Author: ممتاز حیدر

چیئرمین پاکستان پیپلز پارٹی بلاول زرداری اور صدر استحکام پاکستان پارٹی عبدالعلیم خان کے درمیان پارلیمنٹ ہاؤس میں اہم ملاقات ہوئی، جس میں گلگت بلتستان میں حکومت سازی سمیت باہمی سیاسی تعاون اور دیگر اہم امور پر تبادلہ خیال کیا گیا۔

ملاقات کے دوران دونوں رہنماؤں کے درمیان خوشگوار ماحول میں گفتگو ہوئی اور باہمی دلچسپی کے مختلف سیاسی معاملات پر خیالات کا اظہار کیا گیا۔ ذرائع کے مطابق پاکستان پیپلز پارٹی اور استحکام پاکستان پارٹی نے گلگت بلتستان میں آئندہ بھی سیاسی تعاون جاری رکھنے اور مشترکہ حکمت عملی کے تحت آگے بڑھنے پر اتفاق کیا۔اس موقع پر پاکستان پیپلز پارٹی کے سینئر رہنما اور رکن قومی اسمبلی راجہ پرویز اشرف بھی موجود تھے، جبکہ استحکام پاکستان پارٹی کی جانب سے عون چوہدری، گل اصغر بگھور اور منزہ حسن نے ملاقات میں شرکت کی۔سیاسی حلقوں میں اس ملاقات کو گلگت بلتستان کی آئندہ سیاسی صورتحال اور حکومت سازی کے تناظر میں اہم پیش رفت قرار دیا جا رہا ہے، جہاں دونوں جماعتوں کے درمیان تعاون کے امکانات مزید مضبوط ہونے کی توقع ہے۔

اسلام آباد: جمعیت علمائے اسلام (ف) کے سربراہ مولانا فضل الرحمٰن نے حکومت پر زور دیا ہے کہ آزاد کشمیر کی عوامی ایکشن کمیٹی کے ساتھ فوری مذاکرات کیے جائیں اور صورتحال کو افہام و تفہیم کے ذریعے حل کیا جائے۔

قومی اسمبلی کے اجلاس میں اظہار خیال کرتے ہوئے مولانا فضل الرحمٰن نے کہا کہ عوامی ایکشن کمیٹی نے ان سے رابطہ کیا ہے اور انہیں اپنا آئندہ لائحہ عمل دینا تھا، تاہم تاحال اس حوالے سے کوئی فیصلہ سامنے نہیں آیا۔ انہوں نے بتایا کہ عوامی ایکشن کمیٹی کا باضابطہ خط موصول ہوا تھا جسے حکومت کو بھجوا دیا گیا، لیکن اب تک اس کا کوئی جواب نہیں دیا گیا۔مولانا فضل الرحمٰن نے کہا کہ راولاکوٹ میں بڑی تعداد میں لوگ موجود ہیں، اس لیے ضروری ہے کہ حکومت مظاہرین کے مطالبات پر سنجیدگی سے غور کرے اور ان کے چارٹر آف ڈیمانڈ کا جائزہ لے۔ ان کا کہنا تھا کہ محض تقاریر کی بنیاد پر مظاہرین کے خلاف تشدد کا راستہ اختیار نہیں کیا جانا چاہیے۔

جے یو آئی (ف) کے سربراہ نے عوامی ایکشن کمیٹی کی جانب سے مظفرآباد کی طرف اعلان کردہ مارچ مؤخر کرنے کے فیصلے کا خیرمقدم کرتے ہوئے کہا کہ یہ مثبت پیش رفت ہے جس سے مذاکرات کے لیے سازگار ماحول پیدا ہو سکتا ہے۔انہوں نے وزیر دفاع خواجہ آصف کے حالیہ بیانات پر تنقید کرتے ہوئے کہا کہ ایسے بیانات ایک ذمہ دار وزیر کو زیب نہیں دیتے اور ان سے اشتعال میں اضافہ ہو سکتا ہے۔ مولانا فضل الرحمٰن نے کہا کہ ایک طرف مصالحت کی ذمہ داری نائب وزیراعظم اسحاق ڈار کو دی گئی ہے جبکہ دوسری طرف سخت بیانات دیے جا رہے ہیں، جو صورتحال کو مزید پیچیدہ بنا سکتے ہیں۔اپوزیشن کے حوالے سے بات کرتے ہوئے انہوں نے کہا کہ حکومت اپوزیشن کو دیوار سے لگانے کی کوشش نہ کرے۔ ان کا کہنا تھا کہ جے یو آئی (ف) نے چارسدہ میں لاکھوں افراد کا اجتماع منعقد کیا اور حکومتی جماعتیں بھی ایسے عوامی اجتماعات کر کے دکھائیں۔مولانا فضل الرحمٰن نے اس بات پر زور دیا کہ موجودہ حالات میں تحمل، برداشت اور سنجیدگی کی ضرورت ہے۔ انہوں نے کہا کہ اگر حکومت کا ردِعمل جذباتی ہوگا تو یہ اس کے منصب اور ذمہ داریوں کے شایانِ شان نہیں ہوگا۔

قومی اسمبلی اجلاس میں سپیکر ایاز صادق اور اپوزیشن لیڈر محمود اچکزئی پھر آمنے سامنے آ گئے

سپیکر قومی ایاز صادق نےاپوزیشن لیڈر کو آج بھی سخت جواب دیا ہے،ایاز صادق نے کہا کہ 98 میں پی ٹی آئی چھوڑ دی تھی،2001 کو ن لیگ جوائن کی تھی۔ اقتدار کی پارٹی کو جوائن نہیں کیا تھا اسے جوائن کیا جو مشکل میں تھی ،آپ نے مجھ پر بات کی اور کہا تم حوالدار ہو ، میں دو حوالداروں کو جانتا ہوں ،ایک بارڈر والے اور دوسرا چوروں ڈاکوں منشیات فروشوں کو پکڑتا ہے ،میں بھی ایک انسان ہوں، ہم ایک لائن ڈرا کر دیتے ہیں ،یہ عہدہ یا ایم این اے شپ تاحیات نہیں،نہیں معلوم کب تک سپیکر ہوں ،کسی کی دل آزاری کی بات نہیں کرتا،آپ کا جتنا وقت تھا اس سے دو گنا دیا ،67 اپوزیشن ارکان بولے،آپ لوگوں پر پینا ڈال والا افیکٹ ہوتا ہے،آپ لوگوں پر تین چار گھنٹے میں اثر اتر جاتا ہے ، باہر جا کر کہتے ہیں سپیکر بولنے نہیں دیتا۔

قومی اسمبلی اجلاس میں وزیر اعظم شہباز شریف اور مولانا فضل الرحمان میں دلچسپ نوک جھونک ہوئی، وزیراعظم شہباز شریف نے کہا کہ میں مولانا فضل الرحمان کا بہت احترام کرتا ہوں،میں مولانا فضل الرحمان کے پاس جاتا رہتا ہوں، جو میری ان کے ساتھ تخلیہ میں گفتگو ہوئی ہے وہ ہمیشہ میرے سینے میں راز کی طرح رہے گی، جس پر مولانا فضل الرحمان نے کہا کہ میری آج تک جو بھی گفتگو ہوئی ہے میں اجازت دیتا ہوں وزیر اعظم بتا دیں،وزیراعظم شہباز شریف نے کہا کہ میں مولانا فضل الرحمان کی اجازت کے باوجود نہیں یہ باتیں سامنے نہیں لاؤں گا،کیونکہ اگر میں نے یہ باتیں کر دیں تو بات بہت آگے تک چلی جائے گی .

مہاجرین کی سیٹوں کو ختم کرنے کا مطالبہ کیا گیا تھا، سیٹیں ختم کرنے کا فیصلہ آزاد کشمیر اسمبلی کر سکتی ہے،رانا ثناء اللہ
قومی اسمبلی اجلاس میں ن لیگی رکن رانا ثناء اللہ نے کہا کہ کشمیر پاکستان کی شہ رگ ہے۔مولانا فضل الرحمان نے ثالثی کی بات کی ہے جس کا ہم خیر مقدم کرتے ہیں،میں چند حقائق مولانا فضل الرحمان کے سامنے رکھنا چاہتا ہوں،جوائنٹ ایکشن کمیٹی نے 38 مطالبات پیش کیے تھے،وزیراعظم نے مذاکرات کے لیے کمیٹی قائم کی، ہم مظفر آباد جا کر ان سے مذاکرات کر چکے ہیں، بجلی کے ریٹ سے متعلق وزیراعظم نے فوری طور پر مطالبہ منظور کیا، گندم پر 2000 روپے سبسڈی دی جا رہی ہے، ہسپتالوں میں مختلف مشینوں کے حوالے سے مطالبات بھی منظور کیے گئے، مہاجرین کی سیٹوں کو ختم کرنے کا مطالبہ کیا گیا تھا، سیٹیں ختم کرنے کا فیصلہ آزاد کشمیر اسمبلی کر سکتی ہے،اس حوالے سے 6 رکنی کمیٹی بنائی گئی،جوائنٹ ایکشن کمیٹی نے اس کمیٹی کا بائیکاٹ کیا، 9 جون کے احتجاج کا اعلان انتخابات کو روکنے کے لیے تھا،

وفاقی وزیر دفاع خواجہ آصف کا کہنا ہے کہ آئیں ماضی کی غلطیاں درست کریں، ماضی سے سبق سیکھ کر 2 پارٹیوں نے میثاق جمہوریت کیا، پی ٹی آئی والے بھی اپنے ماضی پر نظر دوڑائیں۔

وزیر دفاع خواجہ آصف نے قومی اسمبلی میں اظہار خیال کرتے ہوئے کہا کہ ایوان کا تقدس یقینی بنانا سب کی ذمہ داری ہے، نوے کی دہائی کی سیاست سب کے سامنے ہے، آئیں ماضی کی غلطیاں درست کریں، میثاق جمہوریت کریں۔ان کا کہنا ہے کہ اسپیکر کی کرسی پر بیٹھ کر پارٹی کے حق میں فیصلے دئیے گئے، ماضی سے سبق سیکھ کر 2 پارٹیوں نے میثاق جمہوریت کیا، پی ٹی آئی والے بھی اپنے ماضی پر نظر دوڑائیں۔خواجہ آصف نے کہا کہ بانی پی ٹی آئی نے پارلیمانی نظام کو نقصان پہنچایا، پی ٹی آئی نے سیاست میں تہذیب ختم کردی، محمود اچکزئی پی ٹی آئی میں بیٹھے ہوئے عجیب لگتے ہیں، محمود اچکزئی کی کچھ روایات ہیں، پی ٹی آئی کی کوئی روایت نہیں،یہ ایوان گواہ ہے کہ انہوں نے اپوزیشن میں رہتے ہوئے کیا کچھ نہیں کیا،مراد سعید ان میزوں پر دوڑتے تھے،زیراعظم شہباز شریف اور وزیرخزانہ اپوزیشن کے پاس گئے وہاں کھڑے ہوکر ان سے بات کی، لیکن جب عمران خان وزیراعظم تھے تو ان کے رہنما ہم سے بات بھی نہیں کرتے تھے کہ کہیں عمران خان ناراض نہ ہوجائیں کہ یہ اپوزیشن سے بات کررہے ہیں۔ ہمارے پارلیمانی نظام اور سیاست کو جتنا عمران خان نے نقصان پہنچایا اتنا پچھلے 78 سال میں کسی شخص نے نہیں پہنچایا۔

خواجہ آصف کا مزید کہنا تھا کہ افغان سرزمین بھارت کے ہاتھوں پاکستان کے خلاف استعمال ہوتی آرہی ہے جو کہ پاکستان کے لیے ناقابل برداشت عمل ہے ۔

وفاقی دارالحکومت اسلام آباد کے ایچ نائن اتوار بازار میں لگنے والی ہولناک آگ نے سینکڑوں خاندانوں کی روزی روٹی چھین لی۔

سی ڈی اے کے زیرِ انتظام ملک کے سب سے بڑے ہفتہ وار بازار میں گزشتہ پانچ برس کے دوران یہ چوتھا بڑا آتشزدگی کا واقعہ ہے، جس نے حفاظتی انتظامات اور انتظامی کارکردگی پر سنگین سوالات کھڑے کر دیے ہیں۔ریسکیو حکام کے مطابق آگ گزشتہ رات تقریباً 9 بج کر 50 منٹ پر بھڑکی اور صرف چند منٹوں میں بڑے پیمانے پر پھیل گئی۔ ابتدائی تحقیقات میں آگ لگنے کی ممکنہ وجہ شارٹ سرکٹ قرار دی گئی ہے، جبکہ دکانوں میں موجود بیٹریوں کے پھٹنے سے شعلوں کی شدت میں مزید اضافہ ہوا۔

حکام کا کہنا ہے کہ آتشزدگی کے نتیجے میں 300 سے 335 کے درمیان دکانیں اور اسٹالز متاثر ہوئے، جبکہ تاجروں کو مجموعی طور پر کروڑوں روپے کا نقصان پہنچا۔ متاثرہ اسٹال ہولڈرز کا کہنا ہے کہ ان کی زندگی بھر کی جمع پونجی اور روزگار کا واحد ذریعہ چند گھنٹوں میں جل کر خاکستر ہوگیا۔ابتدائی رپورٹ کے مطابق آگ لگنے کے وقت ایک فائر بریگیڈ گاڑی موقع پر موجود تھی، تاہم بازار بند ہونے سے قبل اسے گیٹ کے باہر منتقل کر دیا گیا تھا اور بازار کو تالے لگا دیے گئے تھے۔ رپورٹ میں کہا گیا ہے کہ آگ کی شدت کے مقابلے میں ایک فائر بریگیڈ گاڑی ناکافی ثابت ہوئی، جس کے باعث شعلے تیزی سے پھیلتے چلے گئے۔تحقیقات میں یہ بھی سامنے آیا ہے کہ متعدد اسٹالز کو کپڑے، ترپالوں اور ٹینٹوں سے ڈھانپا گیا تھا، جس کی وجہ سے آگ ایک اسٹال سے دوسرے اسٹال تک منتقل ہوتی رہی۔ مزید برآں، اسٹال ہولڈرز کی جانب سے فائر سیفٹی کے معیاری ضوابط (ایس او پیز) کی خلاف ورزی بھی رپورٹ کا حصہ بنی ہے۔ریسکیو ذرائع کے مطابق اتوار بازار میں فائر ہائیڈرنٹ یا ہنگامی پانی کے ذخیرے کی عدم موجودگی کے باعث امدادی ٹیموں کو آگ بجھانے میں شدید مشکلات کا سامنا کرنا پڑا۔ کئی گھنٹوں کی مسلسل کوششوں کے بعد آگ پر قابو پا لیا گیا، تاہم کولنگ کا عمل جاری ہے۔

دریں اثنا، اسلام آباد انتظامیہ نے واقعے کی وجوہات، ممکنہ غفلت اور نقصانات کا تعین کرنے کے لیے انکوائری کمیٹی تشکیل دے دی ہے۔ کمیٹی اپنی رپورٹ مرتب کرکے ذمہ داروں کے تعین اور آئندہ ایسے واقعات کی روک تھام کے لیے سفارشات پیش کرے گی۔متاثرہ تاجروں نے حکومت اور سی ڈی اے سے فوری مالی امداد اور متبادل کاروباری سہولیات فراہم کرنے کا مطالبہ کرتے ہوئے کہا ہے کہ بار بار پیش آنے والے آتشزدگی کے واقعات کے باوجود مؤثر حفاظتی اقدامات نہ کرنا انتظامیہ کی سنگین ناکامی ہے۔