والد نے شادی پر 32,000 ڈالر خرچ کیے، مگر اس کے باوجود سسرال کی جانب سے مزید مطالبات جاری رہے۔ انہوں نے گھریلو تشدد کا بھی الزام عائد کیا۔

ممبئی میں، نویِنا کی شادی میں 500 سے زائد مہمان شریک ہوئے۔ تقریب شاندار رہی، مگر اس کے بعد کا مالی بوجھ انہیں پریشان کر رہا ہے۔وہ کہتی ہیں "شادی ویسی ہی تھی جیسی میں نے خواب میں دیکھی تھی، مگر قرض ختم ہونے تک میں پریشان رہوں گی۔”

بھارت میں شادی ایک خوشی کا موقع ہونے کے ساتھ ساتھ ایک بڑا مالی چیلنج بھی بنتی جا رہی ہے۔ سماجی دباؤ، مہنگی روایات اور جہیز جیسی غیر قانونی رسمیں لاکھوں خاندانوں کو قرض کے بوجھ تلے دبا رہی ہیں۔ماہرین کے مطابق اگر اس رجحان کو کنٹرول نہ کیا گیا تو شادی جیسی خوشی کی تقریب مزید خاندانوں کے لیے مالی بحران میں تبدیل ہو سکتی ہے

ایران نے دعویٰ کیا ہے کہ اس نے ایک امریکی جنگی جہاز کو نشانہ بنایا اور اسے واپس ہٹنے پر مجبور کر دیا۔

ایران کے سرکاری میڈیا ایجنسی فارس نیوز کے مطابق، ایل ایچ اے-7 ہیلی کاپٹر کیریئر اور امفی بیئس اسالٹ شپ یعنی یو ایس ایس ٹرپولی پر "بجلی کی رفتار والے ایرانی میزائل” سے حملہ کیا گیا۔ حملے کے بعد امریکی جہاز کو و جنوبی بحر ہند کی گہرائیوں میں واپس ہٹنا پڑا۔حملے کی درست تاریخ اور مقام کے بارے میں معلومات نہیں دی گئیں۔

واضح رہے کہ یو ایس سینٹرل کمانڈ نے اعلان کیا تھا کہ یو ایس ایس ٹرپولی، جس میں تقریباً 3,500 عملہ اور ٹرانسپورٹ و اسٹرائیک فائٹر طیارے موجود ہیں، 27 مارچ کو مشرق وسطیٰ پہنچا تھا۔اب تک امریکہ نے ایرانی دعوے پر کوئی باضابطہ ردعمل نہیں دیا۔

دوسری جانب ایران کی فوج نے اعلان کیا ہے کہ اس نے کویت کے بوبیان جزیرے پر موجود امریکی افواج پر حملے کیے ہیں۔ایرانی فوج کے ترجمان ابراہیم ذوالفقاری نے ایک ویڈیو بیان میں بتایا کہ جزیرے پر قائم امریکی تنصیبات اور فوجی ساز و سامان کو نشانہ بنایا گیا۔ بوبیان جزیرہ اس وقت امریکی افواج کے زیر استعمال ہے، جو بار بار کے ایرانی حملوں کے بعد کویت کے مین لینڈ میں واقع عروفجان کیمپ سے یہاں منتقل ہو چکی ہیں۔بیان کے مطابق، حملے میں سیٹلائٹ آلات اور دیگر ہتھیار ہدف بنے۔پینٹاگون کی جانب سے اس واقعے پر فوری طور پر کوئی ردعمل سامنے نہیں آیا۔یاد رہے کہ بوبیان جزیرہ کویت کے ساحلی جزائر میں سب سے بڑا جزیرہ ہے اور خلیج کی شمال مغربی سمت میں واقع ہے۔یہ واقعہ خطے میں تناؤ میں اضافے اور امریکہ-ایران کشیدگی کے نئے مرحلے کی نشاندہی کرتا ہے۔

متحدہ عرب امارات (یو اے ای) کے ایک اہم ایوی ایشن حب دبئی انٹرنیشنل ایئرپورٹ کے قریب ایک بڑی مقدار میں سیاہ دھواں بلند ہوتا دیکھا گیا ہے،میڈیا رپورٹس کے مطابق دبئی ایئر پورٹ پر حملہ ہوا ہے یا میزائل کے ٹکڑے گرے ہیں

دھوئیں کے حوالے سے مقامی لوگوں نے گواہی دی ہے کہ شدید بادل دکھائی دے رہے ہیں، تاہم حکام کی جانب سے ابھی تک کسی بھی قسم کا سرکاری بیان یا تصدیق جاری نہیں کی گئی۔ متحدہ عرب امارات کے شہروں دبئی اور شارجہ پر میزائل اور ڈرون حملے ہوئے،ٹیلیگرام چینل "نیا” نے اطلاع دی ہے کہ ان حملوں میں دبئی ایئرپورٹ کو نشانہ بنایا گیا،متذکرہ حملوں میں "شارجہ” شہر کو بھی نشانہ بنایا گیا، خبر رساں ذرائع کا کہنا ہے کہ شارجہ پر حملے میں امریکی مفادات کو نشانہ بنایا گیا تاہم ابھی تک یہ واضح نہیں ہے کہ شہر کے کس علاقے کو نشانہ بنایا گیا۔

مارچ کے وسط میں بھی اسی مقام پر دھواں اٹھنے کی ویڈیوز اور تصاویر منظرِ عام پر آئیں تھیں، جب ڈرون حملے کے باعث ایک فیول ٹینکر لگا، جس سے بھڑکتی آگ اور سیاہ دھواں بلند ہوا تھا۔ اسی واقعے کے باعث عارضی طور پر پروازیں معطل یا محدود کردی گئی تھیں۔عالمی میڈیا رپورٹس کے مطابق یو اے ای نے ایرانی میزائلوں اور ڈرونوں کی ایک سلسلے وار کارروائیوں کا سامنا کیا ہے، جس میں متعدد بار فضائی دفاعی نظام نے اہداف کو ناکارہ بنایا، اور اس دوران ملبہ مختلف مقامات پر گِرنے سے دھواں اٹھتا دیکھا گیا۔