Author: ممتاز حیدر

جنوبی وزیرستان میں گزشتہ روز پیش آنے والے واقعے میں کالعدم ٹی ٹی پی سے وابستہ ایک سینئر کمانڈر اپنے ہی دستی بم کے دھماکے میں ہلاک ہوگیا۔

باخبر ذرائع کے مطابق ہلاک ہونے والا شدت پسند پکتیکا، ضلع ارگون کے گاؤں گل شاہ خیل کا رہائشی اور پکتیکا میں سرگرم مسلم یار گروپ کا اہم کمانڈر تھا۔ذرائع کے مطابق مذکورہ کمانڈر چند روز قبل افغانستان سے غیر قانونی طور پر جنوبی وزیرستان میں داخل ہوا تھا، جہاں وہ اپنے نیٹ ورک سے دوبارہ رابطے اور بعض کارروائیوں کی منصوبہ بندی میں مصروف تھا،گزشتہ روز فورسز کی جانب سے علاقے میں ایک آپریشن کیا گیا، جس کے دوران کمانڈر نے مبینہ طور پر مزاحمت کی۔ اسی دوران اس کے پاس موجود دستی بم پھٹ گیا جس کے نتیجے میں وہ موقع پر ہی ہلاک ہوگیا۔

ذرائع کے مطابق اس واقعے کے بعد افغان طالبان (ٹی ٹی اے) اور کالعدم ٹی ٹی پی کے درمیان آپریشنل روابط کی موجودگی ایک بار پھر واضح ہو گئی ہے۔ بتایا گیا ہے کہ مذکورہ کمانڈر دونوں گروہوں کے نیٹ ورک کو ایک بار پھر مضبوط بنانے اور رابطے بحال کرنے کی کوششوں میں تھا۔سیکیورٹی ماہرین کے مطابق ایسے واقعات اس بات کا ثبوت ہیں کہ سرحد پار موجود شدت پسند عناصر پاکستان میں کارروائیاں کرنے کے لیے مسلسل کوشاں ہیں، جبکہ ان کے سہولت کار اور رابطہ گروہ انہیں مدد فراہم کرتے ہیں۔ اس طرح کے واقعات اس بات کی نشاندہی کرتے ہیں کہ جنوبی وزیرستان اور مبینہ سرحدی راستے اب بھی کالعدم تنظیموں کی سرگرمیوں کے لیے استعمال کیے جا رہے ہیں۔

بھارت 10 اور 11 دسمبر کو بحیرۂ عرب کے اوپر بھارتی فضائیہ کی ایک بڑی دو روزہ مشق کرنے جا رہا ہے۔

بھارتی میڈیا کے مطابق یہ مشق کراچی سے تقریباً 200 سمندری میل جنوب میں اور پاکستان کے زیرِ کنٹرول فضائی حدود سے تقریباً 70 سمندری میل کے فاصلے پر ہو گی اس مشق کے لیے ایک نوٹم بھی جاری کیا گیا ہے ،مشق میں لڑاکا طیارے، نگرانی کے طیارے اور سپورٹ ایئرکرافٹ شامل ہوں گے، جن کا بنیادی مقصد سمندری حملہ کی تیاری، فضا اور سمندر کے درمیان عسکری ہم آہنگی، انٹرسیپشن ڈرلز اور جاسوسی/ریکانیسنس آپریشنز کی مشق کرنا ہے۔یہ مشق گزشتہ چند ماہ میں دوسری مرتبہ پاکستان کے خصوصی معاشی زون ے قریب ہو رہی ہے، جو بھارت کی مغربی سمندری حدود پر اس کی عسکری تیاریوں کی نشاندہی کرتی ہے۔

سری لنکا کے علاقے بدھولا میں امدادی سرگرمیوں کے دوران بھارتی فضائیہ کا Mi-17 ہیلی کاپٹر غلط مقام پر لینڈ کرنے کے باعث نرم اور دلدلی زمین میں دھنس گیا۔

مقامی ذرائع کے مطابق ہیلی کاپٹر نے شدید بارشوں کے بعد متاثرہ علاقوں میں امدادی سامان پہنچانے اور لوگوں کی بحالی کے لیے پرواز بھری تھی، تاہم لینڈنگ کے دوران پائلٹ غلط مقام پر اتر گیا، جہاں زمین بارشوں کے باعث خاصی نرم ہو چکی تھی۔ لینڈنگ کے چند لمحوں بعد ہیلی کاپٹر کے ٹائر زمین میں دھنس گئے،سوشل میڈیا پر سامنے آنے والی فوٹیج میں واضح طور پر دیکھا جا سکتا ہے کہ بھارتی فوجی اہلکار اور زمینی عملہ ہاتھوں سے ہیلی کاپٹر کو دھکیل کر باہر نکالنے کی کوشش کر رہے ہیں۔ کیچڑ میں گہرا دھنس جانے کے باعث کوششیں ناکام رہیں اور بعد ازاں بھاری مشینری بلانے کی ضرورت پیش آئی۔

طالبان کے ترجمان کی جانب سے کالعدم تحریکِ طالبان پاکستان کو “دہشت گرد” تسلیم نہ کرنے پر شدید تنقید سامنے آرہی ہے۔ ٹی ٹی پی گروہ کو دہشت گرد نہ کہنا اس وجہ سے ہے کہ طالبان اور ٹی ٹی پی کے درمیان نظریاتی و تاریخی روابط پائے جاتے ہیں۔

افغان طالبان کی جانب سے ٹی ٹی پی کو پاکستان کا "اندرونی مسئلہ” قرار دینا حقائق کے منافی ہے۔ افغانستان کی سرزمین پر ٹی ٹی پی کی قیادت آزادانہ سرگرم ہے، جنگجوؤں کو پناہ فراہم کی جاتی ہے اور گروہ کا کمانڈ ڈھانچہ محفوظ ماحول میں کام کرتا ہے۔پاکستانی حکام کئی بار یہ مؤقف اپنا چکے ہیں کہ پاکستان میں ہونے والے متعدد دہشت گرد حملوں کی منصوبہ بندی، اور آغاز افغان سرزمین سے ہوتا ہے۔ یہ اب قیاس نہیں رہا بلکہ ایک مستند حقیقت کے طور پر سامنے آچکا ہے۔اس کے ساتھ ساتھ ٹی ٹی پی کی صفوں میں افغان شہریوں کی شمولیت میں اضافہ بھی رپورٹ کیا جاتا رہا ہے، ٹی ٹی پی پاکستان کا داخلی معاملہ نہیں بلکہ“سرحد پار سے دہشت گردی”کرنے والا گروپ ہے

مزید برآں، تجزیہ کاروں نے خبردار کیا ہے کہ پشتو زبان اور پشتون ثقافت کو تشدد اور انتہاپسندی کے جواز کے طور پر پیش کرنا گمراہ کن اور خطرناک رجحان ہے۔ پشتونولی کے اصول امن، مہمان نوازی، بھائی چارے اور انسانی جان کی حرمت پر مبنی ہیں جو دہشت گردی، خودکش حملوں اور شہریوں کو نشانہ بنانے جیسے اقدامات کی قطعی اجازت نہیں دیتے۔ دہشت گردی کا کوئی مذہب، زبان یا قومیت نہیں ہوتی اور نہ اسے روایت یا عقیدے کے لبادے میں چھپایا جاسکتا ہے۔ "حقیقت واضح ہے اور ذمہ داری متعلقہ فریقوں پر عائد ہوتی ہے۔”