Author: ممتاز حیدر

یوم القدس کے موقع پر جمعہ کی صبح ایران کے مختلف شہروں میں ہزاروں افراد سڑکوں پر نکل آئے اور فلسطینی عوام کے ساتھ یکجہتی کا اظہار کیا۔ ملک بھر کے شہروں اور قصبوں میں بڑے پیمانے پر ریلیاں اور جلوس نکالے گئے جن میں شہریوں کی بڑی تعداد نے شرکت کی۔

ایرانی سرکاری میڈیا کی جانب سے جاری ویڈیوز میں دارالحکومت تہران سمیت مختلف شہروں میں بڑے اجتماعات دکھائے گئے جہاں مظاہرین فلسطینی پرچم لہراتے اور ریلیاں نکالتے نظر آئے۔ریلیوں کے دوران مظاہرین نے ایران کے سپریم لیڈر مجتبیٰ خامنہ ای اور ان کے والد مرحوم کی تصاویر اٹھا رکھی تھیں۔ دارالحکومت تہران میں مظاہرین نے امریکا اور اسرائیل کے خلاف شدید نعرے بازی کی۔خبر رساں ادارے کے مطابق مظاہرین نے امریکی صدر اور اسرائیلی وزیر اعظم کے پتلے بھی نذرِ آتش کیے۔ ریاستی خبر رساں ادارے فارس نیوز کی ویڈیوز میں دیکھا گیا کہ بعض مظاہرین امریکی اور اسرائیلی جھنڈوں میں لپٹے تابوتوں پر کیلیں ٹھونک رہے تھے۔

یہ مظاہرے ایسے وقت میں ہوئے جب اسرائیلی فوج نے دعویٰ کیا کہ اس نے تہران میں اہداف پر “وسیع پیمانے پر حملوں” کی نئی لہر شروع کی ہے۔ اس سے قبل ایرانی سرکاری میڈیا نے تہران، اصفہان اور دیگر علاقوں میں دھماکوں کی اطلاعات بھی دی تھیں۔

امریکی اخبار نے کہا ہےکہ امریکا نے عارضی طور پر روسی تیل پر عائد پابندیاں اٹھا لیں۔

امریکی میڈیا کے مطابق محکمہ خزانہ نے کہا ہے کہ روسی تیل پر پابندیوں کی یہ چھوٹ 11 اپریل تک رہے گی،اس حوالے سے امریکی وزیرخزانہ اسکاٹ بیسینٹ نے اپنے بیان میں کہا بدقسمتی ہےکہ اس اقدام سے روس کو فائدہ ہو سکتا ہے، روسی تیل پر پابندیوں کی یہ چھوٹ مختصر مدت کے لیے ہے،امریکی وزیر خزانہ کا کہنا تھا کہ ٹرمپ کی توانائی حامی پالیسیوں نے امریکی تیل اورگیس کی پیداوار ریکارڈ سطح تک پہنچادی۔

امریکی ادارے کی جانب سے جاری رپورٹ کے مطابق روسی تیل کی سپلائی گزشتہ ہفتے16 لاکھ بیرل بڑھ کر 2.17 کروڑ بیرل رہی،امریکی ادارے کے مطابق چین نے روس سے 1.24 کروڑ بیرل تیل خریدا، اس کے علاوہ بھارت کی خریداری 2 لاکھ بیرل اضافے سے 86 لاکھ بیرل تک پہنچ گئی،امریکی ادارے نے اپنی رپورٹ میں بتایا کہ ترکیے کی بندرگاہوں پر روسی تیل کی ترسیل 7 لاکھ بیرل رہی جب کہ امریکی چھوٹ ملنے کے بعد بھارتی ساحلوں پر 3 کروڑ بیرل روسی تیل پہنچا، بھارت آئندہ ہفتے 50 لاکھ بیرل روسی تیل وصول کرنے والا ہے۔

مشرق وسطیٰ میں ایران کے حملوں سے امریکی تنصیبات کو بڑا نقصان پہنچا، نیویارک ٹائمز نے سیٹلائٹ تصاویر شیئر کردیں۔

رپورٹ کے مطاق ایران کے ڈرون اور میزائل حملوں سے امریکا کی 17 فوجی، سفارتی اور فضائی دفاعی تنصیبات کو نقصان پہنچا، ایران نے خلیجی ممالک پر 3 ہزار 133 سے زائد حملے کیے۔رپورٹ کے مطابق ایران نے امریکا اور اسرائیل کے حملوں کے جواب میں خطے میں موجود امریکی فوجی اڈوں، سفارتخانوں اور فضائی دفاعی نظام کو نشانہ بنایا۔رپورٹ میں بتایا گیا ہے کہ ان حملوں کے نتیجے میں بعض مقامات پر امریکی فوجیوں کی ہلاکتیں بھی ہوئیں، کئی فوجی تنصیبات کو نقصان پہنچا۔

عراق کے کردستان ریجن میں واقع ایک فوجی اڈے پر حملے کے نتیجے میں ایک فرانسیسی فوجی ہلاک جبکہ متعدد دیگر زخمی ہوگئے۔ اس واقعے کی تصدیق فرانس کے صدر کی۔

صدر میکرون نے سوشل میڈیا پلیٹ فارم ایکس پر جاری بیان میں کہا کہ 7ویں الپائن شاسیئرز بٹالین کے وارنٹ آفیسر آرنوڈ فریون عراق کے شہر اربل کے علاقے میں ایک حملے کے دوران ہلاک ہوگئے۔ انہوں نے کہا کہ فریون نے “فرانس کی خاطر اپنی جان قربان کی” اور قوم کی جانب سے ان کے اہلِ خانہ سے گہری ہمدردی اور یکجہتی کا اظہار کیا۔فرانسیسی صدر کے مطابق اس حملے میں کئی دیگر فرانسیسی فوجی بھی زخمی ہوئے ہیں۔ انہوں نے اس واقعے کو ناقابلِ قبول قرار دیتے ہوئے کہا کہ فرانسیسی افواج 2015 سے عراق میں دہشت گرد تنظیم داعش کے خلاف کارروائیوں کے سلسلے میں تعینات ہیں اور ان کی موجودگی صرف انسدادِ دہشت گردی کے دائرہ کار میں ہے۔

دوسری جانب اربیل کے گورنر اومید خوشناو کے مطابق ایک ڈرون حملے نے اس فوجی اڈے کو نشانہ بنایا جہاں کرد فورسز اور بین الاقوامی اتحاد کے فوجی تعینات تھے۔ ان کے مطابق حملے میں کم از کم چھ فرانسیسی فوجی زخمی ہوئے۔عینی شاہدین کی جانب سے جاری ویڈیوز میں دیکھا جا سکتا ہے کہ مشترکہ فرانسیسی اور کرد فوجی اڈے میں آگ بھڑک اٹھی تھی اور عمارتوں سے دھواں اٹھ رہا تھا۔

ادھر عراق میں ایران نواز ملیشیا گروپ ے ایک بیان میں خبردار کیا ہے کہ عراق اور خطے میں موجود “تمام فرانسیسی مفادات کو نشانہ بنایا جائے گا”، تاہم اس گروپ نے حملے کی براہِ راست ذمہ داری قبول نہیں کی۔