Author: ممتاز حیدر

اسلام آباد: وزیر مملکت برائے داخلہ طلال چوہدری اور سیکرٹری داخلہ کی زیر صدارت محرم الحرام کے سکیورٹی انتظامات کے حوالے سے ایک اہم جائزہ اجلاس منعقد ہوا، جس میں تمام صوبوں، آزاد کشمیر اور گلگت بلتستان کے ہوم سیکرٹریز اور پولیس حکام نے شرکت کی۔

اجلاس کے دوران محرم الحرام کے جلوسوں اور مجالس کے لیے تیار کیے گئے سکیورٹی پلان پر تفصیلی بریفنگ دی گئی جبکہ مجموعی انتظامات کا جامع جائزہ بھی لیا گیا۔ شرکاء نے امن و امان کی صورتحال، سکیورٹی چیلنجز اور ان سے نمٹنے کے لیے کیے گئے اقدامات پر تبادلہ خیال کیا۔وزیر مملکت برائے داخلہ طلال چوہدری نے اجلاس سے خطاب کرتے ہوئے کہا کہ محرم الحرام کے دوران شہریوں کے جان و مال کا تحفظ حکومت کی اولین ذمہ داری ہے۔ انہوں نے ہدایت کی کہ جلوسوں اور مجالس کی سکیورٹی کو مزید مؤثر اور فول پروف بنانے کے لیے تمام دستیاب وسائل بروئے کار لائے جائیں۔طلال چوہدری نے ہوم سیکرٹریز اور قانون نافذ کرنے والے اداروں کے حکام کو سکیورٹی اقدامات مزید مضبوط بنانے کی ہدایت کرتے ہوئے کہا کہ محرم الحرام کے دوران امن و امان کے قیام کو ہر صورت یقینی بنایا جائے۔

اجلاس میں وفاقی حکومت کی جانب سے صوبوں کو ہر ممکن تعاون کی یقین دہانی بھی کرائی گئی۔ وزیر مملکت نے صوبائی حکام کو ہدایت کی کہ سکیورٹی انتظامات کے حوالے سے درکار معاونت اور ضروریات سے وفاقی حکومت کو بروقت آگاہ کیا جائے تاکہ فوری اقدامات کو یقینی بنایا جا سکے۔اجلاس کے اختتام پر اس عزم کا اعادہ کیا گیا کہ محرم الحرام کے دوران ملک بھر میں امن و امان برقرار رکھنے اور عزاداروں کو محفوظ ماحول فراہم کرنے کے لیے تمام ادارے باہمی تعاون اور مکمل ہم آہنگی کے ساتھ فرائض انجام دیں گے۔

انسدادِ دہشت گردی عدالت راولپنڈی نے 26 نومبر کے احتجاج سے متعلق درج مقدمے میں علیمہ خان کی جانب سے وفاقی و صوبائی وزرا سمیت 21 افراد کو بطور عدالتی گواہ طلب کرنے کی درخواست مسترد کر دی۔

اے ٹی سی راولپنڈی کے جج امجد علی شاہ نے درخواست پر محفوظ کیا گیا فیصلہ سناتے ہوئے دو وفاقی وزرا اور ایک صوبائی وزیر کو عدالتی گواہ کے طور پر طلب کرنے کی استدعا خارج کر دی۔عدالتی فیصلے کے مطابق مقدمے کے ٹرائل کے دوران استغاثہ کے 19 گواہان پر تفصیلی اور طویل جرح کی جا چکی ہے، لہٰذا عدالتی گواہان کو طلب کر کے اسی نوعیت کی کارروائی دوبارہ نہیں دہرائی جا سکتی۔

علیمہ خان نے عدالت میں درخواست دائر کرتے ہوئے مؤقف اختیار کیا تھا کہ مقدمے کے حقائق واضح کرنے کے لیے دو وفاقی وزرا، ایک صوبائی وزیر اور دیگر افراد سمیت مجموعی طور پر 21 گواہان کو طلب کیا جائے۔سماعت کے دوران اسپیشل پراسیکیوٹر نے عدالتی گواہان کو طلب کرنے کی درخواست کی مخالفت میں دلائل دیے، جبکہ علیمہ خان کے وکیل فیصل ملک نے گزشتہ ہفتے درخواست کے حق میں اپنے دلائل مکمل کیے تھے۔دالت کے فیصلے کے بعد مقدمے کی مزید کارروائی معمول کے مطابق جاری رہے گی۔

ایم کیو ایم کے رہنما رہنما فاروق ستار نے کہا ہےکہ اگر کراچی کی طرف توجہ نہ دی گئی تو کراچی ایکشن کمیٹی بھی بنے گی۔

قومی اسمبلی کے اجلاس میں اظہار خیال کرتے ہوئے فاروق ستار نے کہا کہ کوئی 100 فیصد درست نہیں، ہم 100 فیصد اپوزیشن کو غلط کہہ سکتے ہیں نہ 100فیصد خود کو درست، دونوں جانب سے غلطیاں ہوئی ہیں،انہوں نے کہا کہ اگر آئین پر عمل نہیں ہو رہا تو اپنے گریباں میں جھانکیں، آرٹیکل 7، 32 اور آرٹیکل 40 اے پرکوئی بات نہیں کرتا،ہمیں ایک قومی مصالحت اور قومی مفاہمت کی ضرورت ہے،آج آپ مسائل کو ایڈریس کریں ورنہ پھرکراچی سمیت دیگر شہروں سے انہیں وفاق کے زیرانتظام ہونے کا مطالبہ آئےگا، اگر آپ نے اس طرف توجہ نہ دی تو کراچی ایکشن کمیٹی بھی بنے گی

ایم کیو ایم کے سربراہ ڈاکٹر خالد مقبول صدیقی سے تحریک کے مرکزی رہنما زاہد ملک کی پارلیمنٹ ہاؤس میں ملاقات ہوئی ہے،سینیئر رہنما ڈاکٹر فاروق ستار اور سید امین الحق بھی ملاقات کے موقع پر موجود تھے ،خالد مقبول صدیقی کا کہنا تھا کہ انتظامی بنیادوں پر نئے صوبوں کا قیام پاکستان کی معاشی ترقی اور عوام کو مسائل سے نجات دلانے کا اہم قدم بن سکتا ہےآئین میں آرٹیکل 140 اے کی ترمیم کی جدوجہد جاری رکھیں گے، ڈاکٹر خالد مقبول صدیقی نے پنجاب اور آزاد کشمیر میں تنظیم سازی سے متعلق کاوشوں پر زاہد ملک کے جذبے اور کام کو سراہا ،زاہد ملک کا کہنا تھا کہ تحریک کو متحد رکھنے میں ڈاکٹر خالد مقبول صدیقی نے تاریخی کردار ادا کیا،زاہد ملک نے ڈاکٹر خالد مقبول صدیقی کو پنجاب میں تنظیم سازی سے متعلق امور پر بریف کیا ،زاہد ملک نے ڈاکٹر خالد مقبول صدیقی کو آزاد جموں و کشمیر میں انتخابات سے متعلق تیاری اور تنظیمی سرگرمیوں سے متعلق بھی رپورٹ پیش کی

چیئرمین پاکستان پیپلز پارٹی بلاول زرداری اور صدر استحکام پاکستان پارٹی عبدالعلیم خان کے درمیان پارلیمنٹ ہاؤس میں اہم ملاقات ہوئی، جس میں گلگت بلتستان میں حکومت سازی سمیت باہمی سیاسی تعاون اور دیگر اہم امور پر تبادلہ خیال کیا گیا۔

ملاقات کے دوران دونوں رہنماؤں کے درمیان خوشگوار ماحول میں گفتگو ہوئی اور باہمی دلچسپی کے مختلف سیاسی معاملات پر خیالات کا اظہار کیا گیا۔ ذرائع کے مطابق پاکستان پیپلز پارٹی اور استحکام پاکستان پارٹی نے گلگت بلتستان میں آئندہ بھی سیاسی تعاون جاری رکھنے اور مشترکہ حکمت عملی کے تحت آگے بڑھنے پر اتفاق کیا۔اس موقع پر پاکستان پیپلز پارٹی کے سینئر رہنما اور رکن قومی اسمبلی راجہ پرویز اشرف بھی موجود تھے، جبکہ استحکام پاکستان پارٹی کی جانب سے عون چوہدری، گل اصغر بگھور اور منزہ حسن نے ملاقات میں شرکت کی۔سیاسی حلقوں میں اس ملاقات کو گلگت بلتستان کی آئندہ سیاسی صورتحال اور حکومت سازی کے تناظر میں اہم پیش رفت قرار دیا جا رہا ہے، جہاں دونوں جماعتوں کے درمیان تعاون کے امکانات مزید مضبوط ہونے کی توقع ہے۔