Author: ممتاز حیدر

امریکی صدر ڈونلڈ ٹرمپ نے اوول آفس میں ہونے والی ایک پریس کانفرنس کے دوران سی این این کی نمائندہ صحافی کیٹلن کولنز پر سخت تنقید کرتے ہوئے انہیں ’’بدترین رپورٹر‘‘ قرار دے دیا اور سی این این کو ’’بے ایمان ادارہ‘‘ کہا۔

پریس کانفرنس کے دوران کیٹلن کولنز نے صدر ٹرمپ سے سوال کیا کہ امریکی محکمہ انصاف کی جانب سے ایپسٹین فائلز میں اہم معلومات کو کیوں چھپایا گیا، اور یہ کہ ایپسٹین کے متاثرین اس عمل پر شدید ناخوش ہیں۔ انہوں نے صدر سے پوچھا کہ وہ ان متاثرین کو کیا پیغام دینا چاہیں گے جو خود کو انصاف سے محروم سمجھتے ہیں۔

اس سوال کے جواب میں صدر ٹرمپ نے سخت لہجہ اختیار کرتے ہوئے کہا،”میں تمہیں دس سال سے جانتا ہوں، مجھے نہیں لگتا کہ میں نے کبھی تمہارے چہرے پر مسکراہٹ دیکھی ہو۔ تم جانتی ہو تم کیوں نہیں مسکراتیں؟ کیونکہ تم سچ نہیں بول رہیں۔ تم ایک انتہائی بے ایمان ادارے کی نمائندگی کرتی ہو، اور سی این این کو اس پر شرم آنی چاہیے۔”صدر ٹرمپ نے مزید کہا کہ اب وقت آ گیا ہے کہ ملک کسی اور معاملے پر توجہ دے کیونکہ "میرے خلاف کچھ بھی سامنے نہیں آیا”۔

پریس کانفرنس کے اختتام پر جب صحافیوں کو اوول آفس سے باہر لے جایا جا رہا تھا، تب بھی صدر ٹرمپ کو کیٹلن کولنز کے بارے میں شکایت کرتے سنا گیا کہ وہ "کبھی مسکراتی نہیں”، جبکہ وہ اشاروں سے دیگر صحافیوں کی جانب اشارہ کر رہے تھے۔

یہ پہلا موقع نہیں کہ صدر ٹرمپ نے کیٹلن کولنز کو نشانہ بنایا ہو۔ اس سے قبل وہ اپنے سوشل میڈیا پلیٹ فارم ٹروتھ سوشل پر بھی انہیں نشانہ بناتے ہوئے لکھ چکے ہیں "فیک نیوز سی این این کی کیٹلن کولنز ہمیشہ بیوقوف اور بدتمیز رہتی ہے۔”صدر ٹرمپ ماضی میں بھی خواتین صحافیوں پر سخت اور توہین آمیز جملے کسنے پر تنقید کی زد میں آتے رہے ہیں۔ گزشتہ برس انہوں نے ایک صحافی کو سوال کرنے سے روکنے کے لیے کہا تھا، "خاموش! خاموش، اسی طرح نومبر میں فلوریڈا میں افغان پناہ گزینوں کی جانچ پڑتال سے متعلق سوال پر ایک رپورٹر کو ڈانٹتے ہوئے کہا، "کیا تم بیوقوف ہو؟ کیا تم واقعی بیوقوف انسان ہو؟”

اس کے علاوہ صدر ٹرمپ نے نیویارک ٹائمز کی ایک رپورٹ پر بھی غصے کا اظہار کیا تھا جس میں ان کی عمر اور تھکن کی علامات پر بات کی گئی تھی، اور رپورٹ کی خاتون مصنفہ کو "بدصورت” قرار دیا تھا۔

کیٹلن کولنز ایک معروف امریکی صحافی اور اینکر ہیں۔ انہوں نے اپنے صحافتی کیریئر کا آغاز انٹرٹینمنٹ رپورٹنگ سے کیا، بعد ازاں 2016 میں دی ڈیلی کالر کے لیے وائٹ ہاؤس کورسپونڈنٹ بنیں۔ ایک سال بعد انہوں نے سی این این جوائن کیا اور بعد میں اینکرنگ کے فرائض بھی انجام دیتی رہیں۔

سی این این نے اپنے ردعمل میں کیٹلن کولنز کو "ایک غیر معمولی صحافی” قرار دیتے ہوئے کہا کہ وہ "گہرائی، جرات اور مستقل مزاجی کے ساتھ رپورٹنگ کرتی ہیں”۔صحافتی حلقوں میں اس واقعے پر تشویش کا اظہار کیا جا رہا ہے اور کئی مبصرین کا کہنا ہے کہ ایسے مواقع پر دیگر صحافیوں کو بھی پیشہ ورانہ یکجہتی کا مظاہرہ کرتے ہوئے ساتھی صحافی کے دفاع میں آواز اٹھانی چاہیے۔

آبنائے ہرمز میں ایران اور امریکا کے درمیان کشیدگی میں ایک بار پھر اضافہ دیکھنے میں آیا ہے، جہاں پاسدارانِ انقلاب کی تیز رفتار کشتیوں نے ایک امریکی پرچم والے تجارتی جہاز کو روک لیا۔ ایرانی حکام کے مطابق مذکورہ جہاز بغیر اجازت ایرانی علاقائی پانیوں میں داخل ہوا تھا۔

ایرانی حکام کا کہنا ہے کہ جب جہاز ایرانی حدود میں داخل ہوا تو پاسدارانِ انقلاب کی جانب سے وارننگ جاری کی گئی، جس کے بعد امریکی پرچم والا جہاز علاقے سے واپس نکل گیا۔ ایرانی موقف کے مطابق یہ اقدام ملکی سمندری حدود کے تحفظ کے لیے کیا گیا۔دوسری جانب امریکی فوج کی سینٹرل کمانڈ (سینٹ کام) نے بھی اس واقعے کی تصدیق کرتے ہوئے کہا ہے کہ ایرانی پاسدارانِ انقلاب کی کشتیوں نے امریکی پرچم والے جہاز کو روکا اور اس کے عملے کو ہراساں کیا۔ سینٹ کام کے ترجمان کے مطابق ایرانی کشتیاں اور ایک ایرانی ڈرون جہاز کے قریب پہنچے اور اسے قبضے میں لینے کی دھمکیاں بھی دی گئیں۔

بحیرہ عرب میں تعینات امریکی ائیرکرافٹ کیریئر یو ایس ایس ابراہم لنکن کی جانب ایک ایرانی ڈرون بڑھنے لگا۔ اس خطرے کے پیشِ نظر یو ایس ایس ابراہم لنکن پر موجود امریکی ایف 35 سی لڑاکا طیارے نے دفاعی کارروائی کرتے ہوئے ایرانی ’شاہد-139‘ ڈرون کو مار گرایا۔غیر ملکی خبر رساں ایجنسی کے مطابق امریکی ایف 35 طیارے نے بروقت کارروائی کرتے ہوئے ائیرکرافٹ کیریئر کی طرف آنے والے ایرانی ڈرون کو نشانہ بنایا۔ امریکی حکام کا کہنا ہے کہ یہ اقدام امریکی بحری جہاز اور اس پر موجود عملے کے تحفظ کے لیے کیا گیا۔سینٹ کام نے واضح کیا ہے کہ اس واقعے میں کسی بھی امریکی فوجی یا فوجی ساز و سامان کو کوئی نقصان نہیں پہنچا۔ امریکی فوج کے مطابق خطے میں امریکی افواج دفاعی پوزیشن میں ہیں اور کسی بھی خطرے کا جواب دینے کے لیے تیار ہیں۔

لیبیا کے سابق صدر معمر قذافی کے بیٹے سیف الاسلام قذافی کو قتل کیے جانے کی اطلاع، ایک سے زائد مصدقہ ذرائع نے تصدیق کی ہے۔

سیف الاسلام قذافی، جو اپنے والد معمر قذافی کے سب سے طاقتور بیٹوں میں شمار ہوتے تھے، مختلف ذرائع کے مطابق 53 سال کی عمر میں ہلاک ہوگئے ہیں۔ان کے سیاسی مشیر عبداللہ عثمان نے ان کی موت کی تصدیق کی ہے، جن کا کہنا ہے کہ ایک مسلح گروہ نے انہیں گولی مار کر ہلاک کیا۔بعض رپورٹس کے مطابق یہ واقعہ ان کے رہائش گاہ یا قریبی علاقے میں پیش آیا، لیکن حتمی حالات ابھی واضح نہیں۔ عرب میڈیا کے مطابق سیف الاسلام قذافی کا قتل چار افراد نے کیا، انہیں باغ میں گولی ماری گئی جس کے بعد ملزمان فرار ہوگئے

سیف الاسلام قذافی، معمر قذافی کے سب سے زیادہ سیاسی سرگرم بیٹے سمجھے جاتے تھے۔وہ اپنے والد کے دور میں اہم پالیسی فیصلوں میں شریک رہے اور عالمی سطح پر بھی شناخت رکھتے تھے۔2011 میں لیبیا میں انقلاب کے بعد انہیں باغیوں نے گرفتار کیا اور بعد میں سن 2017 میں رہائی ملی۔2021 میں انہوں نے صدارتی انتخابات میں حصہ لینے کا اعلان کیا تھا، مگر انہیں پارٹی کمیشن نے غیر اہل قرار دیا تھا۔

سیف الاسلام پر جنگی جرائم کے مقدمات بھی چل رہے تھے،ان پر سن 2015 میں ایک لیبیا عدالت نے غیابی طور پر موت کی سزا بھی سنائی تھی۔اس کے علاوہ بین الاقوامی فوجداری عدالت نے بھی ان پر جرائمِ انسانیت کے الزامات عائد کیے تھے۔ان کی سیاسی واپسی، مقدمات اور ان کے قتل نے لیبیا کی ابھرتی ہوئی سیاسی صورتحال میں ایک بڑا واقعہ ثابت کیا ہے، کیونکہ وہ ایک متنازع شخصیت کے طور پر جانا جاتا تھا۔